| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
200. පලිබොධාපලිබොධකථා
200. Palibodhāpalibodhakathā
325. ද්‌වෙමෙ , භික්‌ඛවෙ, කථිනස්‌ස පලිබොධා, ද්‌වෙ අපලිබොධා. කතමෙ ච, භික්‌ඛවෙ, ද්‌වෙ කථිනස්‌ස පලිබොධා? ආවාසපලිබොධො ච චීවරපලිබොධො ච. කථඤ්‌ච, භික්‌ඛවෙ, ආවාසපලිබොධො හොති? ඉධ, භික්‌ඛවෙ, භික්‌ඛු වසති වා තස්‌මිං ආවාසෙ, සාපෙක්‌ඛො වා පක්‌කමති ‘‘පච්‌චෙස්‌ස’’න්‌ති. එවං ඛො, භික්‌ඛවෙ, ආවාසපලිබොධො හොති. කථඤ්‌ච, භික්‌ඛවෙ, චීවරපලිබොධො හොති? ඉධ, භික්‌ඛවෙ, භික්‌ඛුනො චීවරං අකතං වා හොති විප්‌පකතං වා, චීවරාසා වා අනුපච්‌ඡින්‌නා. එවං ඛො, භික්‌ඛවෙ, චීවරපලිබොධො හොති. ඉමෙ ඛො, භික්‌ඛවෙ, ද්‌වෙ කථිනස්‌ස පලිබොධා.
325. Dveme , bhikkhave, kathinassa palibodhā, dve apalibodhā. Katame ca, bhikkhave, dve kathinassa palibodhā? Āvāsapalibodho ca cīvarapalibodho ca. Kathañca, bhikkhave, āvāsapalibodho hoti? Idha, bhikkhave, bhikkhu vasati vā tasmiṃ āvāse, sāpekkho vā pakkamati ‘‘paccessa’’nti. Evaṃ kho, bhikkhave, āvāsapalibodho hoti. Kathañca, bhikkhave, cīvarapalibodho hoti? Idha, bhikkhave, bhikkhuno cīvaraṃ akataṃ vā hoti vippakataṃ vā, cīvarāsā vā anupacchinnā. Evaṃ kho, bhikkhave, cīvarapalibodho hoti. Ime kho, bhikkhave, dve kathinassa palibodhā.
කතමෙ ච, භික්‌ඛවෙ, ද්‌වෙ කථිනස්‌ස අපලිබොධා? ආවාසඅපලිබොධො ච චීවරඅපලිබොධො ච. කථඤ්‌ච, භික්‌ඛවෙ, ආවාසඅපලිබොධො හොති? ඉධ, භික්‌ඛවෙ, භික්‌ඛු පක්‌කමති තම්‌හා ආවාසා චත්‌තෙන වන්‌තෙන මුත්‌තෙන අනපෙක්‌ඛො 1 ‘‘න පච්‌චෙස්‌ස’’න්‌ති. එවං ඛො, භික්‌ඛවෙ, ආවාසඅපලිබොධො හොති. කථඤ්‌ච, භික්‌ඛවෙ, චීවරඅපලිබොධො හොති? ඉධ, භික්‌ඛවෙ, භික්‌ඛුනො චීවරං කතං වා හොති, නට්‌ඨං වා විනට්‌ඨං වා දඩ්‌ඪං වා, චීවරාසා වා උපච්‌ඡින්‌නා. එවං ඛො, භික්‌ඛවෙ, චීවරඅපලිබොධො හොති. ඉමෙ ඛො, භික්‌ඛවෙ, ද්‌වෙ කථිනස්‌ස අපලිබොධාති.
Katame ca, bhikkhave, dve kathinassa apalibodhā? Āvāsaapalibodho ca cīvaraapalibodho ca. Kathañca, bhikkhave, āvāsaapalibodho hoti? Idha, bhikkhave, bhikkhu pakkamati tamhā āvāsā cattena vantena muttena anapekkho 2 ‘‘na paccessa’’nti. Evaṃ kho, bhikkhave, āvāsaapalibodho hoti. Kathañca, bhikkhave, cīvaraapalibodho hoti? Idha, bhikkhave, bhikkhuno cīvaraṃ kataṃ vā hoti, naṭṭhaṃ vā vinaṭṭhaṃ vā daḍḍhaṃ vā, cīvarāsā vā upacchinnā. Evaṃ kho, bhikkhave, cīvaraapalibodho hoti. Ime kho, bhikkhave, dve kathinassa apalibodhāti.
පලිබොධාපලිබොධකථා නිට්‌ඨිතා.
Palibodhāpalibodhakathā niṭṭhitā.
කථිනක්‌ඛන්‌ධකො නිට්‌ඨිතො සත්‌තමො.
Kathinakkhandhako niṭṭhito sattamo.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ආදායසත්‌තකකථා • Ādāyasattakakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ආදායසත්‌තකකථාවණ්‌ණනා • Ādāyasattakakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ආදායසත්‌තකකථාවණ්‌ණනා • Ādāyasattakakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 188. ආදායසත්‌තකකථා • 188. Ādāyasattakakathā
