| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பகிண்ணகவண்ணனா
Pakiṇṇakavaṇṇanā
அபிசெத்த² இத³ங் பகிண்ணகங், ஸெய்யதி²த³ங் – இத³ங் அனியதகண்ட³ங் நிப்பயோஜனங் அபுப்³பா³பா⁴வதோதி சே? ந, க³ருகலஹுகபே⁴த³பி⁴ன்னாபத்திரோபனாரோபனக்கமலக்க²ணதீ³பனப்பயோஜனதோ. எத்த² ஹி ‘‘ஸா சே ஏவங் வதெ³ய்ய ‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னங் த⁴ம்மங் படிஸேவந்தோ’தி, ஸோ ச தங் படிஜானாதி, ஆபத்தியா காரேதப்³போ³…பே॰… நிஸஜ்ஜாய காரேதப்³போ³’’திஆதி³னா (பாரா॰ 446) ஆபத்தியா க³ருகாய லஹுகாய ச ரோபனக்கமலக்க²ணங், காரேதப்³போ³தி இமினா அனாரோபனக்கமலக்க²ணஞ்ச த³ஸ்ஸிதங். லக்க²ணதீ³பனதோ ஆதி³ம்ஹி, அந்தே வா உத்³தி³ஸிதப்³ப³ந்தி சே? ந, அஸம்ப⁴வதோ. கத²ங்? ந தாவ ஆதி³ம்ஹி ஸம்ப⁴வதி, யேஸமித³ங் லக்க²ணங், தேஸங் ஸிக்கா²பதா³னங் அத³ஸ்ஸிதத்தா. ந அந்தே, க³ருகமிஸ்ஸகத்தா, தஸ்மா க³ருகலஹுகானங் மஜ்ஜே² ஏவ உத்³தி³ஸிதப்³ப³ந்தி அரஹதி உப⁴யாமிஸ்ஸகத்தா. யா தத்த² லஹுகாபத்தி த³ஸ்ஸிதா , ஸாபி க³ருகாதி³கா. தேனேவாஹ ‘‘மேது²னத⁴ம்மஸன்னிஸ்ஸிதகிலேஸஸங்கா²தேன ரஹஸ்ஸாதே³னா’’திஆதி³, தஸ்மா க³ருகானங் ஏவ அனந்தரங் உத்³தி³ட்டா²திபி ஏகே. ஏவங் ஸந்தே பட²மமேவாலங் தாவதா லக்க²ணதீ³பனஸித்³தி⁴தோ, கிங் து³தியேனாதி சே? ந, ஓகாஸனியமபச்சயமிச்சா²கா³ஹனிவாரணப்பயோஜனதோ. ‘‘படிச்ச²ன்னே ஆஸனே அலங்கம்மனியே’’தி ஓகாஸனியமதோ ஹி தப்³பி³பரீதே ஓகாஸே இத³ங் லக்க²ணங் ந விகப்பிதந்தி மிச்சா²கா³ஹோ ஹோதி, தன்னிவாரணதோ து³தியம்பி ஸாத்த²கமேவாதி அதி⁴ப்பாயோ. கஸ்மா? ஓகாஸபே⁴த³தோ, ரஹோபே⁴த³தீ³பனதோ, ரஹோனிஸஜ்ஜஸ்ஸாத³பே⁴த³தீ³பனதோ . ஓகாஸனியமபா⁴வே ச ரஹோனிஸஜ்ஜஸ்ஸாத³பே⁴தோ³ ஜாதோ. த்³வின்னங் ரஹோனிஸஜ்ஜஸிக்கா²பதா³னங் நானதாஜானநஞ்ச ஸியா, ததா² காயஸங்ஸக்³க³பே⁴த³தீ³பனதோ. நாலங்கம்மனியேபி ஹி ஓகாஸே அப்படிச்ச²ன்னே, படிச்ச²ன்னேபி வா நிஸின்னாய வாதபானகவாடசி²த்³தா³தீ³ஹி நிக்க²ந்தகேஸாதி³க்³க³ஹணேன காயஸங்ஸக்³கோ³ லப்³ப⁴தீதி ஏவமாத³யோபி நயா வித்தா²ரதோ வேதி³தப்³பா³. ‘‘பி⁴க்கு²பாதிமொக்கே² ஆக³தனயத்தா பி⁴க்கு²னீபாதிமொக்கே² இத³ங் கண்ட³ங் பரிஹீனந்தி வேதி³தப்³ப³’’ந்தி வத³ந்தி. அத்து²ப்பத்தியா தத்த² அனுபன்னத்தாதி ஏகே. தங் அனேகத்த²பா⁴வதீ³பனதோ அயுத்தங். ஸப்³ப³பு³த்³த⁴காலே ஹி பி⁴க்கூ²னங் பஞ்சன்னங், பி⁴க்கு²னீனங் சத்தாரோ ச உத்³தே³ஸா ஸந்தி. பாதிமொக்கு²த்³தே³ஸபஞ்ஞத்தியா அஸாதா⁴ரணத்தா தத்த² நித்³தி³ட்ட²ஸங்கா⁴தி³ஸேஸபாசித்தியானந்தி ஏகே. தாஸங் பி⁴க்கு²னீனங் உப்³ப⁴ஜாணுமண்ட³லிகஅட்ட²வத்து²கவஸேன காயஸங்ஸக்³க³விஸேஸோ பாராஜிகவத்து², ‘‘ஹத்த²க்³க³ஹணங் வா ஸாதி³யெய்ய, காயங் வா தத³த்தா²ய உபஸங்ஹரெய்யா’’தி (பாசி॰ 674-675) வசனதோ ஸாதி³யனம்பி, ‘‘ஸந்திட்டெ²ய்ய வா’’தி (பாசி॰ 675) வசனதோ டா²னம்பி, ‘‘ஸங்கேதங் வா க³ச்செ²ய்யா’’தி (பாசி॰ 675) வசனதோ க³மனம்பி, ‘‘ச²ன்னங் வா அனுபவிஸெய்யா’’தி (பாசி॰ 675) வசனதோ படிச்ச²ன்னட்டா²னபவேஸோபி, ததா² ‘‘ரத்தந்த⁴காரே அப்பதீ³பே படிச்ச²ன்னே ஓகாஸே ஏகேனேகா ஸந்திட்டெ²ய்ய வா ஸல்லபெய்ய வா’’தி (பாசி॰ 838) வசனதோ து³ட்டு²ல்லவாசாபி பாசித்தியவத்து²கந்தி கத்வா தாஸங் அஞ்ஞதா² அனியதகண்ட³ஸ்ஸ அவத்தப்³ப³தாபத்திதோபி ந வுத்தந்தி தேஸங் அதி⁴ப்பாயோ.
Apicettha idaṃ pakiṇṇakaṃ, seyyathidaṃ – idaṃ aniyatakaṇḍaṃ nippayojanaṃ apubbābhāvatoti ce? Na, garukalahukabhedabhinnāpattiropanāropanakkamalakkhaṇadīpanappayojanato. Ettha hi ‘‘sā ce evaṃ vadeyya ‘ayyo mayā diṭṭho nisinno mātugāmassa methunaṃ dhammaṃ paṭisevanto’ti, so ca taṃ paṭijānāti, āpattiyā kāretabbo…pe… nisajjāya kāretabbo’’tiādinā (pārā. 446) āpattiyā garukāya lahukāya ca ropanakkamalakkhaṇaṃ, kāretabboti iminā anāropanakkamalakkhaṇañca dassitaṃ. Lakkhaṇadīpanato ādimhi, ante vā uddisitabbanti ce? Na, asambhavato. Kathaṃ? Na tāva ādimhi sambhavati, yesamidaṃ lakkhaṇaṃ, tesaṃ sikkhāpadānaṃ adassitattā. Na ante, garukamissakattā, tasmā garukalahukānaṃ majjhe eva uddisitabbanti arahati ubhayāmissakattā. Yā tattha lahukāpatti dassitā , sāpi garukādikā. Tenevāha ‘‘methunadhammasannissitakilesasaṅkhātena rahassādenā’’tiādi, tasmā garukānaṃ eva anantaraṃ uddiṭṭhātipi eke. Evaṃ sante paṭhamamevālaṃ tāvatā lakkhaṇadīpanasiddhito, kiṃ dutiyenāti ce? Na, okāsaniyamapaccayamicchāgāhanivāraṇappayojanato. ‘‘Paṭicchanne āsane alaṃkammaniye’’ti okāsaniyamato hi tabbiparīte okāse idaṃ lakkhaṇaṃ na vikappitanti micchāgāho hoti, tannivāraṇato dutiyampi sātthakamevāti adhippāyo. Kasmā? Okāsabhedato, rahobhedadīpanato, rahonisajjassādabhedadīpanato . Okāsaniyamabhāve ca rahonisajjassādabhedo jāto. Dvinnaṃ rahonisajjasikkhāpadānaṃ nānatājānanañca siyā, tathā kāyasaṃsaggabhedadīpanato. Nālaṃkammaniyepi hi okāse appaṭicchanne, paṭicchannepi vā nisinnāya vātapānakavāṭachiddādīhi nikkhantakesādiggahaṇena kāyasaṃsaggo labbhatīti evamādayopi nayā vitthārato veditabbā. ‘‘Bhikkhupātimokkhe āgatanayattā bhikkhunīpātimokkhe idaṃ kaṇḍaṃ parihīnanti veditabba’’nti vadanti. Atthuppattiyā tattha anupannattāti eke. Taṃ anekatthabhāvadīpanato ayuttaṃ. Sabbabuddhakāle hi bhikkhūnaṃ pañcannaṃ, bhikkhunīnaṃ cattāro ca uddesā santi. Pātimokkhuddesapaññattiyā asādhāraṇattā tattha niddiṭṭhasaṅghādisesapācittiyānanti eke. Tāsaṃ bhikkhunīnaṃ ubbhajāṇumaṇḍalikaaṭṭhavatthukavasena kāyasaṃsaggaviseso pārājikavatthu, ‘‘hatthaggahaṇaṃ vā sādiyeyya, kāyaṃ vā tadatthāya upasaṃhareyyā’’ti (pāci. 674-675) vacanato sādiyanampi, ‘‘santiṭṭheyya vā’’ti (pāci. 675) vacanato ṭhānampi, ‘‘saṅketaṃ vā gaccheyyā’’ti (pāci. 675) vacanato gamanampi, ‘‘channaṃ vā anupaviseyyā’’ti (pāci. 675) vacanato paṭicchannaṭṭhānapavesopi, tathā ‘‘rattandhakāre appadīpe paṭicchanne okāse ekenekā santiṭṭheyya vā sallapeyya vā’’ti (pāci. 838) vacanato duṭṭhullavācāpi pācittiyavatthukanti katvā tāsaṃ aññathā aniyatakaṇḍassa avattabbatāpattitopi na vuttanti tesaṃ adhippāyo.
பகிண்ணகவண்ணனா நிட்டி²தா.
Pakiṇṇakavaṇṇanā niṭṭhitā.
அனியதகண்ட³ங் நிட்டி²தங்.
Aniyatakaṇḍaṃ niṭṭhitaṃ.
