| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
ပက္ခိကဘတ္တာဒိကထာဝဏ္ဏနာ
Pakkhikabhattādikathāvaṇṇanā
‘‘သ္ဝေ ပက္ခော’’တိ အဇ္ဇ ပက္ခိကံ န ဂာဟေတဗ္ဗန္တိ အဋ္ဌမိယာ ဘုဉ္ဇိတဗ္ဗံ သတ္တမိယာ ဘုဉ္ဇနတ္ထာယ န ဂာဟေတဗ္ဗံ, ဒာယကေဟိ နိယမိတဒိဝသေနေဝ ဂာဟေတဗ္ဗန္တိ အတ္ထော။ တေနာဟ ‘‘သစေ ပနာ’’တိအာဒိ။ သ္ဝေ လူခန္တိ အဇ္ဇ အာဝာဟမင္ဂလာဒိကရဏတော အတိပဏီတဘောဇနံ ကရီယတိ, သ္ဝေ တထာ န ဘဝိသ္သတိ, အဇ္ဇေဝ ဘိက္ခူ ဘောဇေသ္သာမီတိ အဓိပ္ပာယော။
‘‘Svepakkho’’ti ajja pakkhikaṃ na gāhetabbanti aṭṭhamiyā bhuñjitabbaṃ sattamiyā bhuñjanatthāya na gāhetabbaṃ, dāyakehi niyamitadivaseneva gāhetabbanti attho. Tenāha ‘‘sace panā’’tiādi. Sve lūkhanti ajja āvāhamaṅgalādikaraṇato atipaṇītabhojanaṃ karīyati, sve tathā na bhavissati, ajjeva bhikkhū bhojessāmīti adhippāyo.
ပက္ခိကဘတ္တတော ဥပောသထိကသ္သ ဘေဒံ ဒသ္သေန္တော အာဟ ‘‘ဥပောသထင္ဂာနိ သမာဒိယိတ္ဝာ’’တိအာဒိ။ နိဗန္ဓာပိတန္တိ ‘‘အသုကဝိဟာရေ အာဂန္တုကာ ဘုဉ္ဇန္တူ’’တိ နိယမိတံ။
Pakkhikabhattato uposathikassa bhedaṃ dassento āha ‘‘uposathaṅgāni samādiyitvā’’tiādi. Nibandhāpitanti ‘‘asukavihāre āgantukā bhuñjantū’’ti niyamitaṃ.
ဂမိကော အာဂန္တုကဘတ္တမ္ပီတိ ဂာမန္တရတော အာဂန္တ္ဝာ အဝူပသန္တေန ဂမိကစိတ္တေန ဝသိတ္ဝာ ပုန အညတ္ထ ဂစ္ဆန္တံ သန္ဓာယ ဝုတ္တံ။ အာဝာသိကသ္သ ပန ဂန္တုကာမသ္သ ဂမိကဘတ္တမေဝ လဗ္ဘတိ။ ‘‘လေသံ ဩဍ္ဍေတ္ဝာ’’တိ ဝုတ္တတ္တာ လေသာဘာဝေ ယာဝ ဂမနပရိဗန္ဓော ဝိဂစ္ဆတိ, တာဝ ဘုဉ္ဇိတုံ ဝဋ္ဋတီတိ ဉာပိတန္တိ ဒဋ္ဌဗ္ဗံ။
Gamiko āgantukabhattampīti gāmantarato āgantvā avūpasantena gamikacittena vasitvā puna aññattha gacchantaṃ sandhāya vuttaṃ. Āvāsikassa pana gantukāmassa gamikabhattameva labbhati. ‘‘Lesaṃ oḍḍetvā’’ti vuttattā lesābhāve yāva gamanaparibandho vigacchati, tāva bhuñjituṃ vaṭṭatīti ñāpitanti daṭṭhabbaṃ.
တဏ္ဍုလာဒီနိ ပေသေန္တိ။ပေ.။ ဝဋ္ဋတီတိ အဘိဟဋဘိက္ခတ္တာ ဝဋ္ဋတိ။ တထာ ပဋိဂ္ဂဟိတတ္တာတိ ဘိက္ခာနာမေန ပဋိဂ္ဂဟိတတ္တာ။
Taṇḍulādīni pesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā.
အဝိဘတ္တံ သင္ဃိကံ ဘဏ္ဍန္တိ ကုက္ကုစ္စုပ္ပတ္တိအာကာရဒသ္သနံ။ ဧဝံ ကုက္ကုစ္စံ ကတ္ဝာ ပုစ္ဆိတဗ္ဗကိစ္စံ နတ္ထိ, အပုစ္ဆိတ္ဝာ ဒာတဗ္ဗန္တိ အဓိပ္ပာယော။
Avibhattaṃ saṅghikaṃ bhaṇḍanti kukkuccuppattiākāradassanaṃ. Evaṃ kukkuccaṃ katvā pucchitabbakiccaṃ natthi, apucchitvā dātabbanti adhippāyo.
ပက္ခိကဘတ္တာဒိကထာဝဏ္ဏနာ နိဋ္ဌိတာ။
Pakkhikabhattādikathāvaṇṇanā niṭṭhitā.
သေနာသနက္ခန္ဓကဝဏ္ဏနာနယော နိဋ္ဌိတော။
Senāsanakkhandhakavaṇṇanānayo niṭṭhito.
