| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
পক্খিকভত্তাদিকথাৰণ্ণনা
Pakkhikabhattādikathāvaṇṇanā
‘‘স্ৰে পক্খো’’তি অজ্জ পক্খিকং ন গাহেতব্বন্তি অট্ঠমিযা ভুঞ্জিতব্বং সত্তমিযা ভুঞ্জনত্থায ন গাহেতব্বং, দাযকেহি নিযমিতদিৰসেনেৰ গাহেতব্বন্তি অত্থো। তেনাহ ‘‘সচে পনা’’তিআদি। স্ৰে লূখন্তি অজ্জ আৰাহমঙ্গলাদিকরণতো অতিপণীতভোজনং করীযতি, স্ৰে তথা ন ভৰিস্সতি, অজ্জেৰ ভিক্খূ ভোজেস্সামীতি অধিপ্পাযো।
‘‘Svepakkho’’ti ajja pakkhikaṃ na gāhetabbanti aṭṭhamiyā bhuñjitabbaṃ sattamiyā bhuñjanatthāya na gāhetabbaṃ, dāyakehi niyamitadivaseneva gāhetabbanti attho. Tenāha ‘‘sace panā’’tiādi. Sve lūkhanti ajja āvāhamaṅgalādikaraṇato atipaṇītabhojanaṃ karīyati, sve tathā na bhavissati, ajjeva bhikkhū bhojessāmīti adhippāyo.
পক্খিকভত্ততো উপোসথিকস্স ভেদং দস্সেন্তো আহ ‘‘উপোসথঙ্গানি সমাদিযিত্ৰা’’তিআদি। নিবন্ধাপিতন্তি ‘‘অসুকৰিহারে আগন্তুকা ভুঞ্জন্তূ’’তি নিযমিতং।
Pakkhikabhattato uposathikassa bhedaṃ dassento āha ‘‘uposathaṅgāni samādiyitvā’’tiādi. Nibandhāpitanti ‘‘asukavihāre āgantukā bhuñjantū’’ti niyamitaṃ.
গমিকো আগন্তুকভত্তম্পীতি গামন্তরতো আগন্ত্ৰা অৰূপসন্তেন গমিকচিত্তেন ৰসিত্ৰা পুন অঞ্ঞত্থ গচ্ছন্তং সন্ধায ৰুত্তং। আৰাসিকস্স পন গন্তুকামস্স গমিকভত্তমেৰ লব্ভতি। ‘‘লেসং ওড্ডেত্ৰা’’তি ৰুত্তত্তা লেসাভাৰে যাৰ গমনপরিবন্ধো ৰিগচ্ছতি, তাৰ ভুঞ্জিতুং ৰট্টতীতি ঞাপিতন্তি দট্ঠব্বং।
Gamiko āgantukabhattampīti gāmantarato āgantvā avūpasantena gamikacittena vasitvā puna aññattha gacchantaṃ sandhāya vuttaṃ. Āvāsikassa pana gantukāmassa gamikabhattameva labbhati. ‘‘Lesaṃ oḍḍetvā’’ti vuttattā lesābhāve yāva gamanaparibandho vigacchati, tāva bhuñjituṃ vaṭṭatīti ñāpitanti daṭṭhabbaṃ.
তণ্ডুলাদীনি পেসেন্তি…পে॰… ৰট্টতীতি অভিহটভিক্খত্তা ৰট্টতি। তথা পটিগ্গহিতত্তাতি ভিক্খানামেন পটিগ্গহিতত্তা।
Taṇḍulādīni pesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā.
অৰিভত্তং সঙ্ঘিকং ভণ্ডন্তি কুক্কুচ্চুপ্পত্তিআকারদস্সনং। এৰং কুক্কুচ্চং কত্ৰা পুচ্ছিতব্বকিচ্চং নত্থি, অপুচ্ছিত্ৰা দাতব্বন্তি অধিপ্পাযো।
Avibhattaṃ saṅghikaṃ bhaṇḍanti kukkuccuppattiākāradassanaṃ. Evaṃ kukkuccaṃ katvā pucchitabbakiccaṃ natthi, apucchitvā dātabbanti adhippāyo.
পক্খিকভত্তাদিকথাৰণ্ণনা নিট্ঠিতা।
Pakkhikabhattādikathāvaṇṇanā niṭṭhitā.
সেনাসনক্খন্ধকৰণ্ণনানযো নিট্ঠিতো।
Senāsanakkhandhakavaṇṇanānayo niṭṭhito.
