| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
84. පක්‌ඛගණනාදිඋග්‌ගහණානුජානනා
84. Pakkhagaṇanādiuggahaṇānujānanā
156. අථ ඛො භගවා චොදනාවත්‌ථුස්‌මිං යථාභිරන්‌තං විහරිත්‌වා පුනදෙව රාජගහං පච්‌චාගඤ්‌ඡි.
156. Atha kho bhagavā codanāvatthusmiṃ yathābhirantaṃ viharitvā punadeva rājagahaṃ paccāgañchi.
තෙන ඛො පන සමයෙන මනුස්‌සා භික්‌ඛූ පිණ්‌ඩාය චරන්‌තෙ පුච්‌ඡන්‌ති – ‘‘කතිමී, භන්‌තෙ, පක්‌ඛස්‌සා’’ති? භික්‌ඛූ එවමාහංසු – ‘‘න ඛො මයං, ආවුසො, ජානාමා’’ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘පක්‌ඛගණනමත්‌තමම්‌පිමෙ සමණා සක්‍යපුත්‌තියා න ජානන්‌ති, කිං පනිමෙ අඤ්‌ඤං කිඤ්‌චි කල්‍යාණං ජානිස්‌සන්‌තී’’ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, පක්‌ඛගණනං උග්‌ගහෙතුන්‌ති. අථ ඛො භික්‌ඛූනං එතදහොසි – ‘‘කෙන නු ඛො පක්‌ඛගණනා උග්‌ගහෙතබ්‌බා’’ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, සබ්‌බෙහෙව පක්‌ඛගණනං උග්‌ගහෙතුන්‌ති.
Tena kho pana samayena manussā bhikkhū piṇḍāya carante pucchanti – ‘‘katimī, bhante, pakkhassā’’ti? Bhikkhū evamāhaṃsu – ‘‘na kho mayaṃ, āvuso, jānāmā’’ti. Manussā ujjhāyanti khiyyanti vipācenti – ‘‘pakkhagaṇanamattamampime samaṇā sakyaputtiyā na jānanti, kiṃ panime aññaṃ kiñci kalyāṇaṃ jānissantī’’ti? Bhagavato etamatthaṃ ārocesuṃ. Anujānāmi, bhikkhave, pakkhagaṇanaṃ uggahetunti. Atha kho bhikkhūnaṃ etadahosi – ‘‘kena nu kho pakkhagaṇanā uggahetabbā’’ti? Bhagavato etamatthaṃ ārocesuṃ. Anujānāmi, bhikkhave, sabbeheva pakkhagaṇanaṃ uggahetunti.
157. තෙන ඛො පන සමයෙන මනුස්‌සා භික්‌ඛූ පිණ්‌ඩාය චරන්‌තෙ පුච්‌ඡන්‌ති – ‘‘කීවතිකා, භන්‌තෙ, භික්‌ඛූ’’ති? භික්‌ඛූ එවමාහංසු – ‘‘න ඛො මයං, ආවුසො, ජානාමා’’ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘අඤ්‌ඤමඤ්‌ඤම්‌පිමෙ සමණා සක්‍යපුත්‌තියා න ජානන්‌ති, කිං පනිමෙ අඤ්‌ඤං කිඤ්‌චි කල්‍යාණං ජානිස්‌සන්‌තී’’ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, භික්‌ඛූ ගණෙතුන්‌ති.
157. Tena kho pana samayena manussā bhikkhū piṇḍāya carante pucchanti – ‘‘kīvatikā, bhante, bhikkhū’’ti? Bhikkhū evamāhaṃsu – ‘‘na kho mayaṃ, āvuso, jānāmā’’ti. Manussā ujjhāyanti khiyyanti vipācenti – ‘‘aññamaññampime samaṇā sakyaputtiyā na jānanti, kiṃ panime aññaṃ kiñci kalyāṇaṃ jānissantī’’ti? Bhagavato etamatthaṃ ārocesuṃ. Anujānāmi, bhikkhave, bhikkhū gaṇetunti.
අථ ඛො භික්‌ඛූනං එතදහොසි – ‘‘කදා නු ඛො භික්‌ඛූ ගණෙතබ්‌බා’’ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, තදහුපොසථෙ නාමග්‌ගෙන 1 ගණෙතුං, සලාකං වා ගාහෙතුන්‌ති.
Atha kho bhikkhūnaṃ etadahosi – ‘‘kadā nu kho bhikkhū gaṇetabbā’’ti? Bhagavato etamatthaṃ ārocesuṃ. Anujānāmi, bhikkhave, tadahuposathe nāmaggena 2 gaṇetuṃ, salākaṃ vā gāhetunti.
158. තෙන ඛො පන සමයෙන භික්‌ඛූ අජානන්‌තා අජ්‌ජුපොසථොති දූරං ගාමං පිණ්‌ඩාය චරන්‌ති. තෙ උද්‌දිස්‌සමානෙපි පාතිමොක්‌ඛෙ ආගච්‌ඡන්‌ති, උද්‌දිට්‌ඨමත්‌තෙපි ආගච්‌ඡන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ආරොචෙතුං ‘අජ්‌ජුපොසථො’ති.
158. Tena kho pana samayena bhikkhū ajānantā ajjuposathoti dūraṃ gāmaṃ piṇḍāya caranti. Te uddissamānepi pātimokkhe āgacchanti, uddiṭṭhamattepi āgacchanti. Bhagavato etamatthaṃ ārocesuṃ. Anujānāmi, bhikkhave, ārocetuṃ ‘ajjuposatho’ti.
අථ ඛො භික්‌ඛූනං එතදහොසි – ‘‘කෙන නු ඛො ආරොචෙතබ්‌බො’’ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, ථෙරෙන භික්‌ඛුනා කාලවතො ආරොචෙතුන්‌ති.
Atha kho bhikkhūnaṃ etadahosi – ‘‘kena nu kho ārocetabbo’’ti? Bhagavato etamatthaṃ ārocesuṃ. Anujānāmi, bhikkhave, therena bhikkhunā kālavato ārocetunti.
තෙන ඛො පන සමයෙන අඤ්‌ඤතරො ථෙරො කාලවතො නස්‌සරති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, භත්‌තකාලෙපි ආරොචෙතුන්‌ති.
Tena kho pana samayena aññataro thero kālavato nassarati. Bhagavato etamatthaṃ ārocesuṃ. Anujānāmi, bhikkhave, bhattakālepi ārocetunti.
භත්‌තකාලෙපි නස්‌සරති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, යං කාලං සරති, තං කාලං ආරොචෙතුන්‌ති.
Bhattakālepi nassarati. Bhagavato etamatthaṃ ārocesuṃ. Anujānāmi, bhikkhave, yaṃ kālaṃ sarati, taṃ kālaṃ ārocetunti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පක්‌ඛගණනාදිඋග්‌ගහණානුජානනකථා • Pakkhagaṇanādiuggahaṇānujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පක්‌ඛගණනාදිඋග්‌ගහණානුජානනකථාවණ්‌ණනා • Pakkhagaṇanādiuggahaṇānujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පක්‌ඛගණනාදිඋග්‌ගහණානුජානනකථාදිවණ්‌ණනා • Pakkhagaṇanādiuggahaṇānujānanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 84. පක්‌ඛගණනාදිඋග්‌ගහණානුජානනකථා • 84. Pakkhagaṇanādiuggahaṇānujānanakathā
