| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
८४. पक्खगणनादिउग्गहणानुजाननकथा
84. Pakkhagaṇanādiuggahaṇānujānanakathā
१५६. कतिनं पूरणीति कतिनं तिथीनं पूरणी। को दिवसोति कित्तको दिवसो। अय्यायत्तन्ति अय्येहि भिक्खूहि आयत्तं आबद्धं। संहरित्वाति पुन सलाकं संहरित्वा। अयं पाठो केसुचि अट्ठकथापोत्थकेसु नत्थि। कालवतोति एत्थ वन्तुपच्चयो स्वत्थोति आह ‘‘कालस्सेवा’’ति। एवसद्दो पन सम्भवतो युज्जियति। पगेवाति पातोव।
156.Katinaṃpūraṇīti katinaṃ tithīnaṃ pūraṇī. Ko divasoti kittako divaso. Ayyāyattanti ayyehi bhikkhūhi āyattaṃ ābaddhaṃ. Saṃharitvāti puna salākaṃ saṃharitvā. Ayaṃ pāṭho kesuci aṭṭhakathāpotthakesu natthi. Kālavatoti ettha vantupaccayo svatthoti āha ‘‘kālassevā’’ti. Evasaddo pana sambhavato yujjiyati. Pagevāti pātova.
१५८. सायम्पीति सायन्हेपि। पिसद्देन अञ्ञम्पि सरणकालं सम्पिण्डेति।
158.Sāyampīti sāyanhepi. Pisaddena aññampi saraṇakālaṃ sampiṇḍeti.
१५९. आणापेतुन्ति एत्थ अनाणापेतब्बभिक्खू अपनेत्वा आणापेतब्बभिक्खू दस्सेतुं वुत्तं ‘‘किञ्चि कम्म’’न्तिआदि। सदाकालमेव किञ्चि कम्मं करोन्तोति योजना। धम्मकथिकादीसूतिआदिसद्देन गणवाचकादयो सङ्गण्हाति। वारेनाति परियायेन। सम्मुञ्चनिन्ति यट्ठिसम्मुञ्चनिं वा मुट्ठिसम्मुञ्चनिं वा। समं, सुट्ठु वा मुञ्चति सोधेति इमायाति सम्मुञ्चनी, तालुजो पठमो। तम्पीति साखाभङ्गम्पि।
159.Āṇāpetunti ettha anāṇāpetabbabhikkhū apanetvā āṇāpetabbabhikkhū dassetuṃ vuttaṃ ‘‘kiñci kamma’’ntiādi. Sadākālameva kiñci kammaṃ karontoti yojanā. Dhammakathikādīsūtiādisaddena gaṇavācakādayo saṅgaṇhāti. Vārenāti pariyāyena. Sammuñcaninti yaṭṭhisammuñcaniṃ vā muṭṭhisammuñcaniṃ vā. Samaṃ, suṭṭhu vā muñcati sodheti imāyāti sammuñcanī, tālujo paṭhamo. Tampīti sākhābhaṅgampi.
१६०. वुत्तनयेनेवाति सम्मज्जने वुत्तनयेनेव। पुन आहरितब्बानीति सङ्घिकावासं आसनानि पुन आहरितब्बानि। तट्टिकायोपीति वेणुआदिमया तट्टिकायोपि।
160.Vuttanayenevāti sammajjane vuttanayeneva. Puna āharitabbānīti saṅghikāvāsaṃ āsanāni puna āharitabbāni. Taṭṭikāyopīti veṇuādimayā taṭṭikāyopi.
१६१. कपल्लिका वाति कपालेसु परियापन्ना पदीपकपाला वा। तन्ति तेलादिं। परियेसितब्बानीति अनवज्जपरियेसनेन परियेसितब्बानि।
161.Kapallikā vāti kapālesu pariyāpannā padīpakapālā vā. Tanti telādiṃ. Pariyesitabbānīti anavajjapariyesanena pariyesitabbāni.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi
८४. पक्खगणनादिउग्गहणानुजानना • 84. Pakkhagaṇanādiuggahaṇānujānanā
८५. पुब्बकरणानुजानना • 85. Pubbakaraṇānujānanā
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / पक्खगणनादिउग्गहणानुजाननकथा • Pakkhagaṇanādiuggahaṇānujānanakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पक्खगणनादिउग्गहणानुजाननकथावण्णना • Pakkhagaṇanādiuggahaṇānujānanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / पक्खगणनादिउग्गहणानुजाननकथादिवण्णना • Pakkhagaṇanādiuggahaṇānujānanakathādivaṇṇanā
