| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၈၄. ပက္ခဂဏနာဒိဥဂ္ဂဟဏာနုဇာနနာ
84. Pakkhagaṇanādiuggahaṇānujānanā
၁၅၆. အထ ခော ဘဂဝာ စောဒနာဝတ္ထုသ္မိံ ယထာဘိရန္တံ ဝိဟရိတ္ဝာ ပုနဒေဝ ရာဇဂဟံ ပစ္စာဂဉ္ဆိ။
156. Atha kho bhagavā codanāvatthusmiṃ yathābhirantaṃ viharitvā punadeva rājagahaṃ paccāgañchi.
တေန ခော ပန သမယေန မနုသ္သာ ဘိက္ခူ ပိဏ္ဍာယ စရန္တေ ပုစ္ဆန္တိ – ‘‘ကတိမီ, ဘန္တေ, ပက္ခသ္သာ’’တိ? ဘိက္ခူ ဧဝမာဟံသု – ‘‘န ခော မယံ, အာဝုသော, ဇာနာမာ’’တိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ပက္ခဂဏနမတ္တမမ္ပိမေ သမဏာ သက္ယပုတ္တိယာ န ဇာနန္တိ, ကိံ ပနိမေ အညံ ကိဉ္စိ ကလ္ယာဏံ ဇာနိသ္သန္တီ’’တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ပက္ခဂဏနံ ဥဂ္ဂဟေတုန္တိ။ အထ ခော ဘိက္ခူနံ ဧတဒဟောသိ – ‘‘ကေန နု ခော ပက္ခဂဏနာ ဥဂ္ဂဟေတဗ္ဗာ’’တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, သဗ္ဗေဟေဝ ပက္ခဂဏနံ ဥဂ္ဂဟေတုန္တိ။
Tena kho pana samayena manussā bhikkhū piṇḍāya carante pucchanti – ‘‘katimī, bhante, pakkhassā’’ti? Bhikkhū evamāhaṃsu – ‘‘na kho mayaṃ, āvuso, jānāmā’’ti. Manussā ujjhāyanti khiyyanti vipācenti – ‘‘pakkhagaṇanamattamampime samaṇā sakyaputtiyā na jānanti, kiṃ panime aññaṃ kiñci kalyāṇaṃ jānissantī’’ti? Bhagavato etamatthaṃ ārocesuṃ. Anujānāmi, bhikkhave, pakkhagaṇanaṃ uggahetunti. Atha kho bhikkhūnaṃ etadahosi – ‘‘kena nu kho pakkhagaṇanā uggahetabbā’’ti? Bhagavato etamatthaṃ ārocesuṃ. Anujānāmi, bhikkhave, sabbeheva pakkhagaṇanaṃ uggahetunti.
၁၅၇. တေန ခော ပန သမယေန မနုသ္သာ ဘိက္ခူ ပိဏ္ဍာယ စရန္တေ ပုစ္ဆန္တိ – ‘‘ကီဝတိကာ, ဘန္တေ, ဘိက္ခူ’’တိ? ဘိက္ခူ ဧဝမာဟံသု – ‘‘န ခော မယံ, အာဝုသော, ဇာနာမာ’’တိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘အညမညမ္ပိမေ သမဏာ သက္ယပုတ္တိယာ န ဇာနန္တိ, ကိံ ပနိမေ အညံ ကိဉ္စိ ကလ္ယာဏံ ဇာနိသ္သန္တီ’’တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဘိက္ခူ ဂဏေတုန္တိ။
157. Tena kho pana samayena manussā bhikkhū piṇḍāya carante pucchanti – ‘‘kīvatikā, bhante, bhikkhū’’ti? Bhikkhū evamāhaṃsu – ‘‘na kho mayaṃ, āvuso, jānāmā’’ti. Manussā ujjhāyanti khiyyanti vipācenti – ‘‘aññamaññampime samaṇā sakyaputtiyā na jānanti, kiṃ panime aññaṃ kiñci kalyāṇaṃ jānissantī’’ti? Bhagavato etamatthaṃ ārocesuṃ. Anujānāmi, bhikkhave, bhikkhū gaṇetunti.
အထ ခော ဘိက္ခူနံ ဧတဒဟောသိ – ‘‘ကဒာ နု ခော ဘိက္ခူ ဂဏေတဗ္ဗာ’’တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, တဒဟုပောသထေ နာမဂ္ဂေန 1 ဂဏေတုံ, သလာကံ ဝာ ဂာဟေတုန္တိ။
Atha kho bhikkhūnaṃ etadahosi – ‘‘kadā nu kho bhikkhū gaṇetabbā’’ti? Bhagavato etamatthaṃ ārocesuṃ. Anujānāmi, bhikkhave, tadahuposathe nāmaggena 2 gaṇetuṃ, salākaṃ vā gāhetunti.
၁၅၈. တေန ခော ပန သမယေန ဘိက္ခူ အဇာနန္တာ အဇ္ဇုပောသထောတိ ဒူရံ ဂာမံ ပိဏ္ဍာယ စရန္တိ။ တေ ဥဒ္ဒိသ္သမာနေပိ ပာတိမောက္ခေ အာဂစ္ဆန္တိ, ဥဒ္ဒိဋ္ဌမတ္တေပိ အာဂစ္ဆန္တိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, အာရောစေတုံ ‘အဇ္ဇုပောသထော’တိ။
158. Tena kho pana samayena bhikkhū ajānantā ajjuposathoti dūraṃ gāmaṃ piṇḍāya caranti. Te uddissamānepi pātimokkhe āgacchanti, uddiṭṭhamattepi āgacchanti. Bhagavato etamatthaṃ ārocesuṃ. Anujānāmi, bhikkhave, ārocetuṃ ‘ajjuposatho’ti.
အထ ခော ဘိက္ခူနံ ဧတဒဟောသိ – ‘‘ကေန နု ခော အာရောစေတဗ္ဗော’’တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ထေရေန ဘိက္ခုနာ ကာလဝတော အာရောစေတုန္တိ။
Atha kho bhikkhūnaṃ etadahosi – ‘‘kena nu kho ārocetabbo’’ti? Bhagavato etamatthaṃ ārocesuṃ. Anujānāmi, bhikkhave, therena bhikkhunā kālavato ārocetunti.
တေန ခော ပန သမယေန အညတရော ထေရော ကာလဝတော နသ္သရတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဘတ္တကာလေပိ အာရောစေတုန္တိ။
Tena kho pana samayena aññataro thero kālavato nassarati. Bhagavato etamatthaṃ ārocesuṃ. Anujānāmi, bhikkhave, bhattakālepi ārocetunti.
ဘတ္တကာလေပိ နသ္သရတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ယံ ကာလံ သရတိ, တံ ကာလံ အာရောစေတုန္တိ။
Bhattakālepi nassarati. Bhagavato etamatthaṃ ārocesuṃ. Anujānāmi, bhikkhave, yaṃ kālaṃ sarati, taṃ kālaṃ ārocetunti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ပက္ခဂဏနာဒိဥဂ္ဂဟဏာနုဇာနနကထာ • Pakkhagaṇanādiuggahaṇānujānanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပက္ခဂဏနာဒိဥဂ္ဂဟဏာနုဇာနနကထာဝဏ္ဏနာ • Pakkhagaṇanādiuggahaṇānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပက္ခဂဏနာဒိဥဂ္ဂဟဏာနုဇာနနကထာဒိဝဏ္ဏနာ • Pakkhagaṇanādiuggahaṇānujānanakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၈၄. ပက္ခဂဏနာဒိဥဂ္ဂဟဏာနုဇာနနကထာ • 84. Pakkhagaṇanādiuggahaṇānujānanakathā
