| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பாளிமுத்தகவினிச்ச²யவண்ணனா
Pāḷimuttakavinicchayavaṇṇanā
ச²த்தத³ண்ட³க்³கா³ஹகங் ஸலாகபஞ்ஜரந்தி எத்த² யோ பஞ்ஜரஸலாகானங் மஜ்ஜ²ட்டோ² பு³ந்தே³ புது²லோ அஹிச்ச²த்தகஸதி³ஸோ அக்³கே³ ஸசி²த்³தோ³ யத்த² த³ண்ட³ந்தரங் பவேஸெத்வா ச²த்தங் க³ண்ஹந்தி, யோ வா ஸயமேவ தீ³க⁴தாய க³ஹணத³ண்டோ³ ஹோதி, அயங் ச²த்தத³ண்டோ³ நாம, தஸ்ஸ அபரிக³ளனத்தா²ய ச²த்தஸலாகானங் மூலப்பதே³ஸத³ண்ட³ஸ்ஸ ஸமந்ததோ த³ள்ஹபஞ்ஜரங் கத்வா ஸுத்தேஹி வினந்த⁴ந்தி, ஸோ பதே³ஸோ ச²த்தத³ண்ட³கா³ஹகஸலாகபஞ்ஜரங் நாம, தங் வினந்தி⁴துங் வட்டதி. ந வண்ணமட்ட²த்தா²யாதி இமினா தி²ரகரணத்த²மேவ ஏகவண்ணஸுத்தேன வினந்தி⁴யமானங் யதி³ வண்ணமட்ட²ங் ஹோதி, ந தத்த² தோ³ஸோதி த³ஸ்ஸேதி. ஆரக்³கே³னாதி நிகா²த³னமுகே²ன. த³ண்ட³பு³ந்தே³தி த³ண்ட³மூலே கோடியங். ச²த்தமண்ட³லிகந்தி ச²த்தபஞ்ஜரே மண்ட³லாகாரேன ப³த்³த⁴த³ண்ட³வலயங். உக்கிரித்வாதி நின்னங், உன்னதங் வா கத்வா.
Chattadaṇḍaggāhakaṃsalākapañjaranti ettha yo pañjarasalākānaṃ majjhaṭṭho bunde puthulo ahicchattakasadiso agge sachiddo yattha daṇḍantaraṃ pavesetvā chattaṃ gaṇhanti, yo vā sayameva dīghatāya gahaṇadaṇḍo hoti, ayaṃ chattadaṇḍo nāma, tassa aparigaḷanatthāya chattasalākānaṃ mūlappadesadaṇḍassa samantato daḷhapañjaraṃ katvā suttehi vinandhanti, so padeso chattadaṇḍagāhakasalākapañjaraṃ nāma, taṃ vinandhituṃ vaṭṭati. Na vaṇṇamaṭṭhatthāyāti iminā thirakaraṇatthameva ekavaṇṇasuttena vinandhiyamānaṃ yadi vaṇṇamaṭṭhaṃ hoti, na tattha dosoti dasseti. Āraggenāti nikhādanamukhena. Daṇḍabundeti daṇḍamūle koṭiyaṃ. Chattamaṇḍalikanti chattapañjare maṇḍalākārena baddhadaṇḍavalayaṃ. Ukkiritvāti ninnaṃ, unnataṃ vā katvā.
நானாஸுத்தகேஹீதி நானாவண்ணேஹி ஸுத்தேஹி. இத³ஞ்ச ததா² கரொந்தானங் வஸேன வுத்தங், ஏகவண்ணஸுத்தகேனாபி ந வட்டதியேவ, ‘‘பகதிஸூசிகம்மமேவ வட்டதீ’’தி ஹி வுத்தங். பட்டமுகே²தி த்³வின்னங் பட்டானங் ஸங்க⁴டிதட்டா²னங் ஸந்தா⁴யேதங் வுத்தங். பரியந்தேதி சீவரபரியந்தே, அனுவாதங் ஸந்தா⁴யேதங் வுத்தங். வேணிந்தி வரகஸீஸாகாரேன ஸிப்³ப³னங். ஸங்க²லிகந்தி தி³கு³ணஸங்க²லிகாகாரேன ஸிப்³ப³னங், வேணிங் வா ஸங்க²லிகங் வா கரொந்தீதி பகதேன ஸம்ப³ந்தோ⁴. அக்³கி⁴யங் நாம சேதியஸண்டா²னங், யங் அக்³கி⁴யத்த²ம்போ⁴தி வத³ந்தி. உக்கிரந்தீதி உட்ட²பெந்தி. சதுகோணமேவ வட்டதீதி க³ண்டி²கபாஸகபட்டானி ஸந்தா⁴ய வுத்தங். கோணஸுத்தபிளகாதி க³ண்டி²கபாஸகபட்டானங் கோணேஹி ப³ஹி நிக்³க³தஸுத்தானங் பிளகாகாரேன ட²பிதகோடியோதி கேசி வத³ந்தி, தே பிளகே சி²ந்தி³த்வா து³விஞ்ஞெய்யா காதப்³பா³தி தேஸங் அதி⁴ப்பாயோ. கேசி பன ‘‘கோணஸுத்தா ச பிளகாதி த்³வேயேவா’’தி வத³ந்தி, தேஸங் மதேன க³ண்டி²கபாஸகபட்டானங் கோணதோ கோணேஹி நீஹதஸுத்தா கோணஸுத்தா நாம. ஸமந்ததோ பன பரியந்தேன கதா சதுரஸ்ஸஸுத்தா பிளகா நாம. தங் து³வித⁴ம்பி கேசி சீவரதோ விஸுங் பஞ்ஞாயனத்தா²ய விகாரயுத்தங் கரொந்தி, தங் நிஸேதா⁴ய ‘‘து³விஞ்ஞெய்யரூபா வட்டந்தீ’’தி வுத்தங், ந பன ஸப்³ப³தா² அசக்கு²கோ³சரபா⁴வேன ஸிப்³ப³னத்தா²ய ததா²ஸிப்³ப³னஸ்ஸ அஸக்குணெய்யத்தா. யதா² பகதிசீவரதோ விகாரோ ந பஞ்ஞாயதி, ஏவங் ஸிப்³பி³தப்³ப³ந்தி அதி⁴ப்பாயோ. ரஜனகம்மதோ புப்³பே³ பஞ்ஞாயமானோபி விஸேஸோ சீவரே ரத்தே ஏகவண்ணதாய ந பஞ்ஞாயதீதி ஆஹ ‘‘சீவரே ரத்தே’’தி. மணினாதி நீலமணிஆதி³மட்ட²பாஸாணேன, அங்ஸவத்³த⁴ககாயப³ந்த⁴னாதி³கங் பன அசீவரத்தா ஸங்கா²தீ³ஹி க⁴ங்ஸிதுங் வட்டதீதி வத³ந்தி. கண்ணஸுத்தகந்தி சீவரஸ்ஸ தீ³க⁴தோ திரியஞ்ச ஸிப்³பி³தானங் சதூஸு கண்ணேஸு கோணேஸு ச நிக்க²ந்தானங் ஸுத்தஸீஸானமேதங் நாமங், தங் சி²ந்தி³த்வாவ பாருபிதப்³ப³ங், தேனாஹ ‘‘ரஜிதகாலே சி²ந்தி³தப்³ப³’’ந்தி. ப⁴க³வதா அனுஞ்ஞாதங் ஏகங் கண்ணஸுத்தம்பி அத்தி², தங் பன நாமேன ஸதி³ஸம்பி இதோ அஞ்ஞமேவாதி த³ஸ்ஸேதுங் யங் பனாதிஆதி³ வுத்தங். லக்³க³னத்தா²யாதி சீவரரஜ்ஜுயங் சீவரப³ந்த⁴னத்தா²ய. க³ண்டி²கேதி த³ந்தாதி³மயே. பீளகாதி பி³ந்து³ங் பி³ந்து³ங் கத்வா உட்டா²பேதப்³ப³பீளகா.
Nānāsuttakehīti nānāvaṇṇehi suttehi. Idañca tathā karontānaṃ vasena vuttaṃ, ekavaṇṇasuttakenāpi na vaṭṭatiyeva, ‘‘pakatisūcikammameva vaṭṭatī’’ti hi vuttaṃ. Paṭṭamukheti dvinnaṃ paṭṭānaṃ saṅghaṭitaṭṭhānaṃ sandhāyetaṃ vuttaṃ. Pariyanteti cīvarapariyante, anuvātaṃ sandhāyetaṃ vuttaṃ. Veṇinti varakasīsākārena sibbanaṃ. Saṅkhalikanti diguṇasaṅkhalikākārena sibbanaṃ, veṇiṃ vā saṅkhalikaṃ vā karontīti pakatena sambandho. Agghiyaṃ nāma cetiyasaṇṭhānaṃ, yaṃ agghiyatthambhoti vadanti. Ukkirantīti uṭṭhapenti. Catukoṇameva vaṭṭatīti gaṇṭhikapāsakapaṭṭāni sandhāya vuttaṃ. Koṇasuttapiḷakāti gaṇṭhikapāsakapaṭṭānaṃ koṇehi bahi niggatasuttānaṃ piḷakākārena ṭhapitakoṭiyoti keci vadanti, te piḷake chinditvā duviññeyyā kātabbāti tesaṃ adhippāyo. Keci pana ‘‘koṇasuttā ca piḷakāti dveyevā’’ti vadanti, tesaṃ matena gaṇṭhikapāsakapaṭṭānaṃ koṇato koṇehi nīhatasuttā koṇasuttā nāma. Samantato pana pariyantena katā caturassasuttā piḷakā nāma. Taṃ duvidhampi keci cīvarato visuṃ paññāyanatthāya vikārayuttaṃ karonti, taṃ nisedhāya ‘‘duviññeyyarūpā vaṭṭantī’’ti vuttaṃ, na pana sabbathā acakkhugocarabhāvena sibbanatthāya tathāsibbanassa asakkuṇeyyattā. Yathā pakaticīvarato vikāro na paññāyati, evaṃ sibbitabbanti adhippāyo. Rajanakammato pubbe paññāyamānopi viseso cīvare ratte ekavaṇṇatāya na paññāyatīti āha ‘‘cīvare ratte’’ti. Maṇināti nīlamaṇiādimaṭṭhapāsāṇena, aṃsavaddhakakāyabandhanādikaṃ pana acīvarattā saṅkhādīhi ghaṃsituṃ vaṭṭatīti vadanti. Kaṇṇasuttakanti cīvarassa dīghato tiriyañca sibbitānaṃ catūsu kaṇṇesu koṇesu ca nikkhantānaṃ suttasīsānametaṃ nāmaṃ, taṃ chinditvāva pārupitabbaṃ, tenāha ‘‘rajitakāle chinditabba’’nti. Bhagavatā anuññātaṃ ekaṃ kaṇṇasuttampi atthi, taṃ pana nāmena sadisampi ito aññamevāti dassetuṃ yaṃ panātiādi vuttaṃ. Lagganatthāyāti cīvararajjuyaṃ cīvarabandhanatthāya. Gaṇṭhiketi dantādimaye. Pīḷakāti binduṃ binduṃ katvā uṭṭhāpetabbapīḷakā.
தா²லகே வாதி தம்பா³தி³மயே புக்³க³லிகே திவிதே⁴பி கப்பியதா²லகே. ந வட்டதீதி மணிவண்ணகரணப்பயோகோ³ ந வட்டதி, தேலவண்ணகரணத்த²ங் பன வட்டதி. பத்தமண்ட³லேதி திபுஸீஸாதி³மயே. ‘‘ந, பி⁴க்க²வே, சித்தானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி (சூளவ॰ 253) வுத்தத்தா ‘‘பி⁴த்திகம்மங் ந வட்டதீ’’தி வுத்தங். ‘‘அனுஜானாமி, பி⁴க்க²வே, மகரத³ந்தகங் சி²ந்தி³து’’ந்தி (சூளவ॰ 253) வுத்தத்தா ‘‘மகரத³ந்தகங் பன வட்டதீ’’தி வுத்தங், இத³ங் பன பாளியா லத்³த⁴ம்பி இத⁴ பாளியா முத்தத்தா பாளிமுத்தகனயே வுத்தங். ஏவமஞ்ஞம்பி ஈதி³ஸங்.
Thālake vāti tambādimaye puggalike tividhepi kappiyathālake. Na vaṭṭatīti maṇivaṇṇakaraṇappayogo na vaṭṭati, telavaṇṇakaraṇatthaṃ pana vaṭṭati. Pattamaṇḍaleti tipusīsādimaye. ‘‘Na, bhikkhave, cittāni pattamaṇḍalāni dhāretabbāni rūpakākiṇṇāni bhittikammakatānī’’ti (cūḷava. 253) vuttattā ‘‘bhittikammaṃ na vaṭṭatī’’ti vuttaṃ. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā ‘‘makaradantakaṃ pana vaṭṭatī’’ti vuttaṃ, idaṃ pana pāḷiyā laddhampi idha pāḷiyā muttattā pāḷimuttakanaye vuttaṃ. Evamaññampi īdisaṃ.
லேகா² ந வட்டதீதி ஆரக்³கே³ன தி³ன்னலேகா²வ ந வட்டதி, ஜாதிஹிங்கு³லிகாதி³வண்ணேஹி கதலேகா² வட்டதி. ச²த்தமுக²வட்டியந்தி த⁴மகரணஸ்ஸ ஹத்தே²ன க³ஹணச²த்தாகாரஸ்ஸ முக²வட்டியங், ‘‘பரிஸ்ஸாவனசோளப³ந்த⁴னட்டா²னே’’தி கேசி.
Lekhā na vaṭṭatīti āraggena dinnalekhāva na vaṭṭati, jātihiṅgulikādivaṇṇehi katalekhā vaṭṭati. Chattamukhavaṭṭiyanti dhamakaraṇassa hatthena gahaṇachattākārassa mukhavaṭṭiyaṃ, ‘‘parissāvanacoḷabandhanaṭṭhāne’’ti keci.
தெ³ட்³டு³ப⁴ஸீஸந்தி உத³கஸப்பஸீஸங். அச்சீ²னீதி குஞ்ஜரச்சி²ஸண்டா²னானி. ஏகமேவ வட்டதீதி எத்த² ஏகரஜ்ஜுகங் தி³கு³ணங் திகு³ணங் கத்வாபி ப³ந்தி⁴துங் ந வட்டதி, ஏகமேவ பன ஸதவாரம்பி ஸரீரங் பரிக்கி²பித்வா ப³ந்தி⁴துங் வட்டதி, ப³ஹுரஜ்ஜுகே ஏகதோ கத்வா ஏகேன நிரந்தரங் வேடெ²த்வா கதங் ‘‘ப³ஹுரஜ்ஜுக’’ந்தி ந வத்தப்³ப³ங் ‘‘வட்டதீ’’தி வுத்தத்தா, தங் முரஜஸங்க²ங் ந க³ச்ச²தீதி வேதி³தப்³ப³ங். முரஜஞ்ஹி நானாவண்ணேஹி ஸுத்தேஹி முரஜவட்டிஸண்டா²னங் வேடெ²த்வா கதங், இத³ங் பன முரஜங் மத்³த³வீணஸங்கா²தங் பாமங்க³ஸண்டா²னஞ்ச த³ஸாஸு வட்டதி ‘‘காயப³ந்த⁴னஸ்ஸ த³ஸா ஜீரந்தி; அனுஜானாமி, பி⁴க்க²வே, முரஜங் மத்³த³வீண’’ந்தி (சூளவ॰ 278) வுத்தத்தா.
Deḍḍubhasīsanti udakasappasīsaṃ. Acchīnīti kuñjaracchisaṇṭhānāni. Ekameva vaṭṭatīti ettha ekarajjukaṃ diguṇaṃ tiguṇaṃ katvāpi bandhituṃ na vaṭṭati, ekameva pana satavārampi sarīraṃ parikkhipitvā bandhituṃ vaṭṭati, bahurajjuke ekato katvā ekena nirantaraṃ veṭhetvā kataṃ ‘‘bahurajjuka’’nti na vattabbaṃ ‘‘vaṭṭatī’’ti vuttattā, taṃ murajasaṅkhaṃ na gacchatīti veditabbaṃ. Murajañhi nānāvaṇṇehi suttehi murajavaṭṭisaṇṭhānaṃ veṭhetvā kataṃ, idaṃ pana murajaṃ maddavīṇasaṅkhātaṃ pāmaṅgasaṇṭhānañca dasāsu vaṭṭati ‘‘kāyabandhanassa dasā jīranti; anujānāmi, bhikkhave, murajaṃ maddavīṇa’’nti (cūḷava. 278) vuttattā.
விதே⁴தி த³ஸாபரியோஸானே தி²ரபா⁴வாய த³ந்தவிஸாணஸுத்தாதீ³ஹி கத்தப்³பே³ விதே⁴. அட்ட² மங்க³லானி நாம ஸங்கோ² சக்கங் புண்ணகும்போ⁴ க³யா ஸிரீவச்சோ² அங்குஸோ த⁴ஜங் ஸோவத்திகந்தி வத³ந்தி. மச்ச²யுக³ளச²த்தனந்தி³யாவட்டாதி³வஸேனபி வத³ந்தி. பரிச்சே²த³லேகா²மத்தந்தி த³ந்தாதீ³ஹி கதவித⁴ஸ்ஸ உபோ⁴ஸு கோடீஸு கதபரிச்சே²த³ராஜிமத்தங்.
Vidheti dasāpariyosāne thirabhāvāya dantavisāṇasuttādīhi kattabbe vidhe. Aṭṭha maṅgalāni nāma saṅkho cakkaṃ puṇṇakumbho gayā sirīvaccho aṅkuso dhajaṃ sovattikanti vadanti. Macchayugaḷachattanandiyāvaṭṭādivasenapi vadanti. Paricchedalekhāmattanti dantādīhi katavidhassa ubhosu koṭīsu kataparicchedarājimattaṃ.
‘‘உஜுகமேவா’’தி வுத்தத்தா சதுரஸ்ஸாதி³ஸண்டா²னாபி அஞ்ஜனீ வங்கக³திகா ந வட்டதி. ஸிபாடிகாயாதி வாஸிஆதி³ப⁴ண்ட³னிக்கி²பனபஸிப்³ப³கே. ஆரகண்டகங் நாம பொத்த²காதி³அஅஸங்கா²ரணத்த²ங் கததீ³க⁴முக²ஸத்த²கந்தி வத³ந்தி. ‘‘ப⁴மகாரானங் தா³ருஆதி³லிக²னஸத்த²க’’ந்தி கேசி. வட்டமணிகந்தி வட்டங் கத்வா உட்ட²பேதப்³ப³ங் புப்பு²ளகங். அஞ்ஞந்தி இமினா பிளகாதி³ங் ஸங்க³ண்ஹாதி. பிப்ப²லிகேதி யங் கிஞ்சி சே²த³னகே கு²த்³த³கஸத்தே². வலிதகந்தி நக²ச்சே²த³னகாலே த³ள்ஹக்³க³ஹணத்த²ங் வலீஹி யுத்தமேவ கரொந்தி. தஸ்மா தங் வட்டதீதி இமினா யங் அஞ்ஞம்பி விகாரங் த³ள்ஹீகம்மாதி³அத்தா²ய கரொந்தி, ந வண்ணமட்ட²த்தா²ய, தங் வட்டதீதி தீ³பிதங், தேன ச கத்தரத³ண்ட³கோடியங் அஞ்ஞமஞ்ஞம்பி க⁴ட்டனேன ஸத்³த³னிச்ச²ரணத்தா²ய கதங் அயோவலயாதி³கங் ஸங்யுத்தம்பி கப்பியதோ உபபன்னங் ஹோதி. மண்ட³லந்தி உத்தராரணியா பவேஸனத்த²ங் ஆவாடமண்ட³லங் ஹோதி. உஜுகமேவ ப³ந்தி⁴துந்தி ஸம்ப³ந்தோ⁴, உபோ⁴ஸு வா பஸ்ஸேஸு ஏகபஸ்ஸே வாதி வசனஸேஸோ. வாஸித³ண்ட³ஸ்ஸ உபோ⁴ஸு பஸ்ஸேஸு த³ண்ட³கோடீனங் அசலனத்த²ங் ப³ந்தி⁴துந்தி அத்தோ².
‘‘Ujukamevā’’ti vuttattā caturassādisaṇṭhānāpi añjanī vaṅkagatikā na vaṭṭati. Sipāṭikāyāti vāsiādibhaṇḍanikkhipanapasibbake. Ārakaṇṭakaṃ nāma potthakādiaasaṅkhāraṇatthaṃ katadīghamukhasatthakanti vadanti. ‘‘Bhamakārānaṃ dāruādilikhanasatthaka’’nti keci. Vaṭṭamaṇikanti vaṭṭaṃ katvā uṭṭhapetabbaṃ pupphuḷakaṃ. Aññanti iminā piḷakādiṃ saṅgaṇhāti. Pipphaliketi yaṃ kiñci chedanake khuddakasatthe. Valitakanti nakhacchedanakāle daḷhaggahaṇatthaṃ valīhi yuttameva karonti. Tasmā taṃ vaṭṭatīti iminā yaṃ aññampi vikāraṃ daḷhīkammādiatthāya karonti, na vaṇṇamaṭṭhatthāya, taṃ vaṭṭatīti dīpitaṃ, tena ca kattaradaṇḍakoṭiyaṃ aññamaññampi ghaṭṭanena saddaniccharaṇatthāya kataṃ ayovalayādikaṃ saṃyuttampi kappiyato upapannaṃ hoti. Maṇḍalanti uttarāraṇiyā pavesanatthaṃ āvāṭamaṇḍalaṃ hoti. Ujukameva bandhitunti sambandho, ubhosu vā passesu ekapasse vāti vacanaseso. Vāsidaṇḍassa ubhosu passesu daṇḍakoṭīnaṃ acalanatthaṃ bandhitunti attho.
ஆமண்ட³ஸாரகேதி ஆமலகப²லானி பிஸித்வா தேன கக்கேன கததேலபா⁴ஜனே. தத்த² கிர பக்கி²த்தங் தேலங் ஸீதலங் ஹோதி. பூ⁴மத்த²ரணேதி கடஸாராதி³மயே பரிகம்மகதாய பூ⁴மியா அத்த²ரிதப்³ப³அத்த²ரணே. பானீயக⁴டேதி ஸப்³ப³ங் பா⁴ஜனவிகதிங் ஸங்க³ண்ஹாதி. ஸப்³ப³ங்…பே॰… வட்டதீதி யதா²வுத்தேஸு மஞ்சாதீ³ஸு இத்தி²புரிஸரூபம்பி வட்டதி தேலபா⁴ஜனேஸுயேவ இத்தி²புரிஸரூபானங் படிக்கி²த்தத்தா, தேலபா⁴ஜனேன ஸஹ அக³ணெத்வா விஸுங் மஞ்சாதீ³னங் க³ஹிதத்தா சாதி வத³ந்தி, கிஞ்சாபி வத³ந்தி, ஏதேஸங் பன மஞ்சாதீ³னங் ஹத்தே²ன ஆமஸிதப்³ப³ப⁴ண்ட³த்தா இத்தி²ரூபமேவெத்த² ந வட்டதீதி க³ஹேதப்³ப³ங். அஞ்ஞேஸந்தி ஸீமஸாமிகானங். ராஜவல்லபே⁴ஹீதி லஜ்ஜீபேஸலாதீ³னங் உபோஸதா²தி³அந்தராயகரா அலஜ்ஜினோ பி⁴ன்னலத்³தி⁴கா ச பி⁴க்கூ² அதி⁴ப்பேதா தேஹி ஸஹ உபோஸதா²தி³கரணாயோகா³, தேனேவ ‘‘ஸீமாயா’’தி வுத்தங். தேஸங் லஜ்ஜீபரிஸாதி தேஸங் ஸீமாஸாமிகானங் அனுப³லங் தா³துங் ஸமத்தா² லஜ்ஜீபரிஸா. பி⁴க்கூ²ஹி கதந்தி யங் அலஜ்ஜீனங் ஸேனாஸனபே⁴த³னாதி³கங் லஜ்ஜீபி⁴க்கூ²ஹி கதங், ஸப்³ப³ஞ்சேதங் ஸுகதமேவ அலஜ்ஜீனிக்³க³ஹத்தா²ய பவத்திதப்³ப³தோ.
Āmaṇḍasāraketi āmalakaphalāni pisitvā tena kakkena katatelabhājane. Tattha kira pakkhittaṃ telaṃ sītalaṃ hoti. Bhūmattharaṇeti kaṭasārādimaye parikammakatāya bhūmiyā attharitabbaattharaṇe. Pānīyaghaṭeti sabbaṃ bhājanavikatiṃ saṅgaṇhāti. Sabbaṃ…pe… vaṭṭatīti yathāvuttesu mañcādīsu itthipurisarūpampi vaṭṭati telabhājanesuyeva itthipurisarūpānaṃ paṭikkhittattā, telabhājanena saha agaṇetvā visuṃ mañcādīnaṃ gahitattā cāti vadanti, kiñcāpi vadanti, etesaṃ pana mañcādīnaṃ hatthena āmasitabbabhaṇḍattā itthirūpamevettha na vaṭṭatīti gahetabbaṃ. Aññesanti sīmasāmikānaṃ. Rājavallabhehīti lajjīpesalādīnaṃ uposathādiantarāyakarā alajjino bhinnaladdhikā ca bhikkhū adhippetā tehi saha uposathādikaraṇāyogā, teneva ‘‘sīmāyā’’ti vuttaṃ. Tesaṃ lajjīparisāti tesaṃ sīmāsāmikānaṃ anubalaṃ dātuṃ samatthā lajjīparisā. Bhikkhūhi katanti yaṃ alajjīnaṃ senāsanabhedanādikaṃ lajjībhikkhūhi kataṃ, sabbañcetaṃ sukatameva alajjīniggahatthāya pavattitabbato.
88. அவஜ்ஜா²யந்தீதி நீசதோ சிந்தெந்தி. உஜ்ஜா²யனத்தோ²தி பி⁴க்கு²னோ தெ²ய்யகம்மனிந்த³னத்தோ² ‘‘கத²ஞ்ஹி நாம அதி³ன்னங் ஆதி³யிஸ்ஸதீ’’தி, ந பன தா³ரு-ஸத்³த³விஸேஸனத்தோ² தஸ்ஸ ப³ஹுவசனத்தா. வசனபே⁴தே³தி ஏகவசனப³ஹுவசனானங் பே⁴தே³. ஸப்³பா³வந்தந்தி பி⁴க்கு²பி⁴க்கு²னீஆதி³ஸப்³பா³வயவவந்தங். பி³ம்பி³ஸாரோதி தஸ்ஸ நாமந்தி எத்த² பி³ம்பீ³தி ஸுவண்ணங். தஸ்மா ஸாரஸுவண்ணஸதி³ஸவண்ணதாய ‘‘பி³ம்பி³ஸாரோ’’தி வுச்சதீதி வேதி³தப்³ப³ங். போராணஸத்தா²னுரூபங் உப்பாதி³தோ வீஸதிமாஸப்பமாணஉத்தமஸுவண்ணக்³க⁴னகோ லக்க²ணஸம்பன்னோ நீலகஹாபணோதி வேதி³தப்³போ³. ருத்³ரதா³மேன நாம கேனசி உப்பாதி³தோ ருத்³ரதா³மகோ. ஸோ கிர நீலகஹாபணஸ்ஸ திபா⁴க³ங் அக்³க⁴தி. யஸ்மிங் பன தே³ஸே நீலகஹாபணா ந ஸந்தி, தத்தா²பி காளகவிரஹிதஸ்ஸ நித்³த⁴ந்தஸுவண்ணஸ்ஸ பஞ்சமாஸக்³க⁴னகேன ப⁴ண்டே³ன பாத³பரிச்சே²தோ³ காதப்³போ³. தேனாதி நீலகஹாபணஸ்ஸ சதுத்த²பா⁴க³பூ⁴தேன. பாராஜிகவத்து²ம்ஹி வாதிஆதி³ பாராஜிகானங் ஸப்³ப³பு³த்³தே⁴ஹி பஞ்ஞத்தபா⁴வேன வுத்தங், ஸங்கா⁴தி³ஸேஸாதீ³ஸு பன இதராபத்தீஸுபி தப்³ப³த்தூ²ஸு ச நானத்தங் நத்தே²வ, கேவலங் கேசி ஸப்³பா³காரேன பஞ்ஞபெந்தி, கேசி ஏகதே³ஸேனாதி எத்தகமேவ விஸேஸோ. ந ஹி கதா³சிபி ஸம்மாஸம்பு³த்³தா⁴ யதா²பராத⁴ங் அதிக்கம்ம ஊனமதி⁴கங் வா ஸிக்கா²பத³ங் பஞ்ஞபெந்தி.
88.Avajjhāyantīti nīcato cintenti. Ujjhāyanatthoti bhikkhuno theyyakammanindanattho ‘‘kathañhi nāma adinnaṃ ādiyissatī’’ti, na pana dāru-saddavisesanattho tassa bahuvacanattā. Vacanabhedeti ekavacanabahuvacanānaṃ bhede. Sabbāvantanti bhikkhubhikkhunīādisabbāvayavavantaṃ. Bimbisāroti tassa nāmanti ettha bimbīti suvaṇṇaṃ. Tasmā sārasuvaṇṇasadisavaṇṇatāya ‘‘bimbisāro’’ti vuccatīti veditabbaṃ. Porāṇasatthānurūpaṃ uppādito vīsatimāsappamāṇauttamasuvaṇṇagghanako lakkhaṇasampanno nīlakahāpaṇoti veditabbo. Rudradāmena nāma kenaci uppādito rudradāmako. So kira nīlakahāpaṇassa tibhāgaṃ agghati. Yasmiṃ pana dese nīlakahāpaṇā na santi, tatthāpi kāḷakavirahitassa niddhantasuvaṇṇassa pañcamāsagghanakena bhaṇḍena pādaparicchedo kātabbo. Tenāti nīlakahāpaṇassa catutthabhāgabhūtena. Pārājikavatthumhi vātiādi pārājikānaṃ sabbabuddhehi paññattabhāvena vuttaṃ, saṅghādisesādīsu pana itarāpattīsupi tabbatthūsu ca nānattaṃ nattheva, kevalaṃ keci sabbākārena paññapenti, keci ekadesenāti ettakameva viseso. Na hi kadācipi sammāsambuddhā yathāparādhaṃ atikkamma ūnamadhikaṃ vā sikkhāpadaṃ paññapenti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாளிமுத்தகவினிச்ச²யவண்ணனா • Pāḷimuttakavinicchayavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாளிமுத்தகவினிச்ச²யவண்ணனா • Pāḷimuttakavinicchayavaṇṇanā
