| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
པཀྑིཀབྷཏྟཱདིཀཐཱཝཎྞནཱ
Pakkhikabhattādikathāvaṇṇanā
ཨབྷིལཀྑིཏེསུ ཙཏཱུསུ པཀྑདིཝསེསུ དཱཏབྦབྷཏྟཾ པཀྑིཀཾ། ཨབྷིལཀྑིཏེསཱུཏི ཨེཏྠ ཨབྷཱིཏི ཨུཔསགྒམཏྟཾ, ལཀྑཎཱིཡེསུ ཨིཙྩེཝ ཨཏྠོ, ཨུཔོསཐསམཱདཱནདྷམྨསྶཝནཔཱུཛཱསཀྐཱརཱདིཀརཎཏྠཾ ལཀྑིཏབྦེསུ སལླཀྑེཏབྦེསུ ཨུཔལཀྑེཏབྦེསཱུཏི ཝུཏྟཾ ཧོཏི། སྭེ པཀྑོཏི ‘‘ཨཛྫ པཀྑིཀཾ ན གཱཧེཏབྦ’’ནྟི པཀྑིཀསྶ ཨནིཡམཏྟཱ ཝུཏྟཾ། ‘‘སྭེ ཨམྷཱཀཾ གྷརེ ལཱུཁབྷཏྟཾ བྷཝིསྶཏཱི’’ཏི པོཏྠཀེསུ ལིཁནྟི, ‘‘པཀྑབྷཏྟཾ བྷཝིསྶཏཱི’’ཏི པཱཋེན བྷཝིཏབྦཾ། ཨུཔོསཐེ དཱཏབྦཾ བྷཏྟཾ ཨུཔོསཐིཀཾ། ནིབནྡྷཱཔིཏནྟི ‘‘ཨསུཀཝིཧཱརསྶཱ’’ཏི ནིཡམིཏཾ། གཱཧེཏྭཱ བྷུཉྫིཏབྦནྟི ཏསྨིཾ སེནཱསནེ ཝསནྟེཧི ཋིཏིཀཱཡ གཱཧེཏྭཱ བྷུཉྫིཏབྦཾ། ཏཎྜུལཱདཱིནིཔེསེནྟི…པེ॰… ཝཊྚཏཱིཏི ཨབྷིཧཊབྷིཀྑཏྟཱ ཝཊྚཏི། ཏཐཱ པཊིགྒཧིཏཏྟཱཏི བྷིཀྑཱནཱམེན པཊིགྒཧིཏཏྟཱ། པཏྟཾ པཱུརེཏྭཱ ཐཀེཏྭཱ དིནྣནྟི ‘‘གུལ༹ཀབྷཏྟཾ དེམཱ’’ཏི དིནྣཾ། གུལ༹པིཎྜེཔི…པེ॰… དཱཏབྦོཏི ཨེཏྠ གུལ༹པིཎྜཾ ཏཱལཔཀྐཔྤམཱཎནྟི ཝེདིཏབྦཾ། སེསམེཏྠ སུཝིཉྙེཡྻམེཝཱཏི།
Abhilakkhitesu catūsu pakkhadivasesu dātabbabhattaṃ pakkhikaṃ. Abhilakkhitesūti ettha abhīti upasaggamattaṃ, lakkhaṇīyesu icceva attho, uposathasamādānadhammassavanapūjāsakkārādikaraṇatthaṃ lakkhitabbesu sallakkhetabbesu upalakkhetabbesūti vuttaṃ hoti. Sve pakkhoti ‘‘ajja pakkhikaṃ na gāhetabba’’nti pakkhikassa aniyamattā vuttaṃ. ‘‘Sve amhākaṃ ghare lūkhabhattaṃ bhavissatī’’ti potthakesu likhanti, ‘‘pakkhabhattaṃ bhavissatī’’ti pāṭhena bhavitabbaṃ. Uposathe dātabbaṃ bhattaṃ uposathikaṃ. Nibandhāpitanti ‘‘asukavihārassā’’ti niyamitaṃ. Gāhetvā bhuñjitabbanti tasmiṃ senāsane vasantehi ṭhitikāya gāhetvā bhuñjitabbaṃ. Taṇḍulādīnipesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā. Pattaṃ pūretvā thaketvā dinnanti ‘‘guḷakabhattaṃ demā’’ti dinnaṃ. Guḷapiṇḍepi…pe… dātabboti ettha guḷapiṇḍaṃ tālapakkappamāṇanti veditabbaṃ. Sesamettha suviññeyyamevāti.
སེནཱསནཀྑནྡྷཀཝཎྞནཱ ནིཊྛིཏཱ།
Senāsanakkhandhakavaṇṇanā niṭṭhitā.
