| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༠༠. པལིབོདྷཱཔལིབོདྷཀཐཱ
200. Palibodhāpalibodhakathā
༣༢༥. དྭེམེ , བྷིཀྑཝེ, ཀཐིནསྶ པལིབོདྷཱ, དྭེ ཨཔལིབོདྷཱ། ཀཏམེ ཙ, བྷིཀྑཝེ, དྭེ ཀཐིནསྶ པལིབོདྷཱ? ཨཱཝཱསཔལིབོདྷོ ཙ ཙཱིཝརཔལིབོདྷོ ཙ། ཀཐཉྩ, བྷིཀྑཝེ, ཨཱཝཱསཔལིབོདྷོ ཧོཏི? ཨིདྷ, བྷིཀྑཝེ, བྷིཀྑུ ཝསཏི ཝཱ ཏསྨིཾ ཨཱཝཱསེ, སཱཔེཀྑོ ཝཱ པཀྐམཏི ‘‘པཙྩེསྶ’’ནྟི། ཨེཝཾ ཁོ, བྷིཀྑཝེ, ཨཱཝཱསཔལིབོདྷོ ཧོཏི། ཀཐཉྩ, བྷིཀྑཝེ, ཙཱིཝརཔལིབོདྷོ ཧོཏི? ཨིདྷ, བྷིཀྑཝེ, བྷིཀྑུནོ ཙཱིཝརཾ ཨཀཏཾ ཝཱ ཧོཏི ཝིཔྤཀཏཾ ཝཱ, ཙཱིཝརཱསཱ ཝཱ ཨནུཔཙྪིནྣཱ། ཨེཝཾ ཁོ, བྷིཀྑཝེ, ཙཱིཝརཔལིབོདྷོ ཧོཏི། ཨིམེ ཁོ, བྷིཀྑཝེ, དྭེ ཀཐིནསྶ པལིབོདྷཱ།
325. Dveme , bhikkhave, kathinassa palibodhā, dve apalibodhā. Katame ca, bhikkhave, dve kathinassa palibodhā? Āvāsapalibodho ca cīvarapalibodho ca. Kathañca, bhikkhave, āvāsapalibodho hoti? Idha, bhikkhave, bhikkhu vasati vā tasmiṃ āvāse, sāpekkho vā pakkamati ‘‘paccessa’’nti. Evaṃ kho, bhikkhave, āvāsapalibodho hoti. Kathañca, bhikkhave, cīvarapalibodho hoti? Idha, bhikkhave, bhikkhuno cīvaraṃ akataṃ vā hoti vippakataṃ vā, cīvarāsā vā anupacchinnā. Evaṃ kho, bhikkhave, cīvarapalibodho hoti. Ime kho, bhikkhave, dve kathinassa palibodhā.
ཀཏམེ ཙ, བྷིཀྑཝེ, དྭེ ཀཐིནསྶ ཨཔལིབོདྷཱ? ཨཱཝཱསཨཔལིབོདྷོ ཙ ཙཱིཝརཨཔལིབོདྷོ ཙ། ཀཐཉྩ, བྷིཀྑཝེ, ཨཱཝཱསཨཔལིབོདྷོ ཧོཏི? ཨིདྷ, བྷིཀྑཝེ, བྷིཀྑུ པཀྐམཏི ཏམྷཱ ཨཱཝཱསཱ ཙཏྟེན ཝནྟེན མུཏྟེན ཨནཔེཀྑོ 1 ‘‘ན པཙྩེསྶ’’ནྟི། ཨེཝཾ ཁོ, བྷིཀྑཝེ, ཨཱཝཱསཨཔལིབོདྷོ ཧོཏི། ཀཐཉྩ, བྷིཀྑཝེ, ཙཱིཝརཨཔལིབོདྷོ ཧོཏི? ཨིདྷ, བྷིཀྑཝེ, བྷིཀྑུནོ ཙཱིཝརཾ ཀཏཾ ཝཱ ཧོཏི, ནཊྛཾ ཝཱ ཝིནཊྛཾ ཝཱ དཌྜྷཾ ཝཱ, ཙཱིཝརཱསཱ ཝཱ ཨུཔཙྪིནྣཱ། ཨེཝཾ ཁོ, བྷིཀྑཝེ, ཙཱིཝརཨཔལིབོདྷོ ཧོཏི། ཨིམེ ཁོ, བྷིཀྑཝེ, དྭེ ཀཐིནསྶ ཨཔལིབོདྷཱཏི།
Katame ca, bhikkhave, dve kathinassa apalibodhā? Āvāsaapalibodho ca cīvaraapalibodho ca. Kathañca, bhikkhave, āvāsaapalibodho hoti? Idha, bhikkhave, bhikkhu pakkamati tamhā āvāsā cattena vantena muttena anapekkho 2 ‘‘na paccessa’’nti. Evaṃ kho, bhikkhave, āvāsaapalibodho hoti. Kathañca, bhikkhave, cīvaraapalibodho hoti? Idha, bhikkhave, bhikkhuno cīvaraṃ kataṃ vā hoti, naṭṭhaṃ vā vinaṭṭhaṃ vā daḍḍhaṃ vā, cīvarāsā vā upacchinnā. Evaṃ kho, bhikkhave, cīvaraapalibodho hoti. Ime kho, bhikkhave, dve kathinassa apalibodhāti.
པལིབོདྷཱཔལིབོདྷཀཐཱ ནིཊྛིཏཱ།
Palibodhāpalibodhakathā niṭṭhitā.
ཀཐིནཀྑནྡྷཀོ ནིཊྛིཏོ སཏྟམོ།
Kathinakkhandhako niṭṭhito sattamo.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཨཱདཱཡསཏྟཀཀཐཱ • Ādāyasattakakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཱདཱཡསཏྟཀཀཐཱཝཎྞནཱ • Ādāyasattakakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨཱདཱཡསཏྟཀཀཐཱཝཎྞནཱ • Ādāyasattakakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༨༨. ཨཱདཱཡསཏྟཀཀཐཱ • 188. Ādāyasattakakathā
