| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பக்கி²கப⁴த்தாதி³கதா²வண்ணனா
Pakkhikabhattādikathāvaṇṇanā
அபி⁴லக்கி²தேஸு சதூஸு பக்க²தி³வஸேஸு தா³தப்³ப³ப⁴த்தங் பக்கி²கங். அபி⁴லக்கி²தேஸூதி எத்த² அபீ⁴தி உபஸக்³க³மத்தங், லக்க²ணீயேஸு இச்சேவ அத்தோ², உபோஸத²ஸமாதா³னத⁴ம்மஸ்ஸவனபூஜாஸக்காராதி³கரணத்த²ங் லக்கி²தப்³பே³ஸு ஸல்லக்கே²தப்³பே³ஸு உபலக்கே²தப்³பே³ஸூதி வுத்தங் ஹோதி. ஸ்வே பக்கோ²தி ‘‘அஜ்ஜ பக்கி²கங் ந கா³ஹேதப்³ப³’’ந்தி பக்கி²கஸ்ஸ அனியமத்தா வுத்தங். ‘‘ஸ்வே அம்ஹாகங் க⁴ரே லூக²ப⁴த்தங் ப⁴விஸ்ஸதீ’’தி பொத்த²கேஸு லிக²ந்தி, ‘‘பக்க²ப⁴த்தங் ப⁴விஸ்ஸதீ’’தி பாடே²ன ப⁴விதப்³ப³ங். உபோஸதே² தா³தப்³ப³ங் ப⁴த்தங் உபோஸதி²கங். நிப³ந்தா⁴பிதந்தி ‘‘அஸுகவிஹாரஸ்ஸா’’தி நியமிதங். கா³ஹெத்வா பு⁴ஞ்ஜிதப்³ப³ந்தி தஸ்மிங் ஸேனாஸனே வஸந்தேஹி டி²திகாய கா³ஹெத்வா பு⁴ஞ்ஜிதப்³ப³ங். தண்டு³லாதீ³னிபேஸெந்தி…பே॰… வட்டதீதி அபி⁴ஹடபி⁴க்க²த்தா வட்டதி. ததா² படிக்³க³ஹிதத்தாதி பி⁴க்கா²னாமேன படிக்³க³ஹிதத்தா. பத்தங் பூரெத்வா த²கெத்வா தி³ன்னந்தி ‘‘கு³ளகப⁴த்தங் தே³மா’’தி தி³ன்னங். கு³ளபிண்டே³பி…பே॰… தா³தப்³போ³தி எத்த² கு³ளபிண்ட³ங் தாலபக்கப்பமாணந்தி வேதி³தப்³ப³ங். ஸேஸமெத்த² ஸுவிஞ்ஞெய்யமேவாதி.
Abhilakkhitesu catūsu pakkhadivasesu dātabbabhattaṃ pakkhikaṃ. Abhilakkhitesūti ettha abhīti upasaggamattaṃ, lakkhaṇīyesu icceva attho, uposathasamādānadhammassavanapūjāsakkārādikaraṇatthaṃ lakkhitabbesu sallakkhetabbesu upalakkhetabbesūti vuttaṃ hoti. Sve pakkhoti ‘‘ajja pakkhikaṃ na gāhetabba’’nti pakkhikassa aniyamattā vuttaṃ. ‘‘Sve amhākaṃ ghare lūkhabhattaṃ bhavissatī’’ti potthakesu likhanti, ‘‘pakkhabhattaṃ bhavissatī’’ti pāṭhena bhavitabbaṃ. Uposathe dātabbaṃ bhattaṃ uposathikaṃ. Nibandhāpitanti ‘‘asukavihārassā’’ti niyamitaṃ. Gāhetvā bhuñjitabbanti tasmiṃ senāsane vasantehi ṭhitikāya gāhetvā bhuñjitabbaṃ. Taṇḍulādīnipesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā. Pattaṃ pūretvā thaketvā dinnanti ‘‘guḷakabhattaṃ demā’’ti dinnaṃ. Guḷapiṇḍepi…pe… dātabboti ettha guḷapiṇḍaṃ tālapakkappamāṇanti veditabbaṃ. Sesamettha suviññeyyamevāti.
ஸேனாஸனக்க²ந்த⁴கவண்ணனா நிட்டி²தா.
Senāsanakkhandhakavaṇṇanā niṭṭhitā.
