| Library / Tipiṭaka / ਤਿਪਿਟਕ • Tipiṭaka / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā |
ਪਾਲਿਲੇਯ੍ਯਕਗਮਨਕਥਾવਣ੍ਣਨਾ
Pālileyyakagamanakathāvaṇṇanā
੪੬੭. ਧਮ੍ਮਿਯਾ ਕਥਾਯਾਤਿ ਸਮਗ੍ਗવਾਸੇ ਆਨਿਸਂਸਪਟਿਸਂਯੁਤ੍ਤਾਯ ਧਮ੍ਮਕਥਾਯ। ਅਨੁਪੁਬ੍ਬੇਨ (ਉਦਾ॰ ਅਟ੍ਠ॰ ੩੫) ਚਾਰਿਕਂ ਚਰਮਾਨੋਤਿ ਅਨੁਕ੍ਕਮੇਨ ਗਾਮਨਿਗਮਪਟਿਪਾਟਿਯਾ ਚਾਰਿਕਂ ਚਰਮਾਨੋ। ਯੇਨ ਪਾਲਿਲੇਯ੍ਯਕਂ ਤਦવਸਰੀਤਿ ਏਕਕੋવ ਯੇਨ ਪਾਲਿਲੇਯ੍ਯਕਗਾਮੋ, ਤਂ ਅવਸਰਿ। ਪਾਲਿਲੇਯ੍ਯਕਗਾਮવਾਸਿਨੋਪਿ ਪਚ੍ਚੁਗ੍ਗਨ੍ਤ੍વਾ ਭਗવਤੋ ਦਾਨਂ ਦਤ੍વਾ ਪਾਲਿਲੇਯ੍ਯਕਗਾਮਸ੍ਸ ਅવਿਦੂਰੇ ਰਕ੍ਖਿਤવਨਸਣ੍ਡੋ ਨਾਮ ਅਤ੍ਥਿ, ਤਤ੍ਥ ਭਗવਤੋ ਪਣ੍ਣਸਾਲਂ ਕਤ੍વਾ ‘‘ਏਤ੍ਥ ਭਗવਾ વਸਤੂ’’ਤਿ ਯਾਚਿਤ੍વਾ વਾਸਯਿਂਸੁ। ਭਦ੍ਦਸਾਲੋਤਿ ਪਨ ਤਤ੍ਥੇਕੋ ਮਨਾਪੋ ਲਟ੍ਠਿਕੋ ਸਾਲਰੁਕ੍ਖੋ। ਭਗવਾ ਤਂ ਗਾਮਂ ਉਪਨਿਸ੍ਸਾਯ વਨਸਣ੍ਡੇ ਪਣ੍ਣਸਾਲਾਯ ਸਮੀਪੇ ਤਸ੍ਮਿਂ ਰੁਕ੍ਖਮੂਲੇ વਿਹਾਸਿ। ਤੇਨ વੁਤ੍ਤਂ ‘‘ਪਾਲਿਲੇਯ੍ਯਕੇ વਿਹਰਤਿ ਰਕ੍ਖਿਤવਨਸਣ੍ਡੇ ਭਦ੍ਦਸਾਲਮੂਲੇ’’ਤਿ।
467.Dhammiyākathāyāti samaggavāse ānisaṃsapaṭisaṃyuttāya dhammakathāya. Anupubbena (udā. aṭṭha. 35) cārikaṃ caramānoti anukkamena gāmanigamapaṭipāṭiyā cārikaṃ caramāno. Yena pālileyyakaṃ tadavasarīti ekakova yena pālileyyakagāmo, taṃ avasari. Pālileyyakagāmavāsinopi paccuggantvā bhagavato dānaṃ datvā pālileyyakagāmassa avidūre rakkhitavanasaṇḍo nāma atthi, tattha bhagavato paṇṇasālaṃ katvā ‘‘ettha bhagavā vasatū’’ti yācitvā vāsayiṃsu. Bhaddasāloti pana tattheko manāpo laṭṭhiko sālarukkho. Bhagavā taṃ gāmaṃ upanissāya vanasaṇḍe paṇṇasālāya samīpe tasmiṃ rukkhamūle vihāsi. Tena vuttaṃ ‘‘pālileyyake viharati rakkhitavanasaṇḍe bhaddasālamūle’’ti.
ਅਥ ਖੋ ਭਗવਤੋ ਰਹੋਗਤਸ੍ਸਾਤਿਆਦਿ ਭਗવਤੋ વਿવੇਕਸੁਖਪਚ੍ਚવੇਕ੍ਖਣਦਸ੍ਸਨਂ। ਆਕਿਣ੍ਣੋ ਨ ਫਾਸੁ વਿਹਾਸਿਨ੍ਤਿ ਸਮ੍ਬਾਧਪ੍ਪਤ੍ਤੋ ਆਕਿਣ੍ਣੋ વਿਹਾਸਿਂ। ਕਿਂ ਪਨ ਭਗવਤੋ ਸਮ੍ਬਾਧੋ ਅਤ੍ਥਿ ਸਂਸਗ੍ਗੋ વਾਤਿ? ਨਤ੍ਥਿ। ਨ ਹਿ ਕੋਚਿ ਭਗવਨ੍ਤਂ ਅਨਿਚ੍ਛਾਯ ਉਪਸਙ੍ਕਮਿਤੁਂ ਸਕ੍ਕੋਤਿ। ਦੁਰਾਸਦਾ ਹਿ ਬੁਦ੍ਧਾ ਭਗવਨ੍ਤੋ ਸਬ੍ਬਤ੍ਥ ਚ ਅਨੁਪਲਿਤ੍ਤਾ, ਹਿਤੇਸਿਤਾਯ ਪਨ ਸਤ੍ਤੇਸੁ ਅਨੁਕਮ੍ਪਂ ਉਪਾਦਾਯ ‘‘ਮੁਤ੍ਤੋ ਮੋਚੇਸ੍ਸਾਮੀ’’ਤਿ ਪਟਿਞ੍ਞਾਨੁਰੂਪਂ ਚਤੁਰੋਘਨਿਤ੍ਥਰਣਤ੍ਥਂ ਅਟ੍ਠਨ੍ਨਂ ਪਰਿਸਾਨਂ ਅਤ੍ਤਨੋ ਸਨ੍ਤਿਕਂ ਕਾਲੇਨ ਕਾਲਂ ਉਪਸਙ੍ਕਮਨਂ ਅਧਿવਾਸੇਤਿ, ਸਯਞ੍ਚ ਮਹਾਕਰੁਣਾਸਮੁਸ੍ਸਾਹਿਤੋ ਕਾਲਞ੍ਞੂ ਹੁਤ੍વਾ ਤਤ੍ਥ ਉਪਸਙ੍ਕਮੀਤਿ ਇਦਂ ਸਬ੍ਬਬੁਦ੍ਧਾਨਂ ਆਚਿਣ੍ਣਂ। ਨਾਯਮਿਧ ਆਕਿਣ੍ਣવਿਹਾਰੋ ਅਧਿਪ੍ਪੇਤੋ, ਇਧ ਪਨ ਤੇਹਿ ਕਲਹਕਾਰਕੇਹਿ ਕੋਸਮ੍ਬਕਭਿਕ੍ਖੂਹਿ ਸਦ੍ਧਿਂ ਏਕવਿਹਾਰੇ વਾਸਂ વਿਹਾਸਿ, ਤਦਾ વਿਨੇਤਬ੍ਬਾਭਾવਤੋ ਆਕਿਣ੍ਣવਿਹਾਰਂ ਕਤ੍વਾ વੁਤ੍ਤਂ ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਨ ਫਾਸੁ વਿਹਾਸਿ’’ਨ੍ਤਿ। ਤੇਨੇવਾਹ ‘‘ਤੇਹਿ ਕੋਸਮ੍ਬਕੇਹਿ ਭਿਕ੍ਖੂਹਿ ਭਣ੍ਡਨਕਾਰਕੇਹੀ’’ਤਿਆਦਿ।
Atha kho bhagavato rahogatassātiādi bhagavato vivekasukhapaccavekkhaṇadassanaṃ. Ākiṇṇo na phāsu vihāsinti sambādhappatto ākiṇṇo vihāsiṃ. Kiṃ pana bhagavato sambādho atthi saṃsaggo vāti? Natthi. Na hi koci bhagavantaṃ anicchāya upasaṅkamituṃ sakkoti. Durāsadā hi buddhā bhagavanto sabbattha ca anupalittā, hitesitāya pana sattesu anukampaṃ upādāya ‘‘mutto mocessāmī’’ti paṭiññānurūpaṃ caturoghanittharaṇatthaṃ aṭṭhannaṃ parisānaṃ attano santikaṃ kālena kālaṃ upasaṅkamanaṃ adhivāseti, sayañca mahākaruṇāsamussāhito kālaññū hutvā tattha upasaṅkamīti idaṃ sabbabuddhānaṃ āciṇṇaṃ. Nāyamidha ākiṇṇavihāro adhippeto, idha pana tehi kalahakārakehi kosambakabhikkhūhi saddhiṃ ekavihāre vāsaṃ vihāsi, tadā vinetabbābhāvato ākiṇṇavihāraṃ katvā vuttaṃ ‘‘ahaṃ kho pubbe ākiṇṇo na phāsu vihāsi’’nti. Tenevāha ‘‘tehi kosambakehi bhikkhūhi bhaṇḍanakārakehī’’tiādi.
ਦਹਰਪੋਤਕੇਹੀਤਿ ਦਹਰੇਹਿ ਹਤ੍ਥਿਪੋਤਕੇਹਿ, ਯੇ ਭਿਙ੍ਕਾਤਿਪਿ વੁਚ੍ਚਨ੍ਤਿ। ਤੇਹੀਤਿ ਹਤ੍ਥਿਆਦੀਹਿ। ਕਦ੍ਦਮੋਦਕਾਨੀਤਿ ਕਦ੍ਦਮਮਿਸ੍ਸਾਨਿ ਉਦਕਾਨਿ। ਓਗਾਹਾਤਿ ਏਤ੍ਥ ‘‘ਓਗਾਹ’’ਨ੍ਤਿਪਿ ਪਾਲ਼ਿ। ਅਸ੍ਸਾਤਿ ਹਤ੍ਥਿਨਾਗਸ੍ਸ। ਉਪਨਿਘਂਸਨ੍ਤਿਯੋਤਿ ਘਟ੍ਟੇਨ੍ਤਿਯੋ। ਉਪਨਿਘਂਸਿਯਮਾਨੋਪਿ ਅਤ੍ਤਨੋ ਉਲ਼ਾਰਭਾવੇਨ ਨ ਕੁਜ੍ਝਤਿ, ਤੇਨ ਤਾ ਘਂਸਨ੍ਤਿਯੇવ। વੂਪਕਟ੍ਠੋਤਿ વੂਪਕਟ੍ਠੋ ਦੂਰੀਭੂਤੋ।
Daharapotakehīti daharehi hatthipotakehi, ye bhiṅkātipi vuccanti. Tehīti hatthiādīhi. Kaddamodakānīti kaddamamissāni udakāni. Ogāhāti ettha ‘‘ogāha’’ntipi pāḷi. Assāti hatthināgassa. Upanighaṃsantiyoti ghaṭṭentiyo. Upanighaṃsiyamānopi attano uḷārabhāvena na kujjhati, tena tā ghaṃsantiyeva. Vūpakaṭṭhoti vūpakaṭṭho dūrībhūto.
ਯੂਥਾਤਿ ਹਤ੍ਥਿਘਟਾਯ। ਯੇਨ ਭਗવਾ ਤੇਨੁਪਸਙ੍ਕਮੀਤਿ ਸੋ ਕਿਰ ਹਤ੍ਥਿਨਾਗੋ ਯੂਥવਾਸੇ ਉਕ੍ਕਣ੍ਠਿਤੋ ਤਂ વਨਸਣ੍ਡਂ ਪવਿਟ੍ਠੋ। ਤਤ੍ਥ ਭਗવਨ੍ਤਂ ਦਿਸ੍વਾ ਘਟਸਹਸ੍ਸੇਨ ਨਿਬ੍ਬਾਪਿਤਸਨ੍ਤਾਪੋ વਿਯ ਨਿਬ੍ਬੁਤੋ ਹੁਤ੍વਾ ਪਸਨ੍ਨਚਿਤ੍ਤੋ ਭਗવਤੋ ਸਨ੍ਤਿਕੇ ਅਟ੍ਠਾਸਿ, ਤਤੋ ਪਟ੍ਠਾਯ વਤ੍ਤਸੀਸੇ ਠਤ੍વਾ ਭਦ੍ਦਸਾਲਸ੍ਸ ਪਣ੍ਣਸਾਲਾਯ ਚ ਸਮਨ੍ਤਤੋ ਅਪ੍ਪਹਰਿਤਂ ਕਤ੍વਾ ਸਾਖਾਭਙ੍ਗੇਨ ਸਮ੍ਮਜ੍ਜਤਿ, ਭਗવਤੋ ਮੁਖਧੋવਨਂ ਦੇਤਿ, ਨਹਾਨੋਦਕਂ ਆਹਰਤਿ, ਦਨ੍ਤਕਟ੍ਠਂ ਦੇਤਿ, ਅਰਞ੍ਞਤੋ ਮਧੁਰਾਨਿ ਫਲਾਫਲਾਨਿ ਆਹਰਿਤ੍વਾ ਸਤ੍ਥੁ ਉਪਨੇਤਿ। ਸਤ੍ਥਾ ਤਾਨਿ ਪਰਿਭੁਞ੍ਜਤਿ। ਤੇਨ વੁਤ੍ਤਂ ‘‘ਸੋਣ੍ਡਾਯ ਭਗવਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤੀ’’ਤਿਆਦਿ। ਸੋ ਕਿਰ ਸੋਣ੍ਡਾਯ ਦਾਰੂਨਿ ਆਹਰਿਤ੍વਾ ਅਞ੍ਞਮਞ੍ਞਂ ਘਂਸਿਤ੍વਾ ਅਗ੍ਗਿਂ ਉਟ੍ਠਾਪੇਤ੍વਾ ਦਾਰੂਨਿ ਜਾਲਾਪੇਤ੍વਾ ਤਤ੍ਥ ਪਾਸਾਣਖਣ੍ਡਾਨਿ ਤਾਪੇਤ੍વਾ ਤਾਨਿ ਦਣ੍ਡਕੇਹਿ વਟ੍ਟੇਤ੍વਾ ਸੋਣ੍ਡਿਯਂ ਖਿਪਿਤ੍વਾ ਉਦਕਸ੍ਸ ਤਤ੍ਤਭਾવਂ ਞਤ੍વਾ ਭਗવਤੋ ਸਨ੍ਤਿਕਂ ਉਪਗਨ੍ਤ੍વਾ ਤਿਟ੍ਠਤਿ। ਭਗવਾ ‘‘ਹਤ੍ਥਿਨਾਗੋ ਮਮ ਨਹਾਨਂ ਇਚ੍ਛਤੀ’’ਤਿ ਤਤ੍ਥ ਗਨ੍ਤ੍વਾ ਨਹਾਨਕਿਚ੍ਚਂ ਕਰੋਤਿ। ਪਾਨੀਯੇਪਿ ਏਸੇવ ਨਯੋ। ਤਸ੍ਮਿਂ ਪਨ ਸੀਤਲੇ ਜਾਤੇ ਉਪਸਙ੍ਕਮਤਿ। ਤਂ ਸਨ੍ਧਾਯ વੁਤ੍ਤਂ ‘‘ਸੋਣ੍ਡਾਯ ਭਗવਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤੀ’’ਤਿ।
Yūthāti hatthighaṭāya. Yena bhagavā tenupasaṅkamīti so kira hatthināgo yūthavāse ukkaṇṭhito taṃ vanasaṇḍaṃ paviṭṭho. Tattha bhagavantaṃ disvā ghaṭasahassena nibbāpitasantāpo viya nibbuto hutvā pasannacitto bhagavato santike aṭṭhāsi, tato paṭṭhāya vattasīse ṭhatvā bhaddasālassa paṇṇasālāya ca samantato appaharitaṃ katvā sākhābhaṅgena sammajjati, bhagavato mukhadhovanaṃ deti, nahānodakaṃ āharati, dantakaṭṭhaṃ deti, araññato madhurāni phalāphalāni āharitvā satthu upaneti. Satthā tāni paribhuñjati. Tena vuttaṃ ‘‘soṇḍāya bhagavato pānīyaṃ paribhojanīyaṃ upaṭṭhāpetī’’tiādi. So kira soṇḍāya dārūni āharitvā aññamaññaṃ ghaṃsitvā aggiṃ uṭṭhāpetvā dārūni jālāpetvā tattha pāsāṇakhaṇḍāni tāpetvā tāni daṇḍakehi vaṭṭetvā soṇḍiyaṃ khipitvā udakassa tattabhāvaṃ ñatvā bhagavato santikaṃ upagantvā tiṭṭhati. Bhagavā ‘‘hatthināgo mama nahānaṃ icchatī’’ti tattha gantvā nahānakiccaṃ karoti. Pānīyepi eseva nayo. Tasmiṃ pana sītale jāte upasaṅkamati. Taṃ sandhāya vuttaṃ ‘‘soṇḍāya bhagavato pānīyaṃ paribhojanīyaṃ upaṭṭhāpetī’’ti.
ਅਤ੍ਤਨੋ ਚ ਪવਿવੇਕਂ વਿਦਿਤ੍વਾਤਿ ਕੇਹਿਚਿ ਅਨਾਕਿਣ੍ਣਭਾવਲਦ੍ਧਂ ਕਾਯવਿવੇਕਂ ਜਾਨਿਤ੍વਾ। ਇਤਰੇ ਪਨ વਿવੇਕਾ ਭਗવਤੋ ਸਬ੍ਬਕਾਲਂ વਿਜ੍ਜਨ੍ਤਿਯੇવ। ਇਮਂ ਉਦਾਨਂ ਉਦਾਨੇਸੀਤਿ ਇਮਂ ਅਤ੍ਤਨੋ ਹਤ੍ਥਿਨਾਗਸ੍ਸ ਚ વਿવੇਕਾਭਿਰਤਿਯਾ ਸਮਾਨਜ੍ਝਾਸਯਭਾવਦੀਪਨਂ ਉਦਾਨਂ ਉਦਾਨੇਸਿ।
Attano ca pavivekaṃ viditvāti kehici anākiṇṇabhāvaladdhaṃ kāyavivekaṃ jānitvā. Itare pana vivekā bhagavato sabbakālaṃ vijjantiyeva. Imaṃ udānaṃ udānesīti imaṃ attano hatthināgassa ca vivekābhiratiyā samānajjhāsayabhāvadīpanaṃ udānaṃ udānesi.
ਗਾਥਾਯ ਪਨ ਏવਮਤ੍ਥਯੋਜਨਾ વੇਦਿਤਬ੍ਬਾ (ਉਦਾ॰ ਅਟ੍ਠ॰ ੩੫) – ਏਤਂ ਈਸਾਦਨ੍ਤਸ੍ਸ ਰਥਈਸਾਸਦਿਸਦਨ੍ਤਸ੍ਸ ਹਤ੍ਥਿਨਾਗਸ੍ਸ ਚਿਤ੍ਤਂ ਨਾਗੇਨ ਬੁਦ੍ਧਨਾਗਸ੍ਸ ਚਿਤ੍ਤੇਨ ਸਮੇਤਿ ਸਂਸਨ੍ਦਤਿ। ਕਥਂ ਸਮੇਤਿ ਚੇ? ਯਦੇਕੋ ਰਮਤੀ વਨੇ, ਯਸ੍ਮਾ ਬੁਦ੍ਧਨਾਗੋ ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ વਿਹਾਸਿ’’ਨ੍ਤਿ ਪੁਰਿਮਂ ਆਕਿਣ੍ਣવਿਹਾਰਂ ਜਿਗੁਚ੍ਛਿਤ੍વਾ વਿવੇਕਂ ਉਪਬ੍ਰੂਹਯਮਾਨੋ ਇਦਾਨਿ ਯਥਾ ਏਕੋ ਅਦੁਤਿਯੋ વਨੇ ਅਰਞ੍ਞੇ ਰਮਤਿ ਅਭਿਰਮਤਿ, ਏવਂ ਅਯਮ੍ਪਿ ਹਤ੍ਥਿਨਾਗੋ ਪੁਬ੍ਬੇ ਅਤ੍ਤਨੋ ਹਤ੍ਥਿਆਦੀਹਿ ਆਕਿਣ੍ਣવਿਹਾਰਂ ਜਿਗੁਚ੍ਛਿਤ੍વਾ ਇਦਾਨਿ ਏਕੋ ਅਸਹਾਯੋ વਨੇ ਏਕવਿਹਾਰਂ ਰਮਤਿ ਅਭਿਨਨ੍ਦਤਿ, ਤਸ੍ਮਾਸ੍ਸ ਚਿਤ੍ਤਂ ਨਾਗੇਨ ਸਮੇਤਿ, ਤਸ੍ਸ ਚਿਤ੍ਤੇਨ ਸਮੇਤੀਤਿ ਕਤ੍વਾ ਏਕੀਭਾવਰਤਿਯਾ ਏਕਸਦਿਸਂ ਹੋਤੀਤਿ ਅਤ੍ਥੋ।
Gāthāya pana evamatthayojanā veditabbā (udā. aṭṭha. 35) – etaṃ īsādantassa rathaīsāsadisadantassa hatthināgassa cittaṃ nāgena buddhanāgassa cittena sameti saṃsandati. Kathaṃ sameti ce? Yadeko ramatī vane, yasmā buddhanāgo ‘‘ahaṃ kho pubbe ākiṇṇo vihāsi’’nti purimaṃ ākiṇṇavihāraṃ jigucchitvā vivekaṃ upabrūhayamāno idāni yathā eko adutiyo vane araññe ramati abhiramati, evaṃ ayampi hatthināgo pubbe attano hatthiādīhi ākiṇṇavihāraṃ jigucchitvā idāni eko asahāyo vane ekavihāraṃ ramati abhinandati, tasmāssa cittaṃ nāgena sameti, tassa cittena sametīti katvā ekībhāvaratiyā ekasadisaṃ hotīti attho.
ਪਾਲਿਲੇਯ੍ਯਕਗਮਨਕਥਾવਣ੍ਣਨਾ ਨਿਟ੍ਠਿਤਾ।
Pālileyyakagamanakathāvaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਗ੍ਗਪਾਲ਼ਿ • Mahāvaggapāḷi / ੨੭੫. ਪਾਲਿਲੇਯ੍ਯਕਗਮਨਕਥਾ • 275. Pālileyyakagamanakathā
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਗ੍ਗ-ਅਟ੍ਠਕਥਾ • Mahāvagga-aṭṭhakathā / ਪਾਲਿਲੇਯ੍ਯਕਗਮਨਕਥਾ • Pālileyyakagamanakathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਪਾਲਿਲੇਯ੍ਯਕਗਮਨਕਥਾવਣ੍ਣਨਾ • Pālileyyakagamanakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਪਾਲਿਲੇਯ੍ਯਕਗਮਨਕਥਾવਣ੍ਣਨਾ • Pālileyyakagamanakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੨੭੫. ਪਾਲਿਲੇਯ੍ਯਕਗਮਨਕਥਾ • 275. Pālileyyakagamanakathā
