| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பாளிமுத்தகவினிச்ச²யவண்ணனா
Pāḷimuttakavinicchayavaṇṇanā
பாளிமுத்தகவினிச்ச²யேஸு தஞ்ச கோ²…பே॰… ந வண்ணமட்ட²த்தா²யாதி இத³ங் ச²த்தத³ண்ட³க்³கா³ஹகஸலாகபஞ்ஜரவினந்த⁴னங் ஸந்தா⁴யாதி வத³ந்தி. ஸப்³ப³த்தா²தி ச²த்தத³ண்டே³ ஸப்³ப³த்த². ஆரக்³கே³னாதி நிகா²த³னமுகே²ன. க⁴டகம்பி வாளரூபம்பி பி⁴ந்தி³த்வா தா⁴ரேதப்³ப³ந்தி ஸசே தாதி³ஸங் அகப்பியச²த்தங் லப⁴தி, க⁴டகம்பி வாளரூபம்பி பி⁴ந்தி³த்வா தச்செ²த்வா தா⁴ரேதப்³ப³ங். ஸுத்தகேன வா த³ண்டோ³ வேடே²தப்³போ³தி யதா² ச²த்தத³ண்டே³ லேகா² ந பஞ்ஞாயதி, ததா² வேடே²தப்³போ³. த³ண்ட³பு³ந்தே³தி த³ண்ட³மூலே, ச²த்தத³ண்ட³ஸ்ஸ ஹெட்டி²மதலேதி அத்தோ². ச²த்தமண்ட³லிகந்தி ச²த்தஸ்ஸ அந்தோ கு²த்³த³கமண்ட³லங். உக்கிரித்வாதி உட்ட²பெத்வா. ஸா வட்டதீதி யதி³பி ரஜ்ஜுகேஹி ந ப³ந்த⁴ந்தி, ப³ந்தி⁴துங் பன யுத்தட்டா²னத்தா வட்டதி.
Pāḷimuttakavinicchayesu tañca kho…pe… na vaṇṇamaṭṭhatthāyāti idaṃ chattadaṇḍaggāhakasalākapañjaravinandhanaṃ sandhāyāti vadanti. Sabbatthāti chattadaṇḍe sabbattha. Āraggenāti nikhādanamukhena. Ghaṭakampi vāḷarūpampi bhinditvā dhāretabbanti sace tādisaṃ akappiyachattaṃ labhati, ghaṭakampi vāḷarūpampi bhinditvā tacchetvā dhāretabbaṃ. Suttakena vā daṇḍo veṭhetabboti yathā chattadaṇḍe lekhā na paññāyati, tathā veṭhetabbo. Daṇḍabundeti daṇḍamūle, chattadaṇḍassa heṭṭhimataleti attho. Chattamaṇḍalikanti chattassa anto khuddakamaṇḍalaṃ. Ukkiritvāti uṭṭhapetvā. Sā vaṭṭatīti yadipi rajjukehi na bandhanti, bandhituṃ pana yuttaṭṭhānattā vaṭṭati.
நானாஸுத்தகேஹீதி நானாவண்ணேஹி ஸுத்தேஹி. இத³ஞ்ச ததா² கரொந்தானங் கரணப்பகாரத³ஸ்ஸனத்த²ங் வுத்தங், ஏகவண்ணஸுத்தகேனபி வுத்தப்பகாரேன ஸிப்³பி³துங் ந வட்டதியேவ. பட்டமுகே²தி பட்டகோடியங். த்³வின்னங் பட்டானங் ஸங்க⁴ட்டிதட்டா²னங் ஸந்தா⁴யேதங் வுத்தங். பரியந்தேதி சீவரபரியந்தே. சீவரஅனுவாதங் ஸந்தா⁴யேதங் வுத்தங். வேணிந்தி வரகஸீஸாகாரேன ஸிப்³ப³னங். ஸங்க²லிகந்தி பி³ளாலப³ந்த⁴னாகாரேன ஸிப்³ப³னங். ‘‘வேணிங் ஸங்க²லிக’’ந்தி செத்த² உபயோக³வசனங் ‘‘கரொந்தீ’’தி கரணகிரியாபெக்க²ங். அக்³கி⁴யக³யமுக்³க³ராதீ³னீதி எத்த² அக்³கி⁴யங் நாம சேதியஸண்டா²னேன ஸிப்³ப³னங், மூலே தனுகங் அக்³கே³ மஹந்தங் கத்வா க³தா³காரேன ஸிப்³ப³னங் க³யா, மூலே ச அக்³கே³ ச ஏகஸதி³ஸங் கத்வா முக்³க³ராகாரேன ஸிப்³ப³னங் முக்³க³ரோ. கக்கடக்கீ²னி உக்கிரந்தீதி க³ண்டி²கபட்டபாஸகபட்டானங் அந்தே பாளிப³த்³த⁴ங் கத்வா கக்கடகானங் அக்கி²ஸண்டா²னங் உட்ட²பெந்தி, கரொந்தீதி அத்தோ². ‘‘கோணஸுத்தபிளகாதி க³ண்டி²கபாஸகபட்டானங் கோணேஹி நீஹடஸுத்தானங் கோடியோ’’தி தீஸுபி க³ண்டி²பதே³ஸு வுத்தங். கத²ங் பன தா பிளகா து³விஞ்ஞெய்யரூபா காதப்³பா³தி? கோணேஹி நீஹடஸுத்தானங் அந்தேஸு ஏகவாரங் க³ண்டி²ககரணேன வா புன நிவத்தெத்வா ஸிப்³ப³னேன வா து³விஞ்ஞெய்யஸபா⁴வங் கத்வா ஸுத்தகோடியோ ரஸ்ஸங் கத்வா சி²ந்தி³தப்³பா³. த⁴ம்மஸிரித்தே²ரேன பன –
Nānāsuttakehīti nānāvaṇṇehi suttehi. Idañca tathā karontānaṃ karaṇappakāradassanatthaṃ vuttaṃ, ekavaṇṇasuttakenapi vuttappakārena sibbituṃ na vaṭṭatiyeva. Paṭṭamukheti paṭṭakoṭiyaṃ. Dvinnaṃ paṭṭānaṃ saṅghaṭṭitaṭṭhānaṃ sandhāyetaṃ vuttaṃ. Pariyanteti cīvarapariyante. Cīvaraanuvātaṃ sandhāyetaṃ vuttaṃ. Veṇinti varakasīsākārena sibbanaṃ. Saṅkhalikanti biḷālabandhanākārena sibbanaṃ. ‘‘Veṇiṃ saṅkhalika’’nti cettha upayogavacanaṃ ‘‘karontī’’ti karaṇakiriyāpekkhaṃ. Agghiyagayamuggarādīnīti ettha agghiyaṃ nāma cetiyasaṇṭhānena sibbanaṃ, mūle tanukaṃ agge mahantaṃ katvā gadākārena sibbanaṃ gayā, mūle ca agge ca ekasadisaṃ katvā muggarākārena sibbanaṃ muggaro. Kakkaṭakkhīni ukkirantīti gaṇṭhikapaṭṭapāsakapaṭṭānaṃ ante pāḷibaddhaṃ katvā kakkaṭakānaṃ akkhisaṇṭhānaṃ uṭṭhapenti, karontīti attho. ‘‘Koṇasuttapiḷakāti gaṇṭhikapāsakapaṭṭānaṃ koṇehi nīhaṭasuttānaṃ koṭiyo’’ti tīsupi gaṇṭhipadesu vuttaṃ. Kathaṃ pana tā piḷakā duviññeyyarūpā kātabbāti? Koṇehi nīhaṭasuttānaṃ antesu ekavāraṃ gaṇṭhikakaraṇena vā puna nivattetvā sibbanena vā duviññeyyasabhāvaṃ katvā suttakoṭiyo rassaṃ katvā chinditabbā. Dhammasirittherena pana –
‘‘கோணஸுத்தா ச பிளகா, து³விஞ்ஞெய்யாவ கப்பரே’’தி –
‘‘Koṇasuttā ca piḷakā, duviññeyyāva kappare’’ti –
வுத்தங். ததா² ஆசரியபு³த்³த⁴த³த்தத்தே²ரேனபி –
Vuttaṃ. Tathā ācariyabuddhadattattherenapi –
‘‘ஸுத்தா ச பிளகா தத்த², து³விஞ்ஞெய்யாவ தீ³பிதா’’தி –
‘‘Suttā ca piḷakā tattha, duviññeyyāva dīpitā’’ti –
வுத்தங் . தஸ்மா தேஸங் மதேன கோணஸுத்தா ச பிளகா ச கோணஸுத்தபிளகாதி ஏவமெத்த² அத்தோ² த³ட்ட²ப்³போ³.
Vuttaṃ . Tasmā tesaṃ matena koṇasuttā ca piḷakā ca koṇasuttapiḷakāti evamettha attho daṭṭhabbo.
மணினாதி மஸாரக³ல்லாதி³பாஸாணேன. ந க⁴ட்டேதப்³ப³ந்தி ந க⁴ங்ஸிதப்³ப³ங், அங்ஸப³த்³த⁴ககாயப³ந்த⁴னானி பன ஸங்கா²தீ³ஹி க⁴ங்ஸிதுங் வட்டதி. பாஸகங் கத்வா ப³ந்தி⁴தப்³ப³ந்தி ரஜனகாலே ப³ந்தி⁴தப்³ப³ங், ஸேஸகாலே மோசெத்வா ட²பேதப்³ப³ங். க³ண்டி²கேதி த³ந்தமயாதி³க³ண்டி²கே. பிளகாதி பி³ந்து³ங் பி³ந்து³ங் கத்வா உட்டா²பேதப்³ப³பிளகா.
Maṇināti masāragallādipāsāṇena. Na ghaṭṭetabbanti na ghaṃsitabbaṃ, aṃsabaddhakakāyabandhanāni pana saṅkhādīhi ghaṃsituṃ vaṭṭati. Pāsakaṃ katvā bandhitabbanti rajanakāle bandhitabbaṃ, sesakāle mocetvā ṭhapetabbaṃ. Gaṇṭhiketi dantamayādigaṇṭhike. Piḷakāti binduṃ binduṃ katvā uṭṭhāpetabbapiḷakā.
‘‘தேலவண்ணோதி ஸமணஸாருப்பவண்ணங் ஸந்தா⁴ய வுத்தங், மணிவண்ணங் பன பத்தங் அஞ்ஞேன கதங் லபி⁴த்வா பரிபு⁴ஞ்ஜிதுங் வட்டதீ’’தி வத³ந்தி. பத்தமண்ட³லேதி திபுஸீஸாதி³மயே பத்தமண்ட³லே. ‘‘ந, பி⁴க்க²வே, சித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி (சூளவ॰ 253) வுத்தத்தா ‘‘பி⁴த்திகம்மங் ந வட்டதீ’’தி வுத்தங். ‘‘அனுஜானாமி, பி⁴க்க²வே, மகரத³ந்தகங் சி²ந்தி³து’’ந்தி வசனதோ ‘‘மகரத³ந்தகங் பன வட்டதீ’’தி வுத்தங்.
‘‘Telavaṇṇoti samaṇasāruppavaṇṇaṃ sandhāya vuttaṃ, maṇivaṇṇaṃ pana pattaṃ aññena kataṃ labhitvā paribhuñjituṃ vaṭṭatī’’ti vadanti. Pattamaṇḍaleti tipusīsādimaye pattamaṇḍale. ‘‘Na, bhikkhave, citrāni pattamaṇḍalāni dhāretabbāni rūpakākiṇṇāni bhittikammakatānī’’ti (cūḷava. 253) vuttattā ‘‘bhittikammaṃ na vaṭṭatī’’ti vuttaṃ. ‘‘Anujānāmi, bhikkhave, makaradantakaṃ chinditu’’nti vacanato ‘‘makaradantakaṃ pana vaṭṭatī’’ti vuttaṃ.
மகரமுக²ந்தி மகரமுக²ஸண்டா²னங். தெ³ட்³டு⁴ப⁴ஸீஸந்தி உத³கஸப்பஸீஸஸண்டா²னங். அச்சீ²னீதி குஞ்ஜரச்சி²ஸண்டா²னானி. ரஜ்ஜுககாயப³ந்த⁴னங் ஏகமேவ வட்டதீதி ரஜ்ஜுகங் ப³ந்த⁴ந்தேன ஏககு³ணமேவ கத்வா ப³ந்தி⁴துங் வட்டதி, மஜ்ஜே² பி⁴ந்தி³த்வா தி³கு³ணங் கத்வா ப³ந்தி⁴துங் ந வட்டதி, தி³கு³ணங் பன அகத்வா ஏகரஜ்ஜுகமேவ ஸதவாரம்பி புனப்புனங் ஆவிஜ்ஜித்வா ப³ந்தி⁴துங் வட்டதி. ஏகம்பி ந வட்டதீதி ஏககு³ணம்பி கத்வா ப³ந்தி⁴துங் ந வட்டதி. ப³ஹுரஜ்ஜுகே…பே॰.. வட்டதீதி இத³ங் காயப³ந்த⁴னங் ஸந்தா⁴ய வுத்தங், ந த³ஸா ஸந்தா⁴ய. ஈதி³ஸஞ்ஹி காயப³ந்த⁴னங் ப³ந்தி⁴துங் வட்டதி. தேனேவ ஆசரியபு³த்³த⁴த³த்தத்தே²ரேன வுத்தங் –
Makaramukhanti makaramukhasaṇṭhānaṃ. Deḍḍhubhasīsanti udakasappasīsasaṇṭhānaṃ. Acchīnīti kuñjaracchisaṇṭhānāni. Rajjukakāyabandhanaṃ ekameva vaṭṭatīti rajjukaṃ bandhantena ekaguṇameva katvā bandhituṃ vaṭṭati, majjhe bhinditvā diguṇaṃ katvā bandhituṃ na vaṭṭati, diguṇaṃ pana akatvā ekarajjukameva satavārampi punappunaṃ āvijjitvā bandhituṃ vaṭṭati. Ekampi na vaṭṭatīti ekaguṇampi katvā bandhituṃ na vaṭṭati. Bahurajjuke…pe... vaṭṭatīti idaṃ kāyabandhanaṃ sandhāya vuttaṃ, na dasā sandhāya. Īdisañhi kāyabandhanaṃ bandhituṃ vaṭṭati. Teneva ācariyabuddhadattattherena vuttaṃ –
‘‘ஏகரஜ்ஜுமயங் வுத்தங், முனினா காயப³ந்த⁴னங்;
‘‘Ekarajjumayaṃ vuttaṃ, muninā kāyabandhanaṃ;
பஞ்சபாமங்க³ஸண்டா²னங், ஏகம்பி ச ந வட்டதி.
Pañcapāmaṅgasaṇṭhānaṃ, ekampi ca na vaṭṭati.
‘‘ரஜ்ஜுகே ஏகதோ கத்வா, ப³ஹூ ஏகாய ரஜ்ஜுயா;
‘‘Rajjuke ekato katvā, bahū ekāya rajjuyā;
நிரந்தரஞ்ஹி வேடெ²த்வா, கதங் வட்டதி ப³ந்தி⁴து’’ந்தி.
Nirantarañhi veṭhetvā, kataṃ vaṭṭati bandhitu’’nti.
முரஜங் பன காயப³ந்த⁴னங் ந வட்டதி ‘‘ந, பி⁴க்க²வே, உச்சாவசானி காயப³ந்த⁴னானி தா⁴ரேதப்³பா³னி கலாபு³கங் தெ³ட்³டு⁴ப⁴கங் முரஜங் மத்³த³வீணங், யோ தா⁴ரெய்ய, ஆபத்தி து³க்கடஸ்ஸா’’தி (சூளவ॰ 278) வுத்தத்தா. கிங் பன ப³ஹுரஜ்ஜுகே ஏகதோ கத்வா ஏகேன நிரந்தரங் வேடெ²த்வா கதங் முரஜஸங்க்²யங் ந க³ச்ச²தீதி? ஆம ந க³ச்ச²தி. முரஜஞ்ஹி நாம நானாவண்ணேஹி ஸுத்தேஹி முரஜவட்டிஸண்டா²னங் வேடெ²த்வா கதங். கேசி பன ‘‘முரஜந்தி ப³ஹுரஜ்ஜுகே ஏகதோ ஸங்கட்³டி⁴த்வா ஏகாய ரஜ்ஜுயா பலிவேடெ²த்வா கதரஜ்ஜூ’’தி வத³ந்தி, தங் ந க³ஹேதப்³ப³ங். யதி³ சேதங் முரஜங் ஸியா, ‘‘ப³ஹுரஜ்ஜுகே ஏகதோ கத்வா ஏகேன நிரந்தரங் வேடெ²த்வா கதங் ப³ஹுரஜ்ஜுக’’ந்தி ந வத்தப்³ப³ங், ‘‘தங் வட்டதீ’’தி இத³ங் விருஜ்ஜெ²ய்ய. முரஜங் பன பாமங்க³ஸண்டா²னஞ்ச த³ஸாஸு வட்டதி ‘‘காயப³ந்த⁴னஸ்ஸ த³ஸா ஜீரந்தி. அனுஜானாமி, பி⁴க்க²வே, முரஜங் மத்³த³வீண’’ந்தி (சூளவ॰ 278) வுத்தத்தா. தேனேவ வக்க²தி ‘‘அனுஜானாமி, பி⁴க்க²வே, முரஜங் மத்³த³வீணந்தி இத³ங் த³ஸாஸுயேவ அனுஞ்ஞாத’’ந்தி.
Murajaṃ pana kāyabandhanaṃ na vaṭṭati ‘‘na, bhikkhave, uccāvacāni kāyabandhanāni dhāretabbāni kalābukaṃ deḍḍhubhakaṃ murajaṃ maddavīṇaṃ, yo dhāreyya, āpatti dukkaṭassā’’ti (cūḷava. 278) vuttattā. Kiṃ pana bahurajjuke ekato katvā ekena nirantaraṃ veṭhetvā kataṃ murajasaṅkhyaṃ na gacchatīti? Āma na gacchati. Murajañhi nāma nānāvaṇṇehi suttehi murajavaṭṭisaṇṭhānaṃ veṭhetvā kataṃ. Keci pana ‘‘murajanti bahurajjuke ekato saṅkaḍḍhitvā ekāya rajjuyā paliveṭhetvā katarajjū’’ti vadanti, taṃ na gahetabbaṃ. Yadi cetaṃ murajaṃ siyā, ‘‘bahurajjuke ekato katvā ekena nirantaraṃ veṭhetvā kataṃ bahurajjuka’’nti na vattabbaṃ, ‘‘taṃ vaṭṭatī’’ti idaṃ virujjheyya. Murajaṃ pana pāmaṅgasaṇṭhānañca dasāsu vaṭṭati ‘‘kāyabandhanassa dasā jīranti. Anujānāmi, bhikkhave, murajaṃ maddavīṇa’’nti (cūḷava. 278) vuttattā. Teneva vakkhati ‘‘anujānāmi, bhikkhave, murajaṃ maddavīṇanti idaṃ dasāsuyeva anuññāta’’nti.
காயப³ந்த⁴னவிதே⁴தி ‘‘காயப³ந்த⁴னஸ்ஸ பவனந்தோ ஜீரதி. அனுஜானாமி, பி⁴க்க²வே, வித⁴’’ந்தி வுத்தத்தா காயப³ந்த⁴னஸ்ஸ பாஸந்தே த³ஸாமூலே தஸ்ஸ தி²ரபா⁴வத்த²ங் கத்தப்³பே³ த³ந்தவிஸாணாதி³மயே விதே⁴. ‘‘அட்ட² மங்க³லானி நாம ஸங்கோ² சக்கங் புண்ணகும்போ⁴ க³யா ஸிரீவச்சோ² அங்குஸோ த⁴ஜங் ஸோவத்தி²க’’ந்தி வத³ந்தி. பரிச்சே²த³லேகா²மத்தந்தி உபோ⁴ஸு கோடீஸு காதப்³ப³பரிச்சே²த³ராஜிமத்தங். ‘‘உஜுகமேவா’’தி வுத்தத்தா சதுரஸ்ஸாதி³வங்கக³திகங் ந வட்டதி. ‘‘ச²த்தத³ண்ட³த⁴ம்மகரணஅஞ்ஜனநாளிகா நானாவண்ணலேகா²பஅகம்மகதா ந வட்டந்தீ’’தி வத³ந்தி.
Kāyabandhanavidheti ‘‘kāyabandhanassa pavananto jīrati. Anujānāmi, bhikkhave, vidha’’nti vuttattā kāyabandhanassa pāsante dasāmūle tassa thirabhāvatthaṃ kattabbe dantavisāṇādimaye vidhe. ‘‘Aṭṭha maṅgalāni nāma saṅkho cakkaṃ puṇṇakumbho gayā sirīvaccho aṅkuso dhajaṃ sovatthika’’nti vadanti. Paricchedalekhāmattanti ubhosu koṭīsu kātabbaparicchedarājimattaṃ. ‘‘Ujukamevā’’ti vuttattā caturassādivaṅkagatikaṃ na vaṭṭati. ‘‘Chattadaṇḍadhammakaraṇaañjananāḷikā nānāvaṇṇalekhāpaakammakatā na vaṭṭantī’’ti vadanti.
ஆரகண்டகேதி பொத்த²காதி³அபி⁴ஸங்க²ரணத்த²ங் கதே தீ³க⁴முக²ஸத்த²கே. வட்டமணிகந்தி வட்டங் கத்வா அக்³க³கோடியங் உட்டா²பேதப்³ப³புப்³பு³ளங். அஞ்ஞங் வா வண்ணமட்ட²ந்தி இமினா பிளகாதி³ங் ஸங்க³ண்ஹாதி. மணிகந்தி ஏகாவட்டமணி. பிளகந்தி ஸாஸபமத்திகா முத்தராஜிஸதி³ஸா ப³ஹுவட்டலேகா². ‘‘இமஸ்மிங் அதி⁴காரே அவுத்தத்தா லேக²னியங் யங் கிஞ்சி வண்ணமட்ட²ங் வட்டதீ’’தி வத³ந்தி. வலிதகந்தி மஜ்ஜே² வலிங் உட்டா²பெத்வா. மண்ட³லங் ஹோதீதி உத்தராரணியா பவேஸனத்த²ங் ஆஹடமண்ட³லங் ஹோதி.
Ārakaṇṭaketi potthakādiabhisaṅkharaṇatthaṃ kate dīghamukhasatthake. Vaṭṭamaṇikanti vaṭṭaṃ katvā aggakoṭiyaṃ uṭṭhāpetabbapubbuḷaṃ. Aññaṃ vā vaṇṇamaṭṭhanti iminā piḷakādiṃ saṅgaṇhāti. Maṇikanti ekāvaṭṭamaṇi. Piḷakanti sāsapamattikā muttarājisadisā bahuvaṭṭalekhā. ‘‘Imasmiṃ adhikāre avuttattā lekhaniyaṃ yaṃ kiñci vaṇṇamaṭṭhaṃ vaṭṭatī’’ti vadanti. Valitakanti majjhe valiṃ uṭṭhāpetvā. Maṇḍalaṃ hotīti uttarāraṇiyā pavesanatthaṃ āhaṭamaṇḍalaṃ hoti.
கிஞ்சாபி எத்த² த³ந்தகட்ட²ச்சே²த³னவாஸியேவ வுத்தா, மஹாவாஸியம்பி பன ந வட்டதியேவ. உஜுகமேவ ப³ந்தி⁴துந்தி ஸம்ப³ந்தோ⁴. ‘‘உபோ⁴ஸு வா பஸ்ஸேஸு ஏகபஸ்ஸேவா’’தி வசனஸேஸோ. கத்தரயட்டி²கோடியங் கதஅயோவலயானிபி வட்டந்தி, யேஸங் அஞ்ஞமஞ்ஞஸங்க⁴ட்டனேன ஸத்³தோ³ நிச்ச²ரதி.
Kiñcāpi ettha dantakaṭṭhacchedanavāsiyeva vuttā, mahāvāsiyampi pana na vaṭṭatiyeva. Ujukameva bandhitunti sambandho. ‘‘Ubhosu vā passesu ekapassevā’’ti vacanaseso. Kattarayaṭṭhikoṭiyaṃ kataayovalayānipi vaṭṭanti, yesaṃ aññamaññasaṅghaṭṭanena saddo niccharati.
ஆமண்ட³ஸாரகேதி ஆமலகேஹி கதபா⁴ஜனே. பூ⁴மத்த²ரணேதி சித்தகடஸாரகசித்தத்த²ரணாதி³கே பரிகம்மகதாய பூ⁴மியா அத்த²ரிதப்³ப³அத்த²ரணே. பானீயக⁴டேதி இமினா குண்டி³கஸரகேபி ஸங்க³ண்ஹாதி. பீ³ஜனேதி சதுரஸ்ஸபீ³ஜனே. ஸப்³ப³ங்…பே॰… வட்டதீதி யதா²வுத்தேஸு மஞ்சபீடா²தீ³ஸு இத்தி²ரூபங் வினா ஸப்³ப³ங் மாலாகம்மலதாகம்மாதி³ வண்ணமட்ட²ங் பி⁴க்கு²னோ வட்டதி. ஸேனாஸனே கிஞ்சி படிஸேதே⁴தப்³ப³ங் நத்தி² அஞ்ஞத்ர விருத்³த⁴ஸேனாஸனாதி எத்தா²யமதி⁴ப்பாயோ – ஸேனாஸனபரிக்கா²ரேஸு படிஸேதே⁴தப்³ப³ங் நாம கிஞ்சி நத்தி², விருத்³த⁴ஸேனாஸனங் பன ஸயமேவ படிக்கி²பிதப்³ப³ந்தி. அஞ்ஞேஸந்தி ஸீமஸாமினோ வுத்தா. ராஜவல்லபா⁴ பரனிகாயிகாபி ஏகனிகாயிகாபி உபோஸத²பவாரணானங் அந்தராயகரா அலஜ்ஜினோ ராஜகுலூபகா³ வுச்சந்தி. தேஸங் லஜ்ஜிபரிஸாதி தேஸங் ஸீமஸாமிகானங் பக்கா² ஹுத்வா அனுப³லங் தா³துங் ஸமத்தா² லஜ்ஜிபரிஸா. ஸுகதமேவாதி அஞ்ஞேஸங் ஸந்தகேபி அத்தனோ ஸீமாய அந்தோவுத்தவிதி⁴னா கதங் ஸுகதமேவ.
Āmaṇḍasāraketi āmalakehi katabhājane. Bhūmattharaṇeti cittakaṭasārakacittattharaṇādike parikammakatāya bhūmiyā attharitabbaattharaṇe. Pānīyaghaṭeti iminā kuṇḍikasarakepi saṅgaṇhāti. Bījaneti caturassabījane. Sabbaṃ…pe… vaṭṭatīti yathāvuttesu mañcapīṭhādīsu itthirūpaṃ vinā sabbaṃ mālākammalatākammādi vaṇṇamaṭṭhaṃ bhikkhuno vaṭṭati. Senāsane kiñci paṭisedhetabbaṃ natthi aññatra viruddhasenāsanāti etthāyamadhippāyo – senāsanaparikkhāresu paṭisedhetabbaṃ nāma kiñci natthi, viruddhasenāsanaṃ pana sayameva paṭikkhipitabbanti. Aññesanti sīmasāmino vuttā. Rājavallabhā paranikāyikāpi ekanikāyikāpi uposathapavāraṇānaṃ antarāyakarā alajjino rājakulūpagā vuccanti. Tesaṃ lajjiparisāti tesaṃ sīmasāmikānaṃ pakkhā hutvā anubalaṃ dātuṃ samatthā lajjiparisā. Sukatamevāti aññesaṃ santakepi attano sīmāya antovuttavidhinā kataṃ sukatameva.
பாளிமுத்தகவினிச்ச²யவண்ணனா நிட்டி²தா.
Pāḷimuttakavinicchayavaṇṇanā niṭṭhitā.
86. தே³வேன க³ஹிததா³ரூனீதி ரஞ்ஞா பரிக்³க³ஹிததா³ரூனி, ரஞ்ஞோ ஸந்தகானீதி வுத்தங் ஹோதி. க²ண்டா³க²ண்ட³ங் கரொந்தோதி கு²த்³த³கங் மஹந்தஞ்ச க²ண்ட³ங் கரொந்தோ.
86.Devena gahitadārūnīti raññā pariggahitadārūni, rañño santakānīti vuttaṃ hoti. Khaṇḍākhaṇḍaṃ karontoti khuddakaṃ mahantañca khaṇḍaṃ karonto.
87. குலபோ⁴க³இஸ்ஸரியாதீ³ஹி மஹதீ மத்தா பமாணங் ஏதஸ்ஸாதி மஹாமத்தோ. தேனாஹ – ‘‘மஹதியா இஸ்ஸரியமத்தாய ஸமன்னாக³தோ’’தி.
87. Kulabhogaissariyādīhi mahatī mattā pamāṇaṃ etassāti mahāmatto. Tenāha – ‘‘mahatiyā issariyamattāya samannāgato’’ti.
88. அவஜ்ஜா²யந்தீதி ஹெட்டா² கத்வா ஓலோகெந்தி, சிந்தெந்தி வா. தேனாஹ ‘‘அவஜானந்தா’’திஆதி³. லாமகதோ வா சிந்தெந்தீதி நிஹீனதோ சிந்தெந்தி. கதெ²ந்தீதி ‘‘கிங் நாமேதங் கிங் நாமேத’’ந்தி அஞ்ஞமஞ்ஞங் கதெ²ந்தி.
88.Avajjhāyantīti heṭṭhā katvā olokenti, cintenti vā. Tenāha ‘‘avajānantā’’tiādi. Lāmakato vā cintentīti nihīnato cintenti. Kathentīti ‘‘kiṃ nāmetaṃ kiṃ nāmeta’’nti aññamaññaṃ kathenti.
கத²ங் பனெத்த² ‘‘தா³ரூனீ’’தி ப³ஹுவசனங் ‘‘அதி³ன்ன’’ந்தி ஏகவசனேன ஸத்³தி⁴ங் ஸம்ப³ந்த⁴முபக³ச்ச²தீதி ஆஹ – ‘‘அதி³ன்னங் ஆதி³யிஸ்ஸதீதி அயங் உஜ்ஜா²யனத்தோ²’’திஆதி³. உஜ்ஜா²யனஸ்ஸ அதி³ன்னாதா³னவிஸயத்தா அதி³ன்னாதா³னங் உஜ்ஜா²யனத்தோ²தி வுத்தங். ஸதிபி பனெத்த² கோ³பகேன தி³ன்னதா³ரூனங் க³ஹணே உஜுகங் அவத்வா லேஸேன க³ஹிதத்தா தே²ரோ ‘‘அதி³ன்னங் ஆதி³யீ’’தி வேதி³தப்³போ³. வசனபே⁴தே³தி ஏகவசனப³ஹுவசனானங் பே⁴தே³.
Kathaṃ panettha ‘‘dārūnī’’ti bahuvacanaṃ ‘‘adinna’’nti ekavacanena saddhiṃ sambandhamupagacchatīti āha – ‘‘adinnaṃ ādiyissatīti ayaṃ ujjhāyanattho’’tiādi. Ujjhāyanassa adinnādānavisayattā adinnādānaṃ ujjhāyanatthoti vuttaṃ. Satipi panettha gopakena dinnadārūnaṃ gahaṇe ujukaṃ avatvā lesena gahitattā thero ‘‘adinnaṃ ādiyī’’ti veditabbo. Vacanabhedeti ekavacanabahuvacanānaṃ bhede.
ஸப்³பா³வந்தங் பரிஸந்தி பி⁴க்கு²பி⁴க்கு²னீஆதி³ஸப்³பா³வயவவந்தங் பரிஸங். ஸப்³பா³ சதுபரிஸஸங்க²ஆதா பஜா எத்த² அத்தீ²தி ஸப்³பா³வந்தா, பரிஸா. ஸேனா ஏதஸ்ஸ அத்தீ²தி ஸேனிகோ, ஸேனிகோ ஏவ ஸேனியோ. பி³ம்பி³ஸாரோதி தஸ்ஸ நாமந்தி எத்த² பி³ம்பீ³தி ஸுவண்ணங், தஸ்மா ஸாரஸுவண்ணஸதி³ஸவண்ணதாய பி³ம்பி³ஸாரோதி வுச்சதீதி வேதி³தப்³போ³. சதுத்தோ² பா⁴கோ³ பாதோ³தி வேதி³தப்³போ³தி இமினாவ ஸப்³ப³ஜனபதே³ஸு கஹாபணஸ்ஸ வீஸதிமோ பா⁴கோ³ மாஸகோதி இத³ஞ்ச வுத்தமேவ ஹோதீதி த³ட்ட²ப்³ப³ங். போராணஸத்தா²னுரூபங் லக்க²ணஸம்பன்னா உப்பாதி³தா நீலகஹாபணாதி வேதி³தப்³பா³. ருத்³ரதா³மேன உப்பாதி³தோ ருத்³ரதா³மகோ. ஸோ கிர நீலகஹாபணஸ்ஸ திபா⁴க³ங் அக்³க⁴தி. யஸ்மிங் பதே³ஸே நீலகஹாபணா ந ஸந்தி, தத்தா²பி நீலகஹாபணானங் வளஞ்ஜனட்டா²னே ச அவளஞ்ஜனட்டா²னே ச ஸமானஅக்³க⁴வஸேன பவத்தமானங் ப⁴ண்ட³ங் க³ஹெத்வா நீலகஹாபணவஸேனேவ பரிச்சே²தோ³ காதப்³போ³தி வத³ந்தி.
Sabbāvantaṃparisanti bhikkhubhikkhunīādisabbāvayavavantaṃ parisaṃ. Sabbā catuparisasaṅkhaātā pajā ettha atthīti sabbāvantā, parisā. Senā etassa atthīti seniko, seniko eva seniyo. Bimbisāroti tassa nāmanti ettha bimbīti suvaṇṇaṃ, tasmā sārasuvaṇṇasadisavaṇṇatāya bimbisāroti vuccatīti veditabbo. Catuttho bhāgo pādoti veditabboti imināva sabbajanapadesu kahāpaṇassa vīsatimo bhāgo māsakoti idañca vuttameva hotīti daṭṭhabbaṃ. Porāṇasatthānurūpaṃ lakkhaṇasampannā uppāditā nīlakahāpaṇāti veditabbā. Rudradāmena uppādito rudradāmako. So kira nīlakahāpaṇassa tibhāgaṃ agghati. Yasmiṃ padese nīlakahāpaṇā na santi, tatthāpi nīlakahāpaṇānaṃ vaḷañjanaṭṭhāne ca avaḷañjanaṭṭhāne ca samānaagghavasena pavattamānaṃ bhaṇḍaṃ gahetvā nīlakahāpaṇavaseneva paricchedo kātabboti vadanti.
த⁴னியவத்து²வண்ணனா நிட்டி²தா.
Dhaniyavatthuvaṇṇanā niṭṭhitā.
தஸ்ஸத்தோ²…பே॰… வுத்தனயேனேவ வேதி³தப்³போ³தி இமினா ‘‘ப⁴க³வதா பி⁴க்கூ²னங் இத³ங் ஸிக்கா²பத³ங் ஏவங் பஞ்ஞத்தங் ஹோதி ச, இத³ஞ்ச அஞ்ஞங் வத்து² உத³பாதீ³’’தி ஏவங் பட²மபாராஜிகவண்ணனாயங் (பாரா॰ அட்ட²॰ 1.39) வுத்தனயேன தஸ்ஸத்தோ² வேதி³தப்³போ³. ‘‘இதா³னி யங் தங் அஞ்ஞங் வத்து² உப்பன்னங், தங் த³ஸ்ஸேதுங் ‘தேன கோ² பன ஸமயேனா’திஆதி³மாஹா’’தி ஏவங் அனுபஞ்ஞத்திஸம்ப³ந்தோ⁴ ச தத்த² வுத்தனயேனேவ வேதி³தப்³போ³தி த³ஸ்ஸேதி.
Tassattho…pe… vuttanayeneva veditabboti iminā ‘‘bhagavatā bhikkhūnaṃ idaṃ sikkhāpadaṃ evaṃ paññattaṃ hoti ca, idañca aññaṃ vatthu udapādī’’ti evaṃ paṭhamapārājikavaṇṇanāyaṃ (pārā. aṭṭha. 1.39) vuttanayena tassattho veditabbo. ‘‘Idāni yaṃ taṃ aññaṃ vatthu uppannaṃ, taṃ dassetuṃ ‘tena kho pana samayenā’tiādimāhā’’ti evaṃ anupaññattisambandho ca tattha vuttanayeneva veditabboti dasseti.
90-91. ரஜகா அத்த²ரந்தி எத்தா²தி ரஜகத்த²ரணங், ரஜகத்த²ரணந்தி ரஜகதித்த²ங் வுச்சதீதி ஆஹ ‘‘ரஜகதித்த²ங் க³ந்த்வா’’தி. வுத்தமேவத்த²ங் விபா⁴வெந்தோ ஆஹ ‘‘தஞ்ஹீ’’திஆதி³.
90-91. Rajakā attharanti etthāti rajakattharaṇaṃ, rajakattharaṇanti rajakatitthaṃ vuccatīti āha ‘‘rajakatitthaṃ gantvā’’ti. Vuttamevatthaṃ vibhāvento āha ‘‘tañhī’’tiādi.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாளிமுத்தகவினிச்ச²யவண்ணனா • Pāḷimuttakavinicchayavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாளிமுத்தகவினிச்ச²யவண்ணனா • Pāḷimuttakavinicchayavaṇṇanā
