| Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā |
ပာလိလေယ္ယကဂမနကထာ
Pālileyyakagamanakathā
၄၆၇. ပာလိလေယ္ယကေ ဝိဟရတိ ရက္ခိတဝနသဏ္ဍေတိ ပာလိလေယ္ယကံ ဥပနိသ္သာယ ရက္ခိတဝနသဏ္ဍေ ဝိဟရတိ။ ဟတ္ထိနာဂောတိ မဟာဟတ္ထီ။ ဟတ္ထိကလဘေဟီတိ ဟတ္ထိပောတကေဟိ။ ဟတ္ထိစ္ဆာပေဟီတိ ခီရူပကေဟိ ဒဟရပောတကေဟိ။ ဆိန္နဂ္ဂာနီတိ တေဟိ ပုရတော ပုရတော ဂစ္ဆန္တေဟိ ဆိန္နဂ္ဂာနိ ခာယိတာဝသေသာနိ ခာဏုသဒိသာနိ တိဏာနိ ခာဒတိ။ ဩဘဂ္ဂောဘဂ္ဂန္တိ တေန ဟတ္ထိနာဂေန ဥစ္စဋ္ဌာနတော ဘဉ္ဇိတ္ဝာ ဘဉ္ဇိတ္ဝာ ပာတိတံ။ အသ္သ သာခာဘင္ဂန္တိ ဧတသ္သ သန္တကံ သာခာဘင္ဂံ တေ ခာဒန္တိ။ အာဝိလာနီတိ တေဟိ ပဌမတရံ ဩတရိတ္ဝာ ပိဝန္တေဟိ အာလုလိတာနိ ကဒ္ဒမောဒကာနိ ပိဝတိ။ ဩဂာဟာတိ တိတ္ထတော။
467.Pālileyyake viharati rakkhitavanasaṇḍeti pālileyyakaṃ upanissāya rakkhitavanasaṇḍe viharati. Hatthināgoti mahāhatthī. Hatthikalabhehīti hatthipotakehi. Hatthicchāpehīti khīrūpakehi daharapotakehi. Chinnaggānīti tehi purato purato gacchantehi chinnaggāni khāyitāvasesāni khāṇusadisāni tiṇāni khādati. Obhaggobhagganti tena hatthināgena uccaṭṭhānato bhañjitvā bhañjitvā pātitaṃ. Assa sākhābhaṅganti etassa santakaṃ sākhābhaṅgaṃ te khādanti. Āvilānīti tehi paṭhamataraṃ otaritvā pivantehi ālulitāni kaddamodakāni pivati. Ogāhāti titthato.
နာဂသ္သ နာဂေနာတိ ဟတ္ထိနာဂသ္သ ဗုဒ္ဓနာဂေန။ ဤသာဒန္တသ္သာတိ ရထဤသာသဒိသဒန္တသ္သ။ ယဒေကော ရမတီ ဝနေတိ ယသ္မာ ဗုဒ္ဓနာဂော ဝိယ အယမ္ပိ ဟတ္ထိနာဂော ဧကော ပဝိဝိတ္တော ဝနေ ရမတိ; တသ္မာသ္သ နာဂသ္သ နာဂေန စိတ္တံ သမေတိ, ဧကီဘာဝရတိယာ ဧကသဒိသံ ဟောတီတိ အတ္ထော။
Nāgassa nāgenāti hatthināgassa buddhanāgena. Īsādantassāti rathaīsāsadisadantassa. Yadeko ramatī vaneti yasmā buddhanāgo viya ayampi hatthināgo eko pavivitto vane ramati; tasmāssa nāgassa nāgena cittaṃ sameti, ekībhāvaratiyā ekasadisaṃ hotīti attho.
ယထာဘိရန္တံ ဝိဟရိတ္ဝာတိ ဧတ္ထ တေမာသံ ဘဂဝာ တတ္ထ ဝိဟာသီတိ ဝေဒိတဗ္ဗော။ ဧတ္တာဝတာ ကောသမ္ဗကေဟိ ကိရ ဥဗ္ဗာဠ္ဟော ဘဂဝာ တေမာသံ အရညံ ပဝိသိတ္ဝာ ဝသီတိ သဗ္ဗတ္ထ ကထာ ပတ္ထဋာ အဟောသိ။
Yathābhirantaṃ viharitvāti ettha temāsaṃ bhagavā tattha vihāsīti veditabbo. Ettāvatā kosambakehi kira ubbāḷho bhagavā temāsaṃ araññaṃ pavisitvā vasīti sabbattha kathā patthaṭā ahosi.
အထ ခော ကောသမ္ဗကာ ဥပာသကာတိ အထ ခော ဣမံ ကထာသလ္လာပံ သုတ္ဝာ ကောသမ္ဗိဝာသိနော ဥပာသကာ။
Atha kho kosambakā upāsakāti atha kho imaṃ kathāsallāpaṃ sutvā kosambivāsino upāsakā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၂၇၅. ပာလိလေယ္ယကဂမနကထာ • 275. Pālileyyakagamanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပာလိလေယ္ယကဂမနကထာဝဏ္ဏနာ • Pālileyyakagamanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပာလိလေယ္ယကဂမနကထာဝဏ္ဏနာ • Pālileyyakagamanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပာလိလေယ္ယကဂမနကထာဝဏ္ဏနာ • Pālileyyakagamanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၇၅. ပာလိလေယ္ယကဂမနကထာ • 275. Pālileyyakagamanakathā
