| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
पक्खिकभत्तादिकथावण्णना
Pakkhikabhattādikathāvaṇṇanā
‘‘स्वे पक्खो’’ति अज्ज पक्खिकं न गाहेतब्बन्ति अट्ठमिया भुञ्जितब्बं सत्तमिया भुञ्जनत्थाय न गाहेतब्बं, दायकेहि नियमितदिवसेनेव गाहेतब्बन्ति अत्थो। तेनाह ‘‘सचे पना’’तिआदि। स्वे लूखन्ति अज्ज आवाहमङ्गलादिकरणतो अतिपणीतभोजनं करीयति, स्वे तथा न भविस्सति, अज्जेव भिक्खू भोजेस्सामीति अधिप्पायो।
‘‘Svepakkho’’ti ajja pakkhikaṃ na gāhetabbanti aṭṭhamiyā bhuñjitabbaṃ sattamiyā bhuñjanatthāya na gāhetabbaṃ, dāyakehi niyamitadivaseneva gāhetabbanti attho. Tenāha ‘‘sace panā’’tiādi. Sve lūkhanti ajja āvāhamaṅgalādikaraṇato atipaṇītabhojanaṃ karīyati, sve tathā na bhavissati, ajjeva bhikkhū bhojessāmīti adhippāyo.
पक्खिकभत्ततो उपोसथिकस्स भेदं दस्सेन्तो आह ‘‘उपोसथङ्गानि समादियित्वा’’तिआदि। निबन्धापितन्ति ‘‘असुकविहारे आगन्तुका भुञ्जन्तू’’ति नियमितं।
Pakkhikabhattato uposathikassa bhedaṃ dassento āha ‘‘uposathaṅgāni samādiyitvā’’tiādi. Nibandhāpitanti ‘‘asukavihāre āgantukā bhuñjantū’’ti niyamitaṃ.
गमिको आगन्तुकभत्तम्पीति गामन्तरतो आगन्त्वा अवूपसन्तेन गमिकचित्तेन वसित्वा पुन अञ्ञत्थ गच्छन्तं सन्धाय वुत्तं। आवासिकस्स पन गन्तुकामस्स गमिकभत्तमेव लब्भति। ‘‘लेसं ओड्डेत्वा’’ति वुत्तत्ता लेसाभावे याव गमनपरिबन्धो विगच्छति, ताव भुञ्जितुं वट्टतीति ञापितन्ति दट्ठब्बं।
Gamiko āgantukabhattampīti gāmantarato āgantvā avūpasantena gamikacittena vasitvā puna aññattha gacchantaṃ sandhāya vuttaṃ. Āvāsikassa pana gantukāmassa gamikabhattameva labbhati. ‘‘Lesaṃ oḍḍetvā’’ti vuttattā lesābhāve yāva gamanaparibandho vigacchati, tāva bhuñjituṃ vaṭṭatīti ñāpitanti daṭṭhabbaṃ.
तण्डुलादीनि पेसेन्ति…पे॰… वट्टतीति अभिहटभिक्खत्ता वट्टति। तथा पटिग्गहितत्ताति भिक्खानामेन पटिग्गहितत्ता।
Taṇḍulādīni pesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā.
अविभत्तं सङ्घिकं भण्डन्ति कुक्कुच्चुप्पत्तिआकारदस्सनं। एवं कुक्कुच्चं कत्वा पुच्छितब्बकिच्चं नत्थि, अपुच्छित्वा दातब्बन्ति अधिप्पायो।
Avibhattaṃ saṅghikaṃ bhaṇḍanti kukkuccuppattiākāradassanaṃ. Evaṃ kukkuccaṃ katvā pucchitabbakiccaṃ natthi, apucchitvā dātabbanti adhippāyo.
पक्खिकभत्तादिकथावण्णना निट्ठिता।
Pakkhikabhattādikathāvaṇṇanā niṭṭhitā.
सेनासनक्खन्धकवण्णनानयो निट्ठितो।
Senāsanakkhandhakavaṇṇanānayo niṭṭhito.
