| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
පක්‌ඛගණනාදිඋග්‌ගහණානුජානනකථා
Pakkhagaṇanādiuggahaṇānujānanakathā
156. කතිමී භන්‌තෙති එත්‌ථ කතීනං පූරණීති කතිමී. කාලවතොති කාලස්‌සෙව; පගෙවාති අත්‌ථො.
156.Katimī bhanteti ettha katīnaṃ pūraṇīti katimī. Kālavatoti kālasseva; pagevāti attho.
158. යං කාලං සරතීති එත්‌ථ සායම්‌පි ‘‘අජ්‌ජුපොසථො සමන්‌නාහරථා’’ති ආරොචෙතුං වට්‌ටති.
158.Yaṃ kālaṃ saratīti ettha sāyampi ‘‘ajjuposatho samannāharathā’’ti ārocetuṃ vaṭṭati.
159. ථෙරෙන භික්‌ඛුනා නවං භික්‌ඛුං ආණාපෙතුන්‌ති එත්‌ථාපි කිඤ්‌චි කම්‌මං කරොන්‌තො වා සදාකාලමෙව එකො වා භාරනිත්‌ථරණකො වා සරභාණකධම්‌මකථිකාදීසු අඤ්‌ඤතරො වා න උපොසථාගාරසම්‌මජ්‌ජනත්‌ථං ආණාපෙතබ්‌බො, අවසෙසා පන වාරෙන ආණාපෙතබ්‌බා. සචෙ ආණත්‌තො සම්‌මුඤ්‌ජනිං තාවකාලිකම්‌පි න ලභති, සාඛාභඞ්‌ගං කප්‌පියං කාරෙත්‌වා සම්‌මජ්‌ජිතබ්‌බං, තම්‌පි අලභන්‌තස්‌ස ලද්‌ධකප්‌පියං හොති.
159.Therena bhikkhunā navaṃ bhikkhuṃ āṇāpetunti etthāpi kiñci kammaṃ karonto vā sadākālameva eko vā bhāranittharaṇako vā sarabhāṇakadhammakathikādīsu aññataro vā na uposathāgārasammajjanatthaṃ āṇāpetabbo, avasesā pana vārena āṇāpetabbā. Sace āṇatto sammuñjaniṃ tāvakālikampi na labhati, sākhābhaṅgaṃ kappiyaṃ kāretvā sammajjitabbaṃ, tampi alabhantassa laddhakappiyaṃ hoti.
160. ආසනපඤ්‌ඤාපනාණත්‌තියම්‌පි වුත්‌තනයෙනෙව ආණාපෙතබ්‌බො. ආණත්‌තෙන ච සචෙ උපොසථාගාරෙ ආසනානි නත්‌ථි, සඞ්‌ඝිකාවාසතොපි ආහරිත්‌වා පඤ්‌ඤපෙත්‌වා පුන ආහරිතබ්‌බානි. ආසනෙසු අසති කටසාරකෙපි තට්‌ටිකායොපි පඤ්‌ඤපෙතුං වට්‌ටති, තට්‌ටිකාසුපි අසති සාඛාභඞ්‌ගානි කප්‌පියං කාරෙත්‌වා පඤ්‌ඤපෙතබ්‌බානි, කප්‌පියකාරකං අලභන්‌තස්‌ස ලද්‌ධකප්‌පියං හොති.
160. Āsanapaññāpanāṇattiyampi vuttanayeneva āṇāpetabbo. Āṇattena ca sace uposathāgāre āsanāni natthi, saṅghikāvāsatopi āharitvā paññapetvā puna āharitabbāni. Āsanesu asati kaṭasārakepi taṭṭikāyopi paññapetuṃ vaṭṭati, taṭṭikāsupi asati sākhābhaṅgāni kappiyaṃ kāretvā paññapetabbāni, kappiyakārakaṃ alabhantassa laddhakappiyaṃ hoti.
161. පදීපකරණෙපි වුත්‌තනයෙනෙව ආණාපෙතබ්‌බො. ආණාපෙන්‌තෙන ච ‘‘අමුකස්‌මිං නාම ඔකාසෙ තෙලං වා වට්‌ටි වා කපල්‌ලිකා වා අත්‌ථි, තං ගහෙත්‌වා කරොහී’’ති වත්‌තබ්‌බො. සචෙ තෙලාදීනි නත්‌ථි, පරියෙසිතබ්‌බානි, පරියෙසිත්‌වා අලභන්‌තස්‌ස ලද්‌ධකප්‌පියං හොති. අපිච කපාලෙ අග්‌ගිපි ජාලෙතබ්‌බො.
161. Padīpakaraṇepi vuttanayeneva āṇāpetabbo. Āṇāpentena ca ‘‘amukasmiṃ nāma okāse telaṃ vā vaṭṭi vā kapallikā vā atthi, taṃ gahetvā karohī’’ti vattabbo. Sace telādīni natthi, pariyesitabbāni, pariyesitvā alabhantassa laddhakappiyaṃ hoti. Apica kapāle aggipi jāletabbo.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
84. පක්‌ඛගණනාදිඋග්‌ගහණානුජානනා • 84. Pakkhagaṇanādiuggahaṇānujānanā
85. පුබ්‌බකරණානුජානනා • 85. Pubbakaraṇānujānanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පක්‌ඛගණනාදිඋග්‌ගහණානුජානනකථාවණ්‌ණනා • Pakkhagaṇanādiuggahaṇānujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පක්‌ඛගණනාදිඋග්‌ගහණානුජානනකථාදිවණ්‌ණනා • Pakkhagaṇanādiuggahaṇānujānanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 84. පක්‌ඛගණනාදිඋග්‌ගහණානුජානනකථා • 84. Pakkhagaṇanādiuggahaṇānujānanakathā
