| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
ပက္ခိကဘတ္တာဒိကထာဝဏ္ဏနာ
Pakkhikabhattādikathāvaṇṇanā
အဘိလက္ခိတေသု စတူသု ပက္ခဒိဝသေသု ဒာတဗ္ဗဘတ္တံ ပက္ခိကံ။ အဘိလက္ခိတေသူတိ ဧတ္ထ အဘီတိ ဥပသဂ္ဂမတ္တံ, လက္ခဏီယေသု ဣစ္စေဝ အတ္ထော, ဥပောသထသမာဒာနဓမ္မသ္သဝနပူဇာသက္ကာရာဒိကရဏတ္ထံ လက္ခိတဗ္ဗေသု သလ္လက္ခေတဗ္ဗေသု ဥပလက္ခေတဗ္ဗေသူတိ ဝုတ္တံ ဟောတိ။ သ္ဝေ ပက္ခောတိ ‘‘အဇ္ဇ ပက္ခိကံ န ဂာဟေတဗ္ဗ’’န္တိ ပက္ခိကသ္သ အနိယမတ္တာ ဝုတ္တံ။ ‘‘သ္ဝေ အမ္ဟာကံ ဃရေ လူခဘတ္တံ ဘဝိသ္သတီ’’တိ ပောတ္ထကေသု လိခန္တိ, ‘‘ပက္ခဘတ္တံ ဘဝိသ္သတီ’’တိ ပာဌေန ဘဝိတဗ္ဗံ။ ဥပောသထေ ဒာတဗ္ဗံ ဘတ္တံ ဥပောသထိကံ။ နိဗန္ဓာပိတန္တိ ‘‘အသုကဝိဟာရသ္သာ’’တိ နိယမိတံ။ ဂာဟေတ္ဝာ ဘုဉ္ဇိတဗ္ဗန္တိ တသ္မိံ သေနာသနေ ဝသန္တေဟိ ဌိတိကာယ ဂာဟေတ္ဝာ ဘုဉ္ဇိတဗ္ဗံ။ တဏ္ဍုလာဒီနိပေသေန္တိ။ပေ.။ ဝဋ္ဋတီတိ အဘိဟဋဘိက္ခတ္တာ ဝဋ္ဋတိ။ တထာ ပဋိဂ္ဂဟိတတ္တာတိ ဘိက္ခာနာမေန ပဋိဂ္ဂဟိတတ္တာ။ ပတ္တံ ပူရေတ္ဝာ ထကေတ္ဝာ ဒိန္နန္တိ ‘‘ဂုဠကဘတ္တံ ဒေမာ’’တိ ဒိန္နံ။ ဂုဠပိဏ္ဍေပိ။ပေ.။ ဒာတဗ္ဗောတိ ဧတ္ထ ဂုဠပိဏ္ဍံ တာလပက္ကပ္ပမာဏန္တိ ဝေဒိတဗ္ဗံ။ သေသမေတ္ထ သုဝိညေယ္ယမေဝာတိ။
Abhilakkhitesu catūsu pakkhadivasesu dātabbabhattaṃ pakkhikaṃ. Abhilakkhitesūti ettha abhīti upasaggamattaṃ, lakkhaṇīyesu icceva attho, uposathasamādānadhammassavanapūjāsakkārādikaraṇatthaṃ lakkhitabbesu sallakkhetabbesu upalakkhetabbesūti vuttaṃ hoti. Sve pakkhoti ‘‘ajja pakkhikaṃ na gāhetabba’’nti pakkhikassa aniyamattā vuttaṃ. ‘‘Sve amhākaṃ ghare lūkhabhattaṃ bhavissatī’’ti potthakesu likhanti, ‘‘pakkhabhattaṃ bhavissatī’’ti pāṭhena bhavitabbaṃ. Uposathe dātabbaṃ bhattaṃ uposathikaṃ. Nibandhāpitanti ‘‘asukavihārassā’’ti niyamitaṃ. Gāhetvā bhuñjitabbanti tasmiṃ senāsane vasantehi ṭhitikāya gāhetvā bhuñjitabbaṃ. Taṇḍulādīnipesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā. Pattaṃ pūretvā thaketvā dinnanti ‘‘guḷakabhattaṃ demā’’ti dinnaṃ. Guḷapiṇḍepi…pe… dātabboti ettha guḷapiṇḍaṃ tālapakkappamāṇanti veditabbaṃ. Sesamettha suviññeyyamevāti.
သေနာသနက္ခန္ဓကဝဏ္ဏနာ နိဋ္ဌိတာ။
Senāsanakkhandhakavaṇṇanā niṭṭhitā.
