| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பக்கி²கப⁴த்தாதி³கதா²வண்ணனா
Pakkhikabhattādikathāvaṇṇanā
‘‘ஸ்வே பக்கோ²’’தி அஜ்ஜ பக்கி²கங் ந கா³ஹேதப்³ப³ந்தி அட்ட²மியா பு⁴ஞ்ஜிதப்³ப³ங் ஸத்தமியா பு⁴ஞ்ஜனத்தா²ய ந கா³ஹேதப்³ப³ங், தா³யகேஹி நியமிததி³வஸேனேவ கா³ஹேதப்³ப³ந்தி அத்தோ². தேனாஹ ‘‘ஸசே பனா’’திஆதி³. ஸ்வே லூக²ந்தி அஜ்ஜ ஆவாஹமங்க³லாதி³கரணதோ அதிபணீதபோ⁴ஜனங் கரீயதி, ஸ்வே ததா² ந ப⁴விஸ்ஸதி, அஜ்ஜேவ பி⁴க்கூ² போ⁴ஜெஸ்ஸாமீதி அதி⁴ப்பாயோ.
‘‘Svepakkho’’ti ajja pakkhikaṃ na gāhetabbanti aṭṭhamiyā bhuñjitabbaṃ sattamiyā bhuñjanatthāya na gāhetabbaṃ, dāyakehi niyamitadivaseneva gāhetabbanti attho. Tenāha ‘‘sace panā’’tiādi. Sve lūkhanti ajja āvāhamaṅgalādikaraṇato atipaṇītabhojanaṃ karīyati, sve tathā na bhavissati, ajjeva bhikkhū bhojessāmīti adhippāyo.
பக்கி²கப⁴த்ததோ உபோஸதி²கஸ்ஸ பே⁴த³ங் த³ஸ்ஸெந்தோ ஆஹ ‘‘உபோஸத²ங்கா³னி ஸமாதி³யித்வா’’திஆதி³. நிப³ந்தா⁴பிதந்தி ‘‘அஸுகவிஹாரே ஆக³ந்துகா பு⁴ஞ்ஜந்தூ’’தி நியமிதங்.
Pakkhikabhattato uposathikassa bhedaṃ dassento āha ‘‘uposathaṅgāni samādiyitvā’’tiādi. Nibandhāpitanti ‘‘asukavihāre āgantukā bhuñjantū’’ti niyamitaṃ.
க³மிகோ ஆக³ந்துகப⁴த்தம்பீதி கா³மந்தரதோ ஆக³ந்த்வா அவூபஸந்தேன க³மிகசித்தேன வஸித்வா புன அஞ்ஞத்த² க³ச்ச²ந்தங் ஸந்தா⁴ய வுத்தங். ஆவாஸிகஸ்ஸ பன க³ந்துகாமஸ்ஸ க³மிகப⁴த்தமேவ லப்³ப⁴தி. ‘‘லேஸங் ஒட்³டெ³த்வா’’தி வுத்தத்தா லேஸாபா⁴வே யாவ க³மனபரிப³ந்தோ⁴ விக³ச்ச²தி, தாவ பு⁴ஞ்ஜிதுங் வட்டதீதி ஞாபிதந்தி த³ட்ட²ப்³ப³ங்.
Gamiko āgantukabhattampīti gāmantarato āgantvā avūpasantena gamikacittena vasitvā puna aññattha gacchantaṃ sandhāya vuttaṃ. Āvāsikassa pana gantukāmassa gamikabhattameva labbhati. ‘‘Lesaṃ oḍḍetvā’’ti vuttattā lesābhāve yāva gamanaparibandho vigacchati, tāva bhuñjituṃ vaṭṭatīti ñāpitanti daṭṭhabbaṃ.
தண்டு³லாதீ³னி பேஸெந்தி…பே॰… வட்டதீதி அபி⁴ஹடபி⁴க்க²த்தா வட்டதி. ததா² படிக்³க³ஹிதத்தாதி பி⁴க்கா²னாமேன படிக்³க³ஹிதத்தா.
Taṇḍulādīni pesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā.
அவிப⁴த்தங் ஸங்கி⁴கங் ப⁴ண்ட³ந்தி குக்குச்சுப்பத்திஆகாரத³ஸ்ஸனங். ஏவங் குக்குச்சங் கத்வா புச்சி²தப்³ப³கிச்சங் நத்தி², அபுச்சி²த்வா தா³தப்³ப³ந்தி அதி⁴ப்பாயோ.
Avibhattaṃ saṅghikaṃ bhaṇḍanti kukkuccuppattiākāradassanaṃ. Evaṃ kukkuccaṃ katvā pucchitabbakiccaṃ natthi, apucchitvā dātabbanti adhippāyo.
பக்கி²கப⁴த்தாதி³கதா²வண்ணனா நிட்டி²தா.
Pakkhikabhattādikathāvaṇṇanā niṭṭhitā.
ஸேனாஸனக்க²ந்த⁴கவண்ணனானயோ நிட்டி²தோ.
Senāsanakkhandhakavaṇṇanānayo niṭṭhito.
