| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
பக்கி²கப⁴த்தாதி³கதா²
Pakkhikabhattādikathā
யந்தி ப⁴த்தங் தி³ய்யதீதி ஸம்ப³ந்தோ⁴. சாதுத்³த³ஸீபஞ்சத்³த³ஸீபஞ்சமீஅட்ட²மீதி அபி⁴லக்கி²தேஸூதி யோஜனா. கம்மப்பஸுதேஹீதி கம்மூபசயேஹி. இமேஹி பாடே²ஹி பக்கே²ஸு தா³தப்³ப³ங் பக்கி²கந்தி வசனத்த²ங் த³ஸ்ஸேதி. தந்தி பக்கி²கப⁴த்தங். ‘‘ஹோதீ’’தி பதே³ வுத்தகத்தா, ‘‘கா³ஹெத்வா’’தி பதே³ தா⁴துகம்மங், ‘‘பு⁴ஞ்ஜிதப்³ப³’’ந்தி பதே³ வுத்தகம்மங். ஸப்³பே³ஸந்தி பி⁴க்கூ²னங். யேஸந்தி பி⁴க்கூ²னங். மந்தா³தி அப்பா. தந்தி ஸலாகப⁴த்தங். பணீதங் தெ³ந்தீதி பணீதங் கத்வா தெ³ந்தி. லூக²ப⁴த்தந்தி அஸினித்³த⁴ப⁴த்தங்.
Yanti bhattaṃ diyyatīti sambandho. Cātuddasīpañcaddasīpañcamīaṭṭhamīti abhilakkhitesūti yojanā. Kammappasutehīti kammūpacayehi. Imehi pāṭhehi pakkhesu dātabbaṃ pakkhikanti vacanatthaṃ dasseti. Tanti pakkhikabhattaṃ. ‘‘Hotī’’ti pade vuttakattā, ‘‘gāhetvā’’ti pade dhātukammaṃ, ‘‘bhuñjitabba’’nti pade vuttakammaṃ. Sabbesanti bhikkhūnaṃ. Yesanti bhikkhūnaṃ. Mandāti appā. Tanti salākabhattaṃ. Paṇītaṃ dentīti paṇītaṃ katvā denti. Lūkhabhattanti asiniddhabhattaṃ.
யங் ப⁴த்தங் அத்தனா பு⁴ஞ்ஜதி, ததே³வ தி³ய்யதீதி யோஜனா. இமினா உபோஸதே² தா³தப்³ப³ங் உபோஸதி²கந்தி வசனத்த²ங் த³ஸ்ஸேதி. உபோஸதே²தி உபோஸத²தி³வஸே. எத்த² ச பஞ்சத்³த³ஸியங் ஸசே தா³யகா ‘‘பக்கி²க’’ந்தி வத்வா தெ³ந்தி, பக்கி²கங் நாம. அத² ‘‘உபோஸதி²க’’ந்தி வத்வா தெ³ந்தி, உபோஸதி²கங் நாமாதி விஸேஸோ. பாடிபதே³தி பாடிபத³தி³வஸே. உபோஸத²கம்மேனாதி உபோஸத²கம்மேன ஹேதுபூ⁴தேன. ‘‘பாடிபதே³ தி³ய்யனகதா³ன’’ந்தி இமினா பாடிபதே³ தா³தப்³ப³ங் பாடிபதி³கந்தி வசனத்த²ங் த³ஸ்ஸேதி. தம்பி உப⁴யந்தி உபோஸதி²கபாடிபதி³கவஸேன உப⁴யம்பி தங் ப⁴த்தங். இதி இமானீதி எத்த² இமஸத்³தே³ன இதிஸத்³த³ஸ்ஸ இமஸத்³த³த்த²பா⁴வோ த³ஸ்ஸிதோ ஹோதி. ஸத்தபி ப⁴த்தானீதி இமஸ்மிங் ஸேனாஸனக்க²ந்த⁴கே ஆக³தானி ஸங்க⁴ப⁴த்தாதீ³னி ஸத்தபி ப⁴த்தானி.
Yaṃ bhattaṃ attanā bhuñjati, tadeva diyyatīti yojanā. Iminā uposathe dātabbaṃ uposathikanti vacanatthaṃ dasseti. Uposatheti uposathadivase. Ettha ca pañcaddasiyaṃ sace dāyakā ‘‘pakkhika’’nti vatvā denti, pakkhikaṃ nāma. Atha ‘‘uposathika’’nti vatvā denti, uposathikaṃ nāmāti viseso. Pāṭipadeti pāṭipadadivase. Uposathakammenāti uposathakammena hetubhūtena. ‘‘Pāṭipade diyyanakadāna’’nti iminā pāṭipade dātabbaṃ pāṭipadikanti vacanatthaṃ dasseti. Tampi ubhayanti uposathikapāṭipadikavasena ubhayampi taṃ bhattaṃ. Iti imānīti ettha imasaddena itisaddassa imasaddatthabhāvo dassito hoti. Sattapi bhattānīti imasmiṃ senāsanakkhandhake āgatāni saṅghabhattādīni sattapi bhattāni.
அபரானிபி சத்தாரி ப⁴த்தானீதி ஸம்ப³ந்தோ⁴. தத்தா²தி சதூஸு ப⁴த்தேஸு. ‘‘ஆக³ந்துகானங் தி³ன்ன’’ந்திஆதி³னா ஆக³ந்துகப⁴த்தந்தி பத³ஸ்ஸ சதுத்தீ²மஜ்ஜே²லோபஸமாஸங் த³ஸ்ஸேதி. அஞ்ஞத்த² பன ‘‘ஆக³ந்துகஸ்ஸ அத்தா²ய ஆப⁴த’’ந்திஆதி³னா ச²ட்டீ²மஜ்ஜே²லோபஸமாஸங் த³ஸ்ஸேதி. எத்தா²தி சதூஸு ப⁴த்தேஸு. ஸப்³பே³ஸந்தி பி⁴க்கூ²னங். ஏகோ ஆக³ந்துகோ நிஸீத³தீதி ஸம்ப³ந்தோ⁴. தேனாதி பட²மஆக³ந்துகேன.
Aparānipi cattāri bhattānīti sambandho. Tatthāti catūsu bhattesu. ‘‘Āgantukānaṃ dinna’’ntiādinā āgantukabhattanti padassa catutthīmajjhelopasamāsaṃ dasseti. Aññattha pana ‘‘āgantukassa atthāya ābhata’’ntiādinā chaṭṭhīmajjhelopasamāsaṃ dasseti. Etthāti catūsu bhattesu. Sabbesanti bhikkhūnaṃ. Eko āgantuko nisīdatīti sambandho. Tenāti paṭhamaāgantukena.
யோதி ஆக³ந்துகோ. ஆக³ந்த்வாபீதி பிஸத்³தோ³ க³ரஹத்தோ², பச்சா² பன பகே³வாதி அத்தோ². தேன க³ண்ஹிதப்³ப³ந்தி யோஜனா. ‘‘ஆக³ததி³வஸேயேவா’’தி இமினா ந து³தியதி³வஸாதீ³ஸு பு⁴ஞ்ஜிதப்³ப³ந்தி த³ஸ்ஸேதி.
Yoti āgantuko. Āgantvāpīti pisaddo garahattho, pacchā pana pagevāti attho. Tena gaṇhitabbanti yojanā. ‘‘Āgatadivaseyevā’’ti iminā na dutiyadivasādīsu bhuñjitabbanti dasseti.
கத்த²சீதி கிஞ்சி டா²னங். தந்தி ஆக³ந்துகப⁴த்தங். நிப³ந்தா⁴பிதந்தி நிச்சங் ட²பிதங். அஸனஸாலாயந்தி அந்தோகா³மே அஸனஸாலாயங். அஸதீதி அஸந்தேஸு.
Katthacīti kiñci ṭhānaṃ. Tanti āgantukabhattaṃ. Nibandhāpitanti niccaṃ ṭhapitaṃ. Asanasālāyanti antogāme asanasālāyaṃ. Asatīti asantesu.
ஆவாஸிகோபீதி பிஸத்³தோ³ ந க³மிகோயேவாதி த³ஸ்ஸேதி. யதா² ஆக³ந்துகப⁴த்தங் த்³வே வா தீணி வா ஸத்த வா தி³வஸானி லப்³ப⁴தி, ஏவங் இத³ங் க³மியப⁴த்தங் ந லப்³ப⁴தீதி யோஜனா. பந்த²ந்தி மக்³க³ங். ருந்த⁴ந்தீதி பித³ஹந்தி. உத³கங் வா ருந்த⁴தீதி ஸம்ப³ந்தோ⁴. ஏதே உபத்³த³வேதி சோராத³யோ ஏதே உபத்³த³வே. ஒட்³டெ³த்வாதி ட²பெத்வா.
Āvāsikopīti pisaddo na gamikoyevāti dasseti. Yathā āgantukabhattaṃ dve vā tīṇi vā satta vā divasāni labbhati, evaṃ idaṃ gamiyabhattaṃ na labbhatīti yojanā. Panthanti maggaṃ. Rundhantīti pidahanti. Udakaṃ vā rundhatīti sambandho. Ete upaddaveti corādayo ete upaddave. Oḍḍetvāti ṭhapetvā.
ஏதஸ்ஸாதி மஹாகி³லானஸ்ஸ. புன ஏதஸ்ஸாதி அனாக³தஸ்ஸ மஹாகி³லானஸ்ஸ. ஸப்பாயபோ⁴ஜனந்தி கி³லானானங் ஸப்பாயபோ⁴ஜனங். மிஸ்ஸகயாகு³ந்தி நானாதண்டு³லே மிஸ்ஸெத்வா பசிதங் யாகு³ங். ந குப்பதீதி ந விகாரங் கரோதி.
Etassāti mahāgilānassa. Puna etassāti anāgatassa mahāgilānassa. Sappāyabhojananti gilānānaṃ sappāyabhojanaṃ. Missakayāgunti nānātaṇḍule missetvā pacitaṃ yāguṃ. Na kuppatīti na vikāraṃ karoti.
இத³ம்பீதி கி³லானுபட்டா²கப⁴த்தம்பி. தத்தா²தி தஸ்மிங் குலே. அஸ்ஸாதி கி³லானஸ்ஸ. ஏவங் தி³ன்னானீதி ஏவங் வக்க²மானநயேன தி³ன்னானி ஹொந்தி. பிண்ட³பாதிகானம்பி வட்டதீதி ‘‘பி⁴க்க²’’ந்தி கப்பியவோஹாரேன வுத்தத்தா பிண்ட³பாதிகானம்பி வட்டதி. ந வட்டதீதி ‘‘ப⁴த்த’’ந்தி அகப்பியவோஹாரேன வுத்தத்தா ந வட்டதி.
Idampīti gilānupaṭṭhākabhattampi. Tatthāti tasmiṃ kule. Assāti gilānassa. Evaṃ dinnānīti evaṃ vakkhamānanayena dinnāni honti. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Na vaṭṭatīti ‘‘bhatta’’nti akappiyavohārena vuttattā na vaṭṭati.
அபரானிபி தீணி ப⁴த்தானீதி ஸம்ப³ந்தோ⁴. தத்தா²தி தீஸு ப⁴த்தேஸு. து⁴ரப⁴த்தந்தி எத்த² து⁴ரஸத்³த³ஸ்ஸ து⁴வஸத்³தே³ன அத்த²தோ ஸதி³ஸத்தா நிச்சத்தோ²தி ஆஹ ‘‘நிச்சப⁴த்தங் வுச்சதீ’’தி. தந்தி து⁴ரப⁴த்தங். தத்தா²தி து³விதே⁴ஸு. ‘‘ஸங்கி⁴கே’’தி பாட²ஸேஸோ யோஜேதப்³போ³. புக்³க³லிகேபீதி பிஸத்³தோ³ ‘‘ஸங்கி⁴கே’’தி பத³ங் அபெக்க²தி. பச்சா²தி பட²மங் ‘‘பி⁴க்க²ங் க³ண்ஹதா²’’தி வுத்தவசனதோ, வுத்தவசனஸ்ஸ வா பரங்.
Aparānipi tīṇi bhattānīti sambandho. Tatthāti tīsu bhattesu. Dhurabhattanti ettha dhurasaddassa dhuvasaddena atthato sadisattā niccatthoti āha ‘‘niccabhattaṃ vuccatī’’ti. Tanti dhurabhattaṃ. Tatthāti duvidhesu. ‘‘Saṅghike’’ti pāṭhaseso yojetabbo. Puggalikepīti pisaddo ‘‘saṅghike’’ti padaṃ apekkhati. Pacchāti paṭhamaṃ ‘‘bhikkhaṃ gaṇhathā’’ti vuttavacanato, vuttavacanassa vā paraṃ.
குடிங் கத்வா தா³தப்³ப³ங் ப⁴த்தங் குடிப⁴த்தந்தி த³ஸ்ஸெந்தோ ஆஹ ‘‘குடிப⁴த்தங் நாமா’’திஆதி³. யந்தி ப⁴த்தங், நிப³ந்தா⁴பிதந்தி ஸம்ப³ந்தோ⁴, ஸேனாஸனவாஸினோ பி⁴க்கூ²தி ஸம்ப³ந்தோ⁴. யங் பனாதி ப⁴த்தங் பன, தி³ன்னந்தி ஸம்ப³ந்தோ⁴. தஸ்ஸேவாதி புக்³க³லஸ்ஸேவ. தஸ்மிந்தி புக்³க³லே.
Kuṭiṃ katvā dātabbaṃ bhattaṃ kuṭibhattanti dassento āha ‘‘kuṭibhattaṃ nāmā’’tiādi. Yanti bhattaṃ, nibandhāpitanti sambandho, senāsanavāsino bhikkhūti sambandho. Yaṃ panāti bhattaṃ pana, dinnanti sambandho. Tassevāti puggalasseva. Tasminti puggale.
வாரேன , வாரங் க³ஹெத்வா வா தி³ன்னங் ப⁴த்தங் வாரப⁴த்தந்தி த³ஸ்ஸெந்தோ ஆஹ ‘‘வாரப⁴த்தங் நாமா’’திஆதி³. தம்பீதி வாரப⁴த்தம்பி. நிக³மனவஸேன ஸம்பிண்டெ³த்வா த³ஸ்ஸெந்தோ ஆஹ ‘‘இதி இமானி சா’’திஆதி³.
Vārena , vāraṃ gahetvā vā dinnaṃ bhattaṃ vārabhattanti dassento āha ‘‘vārabhattaṃ nāmā’’tiādi. Tampīti vārabhattampi. Nigamanavasena sampiṇḍetvā dassento āha ‘‘iti imāni cā’’tiādi.
அட்ட²கதா²யந்தி மஹாஅட்ட²கதா²யங், வுத்தானீதி ஸம்ப³ந்தோ⁴. தத்தா²தி சதூஸு ப⁴த்தேஸு. விஹாரே உப்பன்னங் ப⁴த்தங் விஹாரப⁴த்தந்தி த³ஸ்ஸெந்தோ ஆஹ ‘‘விஹாரப⁴த்தங் நாமா’’திஆதி³. தத்ருப்பாத³ப⁴த்தந்தி தஸ்மிங் விஹாரே தி³ன்னகெ²த்தவத்து²ஆதீ³ஹி உப்பாத³ப⁴த்தங். தந்தி விஹாரப⁴த்தங். யதா²தி யேனாகாரேன, படிக்³க³ஹியமானேதி ஸம்ப³ந்தோ⁴. அட்ட²ன்னங் ஸமூஹோ, அட்ட² பரிமாணானி யஸ்ஸாதி வா அட்ட²கோ, தஸ்ஸ தி³ன்னங் ப⁴த்தங் அட்ட²கப⁴த்தங். ஏவங் சதுக்கப⁴த்தந்தி எத்தா²பி. தமேவத்த²ங் த³ஸ்ஸெந்தோ ஆஹ ‘‘அட்ட²ன்னங் பி⁴க்கூ²னங் தே³மா’’திஆதி³. மஹாபி⁴ஸங்கா²ரிகேனாதி ஸப்³பி³னோனீதாதீ³ஹி மஹந்தோ அபி⁴ஸங்கா²ரோ மஹாபி⁴ஸங்கா²ரோ, ஸோ ஏதஸ்ஸ அத்தீ²தி மஹாபி⁴ஸங்கா²ரிகோ, தேன அதிரஸகபூவேன பத்தே பக்கி²பித்வாதி ஸம்ப³ந்தோ⁴. ‘‘த²கெத்வா தி³ன்ன’’ந்தி இமினா கூ³ஹித்வா தா³தப்³ப³ங் கு³ள்ஹகங், தமேவ ப⁴த்தங் கு³ள்ஹகப⁴த்தந்தி வசனத்த²ங் த³ஸ்ஸேதி.
Aṭṭhakathāyanti mahāaṭṭhakathāyaṃ, vuttānīti sambandho. Tatthāti catūsu bhattesu. Vihāre uppannaṃ bhattaṃ vihārabhattanti dassento āha ‘‘vihārabhattaṃ nāmā’’tiādi. Tatruppādabhattanti tasmiṃ vihāre dinnakhettavatthuādīhi uppādabhattaṃ. Tanti vihārabhattaṃ. Yathāti yenākārena, paṭiggahiyamāneti sambandho. Aṭṭhannaṃ samūho, aṭṭha parimāṇāni yassāti vā aṭṭhako, tassa dinnaṃ bhattaṃ aṭṭhakabhattaṃ. Evaṃ catukkabhattanti etthāpi. Tamevatthaṃ dassento āha ‘‘aṭṭhannaṃ bhikkhūnaṃ demā’’tiādi. Mahābhisaṅkhārikenāti sabbinonītādīhi mahanto abhisaṅkhāro mahābhisaṅkhāro, so etassa atthīti mahābhisaṅkhāriko, tena atirasakapūvena patte pakkhipitvāti sambandho. ‘‘Thaketvā dinna’’nti iminā gūhitvā dātabbaṃ guḷhakaṃ, tameva bhattaṃ guḷhakabhattanti vacanatthaṃ dasseti.
இதா⁴தி இமஸ்மிங் லோகே. ஏகச்சே மனுஸ்ஸா தெ³ந்தீதி ஸம்ப³ந்தோ⁴. ‘‘பி⁴க்கு²பரிச்சே²த³ஜானநத்த²ங் கு³ளகே தெ³ந்தீ’’தி இமினா கு³ளகேன பி⁴க்கூ² க³ணெத்வா தா³தப்³ப³ங் ப⁴த்தங் கு³ளகப⁴த்தந்தி வசனத்த²ங் த³ஸ்ஸேதி. எத்த² ச புரிமனயே ளகாரே ஹகாரஸங்யோகோ³ அத்தி², பச்சி²மனயே நத்தீ²தி த³ட்ட²ப்³ப³ங். கு³ளபிண்ட³க³ணனாய பி⁴க்கு²க³ணனங் ஜானாதி. இதீதிஆதி³ நிக³மனங். சீவரபா⁴ஜனீயங் வுத்தந்தி ஸம்ப³ந்தோ⁴.
Idhāti imasmiṃ loke. Ekacce manussā dentīti sambandho. ‘‘Bhikkhuparicchedajānanatthaṃ guḷake dentī’’ti iminā guḷakena bhikkhū gaṇetvā dātabbaṃ bhattaṃ guḷakabhattanti vacanatthaṃ dasseti. Ettha ca purimanaye ḷakāre hakārasaṃyogo atthi, pacchimanaye natthīti daṭṭhabbaṃ. Guḷapiṇḍagaṇanāya bhikkhugaṇanaṃ jānāti. Itītiādi nigamanaṃ. Cīvarabhājanīyaṃ vuttanti sambandho.
ஸப்³பி³ஆதீ³ஸு பே⁴ஸஜ்ஜேஸூதி நித்³தா⁴ரணே பு⁴ம்மங், ‘‘ஸப்³பி³ஸ்ஸா’’தி பத³ங் ‘‘கும்ப⁴ஸதம்பீ’’தி பதே³ நிஸ்ஸிதஸம்ப³ந்தோ⁴.
Sabbiādīsu bhesajjesūti niddhāraṇe bhummaṃ, ‘‘sabbissā’’ti padaṃ ‘‘kumbhasatampī’’ti pade nissitasambandho.
பச்சா² ஆக³தானங் தா³தப்³ப³மேவாதி து³தியபா⁴கே³ அதா³தப்³பே³யேவ பச்சா² ஆக³தானங் தா³தப்³ப³மேவ. ஸப்³ப³ஸன்னிபாதட்டா²னேயேவாதி ஸப்³பே³ஸங் பி⁴க்கூ²னங் ஸன்னிபாதட்டா²னேவ. பா⁴ஜனீயப⁴ண்ட³ங் நாம பா⁴ஜனட்டா²னங் ஸம்பத்தஸ்ஸேவ பாபுணாதி, ந அஸம்பத்தஸ்ஸ. ஸப்³ப³ஸன்னிபாதட்டா²னே ச யேபு⁴ய்யேன ஸம்பத்தோ ஹோதி, தேன வுத்தங் ‘‘ஸப்³ப³ஸன்னிபாதட்டா²னேயேவா’’தி.
Pacchāāgatānaṃ dātabbamevāti dutiyabhāge adātabbeyeva pacchā āgatānaṃ dātabbameva. Sabbasannipātaṭṭhāneyevāti sabbesaṃ bhikkhūnaṃ sannipātaṭṭhāneva. Bhājanīyabhaṇḍaṃ nāma bhājanaṭṭhānaṃ sampattasseva pāpuṇāti, na asampattassa. Sabbasannipātaṭṭhāne ca yebhuyyena sampatto hoti, tena vuttaṃ ‘‘sabbasannipātaṭṭhāneyevā’’ti.
யதா²டி²தங்யேவாதி கிஞ்சி அபா⁴ஜெத்வா யதா²டி²தங்யேவ. ‘‘து³க்³க³ஹித’’ந்தி வத்வா தத³த்த²ங் த³ஸ்ஸெந்தோ ஆஹ ‘‘தங் க³தக³தட்டா²னே ஸங்கி⁴கமேவ ஹோதீ’’தி. ஆவஜ்ஜெத்வாதி பரிணாமெத்வா. தம்பீதி தா²லகே பக்கி²த்தங் ஸப்³பி³ம்பி. தி²னந்தி க⁴னபா⁴வேன திட்ட²தீதி தி²னங், க⁴னந்தி வுத்தங் ஹோதி. வுத்தபரிச்சே²த³தோதி ‘‘த³ஸ பி⁴க்கூ², த³ஸேவ ச ஸப்³பி³கும்பா⁴’’தி வுத்தபரிச்சே²த³தோ.
Yathāṭhitaṃyevāti kiñci abhājetvā yathāṭhitaṃyeva. ‘‘Duggahita’’nti vatvā tadatthaṃ dassento āha ‘‘taṃ gatagataṭṭhāne saṅghikameva hotī’’ti. Āvajjetvāti pariṇāmetvā. Tampīti thālake pakkhittaṃ sabbimpi. Thinanti ghanabhāvena tiṭṭhatīti thinaṃ, ghananti vuttaṃ hoti. Vuttaparicchedatoti ‘‘dasa bhikkhū, daseva ca sabbikumbhā’’ti vuttaparicchedato.
கா³தா²யங் பாளிந்தி வினயபாளிங். அட்ட²கத²ஞ்சேவாதி தஸ்ஸா அட்ட²கத²ஞ்சேவ. விசக்க²ணோதி விவித⁴ங் அத்த²ங் சக்க²தி பஸ்ஸதீதி விசக்க²ணோ. ஏவந்தி யதா²வுத்தனயேன. தத்ராயங் யோஜனா – ஏவங் விசக்க²ணோ பி⁴க்கு² பாளிங், அட்ட²கத²ஞ்சேவ ஓலோகெத்வா அப்பமத்தோவ ஹுத்வா ஸங்கி⁴கே பச்சயே பா⁴ஜயேதி.
Gāthāyaṃ pāḷinti vinayapāḷiṃ. Aṭṭhakathañcevāti tassā aṭṭhakathañceva. Vicakkhaṇoti vividhaṃ atthaṃ cakkhati passatīti vicakkhaṇo. Evanti yathāvuttanayena. Tatrāyaṃ yojanā – evaṃ vicakkhaṇo bhikkhu pāḷiṃ, aṭṭhakathañceva oloketvā appamattova hutvā saṅghike paccaye bhājayeti.
இதி பச்சயபா⁴ஜனீயகதா²ய யோஜனா ஸமத்தா.
Iti paccayabhājanīyakathāya yojanā samattā.
உபட்³ட⁴பா⁴கோ³தி பி⁴க்கூ²னங் லத்³த⁴பா⁴க³தோ உபட்³டோ⁴ பா⁴கோ³. ஸேஸங் ஸுவிஞ்ஞெய்யமேவ.
Upaḍḍhabhāgoti bhikkhūnaṃ laddhabhāgato upaḍḍho bhāgo. Sesaṃ suviññeyyameva.
இதி ஸேனாஸனக்க²ந்த⁴கவண்ணனாய யோஜனா ஸமத்தா.
Iti senāsanakkhandhakavaṇṇanāya yojanā samattā.
