| Library / Tipiṭaka / ཏིཔིཊཀ • Tipiṭaka / མཧཱཝགྒ-ཨཊྛཀཐཱ • Mahāvagga-aṭṭhakathā |
པཱལིལེཡྻཀགམནཀཐཱ
Pālileyyakagamanakathā
༤༦༧. པཱལིལེཡྻཀེ ཝིཧརཏི རཀྑིཏཝནསཎྜེཏི པཱལིལེཡྻཀཾ ཨུཔནིསྶཱཡ རཀྑིཏཝནསཎྜེ ཝིཧརཏི། ཧཏྠིནཱགོཏི མཧཱཧཏྠཱི། ཧཏྠིཀལབྷེཧཱིཏི ཧཏྠིཔོཏཀེཧི། ཧཏྠིཙྪཱཔེཧཱིཏི ཁཱིརཱུཔཀེཧི དཧརཔོཏཀེཧི། ཚིནྣགྒཱནཱིཏི ཏེཧི པུརཏོ པུརཏོ གཙྪནྟེཧི ཚིནྣགྒཱནི ཁཱཡིཏཱཝསེསཱནི ཁཱཎུསདིསཱནི ཏིཎཱནི ཁཱདཏི། ཨོབྷགྒོབྷགྒནྟི ཏེན ཧཏྠིནཱགེན ཨུཙྩཊྛཱནཏོ བྷཉྫིཏྭཱ བྷཉྫིཏྭཱ པཱཏིཏཾ། ཨསྶ སཱཁཱབྷངྒནྟི ཨེཏསྶ སནྟཀཾ སཱཁཱབྷངྒཾ ཏེ ཁཱདནྟི། ཨཱཝིལཱནཱིཏི ཏེཧི པཋམཏརཾ ཨོཏརིཏྭཱ པིཝནྟེཧི ཨཱལུལིཏཱནི ཀདྡམོདཀཱནི པིཝཏི། ཨོགཱཧཱཏི ཏིཏྠཏོ།
467.Pālileyyake viharati rakkhitavanasaṇḍeti pālileyyakaṃ upanissāya rakkhitavanasaṇḍe viharati. Hatthināgoti mahāhatthī. Hatthikalabhehīti hatthipotakehi. Hatthicchāpehīti khīrūpakehi daharapotakehi. Chinnaggānīti tehi purato purato gacchantehi chinnaggāni khāyitāvasesāni khāṇusadisāni tiṇāni khādati. Obhaggobhagganti tena hatthināgena uccaṭṭhānato bhañjitvā bhañjitvā pātitaṃ. Assa sākhābhaṅganti etassa santakaṃ sākhābhaṅgaṃ te khādanti. Āvilānīti tehi paṭhamataraṃ otaritvā pivantehi ālulitāni kaddamodakāni pivati. Ogāhāti titthato.
ནཱགསྶ ནཱགེནཱཏི ཧཏྠིནཱགསྶ བུདྡྷནཱགེན། ཨཱིསཱདནྟསྶཱཏི རཐཨཱིསཱསདིསདནྟསྶ། ཡདེཀོ རམཏཱི ཝནེཏི ཡསྨཱ བུདྡྷནཱགོ ཝིཡ ཨཡམྤི ཧཏྠིནཱགོ ཨེཀོ པཝིཝིཏྟོ ཝནེ རམཏི; ཏསྨཱསྶ ནཱགསྶ ནཱགེན ཙིཏྟཾ སམེཏི, ཨེཀཱིབྷཱཝརཏིཡཱ ཨེཀསདིསཾ ཧོཏཱིཏི ཨཏྠོ།
Nāgassa nāgenāti hatthināgassa buddhanāgena. Īsādantassāti rathaīsāsadisadantassa. Yadeko ramatī vaneti yasmā buddhanāgo viya ayampi hatthināgo eko pavivitto vane ramati; tasmāssa nāgassa nāgena cittaṃ sameti, ekībhāvaratiyā ekasadisaṃ hotīti attho.
ཡཐཱབྷིརནྟཾ ཝིཧརིཏྭཱཏི ཨེཏྠ ཏེམཱསཾ བྷགཝཱ ཏཏྠ ཝིཧཱསཱིཏི ཝེདིཏབྦོ། ཨེཏྟཱཝཏཱ ཀོསམྦཀེཧི ཀིར ཨུབྦཱལ༹ྷོ བྷགཝཱ ཏེམཱསཾ ཨརཉྙཾ པཝིསིཏྭཱ ཝསཱིཏི སབྦཏྠ ཀཐཱ པཏྠཊཱ ཨཧོསི།
Yathābhirantaṃ viharitvāti ettha temāsaṃ bhagavā tattha vihāsīti veditabbo. Ettāvatā kosambakehi kira ubbāḷho bhagavā temāsaṃ araññaṃ pavisitvā vasīti sabbattha kathā patthaṭā ahosi.
ཨཐ ཁོ ཀོསམྦཀཱ ཨུཔཱསཀཱཏི ཨཐ ཁོ ཨིམཾ ཀཐཱསལླཱཔཾ སུཏྭཱ ཀོསམྦིཝཱསིནོ ཨུཔཱསཀཱ།
Atha kho kosambakā upāsakāti atha kho imaṃ kathāsallāpaṃ sutvā kosambivāsino upāsakā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi / ༢༧༥. པཱལིལེཡྻཀགམནཀཐཱ • 275. Pālileyyakagamanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པཱལིལེཡྻཀགམནཀཐཱཝཎྞནཱ • Pālileyyakagamanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པཱལིལེཡྻཀགམནཀཐཱཝཎྞནཱ • Pālileyyakagamanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / པཱལིལེཡྻཀགམནཀཐཱཝཎྞནཱ • Pālileyyakagamanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢༧༥. པཱལིལེཡྻཀགམནཀཐཱ • 275. Pālileyyakagamanakathā
