| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၀၀. ပလိဗောဓာပလိဗောဓကထာ
200. Palibodhāpalibodhakathā
၃၂၅. ဒ္ဝေမေ , ဘိက္ခဝေ, ကထိနသ္သ ပလိဗောဓာ, ဒ္ဝေ အပလိဗောဓာ။ ကတမေ စ, ဘိက္ခဝေ, ဒ္ဝေ ကထိနသ္သ ပလိဗောဓာ? အာဝာသပလိဗောဓော စ စီဝရပလိဗောဓော စ။ ကထဉ္စ, ဘိက္ခဝေ, အာဝာသပလိဗောဓော ဟောတိ? ဣဓ, ဘိက္ခဝေ, ဘိက္ခု ဝသတိ ဝာ တသ္မိံ အာဝာသေ, သာပေက္ခော ဝာ ပက္ကမတိ ‘‘ပစ္စေသ္သ’’န္တိ။ ဧဝံ ခော, ဘိက္ခဝေ, အာဝာသပလိဗောဓော ဟောတိ။ ကထဉ္စ, ဘိက္ခဝေ, စီဝရပလိဗောဓော ဟောတိ? ဣဓ, ဘိက္ခဝေ, ဘိက္ခုနော စီဝရံ အကတံ ဝာ ဟောတိ ဝိပ္ပကတံ ဝာ, စီဝရာသာ ဝာ အနုပစ္ဆိန္နာ။ ဧဝံ ခော, ဘိက္ခဝေ, စီဝရပလိဗောဓော ဟောတိ။ ဣမေ ခော, ဘိက္ခဝေ, ဒ္ဝေ ကထိနသ္သ ပလိဗောဓာ။
325. Dveme , bhikkhave, kathinassa palibodhā, dve apalibodhā. Katame ca, bhikkhave, dve kathinassa palibodhā? Āvāsapalibodho ca cīvarapalibodho ca. Kathañca, bhikkhave, āvāsapalibodho hoti? Idha, bhikkhave, bhikkhu vasati vā tasmiṃ āvāse, sāpekkho vā pakkamati ‘‘paccessa’’nti. Evaṃ kho, bhikkhave, āvāsapalibodho hoti. Kathañca, bhikkhave, cīvarapalibodho hoti? Idha, bhikkhave, bhikkhuno cīvaraṃ akataṃ vā hoti vippakataṃ vā, cīvarāsā vā anupacchinnā. Evaṃ kho, bhikkhave, cīvarapalibodho hoti. Ime kho, bhikkhave, dve kathinassa palibodhā.
ကတမေ စ, ဘိက္ခဝေ, ဒ္ဝေ ကထိနသ္သ အပလိဗောဓာ? အာဝာသအပလိဗောဓော စ စီဝရအပလိဗောဓော စ။ ကထဉ္စ, ဘိက္ခဝေ, အာဝာသအပလိဗောဓော ဟောတိ? ဣဓ, ဘိက္ခဝေ, ဘိက္ခု ပက္ကမတိ တမ္ဟာ အာဝာသာ စတ္တေန ဝန္တေန မုတ္တေန အနပေက္ခော 1 ‘‘န ပစ္စေသ္သ’’န္တိ။ ဧဝံ ခော, ဘိက္ခဝေ, အာဝာသအပလိဗောဓော ဟောတိ။ ကထဉ္စ, ဘိက္ခဝေ, စီဝရအပလိဗောဓော ဟောတိ? ဣဓ, ဘိက္ခဝေ, ဘိက္ခုနော စီဝရံ ကတံ ဝာ ဟောတိ, နဋ္ဌံ ဝာ ဝိနဋ္ဌံ ဝာ ဒဍ္ဎံ ဝာ, စီဝရာသာ ဝာ ဥပစ္ဆိန္နာ။ ဧဝံ ခော, ဘိက္ခဝေ, စီဝရအပလိဗောဓော ဟောတိ။ ဣမေ ခော, ဘိက္ခဝေ, ဒ္ဝေ ကထိနသ္သ အပလိဗောဓာတိ။
Katame ca, bhikkhave, dve kathinassa apalibodhā? Āvāsaapalibodho ca cīvaraapalibodho ca. Kathañca, bhikkhave, āvāsaapalibodho hoti? Idha, bhikkhave, bhikkhu pakkamati tamhā āvāsā cattena vantena muttena anapekkho 2 ‘‘na paccessa’’nti. Evaṃ kho, bhikkhave, āvāsaapalibodho hoti. Kathañca, bhikkhave, cīvaraapalibodho hoti? Idha, bhikkhave, bhikkhuno cīvaraṃ kataṃ vā hoti, naṭṭhaṃ vā vinaṭṭhaṃ vā daḍḍhaṃ vā, cīvarāsā vā upacchinnā. Evaṃ kho, bhikkhave, cīvaraapalibodho hoti. Ime kho, bhikkhave, dve kathinassa apalibodhāti.
ပလိဗောဓာပလိဗောဓကထာ နိဋ္ဌိတာ။
Palibodhāpalibodhakathā niṭṭhitā.
ကထိနက္ခန္ဓကော နိဋ္ဌိတော သတ္တမော။
Kathinakkhandhako niṭṭhito sattamo.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အာဒာယသတ္တကကထာ • Ādāyasattakakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အာဒာယသတ္တကကထာဝဏ္ဏနာ • Ādāyasattakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာဒာယသတ္တကကထာဝဏ္ဏနာ • Ādāyasattakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၈၈. အာဒာယသတ္တကကထာ • 188. Ādāyasattakakathā
