| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
པཀྑིཀབྷཏྟཱདིཀཐཱཝཎྞནཱ
Pakkhikabhattādikathāvaṇṇanā
‘‘སྭེ པཀྑོ’’ཏི ཨཛྫ པཀྑིཀཾ ན གཱཧེཏབྦནྟི ཨཊྛམིཡཱ བྷུཉྫིཏབྦཾ སཏྟམིཡཱ བྷུཉྫནཏྠཱཡ ན གཱཧེཏབྦཾ, དཱཡཀེཧི ནིཡམིཏདིཝསེནེཝ གཱཧེཏབྦནྟི ཨཏྠོ། ཏེནཱཧ ‘‘སཙེ པནཱ’’ཏིཨཱདི། སྭེ ལཱུཁནྟི ཨཛྫ ཨཱཝཱཧམངྒལཱདིཀརཎཏོ ཨཏིཔཎཱིཏབྷོཛནཾ ཀརཱིཡཏི, སྭེ ཏཐཱ ན བྷཝིསྶཏི, ཨཛྫེཝ བྷིཀྑཱུ བྷོཛེསྶཱམཱིཏི ཨདྷིཔྤཱཡོ།
‘‘Svepakkho’’ti ajja pakkhikaṃ na gāhetabbanti aṭṭhamiyā bhuñjitabbaṃ sattamiyā bhuñjanatthāya na gāhetabbaṃ, dāyakehi niyamitadivaseneva gāhetabbanti attho. Tenāha ‘‘sace panā’’tiādi. Sve lūkhanti ajja āvāhamaṅgalādikaraṇato atipaṇītabhojanaṃ karīyati, sve tathā na bhavissati, ajjeva bhikkhū bhojessāmīti adhippāyo.
པཀྑིཀབྷཏྟཏོ ཨུཔོསཐིཀསྶ བྷེདཾ དསྶེནྟོ ཨཱཧ ‘‘ཨུཔོསཐངྒཱནི སམཱདིཡིཏྭཱ’’ཏིཨཱདི། ནིབནྡྷཱཔིཏནྟི ‘‘ཨསུཀཝིཧཱརེ ཨཱགནྟུཀཱ བྷུཉྫནྟཱུ’’ཏི ནིཡམིཏཾ།
Pakkhikabhattato uposathikassa bhedaṃ dassento āha ‘‘uposathaṅgāni samādiyitvā’’tiādi. Nibandhāpitanti ‘‘asukavihāre āgantukā bhuñjantū’’ti niyamitaṃ.
གམིཀོ ཨཱགནྟུཀབྷཏྟམྤཱིཏི གཱམནྟརཏོ ཨཱགནྟྭཱ ཨཝཱུཔསནྟེན གམིཀཙིཏྟེན ཝསིཏྭཱ པུན ཨཉྙཏྠ གཙྪནྟཾ སནྡྷཱཡ ཝུཏྟཾ། ཨཱཝཱསིཀསྶ པན གནྟུཀཱམསྶ གམིཀབྷཏྟམེཝ ལབྦྷཏི། ‘‘ལེསཾ ཨོཌྜེཏྭཱ’’ཏི ཝུཏྟཏྟཱ ལེསཱབྷཱཝེ ཡཱཝ གམནཔརིབནྡྷོ ཝིགཙྪཏི, ཏཱཝ བྷུཉྫིཏུཾ ཝཊྚཏཱིཏི ཉཱཔིཏནྟི དཊྛབྦཾ།
Gamiko āgantukabhattampīti gāmantarato āgantvā avūpasantena gamikacittena vasitvā puna aññattha gacchantaṃ sandhāya vuttaṃ. Āvāsikassa pana gantukāmassa gamikabhattameva labbhati. ‘‘Lesaṃ oḍḍetvā’’ti vuttattā lesābhāve yāva gamanaparibandho vigacchati, tāva bhuñjituṃ vaṭṭatīti ñāpitanti daṭṭhabbaṃ.
ཏཎྜུལཱདཱིནི པེསེནྟི…པེ॰… ཝཊྚཏཱིཏི ཨབྷིཧཊབྷིཀྑཏྟཱ ཝཊྚཏི། ཏཐཱ པཊིགྒཧིཏཏྟཱཏི བྷིཀྑཱནཱམེན པཊིགྒཧིཏཏྟཱ།
Taṇḍulādīni pesenti…pe… vaṭṭatīti abhihaṭabhikkhattā vaṭṭati. Tathā paṭiggahitattāti bhikkhānāmena paṭiggahitattā.
ཨཝིབྷཏྟཾ སངྒྷིཀཾ བྷཎྜནྟི ཀུཀྐུཙྩུཔྤཏྟིཨཱཀཱརདསྶནཾ། ཨེཝཾ ཀུཀྐུཙྩཾ ཀཏྭཱ པུཙྪིཏབྦཀིཙྩཾ ནཏྠི, ཨཔུཙྪིཏྭཱ དཱཏབྦནྟི ཨདྷིཔྤཱཡོ།
Avibhattaṃ saṅghikaṃ bhaṇḍanti kukkuccuppattiākāradassanaṃ. Evaṃ kukkuccaṃ katvā pucchitabbakiccaṃ natthi, apucchitvā dātabbanti adhippāyo.
པཀྑིཀབྷཏྟཱདིཀཐཱཝཎྞནཱ ནིཊྛིཏཱ།
Pakkhikabhattādikathāvaṇṇanā niṭṭhitā.
སེནཱསནཀྑནྡྷཀཝཎྞནཱནཡོ ནིཊྛིཏོ།
Senāsanakkhandhakavaṇṇanānayo niṭṭhito.
