| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
ปกฺขคณนาทิอุคฺคหณานุชานนกถาทิวณฺณนา
Pakkhagaṇanādiuggahaṇānujānanakathādivaṇṇanā
๑๕๖. กติมีติ ติถิ-สทฺทาเปกฺขํ อิตฺถิลิงฺคํ ทฎฺฐพฺพํฯ
156.Katimīti tithi-saddāpekkhaṃ itthiliṅgaṃ daṭṭhabbaṃ.
๑๖๓. อุตุวเสฺสเยวาติ เหมนฺตคิเมฺหสุเยวฯ
163.Utuvasseyevāti hemantagimhesuyeva.
๑๖๔. วิญฺญาเปตีติ เอตฺถ มนสา จิเนฺตตฺวา กายวิการกรณเมว วิญฺญาปนนฺติ ทฎฺฐพฺพํฯ ปาฬิยํ อญฺญสฺส ทาตพฺพา ปาริสุทฺธีติ ปาริสุทฺธิทายเกน ปุน อญฺญสฺส ภิกฺขุโน สนฺติเก ทาตพฺพาฯ ‘‘ภูตํเยว วา สามเณรภาวํ อาโรเจตี’’ติ วุตฺตตฺตา อูนวีสติวสฺสกาเล อุปสมฺปนฺนสฺส, อนฺติมวตฺถุอชฺฌาปนฺนสิกฺขาปจฺจกฺขาตาทีนํ วา ยาว ภิกฺขุปฎิญฺญา วตฺตติ, ตาว เตหิ อาหฎาปิ ฉนฺทปาริสุทฺธิ อาคจฺฉติฯ ยทา ปน เต อตฺตโน สามเณราทิภาวํ ปฎิชานนฺติ, ตโต ปฎฺฐาเยว นาคจฺฉตีติ ทสฺสิตนฺติ ทฎฺฐพฺพํฯ ปาฬิยมฺปิ หิ ‘‘ทินฺนาย ปาริสุทฺธิยา สงฺฆปฺปโตฺต วิพฺภมติ…เป.… ปณฺฑโก ปฎิชานาติฯ ติรจฺฉานคโต ปฎิชานาติฯ อุภโตพฺยญฺชนโก ปฎิชานาติ, อาหฎา โหติ ปาริสุทฺธี’’ติ วุตฺตตฺตา ปณฺฑกาทีนมฺปิ ภิกฺขุปฎิญฺญาย วตฺตมานกาเลสุ ฉนฺทปาริสุทฺธิยา อาคมนํ สิทฺธเมวฯ เตนาห ‘‘เอส นโย สพฺพตฺถา’’ติฯ อุมฺมตฺตกขิตฺตจิตฺตเวทนาฎฺฎานํ ปน ปกตตฺตา อนฺตรามเคฺค อุมฺมตฺตกาทิภาเว ปฎิญฺญาเตปิ เตสํ สงฺฆปฺปตฺตมเตฺตเนว ฉนฺทาทิ อาคจฺฉตีติ ทฎฺฐพฺพํฯ
164.Viññāpetīti ettha manasā cintetvā kāyavikārakaraṇameva viññāpananti daṭṭhabbaṃ. Pāḷiyaṃ aññassa dātabbā pārisuddhīti pārisuddhidāyakena puna aññassa bhikkhuno santike dātabbā. ‘‘Bhūtaṃyeva vā sāmaṇerabhāvaṃ ārocetī’’ti vuttattā ūnavīsativassakāle upasampannassa, antimavatthuajjhāpannasikkhāpaccakkhātādīnaṃ vā yāva bhikkhupaṭiññā vattati, tāva tehi āhaṭāpi chandapārisuddhi āgacchati. Yadā pana te attano sāmaṇerādibhāvaṃ paṭijānanti, tato paṭṭhāyeva nāgacchatīti dassitanti daṭṭhabbaṃ. Pāḷiyampi hi ‘‘dinnāya pārisuddhiyā saṅghappatto vibbhamati…pe… paṇḍako paṭijānāti. Tiracchānagato paṭijānāti. Ubhatobyañjanako paṭijānāti, āhaṭā hoti pārisuddhī’’ti vuttattā paṇḍakādīnampi bhikkhupaṭiññāya vattamānakālesu chandapārisuddhiyā āgamanaṃ siddhameva. Tenāha ‘‘esa nayo sabbatthā’’ti. Ummattakakhittacittavedanāṭṭānaṃ pana pakatattā antarāmagge ummattakādibhāve paṭiññātepi tesaṃ saṅghappattamatteneva chandādi āgacchatīti daṭṭhabbaṃ.
‘‘ภิกฺขูนํ หตฺถปาส’’นฺติ อิมินา คณปุคฺคเลสุ ฉนฺทปาริสุทฺธิยา อนาคมนํ ทเสฺสติฯ ‘‘สงฺฆปฺปโตฺต’’ติ หิ ปาฬิยํ วุตฺตํฯ พิฬาลสงฺขลิกปาริสุทฺธีติ พิฬาลคีวาย พนฺธนสงฺขลิกสทิสา ปาริสุทฺธิ นาม, ยถา สงฺขลิกา พิฬาเล อาคจฺฉเนฺต เอว อาคจฺฉติ, น อนาคจฺฉเนฺต ตปฺปฎิพทฺธตฺตา, เอวมยํ ปาริสุทฺธิปีติ อโตฺถฯ อถ วา ยถา สงฺขลิกาย ปฐมวลยํ ทุติยวลยํ ปาปุณาติ, น ตติยวลยํ, เอวมยมฺปีติ อธิปฺปาโยฯ อุปลกฺขณมตฺตเญฺจตฺถ พิฬาล-คฺคหณํ ทฎฺฐพฺพํฯ
‘‘Bhikkhūnaṃ hatthapāsa’’nti iminā gaṇapuggalesu chandapārisuddhiyā anāgamanaṃ dasseti. ‘‘Saṅghappatto’’ti hi pāḷiyaṃ vuttaṃ. Biḷālasaṅkhalikapārisuddhīti biḷālagīvāya bandhanasaṅkhalikasadisā pārisuddhi nāma, yathā saṅkhalikā biḷāle āgacchante eva āgacchati, na anāgacchante tappaṭibaddhattā, evamayaṃ pārisuddhipīti attho. Atha vā yathā saṅkhalikāya paṭhamavalayaṃ dutiyavalayaṃ pāpuṇāti, na tatiyavalayaṃ, evamayampīti adhippāyo. Upalakkhaṇamattañcettha biḷāla-ggahaṇaṃ daṭṭhabbaṃ.
ปกฺขคณนาทิอุคฺคหณานุชานนกถาทิวณฺณนา นิฎฺฐิตาฯ
Pakkhagaṇanādiuggahaṇānujānanakathādivaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi
๘๔. ปกฺขคณนาทิอุคฺคหณานุชานนา • 84. Pakkhagaṇanādiuggahaṇānujānanā
๘๖. ทิสํคมิกาทิวตฺถุ • 86. Disaṃgamikādivatthu
๘๗. ปาริสุทฺธิทานกถา • 87. Pārisuddhidānakathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā
ปกฺขคณนาทิอุคฺคหณานุชานนกถา • Pakkhagaṇanādiuggahaṇānujānanakathā
ทิสํคมิกาทิวตฺถุกถา • Disaṃgamikādivatthukathā
ปาริสุทฺธิทานกถา • Pārisuddhidānakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā
ทิสํคมิกาทิวตฺถุกถาวณฺณนา • Disaṃgamikādivatthukathāvaṇṇanā
ปาริสุทฺธิทานกถาวณฺณนา • Pārisuddhidānakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā
ทิสํคมิกาทิวตฺถุกถาวณฺณนา • Disaṃgamikādivatthukathāvaṇṇanā
ปาริสุทฺธิทานกถาวณฺณนา • Pārisuddhidānakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi
๘๔. ปกฺขคณนาทิอุคฺคหณานุชานนกถา • 84. Pakkhagaṇanādiuggahaṇānujānanakathā
๘๖. ทิสํคมิกาทิวตฺถุกถา • 86. Disaṃgamikādivatthukathā
๘๗. ปาริสุทฺธิทานกถา • 87. Pārisuddhidānakathā
