| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
পালিলেয্যকগমনকথাৰণ্ণনা
Pālileyyakagamanakathāvaṇṇanā
৪৬৭. ধম্মিযা কথাযাতি সমগ্গৰাসে আনিসংসপটিসংযুত্তায ধম্মকথায। অনুপুব্বেন (উদা॰ অট্ঠ॰ ৩৫) চারিকং চরমানোতি অনুক্কমেন গামনিগমপটিপাটিযা চারিকং চরমানো। যেন পালিলেয্যকং তদৰসরীতি এককোৰ যেন পালিলেয্যকগামো, তং অৰসরি। পালিলেয্যকগামৰাসিনোপি পচ্চুগ্গন্ত্ৰা ভগৰতো দানং দত্ৰা পালিলেয্যকগামস্স অৰিদূরে রক্খিতৰনসণ্ডো নাম অত্থি, তত্থ ভগৰতো পণ্ণসালং কত্ৰা ‘‘এত্থ ভগৰা ৰসতূ’’তি যাচিত্ৰা ৰাসযিংসু। ভদ্দসালোতি পন তত্থেকো মনাপো লট্ঠিকো সালরুক্খো। ভগৰা তং গামং উপনিস্সায ৰনসণ্ডে পণ্ণসালায সমীপে তস্মিং রুক্খমূলে ৰিহাসি। তেন ৰুত্তং ‘‘পালিলেয্যকে ৰিহরতি রক্খিতৰনসণ্ডে ভদ্দসালমূলে’’তি।
467.Dhammiyākathāyāti samaggavāse ānisaṃsapaṭisaṃyuttāya dhammakathāya. Anupubbena (udā. aṭṭha. 35) cārikaṃ caramānoti anukkamena gāmanigamapaṭipāṭiyā cārikaṃ caramāno. Yena pālileyyakaṃ tadavasarīti ekakova yena pālileyyakagāmo, taṃ avasari. Pālileyyakagāmavāsinopi paccuggantvā bhagavato dānaṃ datvā pālileyyakagāmassa avidūre rakkhitavanasaṇḍo nāma atthi, tattha bhagavato paṇṇasālaṃ katvā ‘‘ettha bhagavā vasatū’’ti yācitvā vāsayiṃsu. Bhaddasāloti pana tattheko manāpo laṭṭhiko sālarukkho. Bhagavā taṃ gāmaṃ upanissāya vanasaṇḍe paṇṇasālāya samīpe tasmiṃ rukkhamūle vihāsi. Tena vuttaṃ ‘‘pālileyyake viharati rakkhitavanasaṇḍe bhaddasālamūle’’ti.
অথ খো ভগৰতো রহোগতস্সাতিআদি ভগৰতো ৰিৰেকসুখপচ্চৰেক্খণদস্সনং। আকিণ্ণো ন ফাসু ৰিহাসিন্তি সম্বাধপ্পত্তো আকিণ্ণো ৰিহাসিং। কিং পন ভগৰতো সম্বাধো অত্থি সংসগ্গো ৰাতি? নত্থি। ন হি কোচি ভগৰন্তং অনিচ্ছায উপসঙ্কমিতুং সক্কোতি। দুরাসদা হি বুদ্ধা ভগৰন্তো সব্বত্থ চ অনুপলিত্তা, হিতেসিতায পন সত্তেসু অনুকম্পং উপাদায ‘‘মুত্তো মোচেস্সামী’’তি পটিঞ্ঞানুরূপং চতুরোঘনিত্থরণত্থং অট্ঠন্নং পরিসানং অত্তনো সন্তিকং কালেন কালং উপসঙ্কমনং অধিৰাসেতি, সযঞ্চ মহাকরুণাসমুস্সাহিতো কালঞ্ঞূ হুত্ৰা তত্থ উপসঙ্কমীতি ইদং সব্ববুদ্ধানং আচিণ্ণং। নাযমিধ আকিণ্ণৰিহারো অধিপ্পেতো, ইধ পন তেহি কলহকারকেহি কোসম্বকভিক্খূহি সদ্ধিং একৰিহারে ৰাসং ৰিহাসি, তদা ৰিনেতব্বাভাৰতো আকিণ্ণৰিহারং কত্ৰা ৰুত্তং ‘‘অহং খো পুব্বে আকিণ্ণো ন ফাসু ৰিহাসি’’ন্তি। তেনেৰাহ ‘‘তেহি কোসম্বকেহি ভিক্খূহি ভণ্ডনকারকেহী’’তিআদি।
Atha kho bhagavato rahogatassātiādi bhagavato vivekasukhapaccavekkhaṇadassanaṃ. Ākiṇṇo na phāsu vihāsinti sambādhappatto ākiṇṇo vihāsiṃ. Kiṃ pana bhagavato sambādho atthi saṃsaggo vāti? Natthi. Na hi koci bhagavantaṃ anicchāya upasaṅkamituṃ sakkoti. Durāsadā hi buddhā bhagavanto sabbattha ca anupalittā, hitesitāya pana sattesu anukampaṃ upādāya ‘‘mutto mocessāmī’’ti paṭiññānurūpaṃ caturoghanittharaṇatthaṃ aṭṭhannaṃ parisānaṃ attano santikaṃ kālena kālaṃ upasaṅkamanaṃ adhivāseti, sayañca mahākaruṇāsamussāhito kālaññū hutvā tattha upasaṅkamīti idaṃ sabbabuddhānaṃ āciṇṇaṃ. Nāyamidha ākiṇṇavihāro adhippeto, idha pana tehi kalahakārakehi kosambakabhikkhūhi saddhiṃ ekavihāre vāsaṃ vihāsi, tadā vinetabbābhāvato ākiṇṇavihāraṃ katvā vuttaṃ ‘‘ahaṃ kho pubbe ākiṇṇo na phāsu vihāsi’’nti. Tenevāha ‘‘tehi kosambakehi bhikkhūhi bhaṇḍanakārakehī’’tiādi.
দহরপোতকেহীতি দহরেহি হত্থিপোতকেহি, যে ভিঙ্কাতিপি ৰুচ্চন্তি। তেহীতি হত্থিআদীহি। কদ্দমোদকানীতি কদ্দমমিস্সানি উদকানি। ওগাহাতি এত্থ ‘‘ওগাহ’’ন্তিপি পাল়ি। অস্সাতি হত্থিনাগস্স। উপনিঘংসন্তিযোতি ঘট্টেন্তিযো। উপনিঘংসিযমানোপি অত্তনো উল়ারভাৰেন ন কুজ্ঝতি, তেন তা ঘংসন্তিযেৰ। ৰূপকট্ঠোতি ৰূপকট্ঠো দূরীভূতো।
Daharapotakehīti daharehi hatthipotakehi, ye bhiṅkātipi vuccanti. Tehīti hatthiādīhi. Kaddamodakānīti kaddamamissāni udakāni. Ogāhāti ettha ‘‘ogāha’’ntipi pāḷi. Assāti hatthināgassa. Upanighaṃsantiyoti ghaṭṭentiyo. Upanighaṃsiyamānopi attano uḷārabhāvena na kujjhati, tena tā ghaṃsantiyeva. Vūpakaṭṭhoti vūpakaṭṭho dūrībhūto.
যূথাতি হত্থিঘটায। যেন ভগৰা তেনুপসঙ্কমীতি সো কির হত্থিনাগো যূথৰাসে উক্কণ্ঠিতো তং ৰনসণ্ডং পৰিট্ঠো। তত্থ ভগৰন্তং দিস্ৰা ঘটসহস্সেন নিব্বাপিতসন্তাপো ৰিয নিব্বুতো হুত্ৰা পসন্নচিত্তো ভগৰতো সন্তিকে অট্ঠাসি, ততো পট্ঠায ৰত্তসীসে ঠত্ৰা ভদ্দসালস্স পণ্ণসালায চ সমন্ততো অপ্পহরিতং কত্ৰা সাখাভঙ্গেন সম্মজ্জতি, ভগৰতো মুখধোৰনং দেতি, নহানোদকং আহরতি, দন্তকট্ঠং দেতি, অরঞ্ঞতো মধুরানি ফলাফলানি আহরিত্ৰা সত্থু উপনেতি। সত্থা তানি পরিভুঞ্জতি। তেন ৰুত্তং ‘‘সোণ্ডায ভগৰতো পানীযং পরিভোজনীযং উপট্ঠাপেতী’’তিআদি। সো কির সোণ্ডায দারূনি আহরিত্ৰা অঞ্ঞমঞ্ঞং ঘংসিত্ৰা অগ্গিং উট্ঠাপেত্ৰা দারূনি জালাপেত্ৰা তত্থ পাসাণখণ্ডানি তাপেত্ৰা তানি দণ্ডকেহি ৰট্টেত্ৰা সোণ্ডিযং খিপিত্ৰা উদকস্স তত্তভাৰং ঞত্ৰা ভগৰতো সন্তিকং উপগন্ত্ৰা তিট্ঠতি। ভগৰা ‘‘হত্থিনাগো মম নহানং ইচ্ছতী’’তি তত্থ গন্ত্ৰা নহানকিচ্চং করোতি। পানীযেপি এসেৰ নযো। তস্মিং পন সীতলে জাতে উপসঙ্কমতি। তং সন্ধায ৰুত্তং ‘‘সোণ্ডায ভগৰতো পানীযং পরিভোজনীযং উপট্ঠাপেতী’’তি।
Yūthāti hatthighaṭāya. Yena bhagavā tenupasaṅkamīti so kira hatthināgo yūthavāse ukkaṇṭhito taṃ vanasaṇḍaṃ paviṭṭho. Tattha bhagavantaṃ disvā ghaṭasahassena nibbāpitasantāpo viya nibbuto hutvā pasannacitto bhagavato santike aṭṭhāsi, tato paṭṭhāya vattasīse ṭhatvā bhaddasālassa paṇṇasālāya ca samantato appaharitaṃ katvā sākhābhaṅgena sammajjati, bhagavato mukhadhovanaṃ deti, nahānodakaṃ āharati, dantakaṭṭhaṃ deti, araññato madhurāni phalāphalāni āharitvā satthu upaneti. Satthā tāni paribhuñjati. Tena vuttaṃ ‘‘soṇḍāya bhagavato pānīyaṃ paribhojanīyaṃ upaṭṭhāpetī’’tiādi. So kira soṇḍāya dārūni āharitvā aññamaññaṃ ghaṃsitvā aggiṃ uṭṭhāpetvā dārūni jālāpetvā tattha pāsāṇakhaṇḍāni tāpetvā tāni daṇḍakehi vaṭṭetvā soṇḍiyaṃ khipitvā udakassa tattabhāvaṃ ñatvā bhagavato santikaṃ upagantvā tiṭṭhati. Bhagavā ‘‘hatthināgo mama nahānaṃ icchatī’’ti tattha gantvā nahānakiccaṃ karoti. Pānīyepi eseva nayo. Tasmiṃ pana sītale jāte upasaṅkamati. Taṃ sandhāya vuttaṃ ‘‘soṇḍāya bhagavato pānīyaṃ paribhojanīyaṃ upaṭṭhāpetī’’ti.
অত্তনো চ পৰিৰেকং ৰিদিত্ৰাতি কেহিচি অনাকিণ্ণভাৰলদ্ধং কাযৰিৰেকং জানিত্ৰা। ইতরে পন ৰিৰেকা ভগৰতো সব্বকালং ৰিজ্জন্তিযেৰ। ইমং উদানং উদানেসীতি ইমং অত্তনো হত্থিনাগস্স চ ৰিৰেকাভিরতিযা সমানজ্ঝাসযভাৰদীপনং উদানং উদানেসি।
Attano ca pavivekaṃ viditvāti kehici anākiṇṇabhāvaladdhaṃ kāyavivekaṃ jānitvā. Itare pana vivekā bhagavato sabbakālaṃ vijjantiyeva. Imaṃ udānaṃ udānesīti imaṃ attano hatthināgassa ca vivekābhiratiyā samānajjhāsayabhāvadīpanaṃ udānaṃ udānesi.
গাথায পন এৰমত্থযোজনা ৰেদিতব্বা (উদা॰ অট্ঠ॰ ৩৫) – এতং ঈসাদন্তস্স রথঈসাসদিসদন্তস্স হত্থিনাগস্স চিত্তং নাগেন বুদ্ধনাগস্স চিত্তেন সমেতি সংসন্দতি। কথং সমেতি চে? যদেকো রমতী ৰনে, যস্মা বুদ্ধনাগো ‘‘অহং খো পুব্বে আকিণ্ণো ৰিহাসি’’ন্তি পুরিমং আকিণ্ণৰিহারং জিগুচ্ছিত্ৰা ৰিৰেকং উপব্রূহযমানো ইদানি যথা একো অদুতিযো ৰনে অরঞ্ঞে রমতি অভিরমতি, এৰং অযম্পি হত্থিনাগো পুব্বে অত্তনো হত্থিআদীহি আকিণ্ণৰিহারং জিগুচ্ছিত্ৰা ইদানি একো অসহাযো ৰনে একৰিহারং রমতি অভিনন্দতি, তস্মাস্স চিত্তং নাগেন সমেতি, তস্স চিত্তেন সমেতীতি কত্ৰা একীভাৰরতিযা একসদিসং হোতীতি অত্থো।
Gāthāya pana evamatthayojanā veditabbā (udā. aṭṭha. 35) – etaṃ īsādantassa rathaīsāsadisadantassa hatthināgassa cittaṃ nāgena buddhanāgassa cittena sameti saṃsandati. Kathaṃ sameti ce? Yadeko ramatī vane, yasmā buddhanāgo ‘‘ahaṃ kho pubbe ākiṇṇo vihāsi’’nti purimaṃ ākiṇṇavihāraṃ jigucchitvā vivekaṃ upabrūhayamāno idāni yathā eko adutiyo vane araññe ramati abhiramati, evaṃ ayampi hatthināgo pubbe attano hatthiādīhi ākiṇṇavihāraṃ jigucchitvā idāni eko asahāyo vane ekavihāraṃ ramati abhinandati, tasmāssa cittaṃ nāgena sameti, tassa cittena sametīti katvā ekībhāvaratiyā ekasadisaṃ hotīti attho.
পালিলেয্যকগমনকথাৰণ্ণনা নিট্ঠিতা।
Pālileyyakagamanakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৭৫. পালিলেয্যকগমনকথা • 275. Pālileyyakagamanakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পালিলেয্যকগমনকথা • Pālileyyakagamanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পালিলেয্যকগমনকথাৰণ্ণনা • Pālileyyakagamanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পালিলেয্যকগমনকথাৰণ্ণনা • Pālileyyakagamanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৭৫. পালিলেয্যকগমনকথা • 275. Pālileyyakagamanakathā
