| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
པཀྑིཀབྷཏྟཱདིཀཐཱ
Pakkhikabhattādikathā
ཡནྟི བྷཏྟཾ དིཡྻཏཱིཏི སམྦནྡྷོ། ཙཱཏུདྡསཱིཔཉྩདྡསཱིཔཉྩམཱིཨཊྛམཱིཏི ཨབྷིལཀྑིཏེསཱུཏི ཡོཛནཱ། ཀམྨཔྤསུཏེཧཱིཏི ཀམྨཱུཔཙཡེཧི། ཨིམེཧི པཱཋེཧི པཀྑེསུ དཱཏབྦཾ པཀྑིཀནྟི ཝཙནཏྠཾ དསྶེཏི། ཏནྟི པཀྑིཀབྷཏྟཾ། ‘‘ཧོཏཱི’’ཏི པདེ ཝུཏྟཀཏྟཱ, ‘‘གཱཧེཏྭཱ’’ཏི པདེ དྷཱཏུཀམྨཾ, ‘‘བྷུཉྫིཏབྦ’’ནྟི པདེ ཝུཏྟཀམྨཾ། སབྦེསནྟི བྷིཀྑཱུནཾ། ཡེསནྟི བྷིཀྑཱུནཾ། མནྡཱཏི ཨཔྤཱ། ཏནྟི སལཱཀབྷཏྟཾ། པཎཱིཏཾ དེནྟཱིཏི པཎཱིཏཾ ཀཏྭཱ དེནྟི། ལཱུཁབྷཏྟནྟི ཨསིནིདྡྷབྷཏྟཾ།
Yanti bhattaṃ diyyatīti sambandho. Cātuddasīpañcaddasīpañcamīaṭṭhamīti abhilakkhitesūti yojanā. Kammappasutehīti kammūpacayehi. Imehi pāṭhehi pakkhesu dātabbaṃ pakkhikanti vacanatthaṃ dasseti. Tanti pakkhikabhattaṃ. ‘‘Hotī’’ti pade vuttakattā, ‘‘gāhetvā’’ti pade dhātukammaṃ, ‘‘bhuñjitabba’’nti pade vuttakammaṃ. Sabbesanti bhikkhūnaṃ. Yesanti bhikkhūnaṃ. Mandāti appā. Tanti salākabhattaṃ. Paṇītaṃ dentīti paṇītaṃ katvā denti. Lūkhabhattanti asiniddhabhattaṃ.
ཡཾ བྷཏྟཾ ཨཏྟནཱ བྷུཉྫཏི, ཏདེཝ དིཡྻཏཱིཏི ཡོཛནཱ། ཨིམིནཱ ཨུཔོསཐེ དཱཏབྦཾ ཨུཔོསཐིཀནྟི ཝཙནཏྠཾ དསྶེཏི། ཨུཔོསཐེཏི ཨུཔོསཐདིཝསེ། ཨེཏྠ ཙ པཉྩདྡསིཡཾ སཙེ དཱཡཀཱ ‘‘པཀྑིཀ’’ནྟི ཝཏྭཱ དེནྟི, པཀྑིཀཾ ནཱམ། ཨཐ ‘‘ཨུཔོསཐིཀ’’ནྟི ཝཏྭཱ དེནྟི, ཨུཔོསཐིཀཾ ནཱམཱཏི ཝིསེསོ། པཱཊིཔདེཏི པཱཊིཔདདིཝསེ། ཨུཔོསཐཀམྨེནཱཏི ཨུཔོསཐཀམྨེན ཧེཏུབྷཱུཏེན། ‘‘པཱཊིཔདེ དིཡྻནཀདཱན’’ནྟི ཨིམིནཱ པཱཊིཔདེ དཱཏབྦཾ པཱཊིཔདིཀནྟི ཝཙནཏྠཾ དསྶེཏི། ཏམྤི ཨུབྷཡནྟི ཨུཔོསཐིཀཔཱཊིཔདིཀཝསེན ཨུབྷཡམྤི ཏཾ བྷཏྟཾ། ཨིཏི ཨིམཱནཱིཏི ཨེཏྠ ཨིམསདྡེན ཨིཏིསདྡསྶ ཨིམསདྡཏྠབྷཱཝོ དསྶིཏོ ཧོཏི། སཏྟཔི བྷཏྟཱནཱིཏི ཨིམསྨིཾ སེནཱསནཀྑནྡྷཀེ ཨཱགཏཱནི སངྒྷབྷཏྟཱདཱིནི སཏྟཔི བྷཏྟཱནི།
Yaṃ bhattaṃ attanā bhuñjati, tadeva diyyatīti yojanā. Iminā uposathe dātabbaṃ uposathikanti vacanatthaṃ dasseti. Uposatheti uposathadivase. Ettha ca pañcaddasiyaṃ sace dāyakā ‘‘pakkhika’’nti vatvā denti, pakkhikaṃ nāma. Atha ‘‘uposathika’’nti vatvā denti, uposathikaṃ nāmāti viseso. Pāṭipadeti pāṭipadadivase. Uposathakammenāti uposathakammena hetubhūtena. ‘‘Pāṭipade diyyanakadāna’’nti iminā pāṭipade dātabbaṃ pāṭipadikanti vacanatthaṃ dasseti. Tampi ubhayanti uposathikapāṭipadikavasena ubhayampi taṃ bhattaṃ. Iti imānīti ettha imasaddena itisaddassa imasaddatthabhāvo dassito hoti. Sattapi bhattānīti imasmiṃ senāsanakkhandhake āgatāni saṅghabhattādīni sattapi bhattāni.
ཨཔརཱནིཔི ཙཏྟཱརི བྷཏྟཱནཱིཏི སམྦནྡྷོ། ཏཏྠཱཏི ཙཏཱུསུ བྷཏྟེསུ། ‘‘ཨཱགནྟུཀཱནཾ དིནྣ’’ནྟིཨཱདིནཱ ཨཱགནྟུཀབྷཏྟནྟི པདསྶ ཙཏུཏྠཱིམཛ྄ཛྷེལོཔསམཱསཾ དསྶེཏི། ཨཉྙཏྠ པན ‘‘ཨཱགནྟུཀསྶ ཨཏྠཱཡ ཨཱབྷཏ’’ནྟིཨཱདིནཱ ཚཊྛཱིམཛ྄ཛྷེལོཔསམཱསཾ དསྶེཏི། ཨེཏྠཱཏི ཙཏཱུསུ བྷཏྟེསུ། སབྦེསནྟི བྷིཀྑཱུནཾ། ཨེཀོ ཨཱགནྟུཀོ ནིསཱིདཏཱིཏི སམྦནྡྷོ། ཏེནཱཏི པཋམཨཱགནྟུཀེན།
Aparānipi cattāri bhattānīti sambandho. Tatthāti catūsu bhattesu. ‘‘Āgantukānaṃ dinna’’ntiādinā āgantukabhattanti padassa catutthīmajjhelopasamāsaṃ dasseti. Aññattha pana ‘‘āgantukassa atthāya ābhata’’ntiādinā chaṭṭhīmajjhelopasamāsaṃ dasseti. Etthāti catūsu bhattesu. Sabbesanti bhikkhūnaṃ. Eko āgantuko nisīdatīti sambandho. Tenāti paṭhamaāgantukena.
ཡོཏི ཨཱགནྟུཀོ། ཨཱགནྟྭཱཔཱིཏི པིསདྡོ གརཧཏྠོ, པཙྪཱ པན པགེཝཱཏི ཨཏྠོ། ཏེན གཎྷིཏབྦནྟི ཡོཛནཱ། ‘‘ཨཱགཏདིཝསེཡེཝཱ’’ཏི ཨིམིནཱ ན དུཏིཡདིཝསཱདཱིསུ བྷུཉྫིཏབྦནྟི དསྶེཏི།
Yoti āgantuko. Āgantvāpīti pisaddo garahattho, pacchā pana pagevāti attho. Tena gaṇhitabbanti yojanā. ‘‘Āgatadivaseyevā’’ti iminā na dutiyadivasādīsu bhuñjitabbanti dasseti.
ཀཏྠཙཱིཏི ཀིཉྩི ཋཱནཾ། ཏནྟི ཨཱགནྟུཀབྷཏྟཾ། ནིབནྡྷཱཔིཏནྟི ནིཙྩཾ ཋཔིཏཾ། ཨསནསཱལཱཡནྟི ཨནྟོགཱམེ ཨསནསཱལཱཡཾ། ཨསཏཱིཏི ཨསནྟེསུ།
Katthacīti kiñci ṭhānaṃ. Tanti āgantukabhattaṃ. Nibandhāpitanti niccaṃ ṭhapitaṃ. Asanasālāyanti antogāme asanasālāyaṃ. Asatīti asantesu.
ཨཱཝཱསིཀོཔཱིཏི པིསདྡོ ན གམིཀོཡེཝཱཏི དསྶེཏི། ཡཐཱ ཨཱགནྟུཀབྷཏྟཾ དྭེ ཝཱ ཏཱིཎི ཝཱ སཏྟ ཝཱ དིཝསཱནི ལབྦྷཏི, ཨེཝཾ ཨིདཾ གམིཡབྷཏྟཾ ན ལབྦྷཏཱིཏི ཡོཛནཱ། པནྠནྟི མགྒཾ། རུནྡྷནྟཱིཏི པིདཧནྟི། ཨུདཀཾ ཝཱ རུནྡྷཏཱིཏི སམྦནྡྷོ། ཨེཏེ ཨུཔདྡཝེཏི ཙོརཱདཡོ ཨེཏེ ཨུཔདྡཝེ། ཨོཌྜེཏྭཱཏི ཋཔེཏྭཱ།
Āvāsikopīti pisaddo na gamikoyevāti dasseti. Yathā āgantukabhattaṃ dve vā tīṇi vā satta vā divasāni labbhati, evaṃ idaṃ gamiyabhattaṃ na labbhatīti yojanā. Panthanti maggaṃ. Rundhantīti pidahanti. Udakaṃ vā rundhatīti sambandho. Ete upaddaveti corādayo ete upaddave. Oḍḍetvāti ṭhapetvā.
ཨེཏསྶཱཏི མཧཱགིལཱནསྶ། པུན ཨེཏསྶཱཏི ཨནཱགཏསྶ མཧཱགིལཱནསྶ། སཔྤཱཡབྷོཛནནྟི གིལཱནཱནཾ སཔྤཱཡབྷོཛནཾ། མིསྶཀཡཱགུནྟི ནཱནཱཏཎྜུལེ མིསྶེཏྭཱ པཙིཏཾ ཡཱགུཾ། ན ཀུཔྤཏཱིཏི ན ཝིཀཱརཾ ཀརོཏི།
Etassāti mahāgilānassa. Puna etassāti anāgatassa mahāgilānassa. Sappāyabhojananti gilānānaṃ sappāyabhojanaṃ. Missakayāgunti nānātaṇḍule missetvā pacitaṃ yāguṃ. Na kuppatīti na vikāraṃ karoti.
ཨིདམྤཱིཏི གིལཱནུཔཊྛཱཀབྷཏྟམྤི། ཏཏྠཱཏི ཏསྨིཾ ཀུལེ། ཨསྶཱཏི གིལཱནསྶ། ཨེཝཾ དིནྣཱནཱིཏི ཨེཝཾ ཝཀྑམཱནནཡེན དིནྣཱནི ཧོནྟི། པིཎྜཔཱཏིཀཱནམྤི ཝཊྚཏཱིཏི ‘‘བྷིཀྑ’’ནྟི ཀཔྤིཡཝོཧཱརེན ཝུཏྟཏྟཱ པིཎྜཔཱཏིཀཱནམྤི ཝཊྚཏི། ན ཝཊྚཏཱིཏི ‘‘བྷཏྟ’’ནྟི ཨཀཔྤིཡཝོཧཱརེན ཝུཏྟཏྟཱ ན ཝཊྚཏི།
Idampīti gilānupaṭṭhākabhattampi. Tatthāti tasmiṃ kule. Assāti gilānassa. Evaṃ dinnānīti evaṃ vakkhamānanayena dinnāni honti. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Na vaṭṭatīti ‘‘bhatta’’nti akappiyavohārena vuttattā na vaṭṭati.
ཨཔརཱནིཔི ཏཱིཎི བྷཏྟཱནཱིཏི སམྦནྡྷོ། ཏཏྠཱཏི ཏཱིསུ བྷཏྟེསུ། དྷུརབྷཏྟནྟི ཨེཏྠ དྷུརསདྡསྶ དྷུཝསདྡེན ཨཏྠཏོ སདིསཏྟཱ ནིཙྩཏྠོཏི ཨཱཧ ‘‘ནིཙྩབྷཏྟཾ ཝུཙྩཏཱི’’ཏི། ཏནྟི དྷུརབྷཏྟཾ། ཏཏྠཱཏི དུཝིདྷེསུ། ‘‘སངྒྷིཀེ’’ཏི པཱཋསེསོ ཡོཛེཏབྦོ། པུགྒལིཀེཔཱིཏི པིསདྡོ ‘‘སངྒྷིཀེ’’ཏི པདཾ ཨཔེཀྑཏི། པཙྪཱཏི པཋམཾ ‘‘བྷིཀྑཾ གཎྷཐཱ’’ཏི ཝུཏྟཝཙནཏོ, ཝུཏྟཝཙནསྶ ཝཱ པརཾ།
Aparānipi tīṇi bhattānīti sambandho. Tatthāti tīsu bhattesu. Dhurabhattanti ettha dhurasaddassa dhuvasaddena atthato sadisattā niccatthoti āha ‘‘niccabhattaṃ vuccatī’’ti. Tanti dhurabhattaṃ. Tatthāti duvidhesu. ‘‘Saṅghike’’ti pāṭhaseso yojetabbo. Puggalikepīti pisaddo ‘‘saṅghike’’ti padaṃ apekkhati. Pacchāti paṭhamaṃ ‘‘bhikkhaṃ gaṇhathā’’ti vuttavacanato, vuttavacanassa vā paraṃ.
ཀུཊིཾ ཀཏྭཱ དཱཏབྦཾ བྷཏྟཾ ཀུཊིབྷཏྟནྟི དསྶེནྟོ ཨཱཧ ‘‘ཀུཊིབྷཏྟཾ ནཱམཱ’’ཏིཨཱདི། ཡནྟི བྷཏྟཾ, ནིབནྡྷཱཔིཏནྟི སམྦནྡྷོ, སེནཱསནཝཱསིནོ བྷིཀྑཱུཏི སམྦནྡྷོ། ཡཾ པནཱཏི བྷཏྟཾ པན, དིནྣནྟི སམྦནྡྷོ། ཏསྶེཝཱཏི པུགྒལསྶེཝ། ཏསྨིནྟི པུགྒལེ།
Kuṭiṃ katvā dātabbaṃ bhattaṃ kuṭibhattanti dassento āha ‘‘kuṭibhattaṃ nāmā’’tiādi. Yanti bhattaṃ, nibandhāpitanti sambandho, senāsanavāsino bhikkhūti sambandho. Yaṃ panāti bhattaṃ pana, dinnanti sambandho. Tassevāti puggalasseva. Tasminti puggale.
ཝཱརེན , ཝཱརཾ གཧེཏྭཱ ཝཱ དིནྣཾ བྷཏྟཾ ཝཱརབྷཏྟནྟི དསྶེནྟོ ཨཱཧ ‘‘ཝཱརབྷཏྟཾ ནཱམཱ’’ཏིཨཱདི། ཏམྤཱིཏི ཝཱརབྷཏྟམྤི། ནིགམནཝསེན སམྤིཎྜེཏྭཱ དསྶེནྟོ ཨཱཧ ‘‘ཨིཏི ཨིམཱནི ཙཱ’’ཏིཨཱདི།
Vārena , vāraṃ gahetvā vā dinnaṃ bhattaṃ vārabhattanti dassento āha ‘‘vārabhattaṃ nāmā’’tiādi. Tampīti vārabhattampi. Nigamanavasena sampiṇḍetvā dassento āha ‘‘iti imāni cā’’tiādi.
ཨཊྛཀཐཱཡནྟི མཧཱཨཊྛཀཐཱཡཾ, ཝུཏྟཱནཱིཏི སམྦནྡྷོ། ཏཏྠཱཏི ཙཏཱུསུ བྷཏྟེསུ། ཝིཧཱརེ ཨུཔྤནྣཾ བྷཏྟཾ ཝིཧཱརབྷཏྟནྟི དསྶེནྟོ ཨཱཧ ‘‘ཝིཧཱརབྷཏྟཾ ནཱམཱ’’ཏིཨཱདི། ཏཏྲུཔྤཱདབྷཏྟནྟི ཏསྨིཾ ཝིཧཱརེ དིནྣཁེཏྟཝཏྠུཨཱདཱིཧི ཨུཔྤཱདབྷཏྟཾ། ཏནྟི ཝིཧཱརབྷཏྟཾ། ཡཐཱཏི ཡེནཱཀཱརེན, པཊིགྒཧིཡམཱནེཏི སམྦནྡྷོ། ཨཊྛནྣཾ སམཱུཧོ, ཨཊྛ པརིམཱཎཱནི ཡསྶཱཏི ཝཱ ཨཊྛཀོ, ཏསྶ དིནྣཾ བྷཏྟཾ ཨཊྛཀབྷཏྟཾ། ཨེཝཾ ཙཏུཀྐབྷཏྟནྟི ཨེཏྠཱཔི། ཏམེཝཏྠཾ དསྶེནྟོ ཨཱཧ ‘‘ཨཊྛནྣཾ བྷིཀྑཱུནཾ དེམཱ’’ཏིཨཱདི། མཧཱབྷིསངྑཱརིཀེནཱཏི སབྦིནོནཱིཏཱདཱིཧི མཧནྟོ ཨབྷིསངྑཱརོ མཧཱབྷིསངྑཱརོ, སོ ཨེཏསྶ ཨཏྠཱིཏི མཧཱབྷིསངྑཱརིཀོ, ཏེན ཨཏིརསཀཔཱུཝེན པཏྟེ པཀྑིཔིཏྭཱཏི སམྦནྡྷོ། ‘‘ཐཀེཏྭཱ དིནྣ’’ནྟི ཨིམིནཱ གཱུཧིཏྭཱ དཱཏབྦཾ གུལ༹ྷཀཾ, ཏམེཝ བྷཏྟཾ གུལ༹ྷཀབྷཏྟནྟི ཝཙནཏྠཾ དསྶེཏི།
Aṭṭhakathāyanti mahāaṭṭhakathāyaṃ, vuttānīti sambandho. Tatthāti catūsu bhattesu. Vihāre uppannaṃ bhattaṃ vihārabhattanti dassento āha ‘‘vihārabhattaṃ nāmā’’tiādi. Tatruppādabhattanti tasmiṃ vihāre dinnakhettavatthuādīhi uppādabhattaṃ. Tanti vihārabhattaṃ. Yathāti yenākārena, paṭiggahiyamāneti sambandho. Aṭṭhannaṃ samūho, aṭṭha parimāṇāni yassāti vā aṭṭhako, tassa dinnaṃ bhattaṃ aṭṭhakabhattaṃ. Evaṃ catukkabhattanti etthāpi. Tamevatthaṃ dassento āha ‘‘aṭṭhannaṃ bhikkhūnaṃ demā’’tiādi. Mahābhisaṅkhārikenāti sabbinonītādīhi mahanto abhisaṅkhāro mahābhisaṅkhāro, so etassa atthīti mahābhisaṅkhāriko, tena atirasakapūvena patte pakkhipitvāti sambandho. ‘‘Thaketvā dinna’’nti iminā gūhitvā dātabbaṃ guḷhakaṃ, tameva bhattaṃ guḷhakabhattanti vacanatthaṃ dasseti.
ཨིདྷཱཏི ཨིམསྨིཾ ལོཀེ། ཨེཀཙྩེ མནུསྶཱ དེནྟཱིཏི སམྦནྡྷོ། ‘‘བྷིཀྑུཔརིཙྪེདཛཱནནཏྠཾ གུལ༹ཀེ དེནྟཱི’’ཏི ཨིམིནཱ གུལ༹ཀེན བྷིཀྑཱུ གཎེཏྭཱ དཱཏབྦཾ བྷཏྟཾ གུལ༹ཀབྷཏྟནྟི ཝཙནཏྠཾ དསྶེཏི། ཨེཏྠ ཙ པུརིམནཡེ ལ༹ཀཱརེ ཧཀཱརསཾཡོགོ ཨཏྠི, པཙྪིམནཡེ ནཏྠཱིཏི དཊྛབྦཾ། གུལ༹པིཎྜགཎནཱཡ བྷིཀྑུགཎནཾ ཛཱནཱཏི། ཨིཏཱིཏིཨཱདི ནིགམནཾ། ཙཱིཝརབྷཱཛནཱིཡཾ ཝུཏྟནྟི སམྦནྡྷོ།
Idhāti imasmiṃ loke. Ekacce manussā dentīti sambandho. ‘‘Bhikkhuparicchedajānanatthaṃ guḷake dentī’’ti iminā guḷakena bhikkhū gaṇetvā dātabbaṃ bhattaṃ guḷakabhattanti vacanatthaṃ dasseti. Ettha ca purimanaye ḷakāre hakārasaṃyogo atthi, pacchimanaye natthīti daṭṭhabbaṃ. Guḷapiṇḍagaṇanāya bhikkhugaṇanaṃ jānāti. Itītiādi nigamanaṃ. Cīvarabhājanīyaṃ vuttanti sambandho.
སབྦིཨཱདཱིསུ བྷེསཛྫེསཱུཏི ནིདྡྷཱརཎེ བྷུམྨཾ, ‘‘སབྦིསྶཱ’’ཏི པདཾ ‘‘ཀུམྦྷསཏམྤཱི’’ཏི པདེ ནིསྶིཏསམྦནྡྷོ།
Sabbiādīsu bhesajjesūti niddhāraṇe bhummaṃ, ‘‘sabbissā’’ti padaṃ ‘‘kumbhasatampī’’ti pade nissitasambandho.
པཙྪཱ ཨཱགཏཱནཾ དཱཏབྦམེཝཱཏི དུཏིཡབྷཱགེ ཨདཱཏབྦེཡེཝ པཙྪཱ ཨཱགཏཱནཾ དཱཏབྦམེཝ། སབྦསནྣིཔཱཏཊྛཱནེཡེཝཱཏི སབྦེསཾ བྷིཀྑཱུནཾ སནྣིཔཱཏཊྛཱནེཝ། བྷཱཛནཱིཡབྷཎྜཾ ནཱམ བྷཱཛནཊྛཱནཾ སམྤཏྟསྶེཝ པཱཔུཎཱཏི, ན ཨསམྤཏྟསྶ། སབྦསནྣིཔཱཏཊྛཱནེ ཙ ཡེབྷུཡྻེན སམྤཏྟོ ཧོཏི, ཏེན ཝུཏྟཾ ‘‘སབྦསནྣིཔཱཏཊྛཱནེཡེཝཱ’’ཏི།
Pacchāāgatānaṃ dātabbamevāti dutiyabhāge adātabbeyeva pacchā āgatānaṃ dātabbameva. Sabbasannipātaṭṭhāneyevāti sabbesaṃ bhikkhūnaṃ sannipātaṭṭhāneva. Bhājanīyabhaṇḍaṃ nāma bhājanaṭṭhānaṃ sampattasseva pāpuṇāti, na asampattassa. Sabbasannipātaṭṭhāne ca yebhuyyena sampatto hoti, tena vuttaṃ ‘‘sabbasannipātaṭṭhāneyevā’’ti.
ཡཐཱཋིཏཾཡེཝཱཏི ཀིཉྩི ཨབྷཱཛེཏྭཱ ཡཐཱཋིཏཾཡེཝ། ‘‘དུགྒཧིཏ’’ནྟི ཝཏྭཱ ཏདཏྠཾ དསྶེནྟོ ཨཱཧ ‘‘ཏཾ གཏགཏཊྛཱནེ སངྒྷིཀམེཝ ཧོཏཱི’’ཏི། ཨཱཝཛྫེཏྭཱཏི པརིཎཱམེཏྭཱ། ཏམྤཱིཏི ཐཱལཀེ པཀྑིཏྟཾ སབྦིམྤི། ཐིནནྟི གྷནབྷཱཝེན ཏིཊྛཏཱིཏི ཐིནཾ, གྷནནྟི ཝུཏྟཾ ཧོཏི། ཝུཏྟཔརིཙྪེདཏོཏི ‘‘དས བྷིཀྑཱུ, དསེཝ ཙ སབྦིཀུམྦྷཱ’’ཏི ཝུཏྟཔརིཙྪེདཏོ།
Yathāṭhitaṃyevāti kiñci abhājetvā yathāṭhitaṃyeva. ‘‘Duggahita’’nti vatvā tadatthaṃ dassento āha ‘‘taṃ gatagataṭṭhāne saṅghikameva hotī’’ti. Āvajjetvāti pariṇāmetvā. Tampīti thālake pakkhittaṃ sabbimpi. Thinanti ghanabhāvena tiṭṭhatīti thinaṃ, ghananti vuttaṃ hoti. Vuttaparicchedatoti ‘‘dasa bhikkhū, daseva ca sabbikumbhā’’ti vuttaparicchedato.
གཱཐཱཡཾ པཱལི༹ནྟི ཝིནཡཔཱལི༹ཾ། ཨཊྛཀཐཉྩེཝཱཏི ཏསྶཱ ཨཊྛཀཐཉྩེཝ། ཝིཙཀྑཎོཏི ཝིཝིདྷཾ ཨཏྠཾ ཙཀྑཏི པསྶཏཱིཏི ཝིཙཀྑཎོ། ཨེཝནྟི ཡཐཱཝུཏྟནཡེན། ཏཏྲཱཡཾ ཡོཛནཱ – ཨེཝཾ ཝིཙཀྑཎོ བྷིཀྑུ པཱལི༹ཾ, ཨཊྛཀཐཉྩེཝ ཨོལོཀེཏྭཱ ཨཔྤམཏྟོཝ ཧུཏྭཱ སངྒྷིཀེ པཙྩཡེ བྷཱཛཡེཏི།
Gāthāyaṃ pāḷinti vinayapāḷiṃ. Aṭṭhakathañcevāti tassā aṭṭhakathañceva. Vicakkhaṇoti vividhaṃ atthaṃ cakkhati passatīti vicakkhaṇo. Evanti yathāvuttanayena. Tatrāyaṃ yojanā – evaṃ vicakkhaṇo bhikkhu pāḷiṃ, aṭṭhakathañceva oloketvā appamattova hutvā saṅghike paccaye bhājayeti.
ཨིཏི པཙྩཡབྷཱཛནཱིཡཀཐཱཡ ཡོཛནཱ སམཏྟཱ།
Iti paccayabhājanīyakathāya yojanā samattā.
ཨུཔཌྜྷབྷཱགོཏི བྷིཀྑཱུནཾ ལདྡྷབྷཱགཏོ ཨུཔཌྜྷོ བྷཱགོ། སེསཾ སུཝིཉྙེཡྻམེཝ།
Upaḍḍhabhāgoti bhikkhūnaṃ laddhabhāgato upaḍḍho bhāgo. Sesaṃ suviññeyyameva.
ཨིཏི སེནཱསནཀྑནྡྷཀཝཎྞནཱཡ ཡོཛནཱ སམཏྟཱ།
Iti senāsanakkhandhakavaṇṇanāya yojanā samattā.
