| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৮৪. পক্খগণনাদিউগ্গহণানুজাননা
84. Pakkhagaṇanādiuggahaṇānujānanā
১৫৬. অথ খো ভগৰা চোদনাৰত্থুস্মিং যথাভিরন্তং ৰিহরিত্ৰা পুনদেৰ রাজগহং পচ্চাগঞ্ছি।
156. Atha kho bhagavā codanāvatthusmiṃ yathābhirantaṃ viharitvā punadeva rājagahaṃ paccāgañchi.
তেন খো পন সমযেন মনুস্সা ভিক্খূ পিণ্ডায চরন্তে পুচ্ছন্তি – ‘‘কতিমী, ভন্তে, পক্খস্সা’’তি? ভিক্খূ এৰমাহংসু – ‘‘ন খো মযং, আৰুসো, জানামা’’তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘পক্খগণনমত্তমম্পিমে সমণা সক্যপুত্তিযা ন জানন্তি, কিং পনিমে অঞ্ঞং কিঞ্চি কল্যাণং জানিস্সন্তী’’তি? ভগৰতো এতমত্থং আরোচেসুং। অনুজানামি, ভিক্খৰে, পক্খগণনং উগ্গহেতুন্তি। অথ খো ভিক্খূনং এতদহোসি – ‘‘কেন নু খো পক্খগণনা উগ্গহেতব্বা’’তি? ভগৰতো এতমত্থং আরোচেসুং। অনুজানামি, ভিক্খৰে, সব্বেহেৰ পক্খগণনং উগ্গহেতুন্তি।
Tena kho pana samayena manussā bhikkhū piṇḍāya carante pucchanti – ‘‘katimī, bhante, pakkhassā’’ti? Bhikkhū evamāhaṃsu – ‘‘na kho mayaṃ, āvuso, jānāmā’’ti. Manussā ujjhāyanti khiyyanti vipācenti – ‘‘pakkhagaṇanamattamampime samaṇā sakyaputtiyā na jānanti, kiṃ panime aññaṃ kiñci kalyāṇaṃ jānissantī’’ti? Bhagavato etamatthaṃ ārocesuṃ. Anujānāmi, bhikkhave, pakkhagaṇanaṃ uggahetunti. Atha kho bhikkhūnaṃ etadahosi – ‘‘kena nu kho pakkhagaṇanā uggahetabbā’’ti? Bhagavato etamatthaṃ ārocesuṃ. Anujānāmi, bhikkhave, sabbeheva pakkhagaṇanaṃ uggahetunti.
১৫৭. তেন খো পন সমযেন মনুস্সা ভিক্খূ পিণ্ডায চরন্তে পুচ্ছন্তি – ‘‘কীৰতিকা, ভন্তে, ভিক্খূ’’তি? ভিক্খূ এৰমাহংসু – ‘‘ন খো মযং, আৰুসো, জানামা’’তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘অঞ্ঞমঞ্ঞম্পিমে সমণা সক্যপুত্তিযা ন জানন্তি, কিং পনিমে অঞ্ঞং কিঞ্চি কল্যাণং জানিস্সন্তী’’তি? ভগৰতো এতমত্থং আরোচেসুং। অনুজানামি, ভিক্খৰে, ভিক্খূ গণেতুন্তি।
157. Tena kho pana samayena manussā bhikkhū piṇḍāya carante pucchanti – ‘‘kīvatikā, bhante, bhikkhū’’ti? Bhikkhū evamāhaṃsu – ‘‘na kho mayaṃ, āvuso, jānāmā’’ti. Manussā ujjhāyanti khiyyanti vipācenti – ‘‘aññamaññampime samaṇā sakyaputtiyā na jānanti, kiṃ panime aññaṃ kiñci kalyāṇaṃ jānissantī’’ti? Bhagavato etamatthaṃ ārocesuṃ. Anujānāmi, bhikkhave, bhikkhū gaṇetunti.
অথ খো ভিক্খূনং এতদহোসি – ‘‘কদা নু খো ভিক্খূ গণেতব্বা’’তি? ভগৰতো এতমত্থং আরোচেসুং। অনুজানামি, ভিক্খৰে, তদহুপোসথে নামগ্গেন 1 গণেতুং, সলাকং ৰা গাহেতুন্তি।
Atha kho bhikkhūnaṃ etadahosi – ‘‘kadā nu kho bhikkhū gaṇetabbā’’ti? Bhagavato etamatthaṃ ārocesuṃ. Anujānāmi, bhikkhave, tadahuposathe nāmaggena 2 gaṇetuṃ, salākaṃ vā gāhetunti.
১৫৮. তেন খো পন সমযেন ভিক্খূ অজানন্তা অজ্জুপোসথোতি দূরং গামং পিণ্ডায চরন্তি। তে উদ্দিস্সমানেপি পাতিমোক্খে আগচ্ছন্তি, উদ্দিট্ঠমত্তেপি আগচ্ছন্তি। ভগৰতো এতমত্থং আরোচেসুং। অনুজানামি, ভিক্খৰে, আরোচেতুং ‘অজ্জুপোসথো’তি।
158. Tena kho pana samayena bhikkhū ajānantā ajjuposathoti dūraṃ gāmaṃ piṇḍāya caranti. Te uddissamānepi pātimokkhe āgacchanti, uddiṭṭhamattepi āgacchanti. Bhagavato etamatthaṃ ārocesuṃ. Anujānāmi, bhikkhave, ārocetuṃ ‘ajjuposatho’ti.
অথ খো ভিক্খূনং এতদহোসি – ‘‘কেন নু খো আরোচেতব্বো’’তি? ভগৰতো এতমত্থং আরোচেসুং। অনুজানামি, ভিক্খৰে, থেরেন ভিক্খুনা কালৰতো আরোচেতুন্তি।
Atha kho bhikkhūnaṃ etadahosi – ‘‘kena nu kho ārocetabbo’’ti? Bhagavato etamatthaṃ ārocesuṃ. Anujānāmi, bhikkhave, therena bhikkhunā kālavato ārocetunti.
তেন খো পন সমযেন অঞ্ঞতরো থেরো কালৰতো নস্সরতি। ভগৰতো এতমত্থং আরোচেসুং। অনুজানামি, ভিক্খৰে, ভত্তকালেপি আরোচেতুন্তি।
Tena kho pana samayena aññataro thero kālavato nassarati. Bhagavato etamatthaṃ ārocesuṃ. Anujānāmi, bhikkhave, bhattakālepi ārocetunti.
ভত্তকালেপি নস্সরতি। ভগৰতো এতমত্থং আরোচেসুং। অনুজানামি, ভিক্খৰে, যং কালং সরতি, তং কালং আরোচেতুন্তি।
Bhattakālepi nassarati. Bhagavato etamatthaṃ ārocesuṃ. Anujānāmi, bhikkhave, yaṃ kālaṃ sarati, taṃ kālaṃ ārocetunti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পক্খগণনাদিউগ্গহণানুজাননকথা • Pakkhagaṇanādiuggahaṇānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পক্খগণনাদিউগ্গহণানুজাননকথাৰণ্ণনা • Pakkhagaṇanādiuggahaṇānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পক্খগণনাদিউগ্গহণানুজাননকথাদিৰণ্ণনা • Pakkhagaṇanādiuggahaṇānujānanakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮৪. পক্খগণনাদিউগ্গহণানুজাননকথা • 84. Pakkhagaṇanādiuggahaṇānujānanakathā
