| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. பாலிலெய்யஸுத்தங்
9. Pālileyyasuttaṃ
81. ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய கோஸம்பி³ங் பிண்டா³ய பாவிஸி. கோஸம்பி³யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ ஸாமங் ஸேனாஸனங் ஸங்ஸாமெத்வா பத்தசீவரமாதா³ய அனாமந்தெத்வா உபட்டா²கே அனபலோகெத்வா பி⁴க்கு²ஸங்க⁴ங் ஏகோ அது³தியோ சாரிகங் பக்காமி.
81. Ekaṃ samayaṃ bhagavā kosambiyaṃ viharati ghositārāme. Atha kho bhagavā pubbaṇhasamayaṃ nivāsetvā pattacīvaramādāya kosambiṃ piṇḍāya pāvisi. Kosambiyaṃ piṇḍāya caritvā pacchābhattaṃ piṇḍapātapaṭikkanto sāmaṃ senāsanaṃ saṃsāmetvā pattacīvaramādāya anāmantetvā upaṭṭhāke anapaloketvā bhikkhusaṅghaṃ eko adutiyo cārikaṃ pakkāmi.
அத² கோ² அஞ்ஞதரோ பி⁴க்கு² அசிரபக்கந்தஸ்ஸ ப⁴க³வதோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தங் ஆனந்த³ங் ஏதத³வோச – ‘‘ஏஸாவுஸோ, ஆனந்த³, ப⁴க³வா ஸாமங் ஸேனாஸனங் ஸங்ஸாமெத்வா பத்தசீவரமாதா³ய அனாமந்தெத்வா உபட்டா²கே அனபலோகெத்வா பி⁴க்கு²ஸங்க⁴ங் ஏகோ அது³தியோ சாரிகங் பக்கந்தோ’’தி. ‘‘யஸ்மிங், ஆவுஸோ, ஸமயே ப⁴க³வா ஸாமங் ஸேனாஸனங் ஸங்ஸாமெத்வா பத்தசீவரமாதா³ய அனாமந்தெத்வா உபட்டா²கே அனபலோகெத்வா பி⁴க்கு²ஸங்க⁴ங் ஏகோ அது³தியோ சாரிகங் பக்கமதி, ஏகோவ ப⁴க³வா தஸ்மிங் ஸமயே விஹரிதுகாமோ ஹோதி; ந ப⁴க³வா தஸ்மிங் ஸமயே கேனசி அனுப³ந்தி⁴தப்³போ³ ஹோதீ’’தி.
Atha kho aññataro bhikkhu acirapakkantassa bhagavato yenāyasmā ānando tenupasaṅkami; upasaṅkamitvā āyasmantaṃ ānandaṃ etadavoca – ‘‘esāvuso, ānanda, bhagavā sāmaṃ senāsanaṃ saṃsāmetvā pattacīvaramādāya anāmantetvā upaṭṭhāke anapaloketvā bhikkhusaṅghaṃ eko adutiyo cārikaṃ pakkanto’’ti. ‘‘Yasmiṃ, āvuso, samaye bhagavā sāmaṃ senāsanaṃ saṃsāmetvā pattacīvaramādāya anāmantetvā upaṭṭhāke anapaloketvā bhikkhusaṅghaṃ eko adutiyo cārikaṃ pakkamati, ekova bhagavā tasmiṃ samaye viharitukāmo hoti; na bhagavā tasmiṃ samaye kenaci anubandhitabbo hotī’’ti.
அத² கோ² ப⁴க³வா அனுபுப்³பே³ன சாரிகங் சரமானோ யேன பாலிலெய்யகங் 1 தத³வஸரி. தத்ர ஸுத³ங் ப⁴க³வா பாலிலெய்யகே விஹரதி ப⁴த்³த³ஸாலமூலே. அத² கோ² ஸம்ப³ஹுலா பி⁴க்கூ² யேனாயஸ்மா ஆனந்தோ³ தேனுபஸங்கமிங்ஸு; உபஸங்கமித்வா ஆயஸ்மதா ஆனந்தே³ன ஸத்³தி⁴ங் ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ஆயஸ்மந்தங் ஆனந்த³ங் ஏதத³வோசுங் – ‘‘சிரஸ்ஸுதா கோ² நோ, ஆவுஸோ ஆனந்த³, ப⁴க³வதோ ஸம்முகா² த⁴ம்மீ கதா²; இச்சா²ம மயங், ஆவுஸோ ஆனந்த³, ப⁴க³வதோ ஸம்முகா² த⁴ம்மிங் கத²ங் ஸோது’’ந்தி.
Atha kho bhagavā anupubbena cārikaṃ caramāno yena pālileyyakaṃ 2 tadavasari. Tatra sudaṃ bhagavā pālileyyake viharati bhaddasālamūle. Atha kho sambahulā bhikkhū yenāyasmā ānando tenupasaṅkamiṃsu; upasaṅkamitvā āyasmatā ānandena saddhiṃ sammodiṃsu. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu. Ekamantaṃ nisinnā kho te bhikkhū āyasmantaṃ ānandaṃ etadavocuṃ – ‘‘cirassutā kho no, āvuso ānanda, bhagavato sammukhā dhammī kathā; icchāma mayaṃ, āvuso ānanda, bhagavato sammukhā dhammiṃ kathaṃ sotu’’nti.
அத² கோ² ஆயஸ்மா ஆனந்தோ³ தேஹி பி⁴க்கூ²ஹி ஸத்³தி⁴ங் யேன பாலிலெய்யகங் ப⁴த்³த³ஸாலமூலங் யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னே கோ² தே பி⁴க்கூ² ப⁴க³வா த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. தேன கோ² பன ஸமயேன அஞ்ஞதரஸ்ஸ பி⁴க்கு²னோ ஏவங் சேதஸோ பரிவிதக்கோ உத³பாதி³ – ‘‘கத²ங் நு கோ² ஜானதோ கத²ங் பஸ்ஸதோ அனந்தரா ஆஸவானங் க²யோ ஹோதீ’’தி? அத² கோ² ப⁴க³வா தஸ்ஸ பி⁴க்கு²னோ சேதஸா சேதோபரிவிதக்கமஞ்ஞாய பி⁴க்கூ² ஆமந்தேஸி – ‘‘விசயஸோ தே³ஸிதோ, பி⁴க்க²வே, மயா த⁴ம்மோ; விசயஸோ தே³ஸிதா சத்தாரோ ஸதிபட்டா²னா; விசயஸோ தே³ஸிதா சத்தாரோ ஸம்மப்பதா⁴னா; விசயஸோ தே³ஸிதா சத்தாரோ இத்³தி⁴பாதா³; விசயஸோ தே³ஸிதானி பஞ்சிந்த்³ரியானி; விசயஸோ தே³ஸிதானி பஞ்ச ப³லானி; விசயஸோ தே³ஸிதா ஸத்தபொ³ஜ்ஜ²ங்கா³; விசயஸோ தே³ஸிதோ அரியோ அட்ட²ங்கி³கோ மக்³கோ³. ஏவங் விசயஸோ தே³ஸிதோ, பி⁴க்க²வே, மயா த⁴ம்மோ. ஏவங் விசயஸோ தே³ஸிதே கோ², பி⁴க்க²வே, மயா த⁴ம்மே அத² ச பனிதே⁴கச்சஸ்ஸ பி⁴க்கு²னோ ஏவங் சேதஸோ பரிவிதக்கோ உத³பாதி³ – ‘கத²ங் நு கோ² ஜானதோ கத²ங் பஸ்ஸதோ அனந்தரா ஆஸவானங் க²யோ ஹோதீ’’’தி?
Atha kho āyasmā ānando tehi bhikkhūhi saddhiṃ yena pālileyyakaṃ bhaddasālamūlaṃ yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinne kho te bhikkhū bhagavā dhammiyā kathāya sandassesi samādapesi samuttejesi sampahaṃsesi. Tena kho pana samayena aññatarassa bhikkhuno evaṃ cetaso parivitakko udapādi – ‘‘kathaṃ nu kho jānato kathaṃ passato anantarā āsavānaṃ khayo hotī’’ti? Atha kho bhagavā tassa bhikkhuno cetasā cetoparivitakkamaññāya bhikkhū āmantesi – ‘‘vicayaso desito, bhikkhave, mayā dhammo; vicayaso desitā cattāro satipaṭṭhānā; vicayaso desitā cattāro sammappadhānā; vicayaso desitā cattāro iddhipādā; vicayaso desitāni pañcindriyāni; vicayaso desitāni pañca balāni; vicayaso desitā sattabojjhaṅgā; vicayaso desito ariyo aṭṭhaṅgiko maggo. Evaṃ vicayaso desito, bhikkhave, mayā dhammo. Evaṃ vicayaso desite kho, bhikkhave, mayā dhamme atha ca panidhekaccassa bhikkhuno evaṃ cetaso parivitakko udapādi – ‘kathaṃ nu kho jānato kathaṃ passato anantarā āsavānaṃ khayo hotī’’’ti?
‘‘கத²ஞ்ச, பி⁴க்க²வே, ஜானதோ கத²ங் பஸ்ஸதோ அனந்தரா ஆஸவானங் க²யோ ஹோதி? இத⁴ பி⁴க்க²வே, அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா அனிச்சா ஸங்க²தா படிச்சஸமுப்பன்னா. ஸாபி வேத³னா அனிச்சா ஸங்க²தா படிச்சஸமுப்பன்னா. ஸோபி ப²ஸ்ஸோ அனிச்சோ ஸங்க²தோ படிச்சஸமுப்பன்னோ. ஸாபி அவிஜ்ஜா அனிச்சா ஸங்க²தா படிச்சஸமுப்பன்னா . ஏவம்பி கோ², பி⁴க்க²வே, ஜானதோ ஏவங் பஸ்ஸதோ அனந்தரா ஆஸவானங் க²யோ ஹோதி.
‘‘Kathañca, bhikkhave, jānato kathaṃ passato anantarā āsavānaṃ khayo hoti? Idha bhikkhave, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati. Yā kho pana sā, bhikkhave, samanupassanā saṅkhāro so. So pana saṅkhāro kiṃnidāno kiṃsamudayo kiṃjātiko kiṃpabhavo? Avijjāsamphassajena, bhikkhave, vedayitena phuṭṭhassa assutavato puthujjanassa uppannā taṇhā; tatojo so saṅkhāro. Iti kho, bhikkhave, sopi saṅkhāro anicco saṅkhato paṭiccasamuppanno. Sāpi taṇhā aniccā saṅkhatā paṭiccasamuppannā. Sāpi vedanā aniccā saṅkhatā paṭiccasamuppannā. Sopi phasso anicco saṅkhato paṭiccasamuppanno. Sāpi avijjā aniccā saṅkhatā paṭiccasamuppannā . Evampi kho, bhikkhave, jānato evaṃ passato anantarā āsavānaṃ khayo hoti.
‘‘ந ஹேவ கோ² ரூபங் அத்ததோ ஸமனுபஸ்ஸதி; அபி ச கோ² ரூபவந்தங் அத்தானங் ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா… ஸாபி வேத³னா… ஸோபி ப²ஸ்ஸோ… ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம்பி கோ², பி⁴க்க²வே, ஜானதோ ஏவங் பஸ்ஸதோ அனந்தரா ஆஸவானங் க²யோ ஹோதி.
‘‘Na heva kho rūpaṃ attato samanupassati; api ca kho rūpavantaṃ attānaṃ samanupassati. Yā kho pana sā, bhikkhave, samanupassanā saṅkhāro so. So pana saṅkhāro kiṃnidāno kiṃsamudayo kiṃjātiko kiṃpabhavo? Avijjāsamphassajena, bhikkhave, vedayitena phuṭṭhassa assutavato puthujjanassa uppannā taṇhā; tatojo so saṅkhāro. Iti kho, bhikkhave, sopi saṅkhāro anicco saṅkhato paṭiccasamuppanno. Sāpi taṇhā… sāpi vedanā… sopi phasso… sāpi avijjā aniccā saṅkhatā paṭiccasamuppannā. Evampi kho, bhikkhave, jānato evaṃ passato anantarā āsavānaṃ khayo hoti.
‘‘ந ஹேவ கோ² ரூபங் அத்ததோ ஸமனுபஸ்ஸதி, ந ரூபவந்தங் அத்தானங் ஸமனுபஸ்ஸதி; அபி ச கோ² அத்தனி ரூபங் ஸமனுபஸ்ஸதி. யா கோ² பன ஸா, பி⁴க்க²வே , ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா… ஸாபி வேத³னா… ஸோபி ப²ஸ்ஸோ… ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம்பி கோ², பி⁴க்க²வே, ஜானதோ ஏவங் பஸ்ஸதோ அனந்தரா ஆஸவானங் க²யோ ஹோதி.
‘‘Na heva kho rūpaṃ attato samanupassati, na rūpavantaṃ attānaṃ samanupassati; api ca kho attani rūpaṃ samanupassati. Yā kho pana sā, bhikkhave , samanupassanā saṅkhāro so. So pana saṅkhāro kiṃnidāno kiṃsamudayo kiṃjātiko kiṃpabhavo? Avijjāsamphassajena, bhikkhave, vedayitena phuṭṭhassa assutavato puthujjanassa uppannā taṇhā; tatojo so saṅkhāro. Iti kho, bhikkhave, sopi saṅkhāro anicco saṅkhato paṭiccasamuppanno. Sāpi taṇhā… sāpi vedanā… sopi phasso… sāpi avijjā aniccā saṅkhatā paṭiccasamuppannā. Evampi kho, bhikkhave, jānato evaṃ passato anantarā āsavānaṃ khayo hoti.
‘‘ந ஹேவ கோ² ரூபங் அத்ததோ ஸமனுபஸ்ஸதி, ந ரூபவந்தங் அத்தானங் ஸமனுபஸ்ஸதி, ந அத்தனி ரூபங் ஸமனுபஸ்ஸதி; அபி ச கோ² ரூபஸ்மிங் அத்தானங் ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதே பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா … ஸாபி வேத³னா… ஸோபி ப²ஸ்ஸோ… ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம்பி கோ², பி⁴க்க²வே, ஜானதோ…பே॰… ஆஸவானங் க²யோ ஹோதி.
‘‘Na heva kho rūpaṃ attato samanupassati, na rūpavantaṃ attānaṃ samanupassati, na attani rūpaṃ samanupassati; api ca kho rūpasmiṃ attānaṃ samanupassati. Yā kho pana sā, bhikkhave, samanupassanā saṅkhāro so. So pana saṅkhāro kiṃnidāno kiṃsamudayo kiṃjātiko kiṃpabhavo? Avijjāsamphassajena, bhikkhave, vedayite phuṭṭhassa assutavato puthujjanassa uppannā taṇhā; tatojo so saṅkhāro. Iti kho, bhikkhave, sopi saṅkhāro anicco saṅkhato paṭiccasamuppanno. Sāpi taṇhā … sāpi vedanā… sopi phasso… sāpi avijjā aniccā saṅkhatā paṭiccasamuppannā. Evampi kho, bhikkhave, jānato…pe… āsavānaṃ khayo hoti.
‘‘ந ஹேவ கோ² ரூபங் அத்ததோ ஸமனுபஸ்ஸதி, ந ரூபவந்தங் அத்தானங், ந அத்தனி ரூபங், ந ரூபஸ்மிங் அத்தானங் ஸமனுபஸ்ஸதி; அபி ச கோ² வேத³னங் அத்ததோ ஸமனுபஸ்ஸதி, அபி ச கோ² வேத³னாவந்தங் அத்தானங் ஸமனுபஸ்ஸதி, அபி ச கோ² அத்தனி வேத³னங் ஸமனுபஸ்ஸதி, அபி ச கோ² வேத³னாய அத்தானங் ஸமனுபஸ்ஸதி; அபி ச கோ² ஸஞ்ஞங்… அபி ச கோ² ஸங்கா²ரே அத்ததோ ஸமனுபஸ்ஸதி, அபி ச கோ² ஸங்கா²ரவந்தங் அத்தானங் ஸமனுபஸ்ஸதி, அபி ச கோ² அத்தனி ஸங்கா²ரே ஸமனுபஸ்ஸதி, அபி ச கோ² ஸங்கா²ரேஸு அத்தானங் ஸமனுபஸ்ஸதி; அபி ச கோ² விஞ்ஞாணங் அத்ததோ ஸமனுபஸ்ஸதி, அபி ச கோ² விஞ்ஞாணவந்தங் அத்தானங், அபி ச கோ² அத்தனி விஞ்ஞாணங், அபி ச கோ² விஞ்ஞாணஸ்மிங் அத்தானங் ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிங்னிதா³னோ…பே॰… கிங்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதே பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா… ஸாபி வேத³னா… ஸோபி ப²ஸ்ஸோ … ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவங் கோ², பி⁴க்க²வே, ஜானதோ ஏவங் பஸ்ஸதோ அனந்தரா ஆஸவானங் க²யோ ஹோதி.
‘‘Na heva kho rūpaṃ attato samanupassati, na rūpavantaṃ attānaṃ, na attani rūpaṃ, na rūpasmiṃ attānaṃ samanupassati; api ca kho vedanaṃ attato samanupassati, api ca kho vedanāvantaṃ attānaṃ samanupassati, api ca kho attani vedanaṃ samanupassati, api ca kho vedanāya attānaṃ samanupassati; api ca kho saññaṃ… api ca kho saṅkhāre attato samanupassati, api ca kho saṅkhāravantaṃ attānaṃ samanupassati, api ca kho attani saṅkhāre samanupassati, api ca kho saṅkhāresu attānaṃ samanupassati; api ca kho viññāṇaṃ attato samanupassati, api ca kho viññāṇavantaṃ attānaṃ, api ca kho attani viññāṇaṃ, api ca kho viññāṇasmiṃ attānaṃ samanupassati. Yā kho pana sā, bhikkhave, samanupassanā saṅkhāro so. So pana saṅkhāro kiṃnidāno…pe… kiṃpabhavo? Avijjāsamphassajena, bhikkhave, vedayite phuṭṭhassa assutavato puthujjanassa uppannā taṇhā; tatojo so saṅkhāro. Iti kho, bhikkhave, sopi saṅkhāro anicco saṅkhato paṭiccasamuppanno. Sāpi taṇhā… sāpi vedanā… sopi phasso … sāpi avijjā aniccā saṅkhatā paṭiccasamuppannā. Evaṃ kho, bhikkhave, jānato evaṃ passato anantarā āsavānaṃ khayo hoti.
‘‘ந ஹேவ கோ² ரூபங் அத்ததோ ஸமனுபஸ்ஸதி, ந வேத³னங் அத்ததோ ஸமனுபஸ்ஸதி, ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ ஸமனுபஸ்ஸதி; அபி ச கோ² ஏவங்தி³ட்டி² ஹோதி – ‘ஸோ அத்தா ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’தி. யா கோ² பன ஸா, பி⁴க்க²வே, ஸஸ்ஸததி³ட்டி² ஸங்கா²ரோ ஸோ. ஸோ பன ஸங்கா²ரோ கிங்னிதா³னோ…பே॰… ஏவம்பி கோ², பி⁴க்க²வே, ஜானதோ ஏவங் பஸ்ஸதோ அனந்தரா ஆஸவானங் க²யோ ஹோதி.
‘‘Na heva kho rūpaṃ attato samanupassati, na vedanaṃ attato samanupassati, na saññaṃ… na saṅkhāre… na viññāṇaṃ attato samanupassati; api ca kho evaṃdiṭṭhi hoti – ‘so attā so loko, so pecca bhavissāmi nicco dhuvo sassato avipariṇāmadhammo’ti. Yā kho pana sā, bhikkhave, sassatadiṭṭhi saṅkhāro so. So pana saṅkhāro kiṃnidāno…pe… evampi kho, bhikkhave, jānato evaṃ passato anantarā āsavānaṃ khayo hoti.
‘‘ந ஹேவ கோ² ரூபங் அத்ததோ ஸமனுபஸ்ஸதி, ந வேத³னங் … ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ ஸமனுபஸ்ஸதி; நாபி ஏவங்தி³ட்டி² ஹோதி – ‘ஸோ அத்தா ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’தி. அபி ச கோ² ஏவங்தி³ட்டி² ஹோதி – ‘நோ சஸ்ஸங் நோ ச மே ஸியா நாப⁴விஸ்ஸங் ந மே ப⁴விஸ்ஸதீ’தி. யா கோ² பன ஸா, பி⁴க்க²வே, உச்சே²த³தி³ட்டி² ஸங்கா²ரோ ஸோ. ஸோ பன ஸங்கா²ரோ கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ…பே॰… ஏவம்பி கோ², பி⁴க்க²வே, ஜானதோ ஏவங் பஸ்ஸதோ அனந்தரா ஆஸவானங் க²யோ ஹோதி.
‘‘Na heva kho rūpaṃ attato samanupassati, na vedanaṃ … na saññaṃ… na saṅkhāre… na viññāṇaṃ attato samanupassati; nāpi evaṃdiṭṭhi hoti – ‘so attā so loko, so pecca bhavissāmi nicco dhuvo sassato avipariṇāmadhammo’ti. Api ca kho evaṃdiṭṭhi hoti – ‘no cassaṃ no ca me siyā nābhavissaṃ na me bhavissatī’ti. Yā kho pana sā, bhikkhave, ucchedadiṭṭhi saṅkhāro so. So pana saṅkhāro kiṃnidāno kiṃsamudayo kiṃjātiko kiṃpabhavo? Avijjāsamphassajena, bhikkhave, vedayitena phuṭṭhassa assutavato puthujjanassa uppannā taṇhā; tatojo so saṅkhāro. Iti kho, bhikkhave, sopi saṅkhāro anicco…pe… evampi kho, bhikkhave, jānato evaṃ passato anantarā āsavānaṃ khayo hoti.
‘‘ந ஹேவ கோ² ரூபங் அத்ததோ ஸமனுபஸ்ஸதி, ந வேத³னங்… ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ ஸமனுபஸ்ஸதி…பே॰… ந விஞ்ஞாணஸ்மிங் அத்ததோ ஸமனுபஸ்ஸதி, நாபி ஏவங்தி³ட்டி² ஹோதி – ‘ஸோ அத்தா ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’தி; நாபி ஏவங்தி³ட்டி² ஹோதி – ‘நோ சஸ்ஸங் நோ ச மே ஸியா நாப⁴விஸ்ஸங் ந மே ப⁴விஸ்ஸதீ’தி; அபி ச கோ² கங்கீ² ஹோதி விசிகிச்சீ² அனிட்ட²ங்க³தோ ஸத்³த⁴ம்மே. யா கோ² பன ஸா, பி⁴க்க²வே, கங்கி²தா விசிகிச்சி²தா அனிட்ட²ங்க³ததா ஸத்³த⁴ம்மே ஸங்கா²ரோ ஸோ. ஸோ பன ஸங்கா²ரோ கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா அனிச்சா ஸங்க²தா படிச்சஸமுப்பன்னா. ஸாபி வேத³னா அனிச்சா ஸங்க²தா படிச்சஸமுப்பன்னா. ஸோபி ப²ஸ்ஸோ அனிச்சோ ஸங்க²தோ படிச்சஸமுப்பன்னோ. ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவங் கோ², பி⁴க்க²வே, ஜானதோ ஏவங் பஸ்ஸதோ அனந்தரா ஆஸவானங் க²யோ ஹோதீ’’தி. நவமங்.
‘‘Na heva kho rūpaṃ attato samanupassati, na vedanaṃ… na saññaṃ… na saṅkhāre… na viññāṇaṃ attato samanupassati…pe… na viññāṇasmiṃ attato samanupassati, nāpi evaṃdiṭṭhi hoti – ‘so attā so loko, so pecca bhavissāmi nicco dhuvo sassato avipariṇāmadhammo’ti; nāpi evaṃdiṭṭhi hoti – ‘no cassaṃ no ca me siyā nābhavissaṃ na me bhavissatī’ti; api ca kho kaṅkhī hoti vicikicchī aniṭṭhaṅgato saddhamme. Yā kho pana sā, bhikkhave, kaṅkhitā vicikicchitā aniṭṭhaṅgatatā saddhamme saṅkhāro so. So pana saṅkhāro kiṃnidāno kiṃsamudayo kiṃjātiko kiṃpabhavo? Avijjāsamphassajena, bhikkhave, vedayitena phuṭṭhassa assutavato puthujjanassa uppannā taṇhā; tatojo so saṅkhāro. Iti kho, bhikkhave, sopi saṅkhāro anicco saṅkhato paṭiccasamuppanno. Sāpi taṇhā aniccā saṅkhatā paṭiccasamuppannā. Sāpi vedanā aniccā saṅkhatā paṭiccasamuppannā. Sopi phasso anicco saṅkhato paṭiccasamuppanno. Sāpi avijjā aniccā saṅkhatā paṭiccasamuppannā. Evaṃ kho, bhikkhave, jānato evaṃ passato anantarā āsavānaṃ khayo hotī’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. பாலிலெய்யஸுத்தவண்ணனா • 9. Pālileyyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. பாலிலெய்யஸுத்தவண்ணனா • 9. Pālileyyasuttavaṇṇanā
