| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
ปกฺขิกภตฺตาทิกถาวณฺณนา
Pakkhikabhattādikathāvaṇṇanā
‘‘เสฺว ปโกฺข’’ติ อชฺช ปกฺขิกํ น คาเหตพฺพนฺติ อฎฺฐมิยา ภุญฺชิตพฺพํ สตฺตมิยา ภุญฺชนตฺถาย น คาเหตพฺพํ, ทายเกหิ นิยมิตทิวเสเนว คาเหตพฺพนฺติ อโตฺถฯ เตนาห ‘‘สเจ ปนา’’ติอาทิฯ เสฺว ลูขนฺติ อชฺช อาวาหมงฺคลาทิกรณโต อติปณีตโภชนํ กรียติ, เสฺว ตถา น ภวิสฺสติ, อเชฺชว ภิกฺขู โภเชสฺสามีติ อธิปฺปาโยฯ
‘‘Svepakkho’’ti ajja pakkhikaṃ na gāhetabbanti aṭṭhamiyā bhuñjitabbaṃ sattamiyā bhuñjanatthāya na gāhetabbaṃ, dāyakehi niyamitadivaseneva gāhetabbanti attho. Tenāha ‘‘sace panā’’tiādi. Sve lūkhanti ajja āvāhamaṅgalādikaraṇato atipaṇītabhojanaṃ karīyati, sve tathā na bhavissati, ajjeva bhikkhū bhojessāmīti adhippāyo.
ปกฺขิกภตฺตโต อุโปสถิกสฺส เภทํ ทเสฺสโนฺต อาห ‘‘อุโปสถงฺคานิ สมาทิยิตฺวา’’ติอาทิฯ นิพนฺธาปิตนฺติ ‘‘อสุกวิหาเร อาคนฺตุกา ภุญฺชนฺตู’’ติ นิยมิตํฯ
Pakkhikabhattato uposathikassa bhedaṃ dassento āha ‘‘uposathaṅgāni samādiyitvā’’tiādi. Nibandhāpitanti ‘‘asukavihāre āgantukā bhuñjantū’’ti niyamitaṃ.
คมิโก อาคนฺตุกภตฺตมฺปีติ คามนฺตรโต อาคนฺตฺวา อวูปสเนฺตน คมิกจิเตฺตน วสิตฺวา ปุน อญฺญตฺถ คจฺฉนฺตํ สนฺธาย วุตฺตํฯ อาวาสิกสฺส ปน คนฺตุกามสฺส คมิกภตฺตเมว ลพฺภติฯ ‘‘เลสํ โอเฑฺฑตฺวา’’ติ วุตฺตตฺตา เลสาภาเว ยาว คมนปริพโนฺธ วิคจฺฉติ, ตาว ภุญฺชิตุํ วฎฺฎตีติ ญาปิตนฺติ ทฎฺฐพฺพํฯ
Gamiko āgantukabhattampīti gāmantarato āgantvā avūpasantena gamikacittena vasitvā puna aññattha gacchantaṃ sandhāya vuttaṃ. Āvāsikassa pana gantukāmassa gamikabhattameva labbhati. ‘‘Lesaṃ oḍḍetvā’’ti vuttattā lesābhāve yāva gamanaparibandho vigacchati, tāva bhuñjituṃ vaṭṭatīti ñāpitanti daṭṭhabbaṃ.
ตณฺฑุลาทีนิ เปเสนฺติ…เป.… วฎฺฎตีติ อภิหฎภิกฺขตฺตา วฎฺฎติฯ ตถา ปฎิคฺคหิตตฺตาติ ภิกฺขานาเมน ปฎิคฺคหิตตฺตาฯ
Taṇḍulādīni pesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā.
อวิภตฺตํ สงฺฆิกํ ภณฺฑนฺติ กุกฺกุจฺจุปฺปตฺติอาการทสฺสนํฯ เอวํ กุกฺกุจฺจํ กตฺวา ปุจฺฉิตพฺพกิจฺจํ นตฺถิ, อปุจฺฉิตฺวา ทาตพฺพนฺติ อธิปฺปาโยฯ
Avibhattaṃ saṅghikaṃ bhaṇḍanti kukkuccuppattiākāradassanaṃ. Evaṃ kukkuccaṃ katvā pucchitabbakiccaṃ natthi, apucchitvā dātabbanti adhippāyo.
ปกฺขิกภตฺตาทิกถาวณฺณนา นิฎฺฐิตาฯ
Pakkhikabhattādikathāvaṇṇanā niṭṭhitā.
เสนาสนกฺขนฺธกวณฺณนานโย นิฎฺฐิโตฯ
Senāsanakkhandhakavaṇṇanānayo niṭṭhito.
