| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
பகிண்ணகவினிச்ச²யகதா²வண்ணனா
Pakiṇṇakavinicchayakathāvaṇṇanā
3029. ச²த்தங் பண்ணமயங் கிஞ்சீதி தாலபண்ணாதி³பண்ணச்ச²த³னங் யங் கிஞ்சி ச²த்தங். ப³ஹீதி உபரி. அந்தோதி ஹெட்டா². ஸிப்³பி³துந்தி ரூபங் த³ஸ்ஸெத்வா ஸூசிகம்மங் காதுங்.
3029.Chattaṃpaṇṇamayaṃ kiñcīti tālapaṇṇādipaṇṇacchadanaṃ yaṃ kiñci chattaṃ. Bahīti upari. Antoti heṭṭhā. Sibbitunti rūpaṃ dassetvā sūcikammaṃ kātuṃ.
3030. பண்ணேதி ச²த³னபண்ணே. அட்³ட⁴சந்த³ந்தி அட்³ட⁴சந்தா³காரங். மகரத³ந்தகந்தி மகரத³ந்தாகாரங், யங் ‘‘கி³ரிகூட’’ந்தி வுச்சதி. சி²ந்தி³துங் ந வட்டதீதி ஸம்ப³ந்தோ⁴. முக²வட்டியா நாமெத்வா ப³த்³த⁴பண்ணகோடியா வா மத்த²கிமண்ட³லகோடியா வா கி³ரிகூடாதி³ங் கரொந்தி, இமினா தங் படிக்கி²த்தங். த³ண்டே³தி ச²த்தத³ண்டே³. க⁴டகந்தி க⁴டாகாரோ. வாளரூபங் வாதி ப்³யக்³கா⁴தி³வாளானங் ரூபகங் வா. லேகா²தி உக்கிரித்வா வா சி²ந்தி³த்வா வா சித்தகம்மவஸேன வா கதராஜி.
3030.Paṇṇeti chadanapaṇṇe. Aḍḍhacandanti aḍḍhacandākāraṃ. Makaradantakanti makaradantākāraṃ, yaṃ ‘‘girikūṭa’’nti vuccati. Chindituṃ na vaṭṭatīti sambandho. Mukhavaṭṭiyā nāmetvā baddhapaṇṇakoṭiyā vā matthakimaṇḍalakoṭiyā vā girikūṭādiṃ karonti, iminā taṃ paṭikkhittaṃ. Daṇḍeti chattadaṇḍe. Ghaṭakanti ghaṭākāro. Vāḷarūpaṃ vāti byagghādivāḷānaṃ rūpakaṃ vā. Lekhāti ukkiritvā vā chinditvā vā cittakammavasena vā katarāji.
3031. பஞ்சவண்ணானங் ஸுத்தானங் அந்தரே நீலாதி³ஏகவண்ணேன ஸுத்தேன தி²ரத்த²ங் ச²த்தங் அந்தோ ச ப³ஹி ச ஸிப்³பி³துங் வா ச²த்தத³ண்ட³க்³கா³ஹகஸலாகபஞ்ஜரங் தி²ரத்த²ங் வினந்தி⁴துங் வா வட்டதீதி யோஜனா. ‘‘பஞ்சவண்ணானங் ஏகவண்ணேன தி²ரத்த²’’ந்தி இமினா அனேகவண்ணேஹி ஸுத்தேஹி வண்ணமட்ட²த்தா²ய ஸிப்³பி³துஞ்ச வினந்தி⁴துஞ்ச ந வட்டதீதி தீ³பேதி.
3031.Pañcavaṇṇānaṃ suttānaṃ antare nīlādiekavaṇṇena suttena thiratthaṃ chattaṃ anto ca bahi ca sibbituṃ vā chattadaṇḍaggāhakasalākapañjaraṃ thiratthaṃ vinandhituṃ vā vaṭṭatīti yojanā. ‘‘Pañcavaṇṇānaṃ ekavaṇṇena thirattha’’nti iminā anekavaṇṇehi suttehi vaṇṇamaṭṭhatthāya sibbituñca vinandhituñca na vaṭṭatīti dīpeti.
பொத்த²கேஸு பன ‘‘பஞ்சவண்ணேனா’’தி பாடோ² தி³ஸ்ஸதி, தஸ்ஸ ஏகவண்ணேன, பஞ்சவண்ணேன வா ஸுத்தேன தி²ரத்த²ங் ஸிப்³பி³துங், வினந்தி⁴துங் வா வட்டதீதி யோஜனா காதப்³பா³ ஹோதி, ஸோ எத்தே²வ ஹெட்டா² வுத்தேன –
Potthakesu pana ‘‘pañcavaṇṇenā’’ti pāṭho dissati, tassa ekavaṇṇena, pañcavaṇṇena vā suttena thiratthaṃ sibbituṃ, vinandhituṃ vā vaṭṭatīti yojanā kātabbā hoti, so ettheva heṭṭhā vuttena –
‘‘பஞ்சவண்ணேன ஸுத்தேன, ஸிப்³பி³துங் ந ச வட்டதீ’’தி –
‘‘Pañcavaṇṇena suttena, sibbituṃ na ca vaṭṭatī’’ti –
பாடே²ன ச ‘‘கேசி தாலபண்ணச்ச²த்தங் அந்தோ வா ப³ஹி வா பஞ்சவண்ணேன ஸுத்தேன ஸிப்³ப³ந்தா வண்ணமட்ட²ங் கரொந்தி, தங் ந வட்டதி. ஏகவண்ணேன பன நீலேன வா பீதகேன வா யேன கேனசி ஸுத்தேன அந்தோ வா ப³ஹி வா ஸிப்³பி³துங் ச²த்தத³ண்ட³க்³கா³ஹகங் ஸலாகபஞ்ஜரங் வா வினந்தி⁴துங் வட்டதி, தஞ்ச கோ² தி²ரகரணத்த²ங், ந வண்ணமட்ட²த்தா²யா’’தி (பாரா॰ அட்ட²॰ 1.85 பாளிமுத்தகவினிச்ச²ய) அட்ட²கதா²பாடே²ன ச விருஜ்ஜ²தி, தஸ்மா ஸோ ந க³ஹேதப்³போ³.
Pāṭhena ca ‘‘keci tālapaṇṇacchattaṃ anto vā bahi vā pañcavaṇṇena suttena sibbantā vaṇṇamaṭṭhaṃ karonti, taṃ na vaṭṭati. Ekavaṇṇena pana nīlena vā pītakena vā yena kenaci suttena anto vā bahi vā sibbituṃ chattadaṇḍaggāhakaṃ salākapañjaraṃ vā vinandhituṃ vaṭṭati, tañca kho thirakaraṇatthaṃ, na vaṇṇamaṭṭhatthāyā’’ti (pārā. aṭṭha. 1.85 pāḷimuttakavinicchaya) aṭṭhakathāpāṭhena ca virujjhati, tasmā so na gahetabbo.
3032. லேகா² வா பன கேவலாதி யதா²வுத்தப்பகாரா ஸலாகலேகா² வா. சி²ந்தி³த்வாதி உக்கிரித்வா கதங் சி²ந்தி³த்வா. க⁴ங்ஸித்வாதி சித்தகம்மாதி³வஸேன கதங் க⁴ங்ஸித்வா.
3032.Lekhāvā pana kevalāti yathāvuttappakārā salākalekhā vā. Chinditvāti ukkiritvā kataṃ chinditvā. Ghaṃsitvāti cittakammādivasena kataṃ ghaṃsitvā.
3033. த³ண்ட³பு³ந்த³ம்ஹீதி ச²த்தத³ண்ட³ஸ்ஸ பஞ்ஜரே கா³ஹணத்தா²ய பா²லிதபு³ந்த³ம்ஹி, மூலேதி அத்தோ². அயமெத்த² நிஸ்ஸந்தே³ஹே வுத்தனயோ. கு²த்³த³ஸிக்கா²க³ண்டி²பதே³ பன ‘‘ச²த்தபிண்டி³யா மூலே’’தி வுத்தங். அஹிச²த்தகஸண்டா²னந்தி பு²ல்லஅஹிச²த்தாகாரங். ரஜ்ஜுகேஹி கா³ஹாபெத்வா த³ண்டே³ ப³ந்த⁴ந்தி, தஸ்மிங் ப³ந்த⁴ட்டா²னே வலயமிவ உக்கிரித்வா உட்டா²பெத்வா. ப³ந்த⁴னத்தா²யாதி வாதேன யதா² ந சலதி, ஏவங் ரஜ்ஜூஹி த³ண்டே³ பஞ்ஜரஸ்ஸ ப³ந்த⁴னத்தா²ய. உக்கிரித்வா கதா லேகா² வட்டதீதி யோஜனா. யதா²ஹ – ‘‘வாதப்பஹாரேன அசலனத்த²ங் ச²த்தமண்ட³லிகங் ரஜ்ஜுகேஹி கா³ஹாபெத்வா த³ண்டே³ ப³ந்த⁴ந்தி, தஸ்மிங் ப³ந்த⁴னட்டா²னே வலயமிவ உக்கிரித்வா லேக²ங் ட²பெந்தி, ஸா வட்டதீ’’தி. ‘‘ஸசேபி ந ப³ந்த⁴ந்தி, ப³ந்த⁴னாரஹட்டா²னத்தா வலயங் உக்கிரிதுங் வட்டதீ’’தி க³ண்டி²பதே³ வுத்தங்.
3033.Daṇḍabundamhīti chattadaṇḍassa pañjare gāhaṇatthāya phālitabundamhi, mūleti attho. Ayamettha nissandehe vuttanayo. Khuddasikkhāgaṇṭhipade pana ‘‘chattapiṇḍiyā mūle’’ti vuttaṃ. Ahichattakasaṇṭhānanti phullaahichattākāraṃ. Rajjukehi gāhāpetvā daṇḍe bandhanti, tasmiṃ bandhaṭṭhāne valayamiva ukkiritvā uṭṭhāpetvā. Bandhanatthāyāti vātena yathā na calati, evaṃ rajjūhi daṇḍe pañjarassa bandhanatthāya. Ukkiritvā katā lekhā vaṭṭatīti yojanā. Yathāha – ‘‘vātappahārena acalanatthaṃ chattamaṇḍalikaṃ rajjukehi gāhāpetvā daṇḍe bandhanti, tasmiṃ bandhanaṭṭhāne valayamiva ukkiritvā lekhaṃ ṭhapenti, sā vaṭṭatī’’ti. ‘‘Sacepi na bandhanti, bandhanārahaṭṭhānattā valayaṃ ukkirituṃ vaṭṭatī’’ti gaṇṭhipade vuttaṃ.
3034. ஸமங் ஸதபதா³தீ³னந்தி ஸதபதா³தீ³ஹி ஸதி³ஸங், துல்யத்தே² கரணவசனப்பஸங்கே³ ஸாமிவசனங்.
3034.Samaṃ satapadādīnanti satapadādīhi sadisaṃ, tulyatthe karaṇavacanappasaṅge sāmivacanaṃ.
3035. பத்தஸ்ஸ பரியந்தே வாதி அனுவாதஸ்ஸ உப⁴யபரியந்தே வா. பத்தமுகே²பி வாதி த்³வின்னங் ஆராமவித்தா²ரபத்தானங் ஸங்க⁴டிதட்டா²னே கண்ணேபி வா, ஏகஸ்ஸேவ வா பத்தஸ்ஸ ஊனபூரணத்த²ங் ஸங்க⁴டிதட்டா²னேபி வா. வேணிந்தி குத்³ரூஸஸீஸாகாரேன ஸிப்³ப³னங். கேசி ‘‘வரகஸீஸாகாரேனா’’தி வத³ந்தி. ஸங்க²லிகந்தி பி³ளாலதா³மஸதி³ஸங் ஸிப்³ப³னங். கேசி ‘‘ஸதபதி³ஸம’’ந்தி வத³ந்தி.
3035.Pattassa pariyante vāti anuvātassa ubhayapariyante vā. Pattamukhepi vāti dvinnaṃ ārāmavitthārapattānaṃ saṅghaṭitaṭṭhāne kaṇṇepi vā, ekasseva vā pattassa ūnapūraṇatthaṃ saṅghaṭitaṭṭhānepi vā. Veṇinti kudrūsasīsākārena sibbanaṃ. Keci ‘‘varakasīsākārenā’’ti vadanti. Saṅkhalikanti biḷāladāmasadisaṃ sibbanaṃ. Keci ‘‘satapadisama’’nti vadanti.
3036. பட்டந்தி பட்டம்பி. அட்ட²கோணாதி³கோ விதி⁴ பகாரோ ஏதஸ்ஸாதி அட்ட²கோணாதி³கவிதி⁴, தங். ‘‘அட்ட²கோணாதி³க’’ந்தி கா³தா²ப³ந்த⁴வஸேன நிக்³க³ஹிதாக³மோ. ‘‘அட்ட²கோணாதி³கங் விதி⁴’’ந்தி ஏதங் ‘‘பட்ட’’ந்தி ஏதஸ்ஸ ஸமானாதி⁴கரணவிஸேஸனங், கிரியாவிஸேஸனங் வா, ‘‘கரொந்தீ’’தி இமினா ஸம்ப³ந்தோ⁴. அத² வா பட்டந்தி எத்த² பு⁴ம்மத்தே² உபயோக³வசனங், பட்டேதி அத்தோ². இமஸ்மிங் பக்கே² ‘‘அட்ட²கோணாதி³க’’ந்தி உபயோக³வசனங். ‘‘விதி⁴’’ந்தி ஏதஸ்ஸ விஸேஸனங். இத⁴ வக்க²மானசதுகோணஸண்டா²னதோ அஞ்ஞங் அட்ட²கோணாதி³கங் நாமங். தத்தா²தி தஸ்மிங் பட்டத்³வயே. அக்³கி⁴யக³தா³ரூபந்தி அக்³கி⁴யஸண்டா²னஞ்சேவ க³தா³ஸண்டா²னஞ்ச ஸிப்³ப³னங். முக்³க³ரந்தி லகு³ளஸண்டா²னஸிப்³ப³னங். ஆதி³-ஸத்³தே³ன சேதியாதி³ஸண்டா²னானங் க³ஹணங்.
3036.Paṭṭanti paṭṭampi. Aṭṭhakoṇādiko vidhi pakāro etassāti aṭṭhakoṇādikavidhi, taṃ. ‘‘Aṭṭhakoṇādika’’nti gāthābandhavasena niggahitāgamo. ‘‘Aṭṭhakoṇādikaṃ vidhi’’nti etaṃ ‘‘paṭṭa’’nti etassa samānādhikaraṇavisesanaṃ, kiriyāvisesanaṃ vā, ‘‘karontī’’ti iminā sambandho. Atha vā paṭṭanti ettha bhummatthe upayogavacanaṃ, paṭṭeti attho. Imasmiṃ pakkhe ‘‘aṭṭhakoṇādika’’nti upayogavacanaṃ. ‘‘Vidhi’’nti etassa visesanaṃ. Idha vakkhamānacatukoṇasaṇṭhānato aññaṃ aṭṭhakoṇādikaṃ nāmaṃ. Tatthāti tasmiṃ paṭṭadvaye. Agghiyagadārūpanti agghiyasaṇṭhānañceva gadāsaṇṭhānañca sibbanaṃ. Muggaranti laguḷasaṇṭhānasibbanaṃ. Ādi-saddena cetiyādisaṇṭhānānaṃ gahaṇaṃ.
3037. தத்தா²தி பட்டத்³வயே தஸ்மிங் டா²னே. கக்கடகக்கீ²னீதி குளீரஅச்சி²ஸதி³ஸானி ஸிப்³ப³னவிகாரானி. உட்டா²பெந்தீதி கரொந்தி. தத்தா²தி தஸ்மிங் க³ண்டி²கபாஸகபட்டகே. ஸுத்தாதி கோணதோ கோணங் ஸிப்³பி³தஸுத்தா சேவ சதுரஸ்ஸே ஸிப்³பி³தஸுத்தா ச. பிளகாதி தேஸமேவ ஸுத்தானங் நிவத்தெத்வா ஸிப்³பி³தகோடியோ ச. து³விஞ்ஞெய்யாவாதி ரஜனகாலே து³விஞ்ஞெய்யரூபா அனோளாரிகா தீ³பிதா வட்டந்தீதி. யதா²ஹ – ‘‘கோணஸுத்தபிளகா ச சீவரே ரத்தே து³விஞ்ஞெய்யரூபா வட்டந்தீ’’தி.
3037.Tatthāti paṭṭadvaye tasmiṃ ṭhāne. Kakkaṭakakkhīnīti kuḷīraacchisadisāni sibbanavikārāni. Uṭṭhāpentīti karonti. Tatthāti tasmiṃ gaṇṭhikapāsakapaṭṭake. Suttāti koṇato koṇaṃ sibbitasuttā ceva caturasse sibbitasuttā ca. Piḷakāti tesameva suttānaṃ nivattetvā sibbitakoṭiyo ca. Duviññeyyāvāti rajanakāle duviññeyyarūpā anoḷārikā dīpitā vaṭṭantīti. Yathāha – ‘‘koṇasuttapiḷakā ca cīvare ratte duviññeyyarūpā vaṭṭantī’’ti.
3038. க³ண்டி²பாஸகபட்டகாதி க³ண்டி²கபட்டகபாஸகபட்டகாதி யோஜனா. கண்ணகோணேஸு ஸுத்தானீதி சீவரகண்ணேஸு ஸுத்தானி சேவ க³ண்டி²கபாஸகபட்டானங் கோணேஸு ஸுத்தானி ச சி²ந்தெ³ய்ய. எத்த² ச சீவரே ஆயாமதோ, வித்தா²ரதோ ச ஸிப்³பி³த்வா அனுவாததோ ப³ஹி நிக்க²ந்தஸுத்தங் சீவரங் ரஜித்வா ஸுக்கா²பனகாலே ரஜ்ஜுயா வா சீவரவங்ஸே வா ப³ந்தி⁴த்வா ஓலம்பி³துங் அனுவாதே ப³த்³த⁴ஸுத்தானி ச கண்ணஸுத்தானி நாம. யதா²ஹ – ‘‘சீவரஸ்ஸ கண்ணஸுத்தகங் ந வட்டதி, ரஜிதகாலே சி²ந்தி³தப்³ப³ங். யங் பன ‘அனுஜானாமி, பி⁴க்க²வே, கண்ணஸுத்தக’ந்தி (மஹாவ॰ 344) ஏவங் அனுஞ்ஞாதங், தங் அனுவாதே பாஸகங் கத்வா ப³ந்தி⁴தப்³ப³ங், ரஜனகாலே லக்³க³னத்தா²யா’’தி (பாரா॰ அட்ட²॰ 1.85 பாளிமுத்தகவினிச்ச²ய).
3038.Gaṇṭhipāsakapaṭṭakāti gaṇṭhikapaṭṭakapāsakapaṭṭakāti yojanā. Kaṇṇakoṇesu suttānīti cīvarakaṇṇesu suttāni ceva gaṇṭhikapāsakapaṭṭānaṃ koṇesu suttāni ca chindeyya. Ettha ca cīvare āyāmato, vitthārato ca sibbitvā anuvātato bahi nikkhantasuttaṃ cīvaraṃ rajitvā sukkhāpanakāle rajjuyā vā cīvaravaṃse vā bandhitvā olambituṃ anuvāte baddhasuttāni ca kaṇṇasuttāni nāma. Yathāha – ‘‘cīvarassa kaṇṇasuttakaṃ na vaṭṭati, rajitakāle chinditabbaṃ. Yaṃ pana ‘anujānāmi, bhikkhave, kaṇṇasuttaka’nti (mahāva. 344) evaṃ anuññātaṃ, taṃ anuvāte pāsakaṃ katvā bandhitabbaṃ, rajanakāle lagganatthāyā’’ti (pārā. aṭṭha. 1.85 pāḷimuttakavinicchaya).
3039. ஸூசிகம்மவிகாரங் வாதி சீவரமண்ட³னத்தா²ய நானாஸுத்தகேஹி ஸதபதி³ஸதி³ஸங் ஸிப்³ப³ந்தா ஆக³ந்துகபட்டங் ட²பெந்தி, ஏவரூபங் ஸூசிகம்மவிகாரங் வா. அஞ்ஞங் வா பன கிஞ்சிபீதி அஞ்ஞம்பி யங் கிஞ்சி மாலாகம்மமிக³பக்கி²பாதா³தி³கங் ஸிப்³ப³னவிகாரங். காதுந்தி ஸயங் காதுங். காராபேதுந்தி அஞ்ஞேன வா காராபேதுங்.
3039.Sūcikammavikāraṃ vāti cīvaramaṇḍanatthāya nānāsuttakehi satapadisadisaṃ sibbantā āgantukapaṭṭaṃ ṭhapenti, evarūpaṃ sūcikammavikāraṃ vā. Aññaṃ vā pana kiñcipīti aññampi yaṃ kiñci mālākammamigapakkhipādādikaṃ sibbanavikāraṃ. Kātunti sayaṃ kātuṃ. Kārāpetunti aññena vā kārāpetuṃ.
3040. யோ பி⁴க்கு² பரங் உத்தமங் வண்ணமட்ட²ங் அபி⁴பத்த²யங் பத்த²யந்தோ கஞ்ஜிபிட்ட²க²லிஅல்லிகாதீ³ஸு சீவரங் பக்கி²பதி, தஸ்ஸ பன பி⁴க்கு²னோ து³க்கடா மொக்கோ² ந விஜ்ஜதீதி யோஜனா. கஞ்ஜீதி வாயனதந்தமக்க²னகஞ்ஜிஸதி³ஸா தூ²லாகஞ்ஜி. பிட்ட²ந்தி தண்டு³லபிட்ட²ங். தண்டு³லபிட்டே²ஹி பக்கா க²லி. அல்லிகாதி நிய்யாஸோ. ஆதி³-ஸத்³தே³ன லாகா²தீ³னங் க³ஹணங்.
3040. Yo bhikkhu paraṃ uttamaṃ vaṇṇamaṭṭhaṃ abhipatthayaṃ patthayanto kañjipiṭṭhakhaliallikādīsu cīvaraṃ pakkhipati, tassa pana bhikkhuno dukkaṭā mokkho na vijjatīti yojanā. Kañjīti vāyanatantamakkhanakañjisadisā thūlākañji. Piṭṭhanti taṇḍulapiṭṭhaṃ. Taṇḍulapiṭṭhehi pakkā khali. Allikāti niyyāso. Ādi-saddena lākhādīnaṃ gahaṇaṃ.
3041. சீவரஸ்ஸ கரணே கரணகாலே ஸமுட்டி²தானங் ஸூசிஹத்த²மலாதீ³னங் தோ⁴வனத்த²ங், கிலிட்ட²காலே ச தோ⁴வனத்த²ங் கஞ்ஜிபிட்டி²க²லிஅல்லிகாதீ³ஸு பக்கி²பதி, வட்டதீதி யோஜனா.
3041. Cīvarassa karaṇe karaṇakāle samuṭṭhitānaṃ sūcihatthamalādīnaṃ dhovanatthaṃ, kiliṭṭhakāle ca dhovanatthaṃ kañjipiṭṭhikhaliallikādīsu pakkhipati, vaṭṭatīti yojanā.
3042. தத்தா²தி யேன கஸாவேன சீவரங் ரஜதி, தஸ்மிங் ரஜனே சீவரஸ்ஸ ஸுக³ந்த⁴பா⁴வத்தா²ய க³ந்த⁴ங் வா உஜ்ஜலபா⁴வத்தா²ய தேலங் வா வண்ணத்தா²ய லாக²ங் வா. கிஞ்சீதி ஏவரூபங் யங் கிஞ்சி.
3042.Tatthāti yena kasāvena cīvaraṃ rajati, tasmiṃ rajane cīvarassa sugandhabhāvatthāya gandhaṃ vā ujjalabhāvatthāya telaṃ vā vaṇṇatthāya lākhaṃ vā. Kiñcīti evarūpaṃ yaṃ kiñci.
3043. மணினாதி பாஸாணேன. அஞ்ஞேனபி ச கேனசீதி யேன உஜ்ஜலங் ஹோதி, ஏவரூபேன முக்³க³ராதி³னா அஞ்ஞேனாபி கேனசி வத்து²னா. தோ³ணியாதி ரஜனம்ப³ணே. ந க⁴ங்ஸிதப்³ப³ங் ஹத்தே²ன கா³ஹெத்வா ந க⁴ட்டேதப்³ப³ங்.
3043.Maṇināti pāsāṇena. Aññenapi ca kenacīti yena ujjalaṃ hoti, evarūpena muggarādinā aññenāpi kenaci vatthunā. Doṇiyāti rajanambaṇe. Na ghaṃsitabbaṃ hatthena gāhetvā na ghaṭṭetabbaṃ.
3044. ரத்தங் சீவரங் ஹத்தே²ஹி கிஞ்சி தோ²கங் பஹரிதுங் வட்டதீதி யோஜனா. ‘‘யத்த² பக்கரஜனங் பக்கி²பந்தி, ஸா ரஜனதோ³ணி, தத்த² அங்ஸப³த்³த⁴ககாயப³ந்த⁴னாதி³ங் க⁴ட்டேதுங் வட்டதீ’’தி க³ண்டி²பதே³ வுத்தங்.
3044. Rattaṃ cīvaraṃ hatthehi kiñci thokaṃ paharituṃ vaṭṭatīti yojanā. ‘‘Yattha pakkarajanaṃ pakkhipanti, sā rajanadoṇi, tattha aṃsabaddhakakāyabandhanādiṃ ghaṭṭetuṃ vaṭṭatī’’ti gaṇṭhipade vuttaṃ.
3045. க³ண்டி²கேதி வேளுத³ந்தவிஸாணாதி³மயக³ண்டி²கே. லேகா² வாதி வட்டாதி³பே⁴தா³ லேகா² வா. பிளகா வாதி ஸாஸபபீ³ஜஸதி³ஸா கு²த்³த³கபுப்³பு³ளா வா. பாளிகண்ணிகபே⁴த³கோதி மணிகாவளிரூபபுப்ப²கண்ணிகரூபபே⁴த³கோ. கப்பபி³ந்து³விகாரோ வா ந வட்டதீதி யோஜனா.
3045.Gaṇṭhiketi veḷudantavisāṇādimayagaṇṭhike. Lekhā vāti vaṭṭādibhedā lekhā vā. Piḷakā vāti sāsapabījasadisā khuddakapubbuḷā vā. Pāḷikaṇṇikabhedakoti maṇikāvaḷirūpapupphakaṇṇikarūpabhedako. Kappabinduvikāro vā na vaṭṭatīti yojanā.
3046. ஆரக்³கே³னாதி ஆரகண்டகக்³கே³ன, ஸூசிமுகே²ன வா. காசிபி லேகா²தி வட்டககோ³முத்தாதி³ஸண்டா²னா யா காசிபி ராஜி.
3046.Āraggenāti ārakaṇṭakaggena, sūcimukhena vā. Kācipi lekhāti vaṭṭakagomuttādisaṇṭhānā yā kācipi rāji.
3047. ப⁴மங் ஆரோபெத்வாதி ப⁴மே அல்லியாபெத்வா.
3047.Bhamaṃ āropetvāti bhame alliyāpetvā.
3048. பத்தமண்ட³லகேதி பத்தே ச²விரக்க²னத்தா²ய திபுஸீஸாதீ³ஹி கதே பத்தஸ்ஸ ஹெட்டா² ஆதா⁴ராதீ³னங் உபரி காதப்³பே³ பத்தமண்ட³லகே. பி⁴த்திகம்மந்தி விப⁴த்தங் கத்வா நானாகாரரூபககம்மசித்தங். யதா²ஹ ‘‘ந பி⁴க்க²வே சித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி (சூளவ॰ 253). தத்தா²தி தஸ்மிங் பத்தமண்ட³லே. அஸ்ஸாதி பி⁴க்கு²ஸ்ஸ. மகரத³ந்தகந்தி கி³ரிகூடாகாரங்.
3048.Pattamaṇḍalaketi patte chavirakkhanatthāya tipusīsādīhi kate pattassa heṭṭhā ādhārādīnaṃ upari kātabbe pattamaṇḍalake. Bhittikammanti vibhattaṃ katvā nānākārarūpakakammacittaṃ. Yathāha ‘‘na bhikkhave citrāni pattamaṇḍalāni dhāretabbāni rūpakākiṇṇāni bhittikammakatānī’’ti (cūḷava. 253). Tatthāti tasmiṃ pattamaṇḍale. Assāti bhikkhussa. Makaradantakanti girikūṭākāraṃ.
3049. முக²வட்டியங் யா லேகா² பரிஸ்ஸாவனப³ந்த⁴னத்தா²ய அனுஞ்ஞாதா, தங் லேக²ங் ட²பெத்வா த⁴ம்மகரணச்ச²த்தே வா குச்சி²யங் வா காசிபி லேகா² ந வட்டதீதி யோஜனா.
3049. Mukhavaṭṭiyaṃ yā lekhā parissāvanabandhanatthāya anuññātā, taṃ lekhaṃ ṭhapetvā dhammakaraṇacchatte vā kucchiyaṃ vā kācipi lekhā na vaṭṭatīti yojanā.
3050. தஹிங் தஹிந்தி மத்திகாய தத்த² தத்த². தந்தி ததா²கொட்டிததி³கு³ணஸுத்தகாயப³ந்த⁴னங்.
3050.Tahiṃ tahinti mattikāya tattha tattha. Tanti tathākoṭṭitadiguṇasuttakāyabandhanaṃ.
3051. அந்தேஸு த³ள்ஹத்தா²ய த³ஸாமுகே² தி³கு³ணங் கத்வா கொட்டெந்தி, வட்டதீதி யோஜனா. சித்திகம்பீதி மாலாகம்மலதாகம்மசித்தயுத்தம்பி காயப³ந்த⁴னங்.
3051. Antesu daḷhatthāya dasāmukhe diguṇaṃ katvā koṭṭenti, vaṭṭatīti yojanā. Cittikampīti mālākammalatākammacittayuttampi kāyabandhanaṃ.
3052. அக்கீ²னீதி குஞ்ஜரக்கீ²னி. தத்தா²தி காயப³ந்த⁴னே வட்டதீதி கா கதா². உட்டா²பேதுந்தி உக்கிரிதுங்.
3052.Akkhīnīti kuñjarakkhīni. Tatthāti kāyabandhane vaṭṭatīti kā kathā. Uṭṭhāpetunti ukkirituṃ.
3053. க⁴டந்தி க⁴டஸண்டா²னங். தெ³ட்³டு³ப⁴ஸீஸங் வாதி உத³கஸப்பஸீஸமுக²ஸண்டா²னங் வா. யங் கிஞ்சி விகாரரூபங் த³ஸாமுகே² ந வட்டதீதி யோஜனா.
3053.Ghaṭanti ghaṭasaṇṭhānaṃ. Deḍḍubhasīsaṃ vāti udakasappasīsamukhasaṇṭhānaṃ vā. Yaṃ kiñci vikārarūpaṃ dasāmukhe na vaṭṭatīti yojanā.
3054. மச்ச²கண்டந்தி மச்ச²கண்டகாகாரங். க²ஜ்ஜூரிபத்தகாகாரந்தி க²ஜ்ஜூரிபத்தஸண்டா²னங். மச்ச²கண்டங் வா மட்ட²ங் பட்டிகங் வா க²ஜ்ஜூரிபத்தகாகாரங் வா உஜுகங் கத்வா கொட்டிதங் வட்டதீதி யோஜனா. எத்த² ச உப⁴யபஸ்ஸேஸு மச்ச²கண்டகயுத்தங் மச்ச²ஸ்ஸ பிட்டி²கண்டகங் விய யஸ்ஸ பட்டிகாய வாயனங் ஹோதி, இத³ங் காயப³ந்த⁴னங் மச்ச²கண்டகங் நாம. யஸ்ஸ க²ஜ்ஜூரிபத்தஸண்டா²னமிவ வாயனங் ஹோதி, தங் க²ஜ்ஜூரிபத்தகாகாரங் நாம.
3054.Macchakaṇṭanti macchakaṇṭakākāraṃ. Khajjūripattakākāranti khajjūripattasaṇṭhānaṃ. Macchakaṇṭaṃ vā maṭṭhaṃ paṭṭikaṃ vā khajjūripattakākāraṃ vā ujukaṃ katvā koṭṭitaṃ vaṭṭatīti yojanā. Ettha ca ubhayapassesu macchakaṇṭakayuttaṃ macchassa piṭṭhikaṇṭakaṃ viya yassa paṭṭikāya vāyanaṃ hoti, idaṃ kāyabandhanaṃ macchakaṇṭakaṃ nāma. Yassa khajjūripattasaṇṭhānamiva vāyanaṃ hoti, taṃ khajjūripattakākāraṃ nāma.
3055. பகதிவீதா பட்டிகா. ஸூகரந்தங்நாம குஞ்சிகாகோஸகஸண்டா²னங். தஸ்ஸ து³வித⁴ஸ்ஸ காயப³ந்த⁴னஸ்ஸ. தத்த² ரஜ்ஜுகா ஸூகரந்தானுலோமிகா, து³ஸ்ஸபட்டங் பட்டிகானுலோமிகங். ஆதி³-ஸத்³தே³ன முத்³தி³ககாயப³ந்த⁴னங் க³ஹிதங், தஞ்ச ஸூகரந்தானுலோமிகங். யதா²ஹ – ‘‘ஏகரஜ்ஜுகங், பன முத்³தி³ககாயப³ந்த⁴னஞ்ச ஸூகரந்தகங் அனுலோமேதீ’’தி (சூளவ॰ அட்ட²॰ 278). தத்த² ஏகரஜ்ஜுகா நாம ஏகவட்டா. ப³ஹுரஜ்ஜுகஸ்ஸ அகப்பியபா⁴வங் வக்க²தி. ‘‘முத்³தி³ககாயப³ந்த⁴னங் நாம சதுரஸ்ஸங் அகத்வா ஸஜ்ஜித’’ந்தி க³ண்டி²பதே³ வுத்தங்.
3055. Pakativītā paṭṭikā. Sūkarantaṃnāma kuñcikākosakasaṇṭhānaṃ. Tassa duvidhassa kāyabandhanassa. Tattha rajjukā sūkarantānulomikā, dussapaṭṭaṃ paṭṭikānulomikaṃ. Ādi-saddena muddikakāyabandhanaṃ gahitaṃ, tañca sūkarantānulomikaṃ. Yathāha – ‘‘ekarajjukaṃ, pana muddikakāyabandhanañca sūkarantakaṃ anulometī’’ti (cūḷava. aṭṭha. 278). Tattha ekarajjukā nāma ekavaṭṭā. Bahurajjukassa akappiyabhāvaṃ vakkhati. ‘‘Muddikakāyabandhanaṃ nāma caturassaṃ akatvā sajjita’’nti gaṇṭhipade vuttaṃ.
3056. முரஜங் நாம முரஜவட்டிஸண்டா²னங் வேடெ²த்வா கதங். வேடெ²த்வாதி நானாஸுத்தேஹி வேடெ²த்வா. ஸிக்கா²பா⁴ஜனவினிச்ச²யே பன ‘‘ப³ஹுகா ரஜ்ஜுயோ ஏகதோ கத்வா ஏகாய ரஜ்ஜுயா வேடி²தங் முரஜங் நாமா’’தி வுத்தங். மத்³த³வீணங் நாம பாமங்க³ஸண்டா²னங். தெ³ட்³டு³ப⁴கங் நாம உத³கஸப்பஸீஸஸதி³ஸங். கலாபு³கங் நாம ப³ஹுரஜ்ஜுகங். ரஜ்ஜுயோதி உப⁴யகோடியங் ஏகதோ அப³த்³தா⁴ ப³ஹூ ரஜ்ஜுயோ, ததா² ப³த்³தா⁴ கலாபு³கங் நாம ஹோதீதி. ந வட்டந்தீதி முரஜாதீ³னி இமானி ஸப்³பா³னி காயப³ந்த⁴னானி ந வட்டந்தி. புரிமா த்³வேதி முரஜங், மத்³த³வீணஞ்சாதி த்³வே. ‘‘த³ஸாஸு ஸியு’’ந்தி வத்தப்³பே³ கா³தா²ப³ந்த⁴வஸேன வண்ணலோபேன ‘‘த³ஸா ஸியு’’ந்தி வுத்தங். யதா²ஹ – ‘‘முரஜங் மத்³த³வீண’ந்தி இத³ங் த³ஸாஸுயேவ அனுஞ்ஞாத’’ந்தி (சூளவ॰ அட்ட²॰ 278).
3056.Murajaṃ nāma murajavaṭṭisaṇṭhānaṃ veṭhetvā kataṃ. Veṭhetvāti nānāsuttehi veṭhetvā. Sikkhābhājanavinicchaye pana ‘‘bahukā rajjuyo ekato katvā ekāya rajjuyā veṭhitaṃ murajaṃ nāmā’’ti vuttaṃ. Maddavīṇaṃ nāma pāmaṅgasaṇṭhānaṃ. Deḍḍubhakaṃ nāma udakasappasīsasadisaṃ. Kalābukaṃ nāma bahurajjukaṃ. Rajjuyoti ubhayakoṭiyaṃ ekato abaddhā bahū rajjuyo, tathā baddhā kalābukaṃ nāma hotīti. Na vaṭṭantīti murajādīni imāni sabbāni kāyabandhanāni na vaṭṭanti. Purimā dveti murajaṃ, maddavīṇañcāti dve. ‘‘Dasāsu siyu’’nti vattabbe gāthābandhavasena vaṇṇalopena ‘‘dasā siyu’’nti vuttaṃ. Yathāha – ‘‘murajaṃ maddavīṇa’nti idaṃ dasāsuyeva anuññāta’’nti (cūḷava. aṭṭha. 278).
3057. பாமங்க³ஸண்டா²னாதி பாமங்க³தா³மங் விய சதுரஸ்ஸஸண்டா²னா.
3057.Pāmaṅgasaṇṭhānāti pāmaṅgadāmaṃ viya caturassasaṇṭhānā.
3058. ஏகரஜ்ஜுமயந்தி நானாவட்டே ஏகதோ வட்டெத்வா கதரஜ்ஜுமயங் காயப³ந்த⁴னங். வட்டங் வட்டதீதி ‘‘ரஜ்ஜுகா து³ஸ்ஸபட்டாதீ³’’தி எத்த² ஏகவட்டரஜ்ஜுகா க³ஹிதா, இத⁴ பன நானாவட்டே ஏகதோ வட்டெத்வா கதாவ ஏகரஜ்ஜுகா க³ஹிதா. தஞ்சாதி தம்பி ஏகரஜ்ஜுககாயப³ந்த⁴னங். பாமங்க³ஸண்டா²னங் ஏகம்பி ந ச வட்டதீதி கேவலம்பி ந வட்டதி.
3058.Ekarajjumayanti nānāvaṭṭe ekato vaṭṭetvā katarajjumayaṃ kāyabandhanaṃ. Vaṭṭaṃ vaṭṭatīti ‘‘rajjukā dussapaṭṭādī’’ti ettha ekavaṭṭarajjukā gahitā, idha pana nānāvaṭṭe ekato vaṭṭetvā katāva ekarajjukā gahitā. Tañcāti tampi ekarajjukakāyabandhanaṃ. Pāmaṅgasaṇṭhānaṃ ekampi na ca vaṭṭatīti kevalampi na vaṭṭati.
3059. ப³ஹூ ரஜ்ஜுகே ஏகதோ கத்வாதி யோஜனா. வட்டதி ப³ந்தி⁴துந்தி முரஜங், கலாபு³கங் வா ந ஹோதி, ரஜ்ஜுககாயப³ந்த⁴னமேவ ஹோதீதி அதி⁴ப்பாயோ. அயங் பன வினிச்ச²யோ ‘‘ப³ஹூ ரஜ்ஜுகே ஏகதோ கத்வா ஏகேன நிரந்தரங் வேடெ²த்வா கதங் ‘ப³ஹுரஜ்ஜுக’ந்தி ந வத்தப்³ப³ங், தங் வட்டதீ’’தி (பாரா॰ அட்ட²॰ 1.85 பாளிமுத்தகவினிச்ச²ய) அட்ட²கதா²க³தோவ இத⁴ வுத்தோ. ஸிக்கா²பா⁴ஜனவினிச்ச²யே ‘‘ப³ஹுகா ரஜ்ஜுயோ ஏகதோ கத்வா ஏகாய ரஜ்ஜுயா வேடி²தங் முரஜங் நாமா’’தி யங் வுத்தங், தங் இமினா விருஜ்ஜ²னதோ ந க³ஹேதப்³ப³ங்.
3059. Bahū rajjuke ekato katvāti yojanā. Vaṭṭati bandhitunti murajaṃ, kalābukaṃ vā na hoti, rajjukakāyabandhanameva hotīti adhippāyo. Ayaṃ pana vinicchayo ‘‘bahū rajjuke ekato katvā ekena nirantaraṃ veṭhetvā kataṃ ‘bahurajjuka’nti na vattabbaṃ, taṃ vaṭṭatī’’ti (pārā. aṭṭha. 1.85 pāḷimuttakavinicchaya) aṭṭhakathāgatova idha vutto. Sikkhābhājanavinicchaye ‘‘bahukā rajjuyo ekato katvā ekāya rajjuyā veṭhitaṃ murajaṃ nāmā’’ti yaṃ vuttaṃ, taṃ iminā virujjhanato na gahetabbaṃ.
3060. த³ந்த-ஸத்³தே³ன ஹத்தி²த³ந்தா வுத்தா. ஜதூதி லாகா². ஸங்க²மயந்தி ஸங்க²னாபி⁴மயங். வித⁴கா மதாதி எத்த² ‘‘வேட²கா’’திபி பாடோ² வித⁴பரியாயோ.
3060.Danta-saddena hatthidantā vuttā. Jatūti lākhā. Saṅkhamayanti saṅkhanābhimayaṃ. Vidhakā matāti ettha ‘‘veṭhakā’’tipi pāṭho vidhapariyāyo.
3061. காயப³ந்த⁴னவிதே⁴தி காயப³ந்த⁴னஸ்ஸ த³ஸாய தி²ரபா⁴வத்த²ங் கட்ட²த³ந்தாதீ³ஹி கதே விதே⁴. விகாரோ அட்ட²மங்க³லாதி³கோ. தத்த² தத்தா²தி தஸ்மிங் தஸ்மிங் டா²னே, உப⁴யகோடியந்தி அத்தோ². து-ஸத்³தே³ன க⁴டாகாரோபி வட்டதீதி தீ³பேதி.
3061.Kāyabandhanavidheti kāyabandhanassa dasāya thirabhāvatthaṃ kaṭṭhadantādīhi kate vidhe. Vikāro aṭṭhamaṅgalādiko. Tattha tatthāti tasmiṃ tasmiṃ ṭhāne, ubhayakoṭiyanti attho. Tu-saddena ghaṭākāropi vaṭṭatīti dīpeti.
3062. மாலா …பே॰… விசித்திதாதி மாலாகம்மலதாகம்மேஹி ச மிக³பக்கி²ரூபாதி³னானாரூபேஹி ச விசித்திதா. ஜனரஞ்ஜனீதி பா³லஜனபலோபி⁴னீ.
3062.Mālā…pe… vicittitāti mālākammalatākammehi ca migapakkhirūpādinānārūpehi ca vicittitā. Janarañjanīti bālajanapalobhinī.
3064. அட்ட²ங்ஸா வாபீதி எத்த² அபி-ஸத்³தே³ன ஸோளஸங்ஸாதீ³னங் க³ஹணங். வண்ணமட்டா²தி மாலாகம்மாதி³வண்ணமட்டா².
3064.Aṭṭhaṃsā vāpīti ettha api-saddena soḷasaṃsādīnaṃ gahaṇaṃ. Vaṇṇamaṭṭhāti mālākammādivaṇṇamaṭṭhā.
3065. அஞ்ஜனிஸலாகாபி ததா² வண்ணமட்டா² ந வட்டதீதி யோஜனா. ‘‘அஞ்ஜனித்த²விகாய ச, நானாவண்ணேஹி ஸுத்தேஹி, சித்தகம்மங் ந வட்டதீ’’தி பாடோ² யுஜ்ஜதி. ‘‘த²விகாபி சா’’தி பாடோ² தி³ஸ்ஸதி, ஸோ ந க³ஹேதப்³போ³.
3065. Añjanisalākāpi tathā vaṇṇamaṭṭhā na vaṭṭatīti yojanā. ‘‘Añjanitthavikāya ca, nānāvaṇṇehi suttehi, cittakammaṃ na vaṭṭatī’’ti pāṭho yujjati. ‘‘Thavikāpi cā’’ti pāṭho dissati, so na gahetabbo.
3066. ரத்தாதி³னா யேன கேனசி ஏகவண்ணேன ஸுத்தேன பிலோதிகாதி³மயங் யங் கிஞ்சி ஸிபாடிகங் ஸிப்³பெ³த்வா வளஞ்ஜந்தஸ்ஸ வட்டதீதி யோஜனா.
3066. Rattādinā yena kenaci ekavaṇṇena suttena pilotikādimayaṃ yaṃ kiñci sipāṭikaṃ sibbetvā vaḷañjantassa vaṭṭatīti yojanā.
3067. மணிகந்தி தூ²லபுப்³பு³ளங். பிளகந்தி ஸுகு²மபுப்³பு³ளங். பிப்ப²லேதி வத்த²ச்சே²த³னஸத்தே². ஆரகண்டகேதி பத்தாதா⁴ரவலயானங் விஜ்ஜ²னகண்டகே. ட²பேதுந்தி உட்டா²பேதுங். யங் கிஞ்சீதி ஸேஸங் வண்ணமட்ட²ம்பி ச.
3067.Maṇikanti thūlapubbuḷaṃ. Piḷakanti sukhumapubbuḷaṃ. Pipphaleti vatthacchedanasatthe. Ārakaṇṭaketi pattādhāravalayānaṃ vijjhanakaṇṭake. Ṭhapetunti uṭṭhāpetuṃ. Yaṃ kiñcīti sesaṃ vaṇṇamaṭṭhampi ca.
3068. த³ண்ட³கேதி பிப்ப²லத³ண்ட³கே. யதா²ஹ – ‘‘பிப்ப²லகேபி மணிகங் வா பிளகங் வா யங் கிஞ்சி உட்டா²பேதுங் ந வட்டதி, த³ண்ட³கே பன பரிச்சே²த³லேகா² வட்டதீ’’தி. பரிச்சே²த³லேகா²மத்தந்தி ஆணிப³ந்த⁴னட்டா²னங் பத்வா பரிச்சி²ந்த³னத்த²ங் ஏகாவ லேகா² வட்டதி. வலித்வாதி உப⁴யகோடியா முக²ங் கத்வா மஜ்ஜே² வலியோ கா³ஹெத்வா. நக²ச்சே²த³னங் யஸ்மா கரொந்தி, தஸ்மா வட்டதீதி யோஜனா.
3068.Daṇḍaketi pipphaladaṇḍake. Yathāha – ‘‘pipphalakepi maṇikaṃ vā piḷakaṃ vā yaṃ kiñci uṭṭhāpetuṃ na vaṭṭati, daṇḍake pana paricchedalekhā vaṭṭatī’’ti. Paricchedalekhāmattanti āṇibandhanaṭṭhānaṃ patvā paricchindanatthaṃ ekāva lekhā vaṭṭati. Valitvāti ubhayakoṭiyā mukhaṃ katvā majjhe valiyo gāhetvā. Nakhacchedanaṃ yasmā karonti, tasmā vaṭṭatīti yojanā.
3069. அரணிஸஹிதே கந்தகிச்சகரோ த³ண்டோ³ உத்தராரணீ நாம. வாபீதி பி-ஸத்³தே³ன அத⁴ராரணிங் ஸங்க³ண்ஹாதி, உது³க்க²லத³ண்ட³ஸ்ஸேதங் அதி⁴வசனங். அஞ்ச²னகயந்தத⁴னு த⁴னுகங் நாம. முஸலமத்த²கபீளனத³ண்ட³கோ பேல்லத³ண்ட³கோ நாம.
3069. Araṇisahite kantakiccakaro daṇḍo uttarāraṇī nāma. Vāpīti pi-saddena adharāraṇiṃ saṅgaṇhāti, udukkhaladaṇḍassetaṃ adhivacanaṃ. Añchanakayantadhanu dhanukaṃ nāma. Musalamatthakapīḷanadaṇḍako pelladaṇḍako nāma.
3070. ஸண்டா³ஸேதி அக்³கி³ஸண்டா³ஸங் வத³ந்தி. கட்ட²ச்சே²த³னவாஸியா ததா² யங் கிஞ்சி வண்ணமட்ட²ங் ந வட்டதீதி ஸம்ப³ந்தோ⁴. த்³வீஸு பஸ்ஸேஸூதி வாஸியா உபோ⁴ஸு பஸ்ஸேஸு. லோஹேனாதி கப்பியலோஹேன . ப³ந்தி⁴துங் வட்டதீதி உஜுகமேவ சதுரஸ்ஸங் வா அட்ட²ங்ஸங் வா ப³ந்தி⁴துங் வட்டதி. ‘‘ஸண்டா³ஸேதி அக்³கி³ஸண்டா³ஸே’’தி நிஸ்ஸந்தே³ஹே வுத்தங். அட்ட²கதா²யங் பனெத்த² ஸூசிஸண்டா³ஸோ த³ஸ்ஸிதோ.
3070.Saṇḍāseti aggisaṇḍāsaṃ vadanti. Kaṭṭhacchedanavāsiyā tathā yaṃ kiñci vaṇṇamaṭṭhaṃ na vaṭṭatīti sambandho. Dvīsu passesūti vāsiyā ubhosu passesu. Lohenāti kappiyalohena . Bandhituṃ vaṭṭatīti ujukameva caturassaṃ vā aṭṭhaṃsaṃ vā bandhituṃ vaṭṭati. ‘‘Saṇḍāseti aggisaṇḍāse’’ti nissandehe vuttaṃ. Aṭṭhakathāyaṃ panettha sūcisaṇḍāso dassito.
3071. ஹெட்ட²தோதி ஹெட்டா² அயோபட்டவலயஸ்ஸ. ‘‘உபரி அஹிச்ச²த்தமகுலமத்த’’ந்தி அட்ட²கதா²யங் வுத்தங்.
3071.Heṭṭhatoti heṭṭhā ayopaṭṭavalayassa. ‘‘Upari ahicchattamakulamatta’’nti aṭṭhakathāyaṃ vuttaṃ.
3072. விஸாணேதி தேலாஸிஞ்சனகக³வயமஹிங்ஸாதி³ஸிங்கே³. நாளியங் வாபீதி வேளுனாளிகாதி³னாளியங். அபி-ஸத்³தே³ன அலாபு³ங் ஸங்க³ண்ஹாதி. ஆமண்ட³ஸாரகேதி ஆமலகசுண்ணமயதேலக⁴டே. தேலபா⁴ஜனகேதி வுத்தப்பகாரேயேவ தேலபா⁴ஜனே. ஸப்³ப³ங் வண்ணமட்ட²ங் வட்டதீதி புமித்தி²ரூபரஹிதங் மாலாகம்மாதி³ ஸப்³ப³ங் வண்ணமட்ட²ங் வட்டதி.
3072.Visāṇeti telāsiñcanakagavayamahiṃsādisiṅge. Nāḷiyaṃ vāpīti veḷunāḷikādināḷiyaṃ. Api-saddena alābuṃ saṅgaṇhāti. Āmaṇḍasāraketi āmalakacuṇṇamayatelaghaṭe. Telabhājanaketi vuttappakāreyeva telabhājane. Sabbaṃ vaṇṇamaṭṭhaṃ vaṭṭatīti pumitthirūparahitaṃ mālākammādi sabbaṃ vaṇṇamaṭṭhaṃ vaṭṭati.
3073-5. பானீயஸ்ஸ உளுங்கேதி பானீயஉளுங்கே. தோ³ணியங் ரஜனஸ்ஸபீதி ரஜனதோ³ணியம்பி. ப²லகபீடே²தி ப²லகமயே பீடே². வலயாதா⁴ரகாதி³கேதி த³ந்தவலயாதி³ஆதா⁴ரகே. ஆதி³-ஸத்³தே³ன த³ண்டா³தா⁴ரகோ ஸங்க³ஹிதோ. பாத³புஞ்ச²னியந்தி சோளாதி³மயபாத³புஞ்ச²னியங். பீடே²தி பாத³பீடே². ஸஹசரியேன பாத³கத²லிகாயஞ்ச. சித்தங் ஸப்³ப³மேவ ச வட்டதீதி யதா²வுத்தே பி⁴க்கு²பரிக்கா²ரே மாதுகா³மரூபரஹிதங், பி⁴க்கு²னிபரிக்கா²ரே புரிஸரூபரஹிதங் அவஸேஸங் ஸப்³ப³ங் சித்தகம்மங்.
3073-5.Pānīyassa uḷuṅketi pānīyauḷuṅke. Doṇiyaṃ rajanassapīti rajanadoṇiyampi. Phalakapīṭheti phalakamaye pīṭhe. Valayādhārakādiketi dantavalayādiādhārake. Ādi-saddena daṇḍādhārako saṅgahito. Pādapuñchaniyanti coḷādimayapādapuñchaniyaṃ. Pīṭheti pādapīṭhe. Sahacariyena pādakathalikāyañca. Cittaṃ sabbameva ca vaṭṭatīti yathāvutte bhikkhuparikkhāre mātugāmarūparahitaṃ, bhikkhuniparikkhāre purisarūparahitaṃ avasesaṃ sabbaṃ cittakammaṃ.
3076. நானா ச தே மணயோ சாதி நானாமணீ, இந்த³னீலாத³யோ, நானாமணீஹி கதா நானாமணிமயா, த²ம்பா⁴ ச கவாடா ச த்³வாரா ச பி⁴த்தியோ ச த²ம்ப⁴கவாடத்³வாரபி⁴த்தியோ, நானாமணிமயா த²ம்ப⁴கவாடத்³வாரபி⁴த்தியோ யஸ்மிங் தங் ததா² வுத்தங். கா கதா² வண்ணமட்ட²கேதி மாலாகம்மலதாகம்மசித்தகம்மாதி³வண்ணமட்ட²கே வத்தப்³ப³மேவ நத்தீ²தி அத்தோ².
3076. Nānā ca te maṇayo cāti nānāmaṇī, indanīlādayo, nānāmaṇīhi katā nānāmaṇimayā, thambhā ca kavāṭā ca dvārā ca bhittiyo ca thambhakavāṭadvārabhittiyo, nānāmaṇimayā thambhakavāṭadvārabhittiyo yasmiṃ taṃ tathā vuttaṃ. Kā kathā vaṇṇamaṭṭhaketi mālākammalatākammacittakammādivaṇṇamaṭṭhake vattabbameva natthīti attho.
3077. தா²வரஸ்ஸ ரதனமயபாஸாத³ஸ்ஸ கப்பியபா⁴வங் த³ஸ்ஸெத்வா ஸுவண்ணாதி³மயஸ்ஸாபி ஸப்³ப³பாஸாத³பரிபோ⁴க³ஸ்ஸ கப்பியபா⁴வங் த³ஸ்ஸேதுமாஹ ‘‘ஸோவண்ணய’’ந்திஆதி³. ஸோவண்ணயந்தி ஸுவண்ணமயங். த்³வாரகவாடானங் அனந்தரகா³தா²ய த³ஸ்ஸிதத்தா ‘‘த்³வாரகவாடப³ந்த⁴’’ந்தி இமினா த்³வாரகவாடபா³ஹாஸங்கா²தங் பிட்ட²ஸங்கா⁴டங் க³ஹிதங். த்³வாரஞ்ச கவாடஞ்ச த்³வாரகவாடானி, த்³வாரகவாடானங் ப³ந்த⁴ங் த்³வாரகவாடப³ந்த⁴ங், உத்தரபாஸகும்மாரஸங்கா²தங் பிட்ட²ஸங்கா⁴டந்தி அத்தோ². நானா ச தே மணயோ சாதி நானாமணீ , ஸுவண்ணஞ்ச நானாமணீ ச ஸுவண்ணனானாமணீ, பி⁴த்தி ச பூ⁴மி ச பி⁴த்திபூ⁴மி ஸுவண்ணனானாமணீஹி கதா பி⁴த்திபூ⁴மி ஸுவண்ணனானாமணிபி⁴த்திபூ⁴மி. இதி இமேஸு ஸேனாஸனாவயவேஸு. ந கிஞ்சி ஏகம்பி நிஸேத⁴னீயந்தி ஏகம்பி ஸேனாஸனபரிக்கா²ரங் கிஞ்சி ந நிஸேத⁴னீயங், ஸேனாஸனம்பி ந படிக்கி²பிதப்³ப³ந்தி அத்தோ². ஸேனாஸனங் வட்டதி ஸப்³ப³மேவாதி ஸப்³ப³மேவ ஸேனாஸனபரிபோ⁴க³ங் வட்டதி. யதா²ஹ –
3077. Thāvarassa ratanamayapāsādassa kappiyabhāvaṃ dassetvā suvaṇṇādimayassāpi sabbapāsādaparibhogassa kappiyabhāvaṃ dassetumāha ‘‘sovaṇṇaya’’ntiādi. Sovaṇṇayanti suvaṇṇamayaṃ. Dvārakavāṭānaṃ anantaragāthāya dassitattā ‘‘dvārakavāṭabandha’’nti iminā dvārakavāṭabāhāsaṅkhātaṃ piṭṭhasaṅghāṭaṃ gahitaṃ. Dvārañca kavāṭañca dvārakavāṭāni, dvārakavāṭānaṃ bandhaṃ dvārakavāṭabandhaṃ, uttarapāsakummārasaṅkhātaṃ piṭṭhasaṅghāṭanti attho. Nānā ca te maṇayo cāti nānāmaṇī, suvaṇṇañca nānāmaṇī ca suvaṇṇanānāmaṇī, bhitti ca bhūmi ca bhittibhūmi suvaṇṇanānāmaṇīhi katā bhittibhūmi suvaṇṇanānāmaṇibhittibhūmi. Iti imesu senāsanāvayavesu. Na kiñci ekampi nisedhanīyanti ekampi senāsanaparikkhāraṃ kiñci na nisedhanīyaṃ, senāsanampi na paṭikkhipitabbanti attho. Senāsanaṃ vaṭṭati sabbamevāti sabbameva senāsanaparibhogaṃ vaṭṭati. Yathāha –
‘‘ஸப்³ப³ங் பாஸாத³பரிபோ⁴க³ந்தி ஸுவண்ணரஜதாதி³விசித்ரானி கவாடானி மஞ்சபீடா²னி தாலவண்டானி ஸுவண்ணரஜதமயானி பானீயக⁴டபானீயஸராவானி யங் கிஞ்சி சித்தகம்மகதங், ஸப்³ப³ங் வட்டதி. ‘பாஸாத³ஸ்ஸ தா³ஸிதா³ஸங் கெ²த்தவத்து²ங் கோ³மஹிங்ஸங் தே³மா’தி வத³ந்தி, பாடேக்கங் க³ஹணகிச்சங் நத்தி², பாஸாதே³ படிக்³க³ஹிதே படிக்³க³ஹிதமேவ ஹோதி. கோ³னகாதீ³னி ஸங்கி⁴கவிஹாரே வா புக்³க³லிகவிஹாரே வா மஞ்சபீட²கேஸு அத்த²ரித்வா பரிபு⁴ஞ்ஜிதுங் ந வட்டந்தி. த⁴ம்மாஸனே பன கி³ஹிவிகதனீஹாரேன லப்³ப⁴ந்தி, தத்ராபி நிபஜ்ஜிதுங் ந வட்டதீ’’தி (சூளவ॰ அட்ட²॰ 320).
‘‘Sabbaṃ pāsādaparibhoganti suvaṇṇarajatādivicitrāni kavāṭāni mañcapīṭhāni tālavaṇṭāni suvaṇṇarajatamayāni pānīyaghaṭapānīyasarāvāni yaṃ kiñci cittakammakataṃ, sabbaṃ vaṭṭati. ‘Pāsādassa dāsidāsaṃ khettavatthuṃ gomahiṃsaṃ demā’ti vadanti, pāṭekkaṃ gahaṇakiccaṃ natthi, pāsāde paṭiggahite paṭiggahitameva hoti. Gonakādīni saṅghikavihāre vā puggalikavihāre vā mañcapīṭhakesu attharitvā paribhuñjituṃ na vaṭṭanti. Dhammāsane pana gihivikatanīhārena labbhanti, tatrāpi nipajjituṃ na vaṭṭatī’’ti (cūḷava. aṭṭha. 320).
‘‘ஸோவண்ணத்³வாரகவாடப³ந்த⁴’’ந்தி வா பாடோ², ப³ஹுப்³பீ³ஹிஸமாஸோ. இமினா ச து³தியபதே³ன ச ஸேனாஸனங் விஸேஸீயதி.
‘‘Sovaṇṇadvārakavāṭabandha’’nti vā pāṭho, bahubbīhisamāso. Iminā ca dutiyapadena ca senāsanaṃ visesīyati.
3078. ந த³வங் கரேதி ‘‘கிங் பு³த்³தோ⁴ ஸிலகபு³த்³தோ⁴? கிங் த⁴ம்மோ கோ³த⁴ம்மோ அஜத⁴ம்மோ? கிங் ஸங்கோ⁴ கோ³ஸங்கோ⁴ அஜஸங்கோ⁴ மிக³ஸங்கோ⁴’’தி பரிஹாஸங் ந கரெய்ய. தித்தி²யப்³ப³தங் மூக³ப்³ப³தாதி³கங் நேவ க³ண்ஹெய்யாதி யோஜனா.
3078.Na davaṃ kareti ‘‘kiṃ buddho silakabuddho? Kiṃ dhammo godhammo ajadhammo? Kiṃ saṅgho gosaṅgho ajasaṅgho migasaṅgho’’ti parihāsaṃ na kareyya. Titthiyabbataṃ mūgabbatādikaṃ neva gaṇheyyāti yojanā.
3079. தா பி⁴க்கு²னியோ உத³காதி³னா வாபி ந ஸிஞ்செய்யாதி யோஜனா.
3079.Tā bhikkhuniyo udakādinā vāpi na siñceyyāti yojanā.
3080. அஞ்ஞத்த² அஞ்ஞஸ்மிங் விஹாரே வஸ்ஸங்வுத்தோ² அஞ்ஞத்த² அஞ்ஞஸ்மிங் விஹாரே பா⁴க³ங் வஸ்ஸாவாஸிகபா⁴க³ங் க³ண்ஹாதி சே, து³க்கடங். தஸ்மிங் சீவரே நட்டே² வா ஜஜ்ஜரே ஜிண்ணே வா கீ³வா புன தா³தப்³ப³ந்தி யோஜனா.
3080.Aññattha aññasmiṃ vihāre vassaṃvuttho aññattha aññasmiṃ vihāre bhāgaṃ vassāvāsikabhāgaṃ gaṇhāti ce, dukkaṭaṃ. Tasmiṃ cīvare naṭṭhe vā jajjare jiṇṇe vā gīvā puna dātabbanti yojanā.
3081. ஸோதி அஞ்ஞத்த² பா⁴க³ங் க³ண்ஹனகோ பி⁴க்கு². தேஹீதி சீவரஸாமிகேஹி. தந்தி ததா² க³ஹிதங் வஸ்ஸாவாஸிகபா⁴க³ங். தேஸந்தி சீவரஸாமிகானங்.
3081.Soti aññattha bhāgaṃ gaṇhanako bhikkhu. Tehīti cīvarasāmikehi. Tanti tathā gahitaṃ vassāvāsikabhāgaṃ. Tesanti cīvarasāmikānaṃ.
3082. கரோதோதி காராபயதோ. த³வா ஸிலங் பவிஜ்ஜ²ந்தோதி பந்திகீளாய கீளத்தி²கானங் ஸிப்பத³ஸ்ஸனவஸேன ஸக்க²ரங் வா நின்னட்டா²னங் பவட்டனவஸேன பாஸாணங் வா பவிஜ்ஜ²ந்தோ. ந கேவலஞ்ச பாஸாணங், அஞ்ஞம்பி யங் கிஞ்சி தா³ருக²ண்ட³ங் வா இட்ட²கக²ண்ட³ங் வா ஹத்தே²ன வா யந்தேன வா பவிஜ்ஜி²துங் ந வட்டதி. சேதியாதீ³னங் அத்தா²ய பாஸாணாத³யோ ஹஸந்தா ஹஸந்தா பவட்டெந்திபி கி²பந்திபி உக்கி²பந்திபி, கம்மஸமயோதி வட்டதி.
3082.Karototi kārāpayato. Davā silaṃ pavijjhantoti pantikīḷāya kīḷatthikānaṃ sippadassanavasena sakkharaṃ vā ninnaṭṭhānaṃ pavaṭṭanavasena pāsāṇaṃ vā pavijjhanto. Na kevalañca pāsāṇaṃ, aññampi yaṃ kiñci dārukhaṇḍaṃ vā iṭṭhakakhaṇḍaṃ vā hatthena vā yantena vā pavijjhituṃ na vaṭṭati. Cetiyādīnaṃ atthāya pāsāṇādayo hasantā hasantā pavaṭṭentipi khipantipi ukkhipantipi, kammasamayoti vaṭṭati.
3083. கி³ஹிகோ³பகதா³னஸ்மிந்தி கி³ஹீனங் உய்யானகோ³பகாதீ³ஹி அத்தனா கோ³பிதஉய்யானாதி³தோ ப²லாதீ³னங் தா³னே யாவத³த்த²ங் தி³ய்யமானேபி. ந தோ³ஸோ கோசி க³ண்ஹதோதி படிக்³க³ண்ஹதோ பி⁴க்கு²னோ கோசி தோ³ஸோ நத்தி². ஸங்க⁴சேதியஸந்தகே தாலப²லாதி³ம்ஹி உய்யானகோ³பகாதீ³ஹி தி³ய்யமானே பரிச்சே²த³னயோ தேஸங் வேதனவஸேன பரிச்சி²ன்னானங்யேவ க³ஹணே அனாபத்தினயோ வுத்தோதி யோஜனா.
3083.Gihigopakadānasminti gihīnaṃ uyyānagopakādīhi attanā gopitauyyānādito phalādīnaṃ dāne yāvadatthaṃ diyyamānepi. Na doso koci gaṇhatoti paṭiggaṇhato bhikkhuno koci doso natthi. Saṅghacetiyasantake tālaphalādimhi uyyānagopakādīhi diyyamāne paricchedanayo tesaṃ vetanavasena paricchinnānaṃyeva gahaṇe anāpattinayo vuttoti yojanā.
3084. புரிஸஸங்யுத்தந்தி பரிவிஸகேஹி புரிஸேஹி வுய்ஹமானங். ஹத்த²வட்டகந்தி ஹத்தே²னேவ பவட்டேதப்³ப³ஸகடங்.
3084.Purisasaṃyuttanti parivisakehi purisehi vuyhamānaṃ. Hatthavaṭṭakanti hattheneva pavaṭṭetabbasakaṭaṃ.
3085. பி⁴க்கு²னியா ஸத்³தி⁴ங் கிஞ்சிபி அனாசாரங் ந ஸம்பயோஜெய்ய ந காரெய்யாதி யோஜனா. ‘‘கிஞ்சீ’’திபி பாடோ², க³ஹட்ட²ங் வா பப்³ப³ஜிதங் வா கிஞ்சி பி⁴க்கு²னியா ஸத்³தி⁴ங் அனாசாரவஸேன ந ஸம்பயோஜெய்யாதி அத்தோ². ஓபா⁴ஸெந்தஸ்ஸாதி காமாதி⁴ப்பாயங் பகாஸெந்தஸ்ஸ.
3085. Bhikkhuniyā saddhiṃ kiñcipi anācāraṃ na sampayojeyya na kāreyyāti yojanā. ‘‘Kiñcī’’tipi pāṭho, gahaṭṭhaṃ vā pabbajitaṃ vā kiñci bhikkhuniyā saddhiṃ anācāravasena na sampayojeyyāti attho. Obhāsentassāti kāmādhippāyaṃ pakāsentassa.
3086. ஹவேதி ஏகங்ஸத்தே² நிபாதோ.
3086.Haveti ekaṃsatthe nipāto.
3087. அத்தனோ பரிபோ⁴க³த்த²ங் தி³ன்னந்தி ‘‘தும்ஹேயேவ பரிபு⁴ஞ்ஜதா²’’தி வத்வா தி³ன்னங் திசீவராதி³ங்.
3087.Attano paribhogatthaṃ dinnanti ‘‘tumheyeva paribhuñjathā’’ti vatvā dinnaṃ ticīvarādiṃ.
3088. அஸப்பாயந்தி பித்தாதி³தோ³ஸானங் கோபனவஸேன அபா²ஸுகாரணங். அபனேதும்பி ஜஹிதும்பி, பகே³வ தா³துந்தி அதி⁴ப்பாயோ. அக்³க³ங் க³ஹெத்வா தா³துங் வாதி ததா² க³ஹணாரஹங் அன்னாதி³ங் ஸந்தா⁴ய வுத்தங். ‘‘கதிபாஹங் பு⁴த்வா’’தி ஸேஸோ. பிண்ட³பாதாதி³தோ அக்³க³ங் க³ஹெத்வா பத்தாதி³ங் கதிபாஹங் பு⁴த்வா தா³துங் வட்டதீதி அத்தோ².
3088.Asappāyanti pittādidosānaṃ kopanavasena aphāsukāraṇaṃ. Apanetumpi jahitumpi, pageva dātunti adhippāyo. Aggaṃ gahetvā dātuṃ vāti tathā gahaṇārahaṃ annādiṃ sandhāya vuttaṃ. ‘‘Katipāhaṃ bhutvā’’ti seso. Piṇḍapātādito aggaṃ gahetvā pattādiṃ katipāhaṃ bhutvā dātuṃ vaṭṭatīti attho.
3089. பஞ்சவக்³கூ³பஸம்பதா³தி வினயத⁴ரபஞ்சமேன ஸங்கே⁴ன காதப்³ப³உபஸம்பதா³. நவாதி அஞ்ஞேஹி ஏகவாரம்பி அபரிபு⁴த்தா. கு³ணங்கு³ணஉபாஹனா சதுபடலதோ பட்டா²ய ப³ஹுபடலஉபாஹனா. சம்மத்தா²ரோதி கப்பியசம்மத்த²ரணஞ்ச. து⁴வன்ஹானந்தி பகதினஹானங்.
3089.Pañcavaggūpasampadāti vinayadharapañcamena saṅghena kātabbaupasampadā. Navāti aññehi ekavārampi aparibhuttā. Guṇaṅguṇaupāhanā catupaṭalato paṭṭhāya bahupaṭalaupāhanā. Cammatthāroti kappiyacammattharaṇañca. Dhuvanhānanti pakatinahānaṃ.
3090. ஸம்பா³த⁴ஸ்ஸாதி வச்சமக்³க³பஸ்ஸாவமக்³க³த்³வயஸ்ஸ ஸாமந்தா த்³வங்கு³லா அந்தோ ஸத்த²வத்தி²கம்மங் வாரிதந்தி யோஜனா. ஸத்தே²ன அந்தமஸோ நகே²னாபி சே²த³னபா²லனாதி³வஸேன ஸத்த²கம்மஞ்ச வத்தீ²ஹி பே⁴ஸஜ்ஜதேலஸ்ஸ அந்தோ பவிஸனவஸேன காதப்³ப³ங் வத்தி²கம்மஞ்ச து²ல்லச்சயாபத்திவிதா⁴னேன வாரிதந்தி அத்தோ². பஸ்ஸாவமக்³க³ஸ்ஸ ஸாமந்தா த்³வங்கு³லங் அங்க³ஜாதஸ்ஸ அக்³க³தோ பட்டா²ய க³ஹேதப்³ப³ங்.
3090.Sambādhassāti vaccamaggapassāvamaggadvayassa sāmantā dvaṅgulā anto satthavatthikammaṃ vāritanti yojanā. Satthena antamaso nakhenāpi chedanaphālanādivasena satthakammañca vatthīhi bhesajjatelassa anto pavisanavasena kātabbaṃ vatthikammañca thullaccayāpattividhānena vāritanti attho. Passāvamaggassa sāmantā dvaṅgulaṃ aṅgajātassa aggato paṭṭhāya gahetabbaṃ.
3091. ‘‘பாகத்த²’’ந்தி இமினா நிப்³பா³பேதுங் சலனே நித்³தோ³ஸபா⁴வங் தீ³பேதி.
3091.‘‘Pākattha’’nti iminā nibbāpetuṃ calane niddosabhāvaṃ dīpeti.
3092. உபளாலேதீதி ‘‘பத்தசீவராதி³பரிக்கா²ரங் தே த³ம்மீ’’தி வத்வா பலோபெ⁴த்வா க³ண்ஹாதி. தத்தா²தி தஸ்மிங் புக்³க³லே. ஆதீ³னவந்தி அலஜ்ஜிதாதி³பா⁴வங் த³ஸ்ஸெத்வா தேன ஸஹ ஸம்போ⁴கா³தி³கரணே அலஜ்ஜிபா⁴வாபஜ்ஜனாதி³ஆதீ³னவங். தஸ்ஸாதி ததோ வியோஜேதப்³ப³ஸ்ஸ தஸ்ஸ.
3092.Upaḷāletīti ‘‘pattacīvarādiparikkhāraṃ te dammī’’ti vatvā palobhetvā gaṇhāti. Tatthāti tasmiṃ puggale. Ādīnavanti alajjitādibhāvaṃ dassetvā tena saha sambhogādikaraṇe alajjibhāvāpajjanādiādīnavaṃ. Tassāti tato viyojetabbassa tassa.
3093. ஆதீ³னவத³ஸ்ஸனப்பகாரங் த³ஸ்ஸேதுமாஹ ‘‘மக்க²ன’’ந்திஆதி³. ‘‘நஹாயிதுங் க³தேன கூ³த²முத்தேஹி மக்க²னங் விய து³ஸ்ஸீலங் நிஸ்ஸாய விஹரதா தயா கத’’ந்தி ஏவங் தத்த² ஆதீ³னவங் வத்துங் வட்டதீதி யோஜனா.
3093. Ādīnavadassanappakāraṃ dassetumāha ‘‘makkhana’’ntiādi. ‘‘Nahāyituṃ gatena gūthamuttehi makkhanaṃ viya dussīlaṃ nissāya viharatā tayā kata’’nti evaṃ tattha ādīnavaṃ vattuṃ vaṭṭatīti yojanā.
3094-5. ப⁴த்தக்³கே³ போ⁴ஜனஸாலாய பு⁴ஞ்ஜமானோ. யாகு³பானேதி யாகு³ங் பிவனகாலே. அந்தோகா³மேதி அந்தரக⁴ரே. வீதி²யந்தி நிக³மனக³ரகா³மாதீ³னங் ரதி²காய. அந்த⁴காரேதி அந்த⁴காரே வத்தமானே, அந்த⁴காரக³தோதி அத்தோ². தஞ்ஹி வந்த³ந்தஸ்ஸ மஞ்சபாதா³தீ³ஸுபி நலாடங் படிஹஞ்ஞெய்ய. அனாவஜ்ஜோதி கிச்சபஸுதத்தா வந்த³னங் அஸமன்னாஹரந்தோ. ஏகாவத்தோதி ஏகதோ ஆவத்தோ ஸபத்தபக்கே² டி²தோ வேரீ விஸபா⁴க³புக்³க³லோ. அயஞ்ஹி வந்தி³யமானோ பாதே³னபி பஹரெய்ய. வாவடோதி ஸிப்³ப³னகம்மாதி³கிச்சந்தரபஸுதோ.
3094-5.Bhattagge bhojanasālāya bhuñjamāno. Yāgupāneti yāguṃ pivanakāle. Antogāmeti antaraghare. Vīthiyanti nigamanagaragāmādīnaṃ rathikāya. Andhakāreti andhakāre vattamāne, andhakāragatoti attho. Tañhi vandantassa mañcapādādīsupi nalāṭaṃ paṭihaññeyya. Anāvajjoti kiccapasutattā vandanaṃ asamannāharanto. Ekāvattoti ekato āvatto sapattapakkhe ṭhito verī visabhāgapuggalo. Ayañhi vandiyamāno pādenapi pahareyya. Vāvaṭoti sibbanakammādikiccantarapasuto.
ஸுத்தோதி நித்³த³ங் ஓக்கந்தோ. கா²த³ந்தி பிட்ட²கக²ஜ்ஜகாதீ³னி கா²த³ந்தோ. பு⁴ஞ்ஜந்தோதி ஓத³னாதீ³னி பு⁴ஞ்ஜந்தோ. வச்சங் முத்தம்பி வா கரந்தி உச்சாரங் வா பஸ்ஸாவங் வா கரொந்தோ இதி இமேஸங் தேரஸன்னங் வந்த³னா அயுத்தத்தே²ன வாரிதாதி ஸம்ப³ந்தோ⁴.
Suttoti niddaṃ okkanto. Khādanti piṭṭhakakhajjakādīni khādanto. Bhuñjantoti odanādīni bhuñjanto. Vaccaṃ muttampi vā karanti uccāraṃ vā passāvaṃ vā karonto iti imesaṃ terasannaṃ vandanā ayuttatthena vāritāti sambandho.
3096-7. கம்மலத்³தி⁴ஸீமாவஸேன தீஸு நானாஸங்வாஸகேஸு கம்மனானாஸங்வாஸகஸ்ஸ உக்கி²த்தக்³க³ஹணேன க³ஹிதத்தா, ஸீமானானாஸங்வாஸகவுட்³ட⁴தரபகதத்தஸ்ஸ வந்தி³யத்தா, பாரிஸேஸஞாயேன ‘‘நானாஸங்வாஸகோ வுட்³ட⁴தரோ அத⁴ம்மவாதீ³ அவந்தி³யோ’’தி (பரி॰ 467) வசனதோ ச லத்³தி⁴னானாஸங்வாஸகோ இத⁴ ‘‘நானாஸங்வாஸகோ’’தி க³ஹிதோதி வேதி³தப்³போ³. உக்கி²த்தோதி திவிதே⁴னாபி உக்கே²பனீயகம்மேன உக்கி²த்தகோ. க³ருகட்டா² ச பஞ்சாதி பாரிவாஸிகமூலாயபடிகஸ்ஸனாரஹமானத்தாரஹமானத்தசாரிகஅப்³பா⁴னாரஹஸங்கா²தா பஞ்ச க³ருகட்டா² ச. இமே பன அஞ்ஞமஞ்ஞஸ்ஸ யதா²வுட்³ட⁴ங் வந்த³னாதீ³னி லப⁴ந்தி, பகதத்தேன அவந்தி³யத்தாவ அவந்தி³யேஸு க³ஹிதா. இமே பா³வீஸதி புக்³க³லேதி நக்³கா³த³யோ யதா²வுத்தே.
3096-7. Kammaladdhisīmāvasena tīsu nānāsaṃvāsakesu kammanānāsaṃvāsakassa ukkhittaggahaṇena gahitattā, sīmānānāsaṃvāsakavuḍḍhatarapakatattassa vandiyattā, pārisesañāyena ‘‘nānāsaṃvāsako vuḍḍhataro adhammavādī avandiyo’’ti (pari. 467) vacanato ca laddhinānāsaṃvāsako idha ‘‘nānāsaṃvāsako’’ti gahitoti veditabbo. Ukkhittoti tividhenāpi ukkhepanīyakammena ukkhittako. Garukaṭṭhā ca pañcāti pārivāsikamūlāyapaṭikassanārahamānattārahamānattacārikaabbhānārahasaṅkhātā pañca garukaṭṭhā ca. Ime pana aññamaññassa yathāvuḍḍhaṃ vandanādīni labhanti, pakatattena avandiyattāva avandiyesu gahitā. Ime bāvīsati puggaleti naggādayo yathāvutte.
3098. ‘‘த⁴ம்மவாதீ³’’தி இத³ங் ‘‘நானாஸங்வாஸவுட்³ட⁴கோ’’தி ஏதஸ்ஸ விஸேஸனங். யதா²ஹ ‘‘தயோமே, பி⁴க்க²வே, வந்தி³யா. பச்சா² உபஸம்பன்னேன புரேஉபஸம்பன்னோ வந்தி³யோ, நானாஸங்வாஸகோ வுட்³ட⁴தரோ த⁴ம்மவாதீ³ வந்தி³யோ, ஸதே³வகே லோகே, பி⁴க்க²வே, ஸமாரகே…பே॰… ததா²க³தோ அரஹங் ஸம்மாஸம்பு³த்³தோ⁴ வந்தி³யோ’’தி (சூளவ॰ 312).
3098.‘‘Dhammavādī’’ti idaṃ ‘‘nānāsaṃvāsavuḍḍhako’’ti etassa visesanaṃ. Yathāha ‘‘tayome, bhikkhave, vandiyā. Pacchā upasampannena pureupasampanno vandiyo, nānāsaṃvāsako vuḍḍhataro dhammavādī vandiyo, sadevake loke, bhikkhave, samārake…pe… tathāgato arahaṃ sammāsambuddho vandiyo’’ti (cūḷava. 312).
3099. ‘‘ஏதேயேவ வந்தி³யா, ந அஞ்ஞே’’தி நியாமஸ்ஸ அகதத்தா அஞ்ஞேஸம்பி வந்தி³யானங் ஸப்³பா⁴வங் த³ஸ்ஸேதுமாஹ ‘‘தஜ்ஜனாதீ³’’திஆதி³. எத்த² ஆதி³-ஸத்³தே³ன நியஸ்ஸபப்³பா³ஜனீயபஅஸாரணீயகம்மே ஸங்க³ண்ஹாதி. எத்தா²தி ஏதஸ்மிங் வந்த³னீயாதி⁴காரே. கம்மந்தி அபலோகனாதி³ சதுப்³பி³த⁴ங் கம்மங்.
3099. ‘‘Eteyeva vandiyā, na aññe’’ti niyāmassa akatattā aññesampi vandiyānaṃ sabbhāvaṃ dassetumāha ‘‘tajjanādī’’tiādi. Ettha ādi-saddena niyassapabbājanīyapaasāraṇīyakamme saṅgaṇhāti. Etthāti etasmiṃ vandanīyādhikāre. Kammanti apalokanādi catubbidhaṃ kammaṃ.
3100. ஸங்கே⁴ன அத⁴ம்மகம்மே கரியமானே தங் வாரேதுங் அஸக்கொந்தேன, அஸக்கொந்தேஹி ச படிபஜ்ஜிதப்³ப³விதி⁴ங் த³ஸ்ஸேதுமாஹ ‘‘அதி⁴ட்டா²ன’’ந்திஆதி³. அதி⁴ட்டா²னங் பனேகஸ்ஸ உத்³தி³ட்ட²ந்தி யோஜனா, அத⁴ம்மகம்மங் கரொந்தானங் பி⁴க்கூ²னமந்தரே நிஸீதி³த்வா தங் ‘‘அத⁴ம்ம’’ந்தி ஜானித்வாபி தங் வாரேதுங் அஸக்கொந்தஸ்ஸ ஏகஸ்ஸ ‘‘ந மேதங் க²மதீ’’தி சித்தேன அதி⁴ட்டா²னமுத்³தி³ட்ட²ந்தி வுத்தங் ஹோதி. த்³வின்னங் வா திண்ணமேவ சாதி தமேவ வாரேதுங் அஸக்கொந்தானங் த்³வின்னங் வா திண்ணங் வா பி⁴க்கூ²னங் அஞ்ஞமஞ்ஞங் ‘‘ந மேதங் க²மதீ’’தி தி³ட்டா²விகம்மங் ஸகஸகதி³ட்டி²யா பகாஸனங் உத்³தி³ட்ட²ந்தி அத்தோ². ததோ உத்³த⁴ங் தீஹி உத்³த⁴ங் சதுன்னங் கம்மஸ்ஸ படிக்கோஸனங் ‘‘இத³ங் அத⁴ம்மகம்மங் மா கரோதா²’’தி படிக்கி²பனங் உத்³தி³ட்ட²ந்தி அத்தோ².
3100. Saṅghena adhammakamme kariyamāne taṃ vāretuṃ asakkontena, asakkontehi ca paṭipajjitabbavidhiṃ dassetumāha ‘‘adhiṭṭhāna’’ntiādi. Adhiṭṭhānaṃ panekassa uddiṭṭhanti yojanā, adhammakammaṃ karontānaṃ bhikkhūnamantare nisīditvā taṃ ‘‘adhamma’’nti jānitvāpi taṃ vāretuṃ asakkontassa ekassa ‘‘na metaṃ khamatī’’ti cittena adhiṭṭhānamuddiṭṭhanti vuttaṃ hoti. Dvinnaṃ vā tiṇṇameva cāti tameva vāretuṃ asakkontānaṃ dvinnaṃ vā tiṇṇaṃ vā bhikkhūnaṃ aññamaññaṃ ‘‘na metaṃ khamatī’’ti diṭṭhāvikammaṃ sakasakadiṭṭhiyā pakāsanaṃ uddiṭṭhanti attho. Tato uddhaṃ tīhi uddhaṃ catunnaṃ kammassa paṭikkosanaṃ ‘‘idaṃ adhammakammaṃ mā karothā’’ti paṭikkhipanaṃ uddiṭṭhanti attho.
3101. விஸ்ஸாஸக்³கா³ஹலக்க²ணங் அக்³க³ஹிதக்³க³ஹணேன பஞ்சவித⁴ந்தி த³ஸ்ஸேதுமாஹ ‘‘ஸந்தி³ட்டோ²’’திஆதி³. யோஜனா பனெத்த² ஏவங் வேதி³தப்³பா³ – ஸந்தி³ட்டோ² ச ஹோதி, ஜீவதி ச, க³ஹிதே ச அத்தமனோ ஹோதி, ஸம்ப⁴த்தோ ச ஹோதி, ஜீவதி ச, க³ஹிதே ச அத்தமனோ ஹோதி, ஆலபிதோ ச ஹோதி, ஜீவதி ச, க³ஹிதே ச அத்தமனோ ஹோதீதி ஏவங் ஸந்தி³ட்ட²ஸம்ப⁴த்தஆலபிதானங் திண்ணமேகேகஸ்ஸ தீணி தீணி விஸ்ஸாஸக்³கா³ஹலக்க²ணானி கத்வா நவவித⁴ங் ஹோதீதி வேதி³தப்³ப³ங். வசனத்தோ², பனெத்த² வினிச்ச²யோ ச ஹெட்டா² வுத்தோவ.
3101. Vissāsaggāhalakkhaṇaṃ aggahitaggahaṇena pañcavidhanti dassetumāha ‘‘sandiṭṭho’’tiādi. Yojanā panettha evaṃ veditabbā – sandiṭṭho ca hoti, jīvati ca, gahite ca attamano hoti, sambhatto ca hoti, jīvati ca, gahite ca attamano hoti, ālapito ca hoti, jīvati ca, gahite ca attamano hotīti evaṃ sandiṭṭhasambhattaālapitānaṃ tiṇṇamekekassa tīṇi tīṇi vissāsaggāhalakkhaṇāni katvā navavidhaṃ hotīti veditabbaṃ. Vacanattho, panettha vinicchayo ca heṭṭhā vuttova.
3102. ஸீலவிபத்தி, தி³ட்டி²விபத்தி ச ஆசாராஜீவஸம்ப⁴வா த்³வே விபத்தியோ சாதி யோஜனா, ஆசாரவிபத்தி, ஆஜீவவிபத்தி சாதி வுத்தங் ஹோதி.
3102. Sīlavipatti, diṭṭhivipatti ca ācārājīvasambhavā dve vipattiyo cāti yojanā, ācāravipatti, ājīvavipatti cāti vuttaṃ hoti.
3103. தத்தா²தி தேஸு சதூஸு விபத்தீஸு. அப்படிகம்மா பாராஜிகா வுட்டா²னகா³மினீ ஸங்கா⁴தி³ஸேஸாபத்திகா து³வே ஆபத்தியோ ஸீலவிபத்தீதி பகாஸிதாதி யோஜனா.
3103.Tatthāti tesu catūsu vipattīsu. Appaṭikammā pārājikā vuṭṭhānagāminī saṅghādisesāpattikā duve āpattiyo sīlavipattīti pakāsitāti yojanā.
3104. யா ச அந்தக்³கா³ஹிகா தி³ட்டி², யா த³ஸவத்து²கா தி³ட்டி², அயங் து³விதா⁴ தி³ட்டி² தி³ட்டி²விபத்தீதி தீ³பிதாதி யோஜனா. தத்த² அந்தக்³கா³ஹிகதி³ட்டி² நாம உச்சே²த³ந்தஸஸ்ஸதந்தகா³ஹவஸேன பவத்தா தி³ட்டி². ‘‘நத்தி² தி³ன்ன’’ந்திஆதி³னயப்பவத்தா த³ஸவத்து²கா தி³ட்டி².
3104. Yā ca antaggāhikā diṭṭhi, yā dasavatthukā diṭṭhi, ayaṃ duvidhā diṭṭhi diṭṭhivipattīti dīpitāti yojanā. Tattha antaggāhikadiṭṭhi nāma ucchedantasassatantagāhavasena pavattā diṭṭhi. ‘‘Natthi dinna’’ntiādinayappavattā dasavatthukā diṭṭhi.
3105. து²ல்லச்சயாதி³கா தே³ஸனாகா³மினிகா யா பஞ்ச ஆபத்தியோ, ஆசாரகுஸலேன ப⁴க³வதா ஸா ஆசாரவிபத்தீதி வுத்தாதி யோஜனா. ஆதி³-ஸத்³தே³ன பாசித்தியபாடிதே³ஸனீயது³க்கடது³ப்³பா⁴ஸிதானங் க³ஹணங். யாதி பஞ்சாபத்தியோ அபெக்கி²த்வா ப³ஹுத்தங். ஸாதி ஆசாரவிபத்தி ஸாமஞ்ஞமபெக்கி²த்வா ஏகத்தங்.
3105. Thullaccayādikā desanāgāminikā yā pañca āpattiyo, ācārakusalena bhagavatā sā ācāravipattīti vuttāti yojanā. Ādi-saddena pācittiyapāṭidesanīyadukkaṭadubbhāsitānaṃ gahaṇaṃ. Yāti pañcāpattiyo apekkhitvā bahuttaṃ. Sāti ācāravipatti sāmaññamapekkhitvā ekattaṃ.
3106. குஹனாதீ³தி ஆதி³-ஸத்³தே³ன லபனா நேமித்திகதா நிப்பேஸிகதா லாபே⁴ன லாப⁴ங் நிஜிகீ³ஸனதா க³ஹிதா, குஹனாதீ³னங் வித்தா²ரோ விஸுத்³தி⁴மக்³கே³ (விஸுத்³தி⁴॰ 1.16) வுத்தனயேன வேதி³தப்³போ³. ஆஜீவோ பச்சயோ ஹேது யஸ்ஸா ஆபத்தியாதி விக்³க³ஹோ. ச²ப்³பி³தா⁴தி சதுத்த²பாராஜிகஸஞ்சரித்தது²ல்லச்சயபாசித்தியபாடிதே³ஸனீயது³க்கடாபத்தீனங் வஸேன ச²ப்³பி³தா⁴. பகாஸிதா –
3106.Kuhanādīti ādi-saddena lapanā nemittikatā nippesikatā lābhena lābhaṃ nijigīsanatā gahitā, kuhanādīnaṃ vitthāro visuddhimagge (visuddhi. 1.16) vuttanayena veditabbo. Ājīvo paccayo hetu yassā āpattiyāti viggaho. Chabbidhāti catutthapārājikasañcarittathullaccayapācittiyapāṭidesanīyadukkaṭāpattīnaṃ vasena chabbidhā. Pakāsitā –
‘‘ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தங் அபூ⁴தங் உத்தரிமனுஸ்ஸத⁴ம்மங் உல்லபதி, ஆபத்தி பாராஜிகஸ்ஸ. ஆஜீவஹேது…பே॰… ஸஞ்சரித்தங் ஸமாபஜ்ஜதி, ஆபத்தி ஸங்கா⁴தி³ஸேஸஸ்ஸ. ஆஜீவஹேது…பே॰… ‘யோ தே விஹாரே வஸதி, ஸோ பி⁴க்கு² அரஹா’தி ப⁴ணதி, படிஜானந்தஸ்ஸ ஆபத்தி து²ல்லச்சயஸ்ஸ. ஆஜீவஹேது…பே॰… பி⁴க்கு² பணீதபோ⁴ஜனானி அகி³லானோ அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி பாசித்தியஸ்ஸ. ஆஜீவஹேது…பே॰… பி⁴க்கு²னீ பணீதபோ⁴ஜனானி அகி³லானா அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. ஆஜீவஹேது ஆஜீவகாரணா ஸூபங் வா ஓத³னங் வா அகி³லானோ அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி து³க்கடஸ்ஸா’’தி (பரி॰ 287) –
‘‘Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa. Ājīvahetu…pe… sañcarittaṃ samāpajjati, āpatti saṅghādisesassa. Ājīvahetu…pe… ‘yo te vihāre vasati, so bhikkhu arahā’ti bhaṇati, paṭijānantassa āpatti thullaccayassa. Ājīvahetu…pe… bhikkhu paṇītabhojanāni agilāno attano atthāya viññāpetvā bhuñjati, āpatti pācittiyassa. Ājīvahetu…pe… bhikkhunī paṇītabhojanāni agilānā attano atthāya viññāpetvā bhuñjati, āpatti pāṭidesanīyassa. Ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati, āpatti dukkaṭassā’’ti (pari. 287) –
தே³ஸிதா. இமினா ஆஜீவவிபத்தி தீ³பிதா.
Desitā. Iminā ājīvavipatti dīpitā.
3107. ‘‘உக்கி²த்தோ’’திஆதி³ யதா²க்கமேன தேஸங் திண்ணங் நானாஸங்வாஸகானங் ஸரூபத³ஸ்ஸனங். தத்த² தயோ உக்கி²த்தகா வுத்தாயேவ.
3107.‘‘Ukkhitto’’tiādi yathākkamena tesaṃ tiṇṇaṃ nānāsaṃvāsakānaṃ sarūpadassanaṃ. Tattha tayo ukkhittakā vuttāyeva.
3108-9. ‘‘யோ ஸங்கே⁴ன உக்கே²பனீயகம்மகதானங் அத⁴ம்மவாதீ³னங் பக்கே² நிஸின்னோ ‘தும்ஹே கிங் ப⁴ணதா²’தி தேஸஞ்ச இதரேஸஞ்ச லத்³தி⁴ங் ஸுத்வா ‘இமே அத⁴ம்மவாதி³னோ, இதரே த⁴ம்மவாதி³னோ’தி சித்தங் உப்பாதே³தி, அயங் தேஸங் மஜ்ஜே² நிஸின்னோவ தேஸங் நானாஸங்வாஸகோ ஹோதி, கம்மங் கோபேதி. இதரேஸம்பி ஹத்த²பாஸங் அனாக³தத்தா கோபேதீ’’தி (மஹாவ॰ அட்ட²॰ 455) ஆக³த அட்ட²கதா²வினிச்ச²யங் த³ஸ்ஸேதுமாஹ ‘‘அத⁴ம்மவாதி³பக்க²ஸ்மி’’ந்திஆதி³.
3108-9. ‘‘Yo saṅghena ukkhepanīyakammakatānaṃ adhammavādīnaṃ pakkhe nisinno ‘tumhe kiṃ bhaṇathā’ti tesañca itaresañca laddhiṃ sutvā ‘ime adhammavādino, itare dhammavādino’ti cittaṃ uppādeti, ayaṃ tesaṃ majjhe nisinnova tesaṃ nānāsaṃvāsako hoti, kammaṃ kopeti. Itaresampi hatthapāsaṃ anāgatattā kopetī’’ti (mahāva. aṭṭha. 455) āgata aṭṭhakathāvinicchayaṃ dassetumāha ‘‘adhammavādipakkhasmi’’ntiādi.
அத⁴ம்மவாதி³பக்க²ஸ்மிந்தி உக்கே²பனீயகம்மேன நிஸ்ஸாரிதானங் அத⁴ம்மவாதீ³னங் பக்க²ஸ்மிங். நிஸின்னோவாதி ஹத்த²பாஸங் அவிஜஹித்வா க³ணபூரகோ ஹுத்வா நிஸின்னோவ. விசிந்தயந்தி ‘‘இமே நு கோ² த⁴ம்மவாதி³னோ, உதா³ஹு ஏதே’’தி விவிதே⁴னாகாரேன சிந்தயந்தோ. ‘‘ஏதே பன த⁴ம்மவாதீ³’’தி மானஸங் உப்பாதே³தி, ஏவங் உப்பன்னே பன மானஸே. அத⁴ம்மவாதி³பக்க²ஸ்மிங் நிஸின்னோவ ஏவங் மானஸங் உப்பாதெ³ந்தோ அயங் பி⁴க்கு². லத்³தி⁴யாதி ஏவங் உப்பாதி³தமானஸஸங்கா²தாய லத்³தி⁴யா. தேஸங் அத⁴ம்மவாதீ³னங் நானாஸங்வாஸகோ நாம ஹோதீதி பகாஸிதோ.
Adhammavādipakkhasminti ukkhepanīyakammena nissāritānaṃ adhammavādīnaṃ pakkhasmiṃ. Nisinnovāti hatthapāsaṃ avijahitvā gaṇapūrako hutvā nisinnova. Vicintayanti ‘‘ime nu kho dhammavādino, udāhu ete’’ti vividhenākārena cintayanto. ‘‘Ete pana dhammavādī’’ti mānasaṃ uppādeti, evaṃ uppanne pana mānase. Adhammavādipakkhasmiṃ nisinnova evaṃ mānasaṃ uppādento ayaṃ bhikkhu. Laddhiyāti evaṃ uppāditamānasasaṅkhātāya laddhiyā. Tesaṃ adhammavādīnaṃ nānāsaṃvāsako nāma hotīti pakāsito.
தத்ரட்டோ² பன ஸோதி தஸ்மிங் அத⁴ம்மவாதி³பக்க²ஸ்மிங் நிஸின்னோவ ஸோ. ஸத³-தா⁴துயா க³தினிவாரணத்த²த்தா தத்ர நிஸின்னோ ‘‘தத்ரட்டோ²’’தி வுச்சதி. த்³வின்னந்தி த⁴ம்மவாதி³அத⁴ம்மவாதி³பக்கா²னங் த்³வின்னங் ஸங்கா⁴னங். கம்மந்தி சதுவக்³கா³தி³ஸங்கே⁴ன கரணீயகம்மங். கோபேதீதி அத⁴ம்மவாதீ³னங் அஸங்வாஸபா⁴வங் க³ந்த்வா தேஸங் க³ணபூரணத்தா, இதரேஸங் ஏகஸீமாயங் ட²த்வா ஹத்த²பாஸங் அனுபக³தத்தா, ச²ந்த³ஸ்ஸ ச அதி³ன்னத்தா கம்மங் கோபேதி. யோ பன அத⁴ம்மவாதீ³னங் பக்கே² நிஸின்னோ ‘‘அத⁴ம்மவாதி³னோ இமே, இதரே த⁴ம்மவாதி³னோ’’தி தேஸங் மஜ்ஜே² பவிஸதி, யத்த² வா தத்த² வா பக்கே² நிஸின்னோ ‘‘இமே த⁴ம்மவாதி³னோ’’தி க³ண்ஹாதி, அயங் அத்தனாவ அத்தானங் ஸமானஸங்வாஸகங் கரோதீதி வேதி³தப்³போ³.
Tatraṭṭho pana soti tasmiṃ adhammavādipakkhasmiṃ nisinnova so. Sada-dhātuyā gatinivāraṇatthattā tatra nisinno ‘‘tatraṭṭho’’ti vuccati. Dvinnanti dhammavādiadhammavādipakkhānaṃ dvinnaṃ saṅghānaṃ. Kammanti catuvaggādisaṅghena karaṇīyakammaṃ. Kopetīti adhammavādīnaṃ asaṃvāsabhāvaṃ gantvā tesaṃ gaṇapūraṇattā, itaresaṃ ekasīmāyaṃ ṭhatvā hatthapāsaṃ anupagatattā, chandassa ca adinnattā kammaṃ kopeti. Yo pana adhammavādīnaṃ pakkhe nisinno ‘‘adhammavādino ime, itare dhammavādino’’ti tesaṃ majjhe pavisati, yattha vā tattha vā pakkhe nisinno ‘‘ime dhammavādino’’ti gaṇhāti, ayaṃ attanāva attānaṃ samānasaṃvāsakaṃ karotīti veditabbo.
3110. ப³ஹிஸீமாக³தோ பகதத்தோ பி⁴க்கு² ஸசே ஹத்த²பாஸே டி²தோ ஹோதி, ஸோ ஸீமாய நானாஸங்வாஸகோ மதோதி யோஜனா. தங் க³ணபூரணங் கத்வா கதகம்மம்பி குப்பதி. ஏவங் யதா²வுத்தனியாமேன தயோ நானாஸங்வாஸகா மஹேஸினா வுத்தாதி யோஜனா.
3110.Bahisīmāgato pakatatto bhikkhu sace hatthapāse ṭhito hoti, so sīmāya nānāsaṃvāsako matoti yojanā. Taṃ gaṇapūraṇaṃ katvā katakammampi kuppati. Evaṃ yathāvuttaniyāmena tayo nānāsaṃvāsakā mahesinā vuttāti yojanā.
3111. சுதோதி பாராஜிகாபன்னோ ஸாஸனதோ சுதத்தா ‘‘சுதோ’’தி க³ஹிதோ. ‘‘பி⁴க்கு²னீ ஏகாத³ஸ அப⁴ப்³பா³’’தி பத³ச்சே²தோ³. இமேதி பே⁴த³மனபெக்கி²த்வா ஸாமஞ்ஞேன ஸத்தரஸ ஜனா. அஸங்வாஸாதி ந ஸங்வஸிதப்³பா³, நத்தி² வா ஏதேஹி பகதத்தானங் ஏககம்மாதி³கோ ஸங்வாஸோதி அஸங்வாஸா நாம ஸியுங்.
3111.Cutoti pārājikāpanno sāsanato cutattā ‘‘cuto’’ti gahito. ‘‘Bhikkhunī ekādasa abhabbā’’ti padacchedo. Imeti bhedamanapekkhitvā sāmaññena sattarasa janā. Asaṃvāsāti na saṃvasitabbā, natthi vā etehi pakatattānaṃ ekakammādiko saṃvāsoti asaṃvāsā nāma siyuṃ.
3112. அஸங்வாஸஸ்ஸ ஸப்³ப³ஸ்ஸாதி யதா²வுத்தஸ்ஸ ஸத்தரஸவித⁴ஸ்ஸ ஸப்³ப³ஸ்ஸ அஸங்வாஸஸ்ஸ. ததா² கம்மாரஹஸ்ஸ சாதி ‘‘யஸ்ஸ ஸங்கோ⁴ கம்மங் கரோதி, ஸோ நேவ கம்மபத்தோ, நாபி ச²ந்தா³ரஹோ, அபிச கம்மாரஹோ’’தி (பரி॰ 488) ஏவங் பரிவாரே வுத்தகம்மாரஹஸ்ஸ ச. உம்மத்தகாதீ³னந்தி ஆதி³-ஸத்³தே³ன கி²த்தசித்தாதீ³னங் க³ஹணங். ஸங்கே⁴ தஜ்ஜனீயாதீ³னி கரொந்தே. படிக்கே²போதி படிக்கோஸனா. ந ரூஹதீதி படிக்கோஸட்டா²னே ந திட்ட²தி, கம்மங் ந கோபேதீதி அதி⁴ப்பாயோ.
3112.Asaṃvāsassa sabbassāti yathāvuttassa sattarasavidhassa sabbassa asaṃvāsassa. Tathā kammārahassa cāti ‘‘yassa saṅgho kammaṃ karoti, so neva kammapatto, nāpi chandāraho, apica kammāraho’’ti (pari. 488) evaṃ parivāre vuttakammārahassa ca. Ummattakādīnanti ādi-saddena khittacittādīnaṃ gahaṇaṃ. Saṅghe tajjanīyādīni karonte. Paṭikkhepoti paṭikkosanā. Na rūhatīti paṭikkosaṭṭhāne na tiṭṭhati, kammaṃ na kopetīti adhippāyo.
3113. ஸஸங்வாஸேக…பே॰… பி⁴க்கு²னோதி வுத்தனயேன கம்மேன வா லத்³தி⁴யா வா அஸங்வாஸிகபா⁴வங் அனுபக³தத்தா ஸமானஸங்வாஸகஸ்ஸ ஸீமாய அஸங்வாஸிகபா⁴வங் அனுபக³ந்த்வா ஏகஸீமாய டி²தஸ்ஸ அந்திமவத்து²ங் அனஜ்ஜா²பன்னத்தா பகதத்தஸ்ஸ பி⁴க்கு²னோ. அனந்தரஸ்ஸபி ஹத்த²பாஸே வசனேன வசீபே⁴த³கரணேன படிக்கே²போ படிக்கோஸோ ருஹதி படிக்கோஸனட்டா²னேயேவ திட்ட²தி, கம்மங் கோபேதீதி அதி⁴ப்பாயோ.
3113.Sasaṃvāseka…pe… bhikkhunoti vuttanayena kammena vā laddhiyā vā asaṃvāsikabhāvaṃ anupagatattā samānasaṃvāsakassa sīmāya asaṃvāsikabhāvaṃ anupagantvā ekasīmāya ṭhitassa antimavatthuṃ anajjhāpannattā pakatattassa bhikkhuno. Anantarassapi hatthapāse vacanena vacībhedakaraṇena paṭikkhepo paṭikkoso ruhati paṭikkosanaṭṭhāneyeva tiṭṭhati, kammaṃ kopetīti adhippāyo.
3114. ச²ஹி ஆகாரேஹீதி (பாசி॰ அட்ட²॰ 438; கங்கா²॰ அட்ட²॰ நிதா³னவண்ணனா) லஜ்ஜிதாய, அஞ்ஞாணதாய, குக்குச்சபகததாய, ஸதிஸம்மோஸாய, அகப்பியேகப்பியஸஞ்ஞிதாய, கப்பியேஅகப்பியஸஞ்ஞிதாயாதி இமேஹி ச²ஹி ஆகாரேஹி. பஞ்ச ஸமணகப்பா ச வுத்தா, பஞ்ச விஸுத்³தி⁴யோ ச வுத்தாதி யோஜனா.
3114.Chahi ākārehīti (pāci. aṭṭha. 438; kaṅkhā. aṭṭha. nidānavaṇṇanā) lajjitāya, aññāṇatāya, kukkuccapakatatāya, satisammosāya, akappiyekappiyasaññitāya, kappiyeakappiyasaññitāyāti imehi chahi ākārehi. Pañca samaṇakappā ca vuttā, pañca visuddhiyo ca vuttāti yojanā.
‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லங் பரிபு⁴ஞ்ஜிதுங், அக்³கி³பரிஜிதங் ஸத்த²பரிஜிதங் நக²பரிஜிதங் அபீ³ஜங் நிப்³ப³ட்டபீ³ஜஞ்ஞேவ பஞ்சம’’ந்தி (சூளவ॰ 250) கு²த்³த³கவத்து²கே அனுஞ்ஞாதா பஞ்ச ஸமணகப்பா நாம. பஞ்ச விஸுத்³தி⁴யோதி பரிவாரே ஏகுத்தரே ‘‘பஞ்ச விஸுத்³தி⁴யோ’’தி இமஸ்ஸ நித்³தே³ஸே ‘‘நிதா³னங் உத்³தி³ஸித்வா அவஸேஸங் ஸுதேன ஸாவேதப்³ப³ங், அயங் பட²மா விஸுத்³தீ⁴’’திஆதி³னா (பரி॰ 325) நயேன த³ஸ்ஸிதா பஞ்ச பாதிமொக்கு²த்³தே³ஸஸங்கா²தா பஞ்ச விஸுத்³தி⁴யோ ச ‘‘ஸுத்துத்³தே³ஸோ பாரிஸுத்³தி⁴உபோஸதோ² அதி⁴ட்டா²னுபோஸதோ² பவாரணா ஸாமக்³கி³உபோஸதோ²யேவ பஞ்சமோ’’தி (பரி॰ 325) ஏவங் வுத்தா பஞ்ச விஸுத்³தி⁴யோ சாதி த்³வேபஞ்சவிஸுத்³தி⁴யோ ‘‘த்³விபஞ்சவிஞ்ஞாணானீ’’திஆதீ³ஸு விய ஸாமஞ்ஞவசனேன ஸங்க³ஹிதா.
‘‘Anujānāmi, bhikkhave, pañcahi samaṇakappehi phalaṃ paribhuñjituṃ, aggiparijitaṃ satthaparijitaṃ nakhaparijitaṃ abījaṃ nibbaṭṭabījaññeva pañcama’’nti (cūḷava. 250) khuddakavatthuke anuññātā pañca samaṇakappā nāma. Pañca visuddhiyoti parivāre ekuttare ‘‘pañca visuddhiyo’’ti imassa niddese ‘‘nidānaṃ uddisitvā avasesaṃ sutena sāvetabbaṃ, ayaṃ paṭhamā visuddhī’’tiādinā (pari. 325) nayena dassitā pañca pātimokkhuddesasaṅkhātā pañca visuddhiyo ca ‘‘suttuddeso pārisuddhiuposatho adhiṭṭhānuposatho pavāraṇā sāmaggiuposathoyeva pañcamo’’ti (pari. 325) evaṃ vuttā pañca visuddhiyo cāti dvepañcavisuddhiyo ‘‘dvipañcaviññāṇānī’’tiādīsu viya sāmaññavacanena saṅgahitā.
3115-7. நிஸ்ஸேஸேன தீ³யதி பஞ்ஞபீயதி எத்த² ஸிக்கா²பத³ந்தி நிதா³னங், தேஸங் தேஸங் ஸிக்கா²பதா³னங் பஞ்ஞத்தியா டா²னபூ⁴தங் வேஸாலீஆதி³. புங் வுச்சதி நிரயோ, தங் க³லதி மத்³த³தி நேரயிகது³க்க²ங் அனுப⁴வதீதி புக்³க³லோ, ஸத்தோ. அரியபுக்³க³லா தங்ஸதி³ஸத்தா, பூ⁴தபுப்³ப³க³தியா வா ‘‘புக்³க³லா’’தி வேதி³தப்³பா³. இத⁴ பனேதே ஸிக்கா²பத³வீதிக்கமஸ்ஸ ஆதி³கம்மிகா அதி⁴ப்பேதா. இதா³னி புக்³க³லனித்³தே³ஸங் வக்க²தி. வஸதி எத்த² ப⁴க³வதோ ஆணாஸங்கா²தா ஸிக்கா²பத³பஞ்ஞத்தி தங் படிச்ச பவத்ததீதி வத்து², தஸ்ஸ தஸ்ஸ புக்³க³லஸ்ஸ ஸிக்கா²பத³பஞ்ஞத்திஹேதுபூ⁴தோ அஜ்ஜா²சாரோ.
3115-7. Nissesena dīyati paññapīyati ettha sikkhāpadanti nidānaṃ, tesaṃ tesaṃ sikkhāpadānaṃ paññattiyā ṭhānabhūtaṃ vesālīādi. Puṃ vuccati nirayo, taṃ galati maddati nerayikadukkhaṃ anubhavatīti puggalo, satto. Ariyapuggalā taṃsadisattā, bhūtapubbagatiyā vā ‘‘puggalā’’ti veditabbā. Idha panete sikkhāpadavītikkamassa ādikammikā adhippetā. Idāni puggalaniddesaṃ vakkhati. Vasati ettha bhagavato āṇāsaṅkhātā sikkhāpadapaññatti taṃ paṭicca pavattatīti vatthu, tassa tassa puggalassa sikkhāpadapaññattihetubhūto ajjhācāro.
விதா⁴னங் விப⁴ஜனங் விதி⁴, பபே⁴தோ³. பஞ்ஞாபீயதி ப⁴க³வதோ ஆணா பகாரேன ஞாபீயதி ஏதாயாதி பஞ்ஞத்தி, பஞ்ஞத்தியா விதி⁴ பபே⁴தோ³ ‘‘பஞ்ஞத்திவிதி⁴’’ந்தி வத்தப்³பே³ ‘‘விதி⁴ங் பஞ்ஞத்தியா’’தி கா³தா²ப³ந்த⁴வஸேன அஸமத்த²னித்³தே³ஸோ. ஸா பன பஞ்ஞத்திவிதி⁴ பஞ்ஞத்திஅனுபஞ்ஞத்தி அனுப்பன்னபஞ்ஞத்தி ஸப்³ப³த்த²பஞ்ஞத்தி பதே³ஸபஞ்ஞத்தி ஸாதா⁴ரணபஞ்ஞத்தி அஸாதா⁴ரணபஞ்ஞத்தி ஏகதோபஞ்ஞத்தி உப⁴தோபஞ்ஞத்திவஸேன நவவிதா⁴ ஹோதி.
Vidhānaṃ vibhajanaṃ vidhi, pabhedo. Paññāpīyati bhagavato āṇā pakārena ñāpīyati etāyāti paññatti, paññattiyā vidhi pabhedo ‘‘paññattividhi’’nti vattabbe ‘‘vidhiṃ paññattiyā’’ti gāthābandhavasena asamatthaniddeso. Sā pana paññattividhi paññattianupaññatti anuppannapaññatti sabbatthapaññatti padesapaññatti sādhāraṇapaññatti asādhāraṇapaññatti ekatopaññatti ubhatopaññattivasena navavidhā hoti.
‘‘விபத்தி ஆபத்தி அனாபத்தீ’’தி பத³ச்சே²தோ³, விபஜ்ஜந்தி ஏதாய ஸீலாத³யோதி விபத்தி. ஸா பன ஸீலஆசாரதி³ட்டி²ஆஜீவானங் வஸேன சதுப்³பி³தா⁴. ஸா பன உத்³தே³ஸவஸேன ஹெட்டா² த³ஸ்ஸிதாவ. ஆபஜ்ஜந்தி ஏதாய அகுஸலாப்³யாகதபூ⁴தாய ப⁴க³வதோ ஆணாவீதிக்கமந்தி ஆபத்தி. ஸா புப்³ப³பயோகா³தி³வஸேன அனேகப்பபே⁴தா³ ஆபத்தி. அனாபத்தி அஜானநாதி³வஸேன ஆணாய அனதிக்கமனங். ஸமுட்டா²தி ஏதேஹி ஆபத்தீதி ஸமுட்டா²னானி, காயாதி³வஸேன ச²ப்³பி³தா⁴னி ஆபத்திகாரணானி. ஸமுட்டா²னானங் நயோ ஸமுட்டா²னநயோ, தங்.
‘‘Vipatti āpatti anāpattī’’ti padacchedo, vipajjanti etāya sīlādayoti vipatti. Sā pana sīlaācāradiṭṭhiājīvānaṃ vasena catubbidhā. Sā pana uddesavasena heṭṭhā dassitāva. Āpajjanti etāya akusalābyākatabhūtāya bhagavato āṇāvītikkamanti āpatti. Sā pubbapayogādivasena anekappabhedā āpatti. Anāpatti ajānanādivasena āṇāya anatikkamanaṃ. Samuṭṭhāti etehi āpattīti samuṭṭhānāni, kāyādivasena chabbidhāni āpattikāraṇāni. Samuṭṭhānānaṃ nayo samuṭṭhānanayo, taṃ.
வஜ்ஜஞ்ச கம்மஞ்ச கிரியா ச ஸஞ்ஞா ச சித்தஞ்ச ஆணத்தி ச வஜ்ஜகம்மக்ரியாஸஞ்ஞாசித்தாணத்தியோ, தாஸங் விதி⁴ ததா² வுச்சதி, தங். வஜ்ஜவிதி⁴ந்தி ‘‘யஸ்ஸா ஸசித்தகபக்கே² சித்தங் அகுஸலமேவ ஹோதி, அயங் லோகவஜ்ஜா, ஸேஸா பண்ணத்திவஜ்ஜா’’தி (கங்கா²॰ அட்ட²॰ பட²மபாராஜிகவண்ணனா) வுத்தங் வஜ்ஜவிதி⁴ங். கம்மவிதி⁴ந்தி ‘‘ஸப்³பா³ ச காயகம்மவசீகம்மதது³ப⁴யவஸேன திவிதா⁴ ஹொந்தீ’’தி (கங்கா²॰ அட்ட²॰ பட²மபாராஜிகவண்ணனா) த³ஸ்ஸிதங் கம்மவிதி⁴ங் . க்ரியாவிதி⁴ந்தி ‘‘அத்தா²பத்தி கிரியதோ ஸமுட்டா²தி, அத்தி² அகிரியதோ, அத்தி² கிரியாகிரியதோ, அத்தி² ஸியா கிரியதோ ஸியா அகிரியதோ’’திஆதி³னா (கங்கா²॰ அட்ட²॰ பட²மபாராஜிகவண்ணனா) நயேன த³ஸ்ஸிதங் கிரியாவிதி⁴ங். ஸஞ்ஞாவிதி⁴ந்தி ‘‘ஸஞ்ஞாவிமொக்கா²’’திஆதி³னா (கங்கா²॰ அட்ட²॰ பட²மபாராஜிகவண்ணனா) நயேன த³ஸ்ஸிதங் ஸஞ்ஞாவிதி⁴ங்.
Vajjañca kammañca kiriyā ca saññā ca cittañca āṇatti ca vajjakammakriyāsaññācittāṇattiyo, tāsaṃ vidhi tathā vuccati, taṃ. Vajjavidhinti ‘‘yassā sacittakapakkhe cittaṃ akusalameva hoti, ayaṃ lokavajjā, sesā paṇṇattivajjā’’ti (kaṅkhā. aṭṭha. paṭhamapārājikavaṇṇanā) vuttaṃ vajjavidhiṃ. Kammavidhinti ‘‘sabbā ca kāyakammavacīkammatadubhayavasena tividhā hontī’’ti (kaṅkhā. aṭṭha. paṭhamapārājikavaṇṇanā) dassitaṃ kammavidhiṃ . Kriyāvidhinti ‘‘atthāpatti kiriyato samuṭṭhāti, atthi akiriyato, atthi kiriyākiriyato, atthi siyā kiriyato siyā akiriyato’’tiādinā (kaṅkhā. aṭṭha. paṭhamapārājikavaṇṇanā) nayena dassitaṃ kiriyāvidhiṃ. Saññāvidhinti ‘‘saññāvimokkhā’’tiādinā (kaṅkhā. aṭṭha. paṭhamapārājikavaṇṇanā) nayena dassitaṃ saññāvidhiṃ.
சித்தவிதி⁴ந்தி ‘‘ஸப்³பா³பி சித்தவஸேன து³விதா⁴ ஹொந்தி ஸசித்தகா, அசித்தகா சா’’தி (கங்கா²॰ அட்ட²॰ பட²மபாராஜிகவண்ணனா) வுத்தங் சித்தவிதி⁴ங். ஆணத்திவிதி⁴ந்தி ‘‘ஸாணத்திகங் அனாணத்திக’’ந்தி வுத்தங் ஆணத்திவிதி⁴ங். அங்க³விதா⁴னந்தி ஸப்³ப³ஸிக்கா²பதே³ஸு ஆபத்தீனங் வுத்தங் அங்க³விதா⁴னஞ்ச. வேத³னாத்திகங், குஸலத்திகஞ்சாதி யோஜனா. தங் பன ‘‘அகுஸலசித்தங், த்³விசித்தங், திசித்தங், து³க்க²வேத³னங், த்³விவேத³னங், திவேத³ன’’ந்தி தத்த² தத்த² த³ஸ்ஸிதமேவ.
Cittavidhinti ‘‘sabbāpi cittavasena duvidhā honti sacittakā, acittakā cā’’ti (kaṅkhā. aṭṭha. paṭhamapārājikavaṇṇanā) vuttaṃ cittavidhiṃ. Āṇattividhinti ‘‘sāṇattikaṃ anāṇattika’’nti vuttaṃ āṇattividhiṃ. Aṅgavidhānanti sabbasikkhāpadesu āpattīnaṃ vuttaṃ aṅgavidhānañca. Vedanāttikaṃ, kusalattikañcāti yojanā. Taṃ pana ‘‘akusalacittaṃ, dvicittaṃ, ticittaṃ, dukkhavedanaṃ, dvivedanaṃ, tivedana’’nti tattha tattha dassitameva.
ஸத்தரஸவித⁴ங் ஏதங் லக்க²ணந்தி யதா²வுத்தனிதா³னாதி³ஸத்தரஸப்பபே⁴த³ங் ஸப்³ப³ஸிக்கா²பதா³னங் ஸாதா⁴ரணலக்க²ணங். த³ஸ்ஸெத்வாதி பகாஸெத்வா. பு³தோ⁴ வினயகுஸலோ. தத்த² தத்த² ஸிக்கா²பதே³ஸு யதா²ரஹங் யோஜெய்யாதி ஸம்ப³ந்தோ⁴.
Sattarasavidhaṃetaṃ lakkhaṇanti yathāvuttanidānādisattarasappabhedaṃ sabbasikkhāpadānaṃ sādhāraṇalakkhaṇaṃ. Dassetvāti pakāsetvā. Budho vinayakusalo. Tattha tattha sikkhāpadesu yathārahaṃ yojeyyāti sambandho.
3118. இமேஸு ஸத்தரஸஸு லக்க²ணேஸு நிதா³னபுக்³க³லே தாவ நித்³தி³ஸிதுமாஹ ‘‘நிதா³ன’’ந்திஆதி³. தத்தா²தி தேஸு ஸத்தரஸஸு ஸாதா⁴ரணலக்க²ணேஸு, நித்³தா⁴ரணே சேதங் பு⁴ம்மங். நிதா³னந்தி நித்³தா⁴ரிதப்³ப³த³ஸ்ஸனங். ‘‘புர’’ந்தி இத³ங் ‘‘வேஸாலீ’’திஆதி³பதே³ஹி பச்சேகங் யோஜேதப்³ப³ங். ஸக்கப⁴க்³கா³தி ஏதேஹி ஜனபத³வாசீஹி ஸத்³தே³ஹி டா²னநிஸ்ஸிதா நாக³ராவ க³ஹேதப்³பா³. தானி ச ‘‘ஸக்கேஸு விஹரதி கபிலவத்து²ஸ்மிங், ப⁴க்³கே³ஸு விஹரதி ஸுஸுமாரகி³ரே’’தி தத்த² தத்த² ஸிக்கா²பத³னிதா³னே நித³ஸ்ஸிதானேவ.
3118. Imesu sattarasasu lakkhaṇesu nidānapuggale tāva niddisitumāha ‘‘nidāna’’ntiādi. Tatthāti tesu sattarasasu sādhāraṇalakkhaṇesu, niddhāraṇe cetaṃ bhummaṃ. Nidānanti niddhāritabbadassanaṃ. ‘‘Pura’’nti idaṃ ‘‘vesālī’’tiādipadehi paccekaṃ yojetabbaṃ. Sakkabhaggāti etehi janapadavācīhi saddehi ṭhānanissitā nāgarāva gahetabbā. Tāni ca ‘‘sakkesu viharati kapilavatthusmiṃ, bhaggesu viharati susumāragire’’ti tattha tattha sikkhāpadanidāne nidassitāneva.
3119. ‘‘த³ஸ வேஸாலியா’’திஆதீ³னங் அத்த²வினிச்ச²யோ உத்தரே ஆவி ப⁴விஸ்ஸதி. கி³ரிப்³ப³ஜேதி ராஜக³ஹனக³ரே. தஞ்ஹி ஸமந்தா டி²தேஹி இஸிகி³லிஆதீ³ஹி பஞ்சஹி பப்³ப³தேஹி வஜஸதி³ஸந்தி ‘‘கி³ரிப்³ப³ஜ’’ந்தி வுச்சதி.
3119.‘‘Dasa vesāliyā’’tiādīnaṃ atthavinicchayo uttare āvi bhavissati. Giribbajeti rājagahanagare. Tañhi samantā ṭhitehi isigiliādīhi pañcahi pabbatehi vajasadisanti ‘‘giribbaja’’nti vuccati.
3121. பி⁴க்கூ²னங் பாதிமொக்க²ஸ்மிங் ஸுதி³ன்னத⁴னியாத³யோ தேவீஸதிவிதா⁴ ஆதி³கம்மிகபுக்³க³லா வுத்தாதி யோஜனா.
3121. Bhikkhūnaṃ pātimokkhasmiṃ sudinnadhaniyādayo tevīsatividhā ādikammikapuggalā vuttāti yojanā.
3122. உப⁴யபாதிமொக்கே² ஆக³தா தே ஸப்³பே³ ஆதி³கம்மிகபுக்³க³லா பரிபிண்டி³தா திங்ஸ ப⁴வந்தீதி யோஜனா. வத்து²ஆதீ³னங் வினிச்ச²யோ உத்தரே வக்க²மானத்தா இத⁴ ந வுத்தோ. நனு ச நிதா³னபுக்³க³லவினிச்ச²யம்பி தத்த² வக்க²தீதி ஸோ இத⁴ கஸ்மா வுத்தோதி? நாயங் தோ³ஸோ, இமஸ்ஸ பகரணத்தா இதா⁴பி வத்தப்³போ³தி. யதி³ ஏவங் வத்து²ஆதி³வினிச்ச²யோபி இத⁴ வத்தப்³போ³ ஸியா, ஸோ கஸ்மா ந வுத்தோதி? ஏகயோக³னித்³தி³ட்ட²ஸ்ஸ இமஸ்ஸ வசனேன ஸோபி வுத்தோயேவ ஹோதீதி ஏகதே³ஸத³ஸ்ஸனவஸேன ஸங்கி²த்தோதி த³ட்ட²ப்³போ³.
3122. Ubhayapātimokkhe āgatā te sabbe ādikammikapuggalā paripiṇḍitā tiṃsa bhavantīti yojanā. Vatthuādīnaṃ vinicchayo uttare vakkhamānattā idha na vutto. Nanu ca nidānapuggalavinicchayampi tattha vakkhatīti so idha kasmā vuttoti? Nāyaṃ doso, imassa pakaraṇattā idhāpi vattabboti. Yadi evaṃ vatthuādivinicchayopi idha vattabbo siyā, so kasmā na vuttoti? Ekayoganiddiṭṭhassa imassa vacanena sopi vuttoyeva hotīti ekadesadassanavasena saṃkhittoti daṭṭhabbo.
3123. யோ ஏனங் தருங் ஜானாதி, ஸோ பஞ்ஞத்திங் அஸேஸதோ ஜானாதீதி ஸம்ப³ந்தோ⁴. எத்த² ‘‘ஏனங் தரு’’ந்தி இமினா நிதா³னாதி³ஸத்தரஸப்பகாரங் ஸப்³ப³ஸிக்கா²பத³ஸாதா⁴ரணலக்க²ணஸமுதா³யங் ரூபகேன த³ஸ்ஸேதி. கிங் விஸிட்ட²ங் தருந்தி ஆஹ ‘‘திமூல’’ந்திஆதி³.
3123. Yo enaṃ taruṃ jānāti, so paññattiṃ asesato jānātīti sambandho. Ettha ‘‘enaṃ taru’’nti iminā nidānādisattarasappakāraṃ sabbasikkhāpadasādhāraṇalakkhaṇasamudāyaṃ rūpakena dasseti. Kiṃ visiṭṭhaṃ tarunti āha ‘‘timūla’’ntiādi.
தத்த² திமூலந்தி நிதா³னபுக்³க³லவத்து²ஸங்கா²தானி தீணி மூலானி ஏதஸ்ஸாதி திமூலங். நவபத்தந்தி நவவித⁴பண்ணத்திஸங்கா²தானி பத்தானி ஏதஸ்ஸாதி நவபத்தங். த்³வயங்குரந்தி லோகவஜ்ஜபண்ணத்திவஜ்ஜஸங்கா²தா த்³வே அங்குரா ஏதஸ்ஸாதி த்³வயங்குரங். ‘‘த்³விஅங்குர’’ந்தி வத்தப்³பே³ இ-காரஸ்ஸ அயாதே³ஸங் கத்வா ‘‘த்³வயங்குர’’ந்தி வுத்தங். ஸத்தப²லந்தி ஆணத்திஆபத்திஅனாபத்திவிபத்திஸஞ்ஞாவேத³னாகுஸலத்திகஸங்கா²தானி ஸத்த ப²லானி ஏதஸ்ஸாதி ஸத்தப²லங். ச²புப்ப²ந்தி ச²ஸமுட்டா²னஸங்கா²தானி புப்பா²னி ஏதஸ்ஸாதி ச²புப்ப²ங். த்³விப்பப⁴வந்தி சித்தகம்மஸங்கா²தா த்³வே பப⁴வா ஏதஸ்ஸாதி த்³விப்பப⁴வங். த்³விஸாக²ந்தி கிரியஅங்க³ஸங்கா²தா த்³வே ஸாகா² ஏதஸ்ஸாதி த்³விஸாக²ங். ஏனங் தருங் யோ ஜானாதீதி யோ வுத்தோ பி⁴க்கு² வுத்தஸரூபஸாதா⁴ரணஸத்தரஸலக்க²ணராஸிவினிச்ச²யஸங்கா²ததருங் ஜானாதி. ஸோதி ஸோ பி⁴க்கு². பஞ்ஞத்திந்தி வினயபிடகங். அஸேஸதோதி ஸப்³ப³ஸோ.
Tattha timūlanti nidānapuggalavatthusaṅkhātāni tīṇi mūlāni etassāti timūlaṃ. Navapattanti navavidhapaṇṇattisaṅkhātāni pattāni etassāti navapattaṃ. Dvayaṅkuranti lokavajjapaṇṇattivajjasaṅkhātā dve aṅkurā etassāti dvayaṅkuraṃ. ‘‘Dviaṅkura’’nti vattabbe i-kārassa ayādesaṃ katvā ‘‘dvayaṅkura’’nti vuttaṃ. Sattaphalanti āṇattiāpattianāpattivipattisaññāvedanākusalattikasaṅkhātāni satta phalāni etassāti sattaphalaṃ. Chapupphanti chasamuṭṭhānasaṅkhātāni pupphāni etassāti chapupphaṃ. Dvippabhavanti cittakammasaṅkhātā dve pabhavā etassāti dvippabhavaṃ. Dvisākhanti kiriyaaṅgasaṅkhātā dve sākhā etassāti dvisākhaṃ. Enaṃ taruṃ yo jānātīti yo vutto bhikkhu vuttasarūpasādhāraṇasattarasalakkhaṇarāsivinicchayasaṅkhātataruṃ jānāti. Soti so bhikkhu. Paññattinti vinayapiṭakaṃ. Asesatoti sabbaso.
3124. இதி ஏவங் மது⁴ரபத³த்த²ங் அனாகுலங் பரமங் உத்தமங் இமங் வினிச்ச²யங் யோ பட²தி வாசுக்³க³தங் கரொந்தோ பரியாபுணாதி, க³ருஸந்திகே ஸாது⁴கங் ஸுணாதி, பரிபுச்ச²தே ச அத்த²ங் பரிபுச்ச²தி ச, ஸோ பி⁴க்கு² வினய வினிச்ச²யே உபாலிஸமோ ப⁴வதி வினயத⁴ரானங் ஏதத³க்³க³ட்டா²னே நிக்கி²த்தேன உபாலிமஹாதே²ரேன ஸதி³ஸோ ப⁴வதீதி யோஜனா.
3124.Iti evaṃ madhurapadatthaṃ anākulaṃ paramaṃ uttamaṃ imaṃ vinicchayaṃ yo paṭhati vācuggataṃ karonto pariyāpuṇāti, garusantike sādhukaṃ suṇāti, paripucchate ca atthaṃ paripucchati ca, so bhikkhu vinaya vinicchaye upālisamo bhavati vinayadharānaṃ etadaggaṭṭhāne nikkhittena upālimahātherena sadiso bhavatīti yojanā.
இதி வினயத்த²ஸாரஸந்தீ³பனியா வினயவினிச்ச²யவண்ணனாய
Iti vinayatthasārasandīpaniyā vinayavinicchayavaṇṇanāya
பகிண்ணகவினிச்ச²யகதா²வண்ணனா நிட்டி²தா.
Pakiṇṇakavinicchayakathāvaṇṇanā niṭṭhitā.
