| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
পকিণ্ণকৰণ্ণনা
Pakiṇṇakavaṇṇanā
অপিচেত্থ ইদং পকিণ্ণকং, সেয্যথিদং – ইদং অনিযতকণ্ডং নিপ্পযোজনং অপুব্বাভাৰতোতি চে? ন, গরুকলহুকভেদভিন্নাপত্তিরোপনারোপনক্কমলক্খণদীপনপ্পযোজনতো। এত্থ হি ‘‘সা চে এৰং ৰদেয্য ‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’তি, সো চ তং পটিজানাতি, আপত্তিযা কারেতব্বো…পে॰… নিসজ্জায কারেতব্বো’’তিআদিনা (পারা॰ ৪৪৬) আপত্তিযা গরুকায লহুকায চ রোপনক্কমলক্খণং, কারেতব্বোতি ইমিনা অনারোপনক্কমলক্খণঞ্চ দস্সিতং। লক্খণদীপনতো আদিম্হি, অন্তে ৰা উদ্দিসিতব্বন্তি চে? ন, অসম্ভৰতো। কথং? ন তাৰ আদিম্হি সম্ভৰতি, যেসমিদং লক্খণং, তেসং সিক্খাপদানং অদস্সিতত্তা। ন অন্তে, গরুকমিস্সকত্তা, তস্মা গরুকলহুকানং মজ্ঝে এৰ উদ্দিসিতব্বন্তি অরহতি উভযামিস্সকত্তা। যা তত্থ লহুকাপত্তি দস্সিতা , সাপি গরুকাদিকা। তেনেৰাহ ‘‘মেথুনধম্মসন্নিস্সিতকিলেসসঙ্খাতেন রহস্সাদেনা’’তিআদি, তস্মা গরুকানং এৰ অনন্তরং উদ্দিট্ঠাতিপি একে। এৰং সন্তে পঠমমেৰালং তাৰতা লক্খণদীপনসিদ্ধিতো, কিং দুতিযেনাতি চে? ন, ওকাসনিযমপচ্চযমিচ্ছাগাহনিৰারণপ্পযোজনতো। ‘‘পটিচ্ছন্নে আসনে অলংকম্মনিযে’’তি ওকাসনিযমতো হি তব্বিপরীতে ওকাসে ইদং লক্খণং ন ৰিকপ্পিতন্তি মিচ্ছাগাহো হোতি, তন্নিৰারণতো দুতিযম্পি সাত্থকমেৰাতি অধিপ্পাযো। কস্মা? ওকাসভেদতো, রহোভেদদীপনতো, রহোনিসজ্জস্সাদভেদদীপনতো । ওকাসনিযমভাৰে চ রহোনিসজ্জস্সাদভেদো জাতো। দ্ৰিন্নং রহোনিসজ্জসিক্খাপদানং নানতাজাননঞ্চ সিযা, তথা কাযসংসগ্গভেদদীপনতো। নালংকম্মনিযেপি হি ওকাসে অপ্পটিচ্ছন্নে, পটিচ্ছন্নেপি ৰা নিসিন্নায ৰাতপানকৰাটছিদ্দাদীহি নিক্খন্তকেসাদিগ্গহণেন কাযসংসগ্গো লব্ভতীতি এৰমাদযোপি নযা ৰিত্থারতো ৰেদিতব্বা। ‘‘ভিক্খুপাতিমোক্খে আগতনযত্তা ভিক্খুনীপাতিমোক্খে ইদং কণ্ডং পরিহীনন্তি ৰেদিতব্ব’’ন্তি ৰদন্তি। অত্থুপ্পত্তিযা তত্থ অনুপন্নত্তাতি একে। তং অনেকত্থভাৰদীপনতো অযুত্তং। সব্ববুদ্ধকালে হি ভিক্খূনং পঞ্চন্নং, ভিক্খুনীনং চত্তারো চ উদ্দেসা সন্তি। পাতিমোক্খুদ্দেসপঞ্ঞত্তিযা অসাধারণত্তা তত্থ নিদ্দিট্ঠসঙ্ঘাদিসেসপাচিত্তিযানন্তি একে। তাসং ভিক্খুনীনং উব্ভজাণুমণ্ডলিকঅট্ঠৰত্থুকৰসেন কাযসংসগ্গৰিসেসো পারাজিকৰত্থু, ‘‘হত্থগ্গহণং ৰা সাদিযেয্য, কাযং ৰা তদত্থায উপসংহরেয্যা’’তি (পাচি॰ ৬৭৪-৬৭৫) ৰচনতো সাদিযনম্পি, ‘‘সন্তিট্ঠেয্য ৰা’’তি (পাচি॰ ৬৭৫) ৰচনতো ঠানম্পি, ‘‘সঙ্কেতং ৰা গচ্ছেয্যা’’তি (পাচি॰ ৬৭৫) ৰচনতো গমনম্পি, ‘‘ছন্নং ৰা অনুপৰিসেয্যা’’তি (পাচি॰ ৬৭৫) ৰচনতো পটিচ্ছন্নট্ঠানপৰেসোপি, তথা ‘‘রত্তন্ধকারে অপ্পদীপে পটিচ্ছন্নে ওকাসে একেনেকা সন্তিট্ঠেয্য ৰা সল্লপেয্য ৰা’’তি (পাচি॰ ৮৩৮) ৰচনতো দুট্ঠুল্লৰাচাপি পাচিত্তিযৰত্থুকন্তি কত্ৰা তাসং অঞ্ঞথা অনিযতকণ্ডস্স অৰত্তব্বতাপত্তিতোপি ন ৰুত্তন্তি তেসং অধিপ্পাযো।
Apicettha idaṃ pakiṇṇakaṃ, seyyathidaṃ – idaṃ aniyatakaṇḍaṃ nippayojanaṃ apubbābhāvatoti ce? Na, garukalahukabhedabhinnāpattiropanāropanakkamalakkhaṇadīpanappayojanato. Ettha hi ‘‘sā ce evaṃ vadeyya ‘ayyo mayā diṭṭho nisinno mātugāmassa methunaṃ dhammaṃ paṭisevanto’ti, so ca taṃ paṭijānāti, āpattiyā kāretabbo…pe… nisajjāya kāretabbo’’tiādinā (pārā. 446) āpattiyā garukāya lahukāya ca ropanakkamalakkhaṇaṃ, kāretabboti iminā anāropanakkamalakkhaṇañca dassitaṃ. Lakkhaṇadīpanato ādimhi, ante vā uddisitabbanti ce? Na, asambhavato. Kathaṃ? Na tāva ādimhi sambhavati, yesamidaṃ lakkhaṇaṃ, tesaṃ sikkhāpadānaṃ adassitattā. Na ante, garukamissakattā, tasmā garukalahukānaṃ majjhe eva uddisitabbanti arahati ubhayāmissakattā. Yā tattha lahukāpatti dassitā , sāpi garukādikā. Tenevāha ‘‘methunadhammasannissitakilesasaṅkhātena rahassādenā’’tiādi, tasmā garukānaṃ eva anantaraṃ uddiṭṭhātipi eke. Evaṃ sante paṭhamamevālaṃ tāvatā lakkhaṇadīpanasiddhito, kiṃ dutiyenāti ce? Na, okāsaniyamapaccayamicchāgāhanivāraṇappayojanato. ‘‘Paṭicchanne āsane alaṃkammaniye’’ti okāsaniyamato hi tabbiparīte okāse idaṃ lakkhaṇaṃ na vikappitanti micchāgāho hoti, tannivāraṇato dutiyampi sātthakamevāti adhippāyo. Kasmā? Okāsabhedato, rahobhedadīpanato, rahonisajjassādabhedadīpanato . Okāsaniyamabhāve ca rahonisajjassādabhedo jāto. Dvinnaṃ rahonisajjasikkhāpadānaṃ nānatājānanañca siyā, tathā kāyasaṃsaggabhedadīpanato. Nālaṃkammaniyepi hi okāse appaṭicchanne, paṭicchannepi vā nisinnāya vātapānakavāṭachiddādīhi nikkhantakesādiggahaṇena kāyasaṃsaggo labbhatīti evamādayopi nayā vitthārato veditabbā. ‘‘Bhikkhupātimokkhe āgatanayattā bhikkhunīpātimokkhe idaṃ kaṇḍaṃ parihīnanti veditabba’’nti vadanti. Atthuppattiyā tattha anupannattāti eke. Taṃ anekatthabhāvadīpanato ayuttaṃ. Sabbabuddhakāle hi bhikkhūnaṃ pañcannaṃ, bhikkhunīnaṃ cattāro ca uddesā santi. Pātimokkhuddesapaññattiyā asādhāraṇattā tattha niddiṭṭhasaṅghādisesapācittiyānanti eke. Tāsaṃ bhikkhunīnaṃ ubbhajāṇumaṇḍalikaaṭṭhavatthukavasena kāyasaṃsaggaviseso pārājikavatthu, ‘‘hatthaggahaṇaṃ vā sādiyeyya, kāyaṃ vā tadatthāya upasaṃhareyyā’’ti (pāci. 674-675) vacanato sādiyanampi, ‘‘santiṭṭheyya vā’’ti (pāci. 675) vacanato ṭhānampi, ‘‘saṅketaṃ vā gaccheyyā’’ti (pāci. 675) vacanato gamanampi, ‘‘channaṃ vā anupaviseyyā’’ti (pāci. 675) vacanato paṭicchannaṭṭhānapavesopi, tathā ‘‘rattandhakāre appadīpe paṭicchanne okāse ekenekā santiṭṭheyya vā sallapeyya vā’’ti (pāci. 838) vacanato duṭṭhullavācāpi pācittiyavatthukanti katvā tāsaṃ aññathā aniyatakaṇḍassa avattabbatāpattitopi na vuttanti tesaṃ adhippāyo.
পকিণ্ণকৰণ্ণনা নিট্ঠিতা।
Pakiṇṇakavaṇṇanā niṭṭhitā.
অনিযতকণ্ডং নিট্ঠিতং।
Aniyatakaṇḍaṃ niṭṭhitaṃ.
