| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২০০. পলিবোধাপলিবোধকথা
200. Palibodhāpalibodhakathā
৩২৫. দ্ৰেমে , ভিক্খৰে, কথিনস্স পলিবোধা, দ্ৰে অপলিবোধা। কতমে চ, ভিক্খৰে, দ্ৰে কথিনস্স পলিবোধা? আৰাসপলিবোধো চ চীৰরপলিবোধো চ। কথঞ্চ, ভিক্খৰে, আৰাসপলিবোধো হোতি? ইধ, ভিক্খৰে, ভিক্খু ৰসতি ৰা তস্মিং আৰাসে, সাপেক্খো ৰা পক্কমতি ‘‘পচ্চেস্স’’ন্তি। এৰং খো, ভিক্খৰে, আৰাসপলিবোধো হোতি। কথঞ্চ, ভিক্খৰে, চীৰরপলিবোধো হোতি? ইধ, ভিক্খৰে, ভিক্খুনো চীৰরং অকতং ৰা হোতি ৰিপ্পকতং ৰা, চীৰরাসা ৰা অনুপচ্ছিন্না। এৰং খো, ভিক্খৰে, চীৰরপলিবোধো হোতি। ইমে খো, ভিক্খৰে, দ্ৰে কথিনস্স পলিবোধা।
325. Dveme , bhikkhave, kathinassa palibodhā, dve apalibodhā. Katame ca, bhikkhave, dve kathinassa palibodhā? Āvāsapalibodho ca cīvarapalibodho ca. Kathañca, bhikkhave, āvāsapalibodho hoti? Idha, bhikkhave, bhikkhu vasati vā tasmiṃ āvāse, sāpekkho vā pakkamati ‘‘paccessa’’nti. Evaṃ kho, bhikkhave, āvāsapalibodho hoti. Kathañca, bhikkhave, cīvarapalibodho hoti? Idha, bhikkhave, bhikkhuno cīvaraṃ akataṃ vā hoti vippakataṃ vā, cīvarāsā vā anupacchinnā. Evaṃ kho, bhikkhave, cīvarapalibodho hoti. Ime kho, bhikkhave, dve kathinassa palibodhā.
কতমে চ, ভিক্খৰে, দ্ৰে কথিনস্স অপলিবোধা? আৰাসঅপলিবোধো চ চীৰরঅপলিবোধো চ। কথঞ্চ, ভিক্খৰে, আৰাসঅপলিবোধো হোতি? ইধ, ভিক্খৰে, ভিক্খু পক্কমতি তম্হা আৰাসা চত্তেন ৰন্তেন মুত্তেন অনপেক্খো 1 ‘‘ন পচ্চেস্স’’ন্তি। এৰং খো, ভিক্খৰে, আৰাসঅপলিবোধো হোতি। কথঞ্চ, ভিক্খৰে, চীৰরঅপলিবোধো হোতি? ইধ, ভিক্খৰে, ভিক্খুনো চীৰরং কতং ৰা হোতি, নট্ঠং ৰা ৰিনট্ঠং ৰা দড্ঢং ৰা, চীৰরাসা ৰা উপচ্ছিন্না। এৰং খো, ভিক্খৰে, চীৰরঅপলিবোধো হোতি। ইমে খো, ভিক্খৰে, দ্ৰে কথিনস্স অপলিবোধাতি।
Katame ca, bhikkhave, dve kathinassa apalibodhā? Āvāsaapalibodho ca cīvaraapalibodho ca. Kathañca, bhikkhave, āvāsaapalibodho hoti? Idha, bhikkhave, bhikkhu pakkamati tamhā āvāsā cattena vantena muttena anapekkho 2 ‘‘na paccessa’’nti. Evaṃ kho, bhikkhave, āvāsaapalibodho hoti. Kathañca, bhikkhave, cīvaraapalibodho hoti? Idha, bhikkhave, bhikkhuno cīvaraṃ kataṃ vā hoti, naṭṭhaṃ vā vinaṭṭhaṃ vā daḍḍhaṃ vā, cīvarāsā vā upacchinnā. Evaṃ kho, bhikkhave, cīvaraapalibodho hoti. Ime kho, bhikkhave, dve kathinassa apalibodhāti.
পলিবোধাপলিবোধকথা নিট্ঠিতা।
Palibodhāpalibodhakathā niṭṭhitā.
কথিনক্খন্ধকো নিট্ঠিতো সত্তমো।
Kathinakkhandhako niṭṭhito sattamo.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / আদাযসত্তককথা • Ādāyasattakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আদাযসত্তককথাৰণ্ণনা • Ādāyasattakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / আদাযসত্তককথাৰণ্ণনা • Ādāyasattakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৮৮. আদাযসত্তককথা • 188. Ādāyasattakakathā
