| Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā |
ပက္ခဂဏနာဒိဥဂ္ဂဟဏာနုဇာနနကထာ
Pakkhagaṇanādiuggahaṇānujānanakathā
၁၅၆. ကတိမီ ဘန္တေတိ ဧတ္ထ ကတီနံ ပူရဏီတိ ကတိမီ။ ကာလဝတောတိ ကာလသ္သေဝ; ပဂေဝာတိ အတ္ထော။
156.Katimī bhanteti ettha katīnaṃ pūraṇīti katimī. Kālavatoti kālasseva; pagevāti attho.
၁၅၈. ယံ ကာလံ သရတီတိ ဧတ္ထ သာယမ္ပိ ‘‘အဇ္ဇုပောသထော သမန္နာဟရထာ’’တိ အာရောစေတုံ ဝဋ္ဋတိ။
158.Yaṃ kālaṃ saratīti ettha sāyampi ‘‘ajjuposatho samannāharathā’’ti ārocetuṃ vaṭṭati.
၁၅၉. ထေရေန ဘိက္ခုနာ နဝံ ဘိက္ခုံ အာဏာပေတုန္တိ ဧတ္ထာပိ ကိဉ္စိ ကမ္မံ ကရောန္တော ဝာ သဒာကာလမေဝ ဧကော ဝာ ဘာရနိတ္ထရဏကော ဝာ သရဘာဏကဓမ္မကထိကာဒီသု အညတရော ဝာ န ဥပောသထာဂာရသမ္မဇ္ဇနတ္ထံ အာဏာပေတဗ္ဗော, အဝသေသာ ပန ဝာရေန အာဏာပေတဗ္ဗာ။ သစေ အာဏတ္တော သမ္မုဉ္ဇနိံ တာဝကာလိကမ္ပိ န လဘတိ, သာခာဘင္ဂံ ကပ္ပိယံ ကာရေတ္ဝာ သမ္မဇ္ဇိတဗ္ဗံ, တမ္ပိ အလဘန္တသ္သ လဒ္ဓကပ္ပိယံ ဟောတိ။
159.Therena bhikkhunā navaṃ bhikkhuṃ āṇāpetunti etthāpi kiñci kammaṃ karonto vā sadākālameva eko vā bhāranittharaṇako vā sarabhāṇakadhammakathikādīsu aññataro vā na uposathāgārasammajjanatthaṃ āṇāpetabbo, avasesā pana vārena āṇāpetabbā. Sace āṇatto sammuñjaniṃ tāvakālikampi na labhati, sākhābhaṅgaṃ kappiyaṃ kāretvā sammajjitabbaṃ, tampi alabhantassa laddhakappiyaṃ hoti.
၁၆၀. အာသနပညာပနာဏတ္တိယမ္ပိ ဝုတ္တနယေနေဝ အာဏာပေတဗ္ဗော။ အာဏတ္တေန စ သစေ ဥပောသထာဂာရေ အာသနာနိ နတ္ထိ, သင္ဃိကာဝာသတောပိ အာဟရိတ္ဝာ ပညပေတ္ဝာ ပုန အာဟရိတဗ္ဗာနိ။ အာသနေသု အသတိ ကဋသာရကေပိ တဋ္ဋိကာယောပိ ပညပေတုံ ဝဋ္ဋတိ, တဋ္ဋိကာသုပိ အသတိ သာခာဘင္ဂာနိ ကပ္ပိယံ ကာရေတ္ဝာ ပညပေတဗ္ဗာနိ, ကပ္ပိယကာရကံ အလဘန္တသ္သ လဒ္ဓကပ္ပိယံ ဟောတိ။
160. Āsanapaññāpanāṇattiyampi vuttanayeneva āṇāpetabbo. Āṇattena ca sace uposathāgāre āsanāni natthi, saṅghikāvāsatopi āharitvā paññapetvā puna āharitabbāni. Āsanesu asati kaṭasārakepi taṭṭikāyopi paññapetuṃ vaṭṭati, taṭṭikāsupi asati sākhābhaṅgāni kappiyaṃ kāretvā paññapetabbāni, kappiyakārakaṃ alabhantassa laddhakappiyaṃ hoti.
၁၆၁. ပဒီပကရဏေပိ ဝုတ္တနယေနေဝ အာဏာပေတဗ္ဗော။ အာဏာပေန္တေန စ ‘‘အမုကသ္မိံ နာမ ဩကာသေ တေလံ ဝာ ဝဋ္ဋိ ဝာ ကပလ္လိကာ ဝာ အတ္ထိ, တံ ဂဟေတ္ဝာ ကရောဟီ’’တိ ဝတ္တဗ္ဗော။ သစေ တေလာဒီနိ နတ္ထိ, ပရိယေသိတဗ္ဗာနိ, ပရိယေသိတ္ဝာ အလဘန္တသ္သ လဒ္ဓကပ္ပိယံ ဟောတိ။ အပိစ ကပာလေ အဂ္ဂိပိ ဇာလေတဗ္ဗော။
161. Padīpakaraṇepi vuttanayeneva āṇāpetabbo. Āṇāpentena ca ‘‘amukasmiṃ nāma okāse telaṃ vā vaṭṭi vā kapallikā vā atthi, taṃ gahetvā karohī’’ti vattabbo. Sace telādīni natthi, pariyesitabbāni, pariyesitvā alabhantassa laddhakappiyaṃ hoti. Apica kapāle aggipi jāletabbo.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi
၈၄. ပက္ခဂဏနာဒိဥဂ္ဂဟဏာနုဇာနနာ • 84. Pakkhagaṇanādiuggahaṇānujānanā
၈၅. ပုဗ္ဗကရဏာနုဇာနနာ • 85. Pubbakaraṇānujānanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပက္ခဂဏနာဒိဥဂ္ဂဟဏာနုဇာနနကထာဝဏ္ဏနာ • Pakkhagaṇanādiuggahaṇānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပက္ခဂဏနာဒိဥဂ္ဂဟဏာနုဇာနနကထာဒိဝဏ္ဏနာ • Pakkhagaṇanādiuggahaṇānujānanakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၈၄. ပက္ခဂဏနာဒိဥဂ္ဂဟဏာနုဇာနနကထာ • 84. Pakkhagaṇanādiuggahaṇānujānanakathā
