| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. পালিলেয্যসুত্তৰণ্ণনা
9. Pālileyyasuttavaṇṇanā
৮১. পরিযাদিণ্ণরূপচিত্তাতি রাগাদীহি পরিযাদিযিত্ৰা খেপেত্ৰা গহিতচিত্তা।
81.Pariyādiṇṇarūpacittāti rāgādīhi pariyādiyitvā khepetvā gahitacittā.
ভগৰতো চারো ৰিদিতো পরিচযৰসেন। সত্থা পরিভোগং করোতি অনুগ্গণ্হন্তো ‘‘এৰং হিস্স দুগ্গতিমোক্খো ভৰিস্সতী’’তি। অঞ্ঞত্রাতি ৰিনা।
Bhagavato cāro vidito paricayavasena. Satthā paribhogaṃ karoti anuggaṇhanto ‘‘evaṃ hissa duggatimokkho bhavissatī’’ti. Aññatrāti vinā.
নাগেনাতি বুদ্ধনাগেন অঙ্কুসরহিতেন। ততো এৰ উজুভূতেন চিত্তেন। ঈসাদন্তস্স নঙ্গলসদিসদন্তস্স হত্থিনো এৰং চিত্তং সমেতি। তত্থ কারণমাহ ‘‘যদেকো রমতী ৰনে’’তি। এতেন কাযৰিৰেকেন রতিসামঞ্ঞং ৰদতি।
Nāgenāti buddhanāgena aṅkusarahitena. Tato eva ujubhūtena cittena. Īsādantassa naṅgalasadisadantassa hatthino evaṃ cittaṃ sameti. Tattha kāraṇamāha ‘‘yadeko ramatī vane’’ti. Etena kāyavivekena ratisāmaññaṃ vadati.
অত্তনো ধম্মতাযাতি পকতিযা সযমেৰ।
Attano dhammatāyāti pakatiyā sayameva.
আসৰানং খযোতি ইধ অরহত্তং অধিপ্পেতং, তং পন অগ্গমগ্গানন্তরমেৰাতি আহ ‘‘মগ্গানন্তরং অরহত্তফল’’ন্তি। ৰিচযো দেসনাপঞ্ঞা অধিপ্পেতা, সা চ অনেকধা পৰত্তা এৰাতি ৰুত্তং ‘‘ৰিচযসো’’তি, অনেকক্খত্তুং পৰত্তমানাপি ৰিচযো এৰাতি কত্ৰা ‘‘ৰিচযেনা’’তি অত্থো ৰুত্তো। সাসনধম্মোতি সীলক্খন্ধাদিপরিদীপনো পরিযত্তিধম্মো। পরিৰিতক্কো উদপাদি ‘‘চত্তারো সতিপট্ঠানা’’তিআদিনা, এৰং কোট্ঠাসতো পরিচ্ছিজ্জ দেসিতে মযা ধম্মে কতমস্স জাননস্স অন্তরা আসৰানং খযো হোতীতি একচ্চস্স কঙ্খা হোতিযেৰাতি অধিপ্পাযো। দিট্ঠি এৰ সমনুপস্সনা দিট্ঠিসমনুপস্সনা। দিট্ঠিসঙ্খারোতি দিট্ঠিপচ্চযো সঙ্খারো। ততো এৰ তণ্হাপচ্চযো হোতীতি ৰুত্তং ‘‘ততোজো সো সঙ্খারো’’তি। ততো তণ্হাতো সো সঙ্খারো জাতোতি চতূসু এস দিট্ঠিসঙ্খারো দিট্ঠূপনিস্সযো সঙ্খারো জাযতি। অৰিজ্জাসম্ফস্সোতি অৰিজ্জাসম্পযুত্তসম্ফস্সো। এৰমেত্থ ভগৰা সল়াযতননামরূপৰিঞ্ঞাণানি সঙ্খারপক্খিকানেৰ কত্ৰা দস্সেতি।
Āsavānaṃ khayoti idha arahattaṃ adhippetaṃ, taṃ pana aggamaggānantaramevāti āha ‘‘maggānantaraṃ arahattaphala’’nti. Vicayo desanāpaññā adhippetā, sā ca anekadhā pavattā evāti vuttaṃ ‘‘vicayaso’’ti, anekakkhattuṃ pavattamānāpi vicayo evāti katvā ‘‘vicayenā’’ti attho vutto. Sāsanadhammoti sīlakkhandhādiparidīpano pariyattidhammo. Parivitakko udapādi ‘‘cattāro satipaṭṭhānā’’tiādinā, evaṃ koṭṭhāsato paricchijja desite mayā dhamme katamassa jānanassa antarā āsavānaṃ khayo hotīti ekaccassa kaṅkhā hotiyevāti adhippāyo. Diṭṭhi eva samanupassanā diṭṭhisamanupassanā. Diṭṭhisaṅkhāroti diṭṭhipaccayo saṅkhāro. Tato eva taṇhāpaccayo hotīti vuttaṃ ‘‘tatojo so saṅkhāro’’ti. Tato taṇhāto so saṅkhāro jātoti catūsu esa diṭṭhisaṅkhāro diṭṭhūpanissayo saṅkhāro jāyati. Avijjāsamphassoti avijjāsampayuttasamphasso. Evamettha bhagavā saḷāyatananāmarūpaviññāṇāni saṅkhārapakkhikāneva katvā dasseti.
এত্তকে ঠানেতি ‘‘ইধ ভিক্খৰে অস্সুতৰা পুথুজ্জনো’’তিআদিং কত্ৰা যাৰ ‘‘ন মে ভৰিস্সতী’’তি এত্তকে ঠানে। গহিতগহিতদিট্ঠিন্তি সক্কাযদিট্ঠিযা ‘‘সো অত্তা, সো লোকো’’তিআদিনা পৰত্তং সস্সতদিট্ঠিং, নো চস্সং, নো চ মে সিযা’’তিআদিনা পৰত্তং উচ্ছেদদিট্ঠিন্তি তথা তথা গহিতদিট্ঠিং। ‘‘ইতি খো, ভিক্খৰে, সোপি সঙ্খারো অনিচ্চো’’তিআদিদেসনায ৰিস্সজ্জাপেন্তো আগতো। তত্থ তত্থেৰাস্স উপ্পন্নদিট্ঠিৰিৰেচনতো ইমিস্সা দেসনায পুগ্গলজ্ঝাসযেন পৰত্তিততা ৰেদিতব্বা, তেৰীসতিযা ঠানেসু অরহত্তপাপনেন দেসনাৰিলাসো। ততোজো সো সঙ্খারোতি ততো ৰিচিকিচ্ছায পচ্চযভূততণ্হাতো জাতো ৰিচিকিচ্ছায সম্পযুত্তো সঙ্খারো। যদি সহজাতাদিপচ্চযৰসেন ততো তণ্হাতো জাতোতি ততোজো সঙ্খারোতি ৰুচ্চেয্য, ইদমযুত্তন্তি দস্সেন্তো ‘‘তণ্হাসম্পযুত্ত…পে॰… জাযতী’’তি চোদেতি। ইতরো উপনিস্সযকোটি ইধাধিপ্পেতাতি দস্সেন্তো ‘‘অপ্পহীনত্তা’’তি ৰত্ৰা ‘‘যস্স হী’’তিআদিনা তমত্থং ৰিৰরতি। ন হি তণ্হায ৰিচিকিচ্ছা সম্ভৰতি। যদি অসতি সহজাতকোটিযা উপনিস্সযকোটিযা তণ্হাপচ্চযা ৰিচিকিচ্ছায সম্ভৰো এৰ। দিট্ঠিযাপীতি দ্ৰাসট্ঠিদিট্ঠিযাপি। তেনাহ ‘‘চতূসু হী’’তিআদি। ৰীসতি সক্কাযদিট্ঠিযো সস্সতদিট্ঠিং উচ্ছেদদিট্ঠিং ৰিচিকিচ্ছঞ্চ পক্খিপিত্ৰা পচ্চেকং অনিচ্চতামুখেন ৰিপস্সনং দস্সেত্ৰা অরহত্তং পাপেত্ৰা দেসনা নিট্ঠাপিতাতি আহ ‘‘তেৰীসতিযা ঠানেসূ’’তিআদি।
Ettake ṭhāneti ‘‘idha bhikkhave assutavā puthujjano’’tiādiṃ katvā yāva ‘‘na me bhavissatī’’ti ettake ṭhāne. Gahitagahitadiṭṭhinti sakkāyadiṭṭhiyā ‘‘so attā, so loko’’tiādinā pavattaṃ sassatadiṭṭhiṃ, no cassaṃ, no ca me siyā’’tiādinā pavattaṃ ucchedadiṭṭhinti tathā tathā gahitadiṭṭhiṃ. ‘‘Iti kho, bhikkhave, sopi saṅkhāro anicco’’tiādidesanāya vissajjāpento āgato. Tattha tatthevāssa uppannadiṭṭhivivecanato imissā desanāya puggalajjhāsayena pavattitatā veditabbā, tevīsatiyā ṭhānesu arahattapāpanena desanāvilāso. Tatojo so saṅkhāroti tato vicikicchāya paccayabhūtataṇhāto jāto vicikicchāya sampayutto saṅkhāro. Yadi sahajātādipaccayavasena tato taṇhāto jātoti tatojo saṅkhāroti vucceyya, idamayuttanti dassento ‘‘taṇhāsampayutta…pe… jāyatī’’ti codeti. Itaro upanissayakoṭi idhādhippetāti dassento ‘‘appahīnattā’’ti vatvā ‘‘yassa hī’’tiādinā tamatthaṃ vivarati. Na hi taṇhāya vicikicchā sambhavati. Yadi asati sahajātakoṭiyā upanissayakoṭiyā taṇhāpaccayā vicikicchāya sambhavo eva. Diṭṭhiyāpīti dvāsaṭṭhidiṭṭhiyāpi. Tenāha ‘‘catūsu hī’’tiādi. Vīsati sakkāyadiṭṭhiyo sassatadiṭṭhiṃ ucchedadiṭṭhiṃ vicikicchañca pakkhipitvā paccekaṃ aniccatāmukhena vipassanaṃ dassetvā arahattaṃ pāpetvā desanā niṭṭhāpitāti āha ‘‘tevīsatiyā ṭhānesū’’tiādi.
পালিলেয্যসুত্তৰণ্ণনা নিট্ঠিতা।
Pālileyyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. পালিলেয্যসুত্তং • 9. Pālileyyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. পালিলেয্যসুত্তৰণ্ণনা • 9. Pālileyyasuttavaṇṇanā
