| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
পাল়িমুত্তকৰিনিচ্ছযৰণ্ণনা
Pāḷimuttakavinicchayavaṇṇanā
পাল়িমুত্তকৰিনিচ্ছযেসু তঞ্চ খো…পে॰… ন ৰণ্ণমট্ঠত্থাযাতি ইদং ছত্তদণ্ডগ্গাহকসলাকপঞ্জরৰিনন্ধনং সন্ধাযাতি ৰদন্তি। সব্বত্থাতি ছত্তদণ্ডে সব্বত্থ। আরগ্গেনাতি নিখাদনমুখেন। ঘটকম্পি ৰাল়রূপম্পি ভিন্দিত্ৰা ধারেতব্বন্তি সচে তাদিসং অকপ্পিযছত্তং লভতি, ঘটকম্পি ৰাল়রূপম্পি ভিন্দিত্ৰা তচ্ছেত্ৰা ধারেতব্বং। সুত্তকেন ৰা দণ্ডো ৰেঠেতব্বোতি যথা ছত্তদণ্ডে লেখা ন পঞ্ঞাযতি, তথা ৰেঠেতব্বো। দণ্ডবুন্দেতি দণ্ডমূলে, ছত্তদণ্ডস্স হেট্ঠিমতলেতি অত্থো। ছত্তমণ্ডলিকন্তি ছত্তস্স অন্তো খুদ্দকমণ্ডলং। উক্কিরিত্ৰাতি উট্ঠপেত্ৰা। সা ৰট্টতীতি যদিপি রজ্জুকেহি ন বন্ধন্তি, বন্ধিতুং পন যুত্তট্ঠানত্তা ৰট্টতি।
Pāḷimuttakavinicchayesu tañca kho…pe… na vaṇṇamaṭṭhatthāyāti idaṃ chattadaṇḍaggāhakasalākapañjaravinandhanaṃ sandhāyāti vadanti. Sabbatthāti chattadaṇḍe sabbattha. Āraggenāti nikhādanamukhena. Ghaṭakampi vāḷarūpampi bhinditvā dhāretabbanti sace tādisaṃ akappiyachattaṃ labhati, ghaṭakampi vāḷarūpampi bhinditvā tacchetvā dhāretabbaṃ. Suttakena vā daṇḍo veṭhetabboti yathā chattadaṇḍe lekhā na paññāyati, tathā veṭhetabbo. Daṇḍabundeti daṇḍamūle, chattadaṇḍassa heṭṭhimataleti attho. Chattamaṇḍalikanti chattassa anto khuddakamaṇḍalaṃ. Ukkiritvāti uṭṭhapetvā. Sā vaṭṭatīti yadipi rajjukehi na bandhanti, bandhituṃ pana yuttaṭṭhānattā vaṭṭati.
নানাসুত্তকেহীতি নানাৰণ্ণেহি সুত্তেহি। ইদঞ্চ তথা করোন্তানং করণপ্পকারদস্সনত্থং ৰুত্তং, একৰণ্ণসুত্তকেনপি ৰুত্তপ্পকারেন সিব্বিতুং ন ৰট্টতিযেৰ। পট্টমুখেতি পট্টকোটিযং। দ্ৰিন্নং পট্টানং সঙ্ঘট্টিতট্ঠানং সন্ধাযেতং ৰুত্তং। পরিযন্তেতি চীৰরপরিযন্তে। চীৰরঅনুৰাতং সন্ধাযেতং ৰুত্তং। ৰেণিন্তি ৰরকসীসাকারেন সিব্বনং। সঙ্খলিকন্তি বিল়ালবন্ধনাকারেন সিব্বনং। ‘‘ৰেণিং সঙ্খলিক’’ন্তি চেত্থ উপযোগৰচনং ‘‘করোন্তী’’তি করণকিরিযাপেক্খং। অগ্ঘিযগযমুগ্গরাদীনীতি এত্থ অগ্ঘিযং নাম চেতিযসণ্ঠানেন সিব্বনং, মূলে তনুকং অগ্গে মহন্তং কত্ৰা গদাকারেন সিব্বনং গযা, মূলে চ অগ্গে চ একসদিসং কত্ৰা মুগ্গরাকারেন সিব্বনং মুগ্গরো। কক্কটক্খীনি উক্কিরন্তীতি গণ্ঠিকপট্টপাসকপট্টানং অন্তে পাল়িবদ্ধং কত্ৰা কক্কটকানং অক্খিসণ্ঠানং উট্ঠপেন্তি, করোন্তীতি অত্থো। ‘‘কোণসুত্তপিল়কাতি গণ্ঠিকপাসকপট্টানং কোণেহি নীহটসুত্তানং কোটিযো’’তি তীসুপি গণ্ঠিপদেসু ৰুত্তং। কথং পন তা পিল়কা দুৰিঞ্ঞেয্যরূপা কাতব্বাতি? কোণেহি নীহটসুত্তানং অন্তেসু একৰারং গণ্ঠিককরণেন ৰা পুন নিৰত্তেত্ৰা সিব্বনেন ৰা দুৰিঞ্ঞেয্যসভাৰং কত্ৰা সুত্তকোটিযো রস্সং কত্ৰা ছিন্দিতব্বা। ধম্মসিরিত্থেরেন পন –
Nānāsuttakehīti nānāvaṇṇehi suttehi. Idañca tathā karontānaṃ karaṇappakāradassanatthaṃ vuttaṃ, ekavaṇṇasuttakenapi vuttappakārena sibbituṃ na vaṭṭatiyeva. Paṭṭamukheti paṭṭakoṭiyaṃ. Dvinnaṃ paṭṭānaṃ saṅghaṭṭitaṭṭhānaṃ sandhāyetaṃ vuttaṃ. Pariyanteti cīvarapariyante. Cīvaraanuvātaṃ sandhāyetaṃ vuttaṃ. Veṇinti varakasīsākārena sibbanaṃ. Saṅkhalikanti biḷālabandhanākārena sibbanaṃ. ‘‘Veṇiṃ saṅkhalika’’nti cettha upayogavacanaṃ ‘‘karontī’’ti karaṇakiriyāpekkhaṃ. Agghiyagayamuggarādīnīti ettha agghiyaṃ nāma cetiyasaṇṭhānena sibbanaṃ, mūle tanukaṃ agge mahantaṃ katvā gadākārena sibbanaṃ gayā, mūle ca agge ca ekasadisaṃ katvā muggarākārena sibbanaṃ muggaro. Kakkaṭakkhīni ukkirantīti gaṇṭhikapaṭṭapāsakapaṭṭānaṃ ante pāḷibaddhaṃ katvā kakkaṭakānaṃ akkhisaṇṭhānaṃ uṭṭhapenti, karontīti attho. ‘‘Koṇasuttapiḷakāti gaṇṭhikapāsakapaṭṭānaṃ koṇehi nīhaṭasuttānaṃ koṭiyo’’ti tīsupi gaṇṭhipadesu vuttaṃ. Kathaṃ pana tā piḷakā duviññeyyarūpā kātabbāti? Koṇehi nīhaṭasuttānaṃ antesu ekavāraṃ gaṇṭhikakaraṇena vā puna nivattetvā sibbanena vā duviññeyyasabhāvaṃ katvā suttakoṭiyo rassaṃ katvā chinditabbā. Dhammasirittherena pana –
‘‘কোণসুত্তা চ পিল়কা, দুৰিঞ্ঞেয্যাৰ কপ্পরে’’তি –
‘‘Koṇasuttā ca piḷakā, duviññeyyāva kappare’’ti –
ৰুত্তং। তথা আচরিযবুদ্ধদত্তত্থেরেনপি –
Vuttaṃ. Tathā ācariyabuddhadattattherenapi –
‘‘সুত্তা চ পিল়কা তত্থ, দুৰিঞ্ঞেয্যাৰ দীপিতা’’তি –
‘‘Suttā ca piḷakā tattha, duviññeyyāva dīpitā’’ti –
ৰুত্তং । তস্মা তেসং মতেন কোণসুত্তা চ পিল়কা চ কোণসুত্তপিল়কাতি এৰমেত্থ অত্থো দট্ঠব্বো।
Vuttaṃ . Tasmā tesaṃ matena koṇasuttā ca piḷakā ca koṇasuttapiḷakāti evamettha attho daṭṭhabbo.
মণিনাতি মসারগল্লাদিপাসাণেন। ন ঘট্টেতব্বন্তি ন ঘংসিতব্বং, অংসবদ্ধককাযবন্ধনানি পন সঙ্খাদীহি ঘংসিতুং ৰট্টতি। পাসকং কত্ৰা বন্ধিতব্বন্তি রজনকালে বন্ধিতব্বং, সেসকালে মোচেত্ৰা ঠপেতব্বং। গণ্ঠিকেতি দন্তমযাদিগণ্ঠিকে। পিল়কাতি বিন্দুং বিন্দুং কত্ৰা উট্ঠাপেতব্বপিল়কা।
Maṇināti masāragallādipāsāṇena. Na ghaṭṭetabbanti na ghaṃsitabbaṃ, aṃsabaddhakakāyabandhanāni pana saṅkhādīhi ghaṃsituṃ vaṭṭati. Pāsakaṃ katvā bandhitabbanti rajanakāle bandhitabbaṃ, sesakāle mocetvā ṭhapetabbaṃ. Gaṇṭhiketi dantamayādigaṇṭhike. Piḷakāti binduṃ binduṃ katvā uṭṭhāpetabbapiḷakā.
‘‘তেলৰণ্ণোতি সমণসারুপ্পৰণ্ণং সন্ধায ৰুত্তং, মণিৰণ্ণং পন পত্তং অঞ্ঞেন কতং লভিত্ৰা পরিভুঞ্জিতুং ৰট্টতী’’তি ৰদন্তি। পত্তমণ্ডলেতি তিপুসীসাদিমযে পত্তমণ্ডলে। ‘‘ন, ভিক্খৰে, চিত্রানি পত্তমণ্ডলানি ধারেতব্বানি রূপকাকিণ্ণানি ভিত্তিকম্মকতানী’’তি (চূল়ৰ॰ ২৫৩) ৰুত্তত্তা ‘‘ভিত্তিকম্মং ন ৰট্টতী’’তি ৰুত্তং। ‘‘অনুজানামি, ভিক্খৰে, মকরদন্তকং ছিন্দিতু’’ন্তি ৰচনতো ‘‘মকরদন্তকং পন ৰট্টতী’’তি ৰুত্তং।
‘‘Telavaṇṇoti samaṇasāruppavaṇṇaṃ sandhāya vuttaṃ, maṇivaṇṇaṃ pana pattaṃ aññena kataṃ labhitvā paribhuñjituṃ vaṭṭatī’’ti vadanti. Pattamaṇḍaleti tipusīsādimaye pattamaṇḍale. ‘‘Na, bhikkhave, citrāni pattamaṇḍalāni dhāretabbāni rūpakākiṇṇāni bhittikammakatānī’’ti (cūḷava. 253) vuttattā ‘‘bhittikammaṃ na vaṭṭatī’’ti vuttaṃ. ‘‘Anujānāmi, bhikkhave, makaradantakaṃ chinditu’’nti vacanato ‘‘makaradantakaṃ pana vaṭṭatī’’ti vuttaṃ.
মকরমুখন্তি মকরমুখসণ্ঠানং। দেড্ঢুভসীসন্তি উদকসপ্পসীসসণ্ঠানং। অচ্ছীনীতি কুঞ্জরচ্ছিসণ্ঠানানি। রজ্জুককাযবন্ধনং একমেৰ ৰট্টতীতি রজ্জুকং বন্ধন্তেন একগুণমেৰ কত্ৰা বন্ধিতুং ৰট্টতি, মজ্ঝে ভিন্দিত্ৰা দিগুণং কত্ৰা বন্ধিতুং ন ৰট্টতি, দিগুণং পন অকত্ৰা একরজ্জুকমেৰ সতৰারম্পি পুনপ্পুনং আৰিজ্জিত্ৰা বন্ধিতুং ৰট্টতি। একম্পি ন ৰট্টতীতি একগুণম্পি কত্ৰা বন্ধিতুং ন ৰট্টতি। বহুরজ্জুকে…পে॰.. ৰট্টতীতি ইদং কাযবন্ধনং সন্ধায ৰুত্তং, ন দসা সন্ধায। ঈদিসঞ্হি কাযবন্ধনং বন্ধিতুং ৰট্টতি। তেনেৰ আচরিযবুদ্ধদত্তত্থেরেন ৰুত্তং –
Makaramukhanti makaramukhasaṇṭhānaṃ. Deḍḍhubhasīsanti udakasappasīsasaṇṭhānaṃ. Acchīnīti kuñjaracchisaṇṭhānāni. Rajjukakāyabandhanaṃ ekameva vaṭṭatīti rajjukaṃ bandhantena ekaguṇameva katvā bandhituṃ vaṭṭati, majjhe bhinditvā diguṇaṃ katvā bandhituṃ na vaṭṭati, diguṇaṃ pana akatvā ekarajjukameva satavārampi punappunaṃ āvijjitvā bandhituṃ vaṭṭati. Ekampi na vaṭṭatīti ekaguṇampi katvā bandhituṃ na vaṭṭati. Bahurajjuke…pe... vaṭṭatīti idaṃ kāyabandhanaṃ sandhāya vuttaṃ, na dasā sandhāya. Īdisañhi kāyabandhanaṃ bandhituṃ vaṭṭati. Teneva ācariyabuddhadattattherena vuttaṃ –
‘‘একরজ্জুমযং ৰুত্তং, মুনিনা কাযবন্ধনং।
‘‘Ekarajjumayaṃ vuttaṃ, muninā kāyabandhanaṃ;
পঞ্চপামঙ্গসণ্ঠানং, একম্পি চ ন ৰট্টতি॥
Pañcapāmaṅgasaṇṭhānaṃ, ekampi ca na vaṭṭati.
‘‘রজ্জুকে একতো কত্ৰা, বহূ একায রজ্জুযা।
‘‘Rajjuke ekato katvā, bahū ekāya rajjuyā;
নিরন্তরঞ্হি ৰেঠেত্ৰা, কতং ৰট্টতি বন্ধিতু’’ন্তি॥
Nirantarañhi veṭhetvā, kataṃ vaṭṭati bandhitu’’nti.
মুরজং পন কাযবন্ধনং ন ৰট্টতি ‘‘ন, ভিক্খৰে, উচ্চাৰচানি কাযবন্ধনানি ধারেতব্বানি কলাবুকং দেড্ঢুভকং মুরজং মদ্দৰীণং, যো ধারেয্য, আপত্তি দুক্কটস্সা’’তি (চূল়ৰ॰ ২৭৮) ৰুত্তত্তা। কিং পন বহুরজ্জুকে একতো কত্ৰা একেন নিরন্তরং ৰেঠেত্ৰা কতং মুরজসঙ্খ্যং ন গচ্ছতীতি? আম ন গচ্ছতি। মুরজঞ্হি নাম নানাৰণ্ণেহি সুত্তেহি মুরজৰট্টিসণ্ঠানং ৰেঠেত্ৰা কতং। কেচি পন ‘‘মুরজন্তি বহুরজ্জুকে একতো সঙ্কড্ঢিত্ৰা একায রজ্জুযা পলিৰেঠেত্ৰা কতরজ্জূ’’তি ৰদন্তি, তং ন গহেতব্বং। যদি চেতং মুরজং সিযা, ‘‘বহুরজ্জুকে একতো কত্ৰা একেন নিরন্তরং ৰেঠেত্ৰা কতং বহুরজ্জুক’’ন্তি ন ৰত্তব্বং, ‘‘তং ৰট্টতী’’তি ইদং ৰিরুজ্ঝেয্য। মুরজং পন পামঙ্গসণ্ঠানঞ্চ দসাসু ৰট্টতি ‘‘কাযবন্ধনস্স দসা জীরন্তি। অনুজানামি, ভিক্খৰে, মুরজং মদ্দৰীণ’’ন্তি (চূল়ৰ॰ ২৭৮) ৰুত্তত্তা। তেনেৰ ৰক্খতি ‘‘অনুজানামি, ভিক্খৰে, মুরজং মদ্দৰীণন্তি ইদং দসাসুযেৰ অনুঞ্ঞাত’’ন্তি।
Murajaṃ pana kāyabandhanaṃ na vaṭṭati ‘‘na, bhikkhave, uccāvacāni kāyabandhanāni dhāretabbāni kalābukaṃ deḍḍhubhakaṃ murajaṃ maddavīṇaṃ, yo dhāreyya, āpatti dukkaṭassā’’ti (cūḷava. 278) vuttattā. Kiṃ pana bahurajjuke ekato katvā ekena nirantaraṃ veṭhetvā kataṃ murajasaṅkhyaṃ na gacchatīti? Āma na gacchati. Murajañhi nāma nānāvaṇṇehi suttehi murajavaṭṭisaṇṭhānaṃ veṭhetvā kataṃ. Keci pana ‘‘murajanti bahurajjuke ekato saṅkaḍḍhitvā ekāya rajjuyā paliveṭhetvā katarajjū’’ti vadanti, taṃ na gahetabbaṃ. Yadi cetaṃ murajaṃ siyā, ‘‘bahurajjuke ekato katvā ekena nirantaraṃ veṭhetvā kataṃ bahurajjuka’’nti na vattabbaṃ, ‘‘taṃ vaṭṭatī’’ti idaṃ virujjheyya. Murajaṃ pana pāmaṅgasaṇṭhānañca dasāsu vaṭṭati ‘‘kāyabandhanassa dasā jīranti. Anujānāmi, bhikkhave, murajaṃ maddavīṇa’’nti (cūḷava. 278) vuttattā. Teneva vakkhati ‘‘anujānāmi, bhikkhave, murajaṃ maddavīṇanti idaṃ dasāsuyeva anuññāta’’nti.
কাযবন্ধনৰিধেতি ‘‘কাযবন্ধনস্স পৰনন্তো জীরতি। অনুজানামি, ভিক্খৰে, ৰিধ’’ন্তি ৰুত্তত্তা কাযবন্ধনস্স পাসন্তে দসামূলে তস্স থিরভাৰত্থং কত্তব্বে দন্তৰিসাণাদিমযে ৰিধে। ‘‘অট্ঠ মঙ্গলানি নাম সঙ্খো চক্কং পুণ্ণকুম্ভো গযা সিরীৰচ্ছো অঙ্কুসো ধজং সোৰত্থিক’’ন্তি ৰদন্তি। পরিচ্ছেদলেখামত্তন্তি উভোসু কোটীসু কাতব্বপরিচ্ছেদরাজিমত্তং। ‘‘উজুকমেৰা’’তি ৰুত্তত্তা চতুরস্সাদিৰঙ্কগতিকং ন ৰট্টতি। ‘‘ছত্তদণ্ডধম্মকরণঅঞ্জননাল়িকা নানাৰণ্ণলেখাপঅকম্মকতা ন ৰট্টন্তী’’তি ৰদন্তি।
Kāyabandhanavidheti ‘‘kāyabandhanassa pavananto jīrati. Anujānāmi, bhikkhave, vidha’’nti vuttattā kāyabandhanassa pāsante dasāmūle tassa thirabhāvatthaṃ kattabbe dantavisāṇādimaye vidhe. ‘‘Aṭṭha maṅgalāni nāma saṅkho cakkaṃ puṇṇakumbho gayā sirīvaccho aṅkuso dhajaṃ sovatthika’’nti vadanti. Paricchedalekhāmattanti ubhosu koṭīsu kātabbaparicchedarājimattaṃ. ‘‘Ujukamevā’’ti vuttattā caturassādivaṅkagatikaṃ na vaṭṭati. ‘‘Chattadaṇḍadhammakaraṇaañjananāḷikā nānāvaṇṇalekhāpaakammakatā na vaṭṭantī’’ti vadanti.
আরকণ্টকেতি পোত্থকাদিঅভিসঙ্খরণত্থং কতে দীঘমুখসত্থকে। ৰট্টমণিকন্তি ৰট্টং কত্ৰা অগ্গকোটিযং উট্ঠাপেতব্বপুব্বুল়ং। অঞ্ঞং ৰা ৰণ্ণমট্ঠন্তি ইমিনা পিল়কাদিং সঙ্গণ্হাতি। মণিকন্তি একাৰট্টমণি। পিল়কন্তি সাসপমত্তিকা মুত্তরাজিসদিসা বহুৰট্টলেখা। ‘‘ইমস্মিং অধিকারে অৰুত্তত্তা লেখনিযং যং কিঞ্চি ৰণ্ণমট্ঠং ৰট্টতী’’তি ৰদন্তি। ৰলিতকন্তি মজ্ঝে ৰলিং উট্ঠাপেত্ৰা। মণ্ডলং হোতীতি উত্তরারণিযা পৰেসনত্থং আহটমণ্ডলং হোতি।
Ārakaṇṭaketi potthakādiabhisaṅkharaṇatthaṃ kate dīghamukhasatthake. Vaṭṭamaṇikanti vaṭṭaṃ katvā aggakoṭiyaṃ uṭṭhāpetabbapubbuḷaṃ. Aññaṃ vā vaṇṇamaṭṭhanti iminā piḷakādiṃ saṅgaṇhāti. Maṇikanti ekāvaṭṭamaṇi. Piḷakanti sāsapamattikā muttarājisadisā bahuvaṭṭalekhā. ‘‘Imasmiṃ adhikāre avuttattā lekhaniyaṃ yaṃ kiñci vaṇṇamaṭṭhaṃ vaṭṭatī’’ti vadanti. Valitakanti majjhe valiṃ uṭṭhāpetvā. Maṇḍalaṃ hotīti uttarāraṇiyā pavesanatthaṃ āhaṭamaṇḍalaṃ hoti.
কিঞ্চাপি এত্থ দন্তকট্ঠচ্ছেদনৰাসিযেৰ ৰুত্তা, মহাৰাসিযম্পি পন ন ৰট্টতিযেৰ। উজুকমেৰ বন্ধিতুন্তি সম্বন্ধো। ‘‘উভোসু ৰা পস্সেসু একপস্সেৰা’’তি ৰচনসেসো। কত্তরযট্ঠিকোটিযং কতঅযোৰলযানিপি ৰট্টন্তি, যেসং অঞ্ঞমঞ্ঞসঙ্ঘট্টনেন সদ্দো নিচ্ছরতি।
Kiñcāpi ettha dantakaṭṭhacchedanavāsiyeva vuttā, mahāvāsiyampi pana na vaṭṭatiyeva. Ujukameva bandhitunti sambandho. ‘‘Ubhosu vā passesu ekapassevā’’ti vacanaseso. Kattarayaṭṭhikoṭiyaṃ kataayovalayānipi vaṭṭanti, yesaṃ aññamaññasaṅghaṭṭanena saddo niccharati.
আমণ্ডসারকেতি আমলকেহি কতভাজনে। ভূমত্থরণেতি চিত্তকটসারকচিত্তত্থরণাদিকে পরিকম্মকতায ভূমিযা অত্থরিতব্বঅত্থরণে। পানীযঘটেতি ইমিনা কুণ্ডিকসরকেপি সঙ্গণ্হাতি। বীজনেতি চতুরস্সবীজনে। সব্বং…পে॰… ৰট্টতীতি যথাৰুত্তেসু মঞ্চপীঠাদীসু ইত্থিরূপং ৰিনা সব্বং মালাকম্মলতাকম্মাদি ৰণ্ণমট্ঠং ভিক্খুনো ৰট্টতি। সেনাসনে কিঞ্চি পটিসেধেতব্বং নত্থি অঞ্ঞত্র ৰিরুদ্ধসেনাসনাতি এত্থাযমধিপ্পাযো – সেনাসনপরিক্খারেসু পটিসেধেতব্বং নাম কিঞ্চি নত্থি, ৰিরুদ্ধসেনাসনং পন সযমেৰ পটিক্খিপিতব্বন্তি। অঞ্ঞেসন্তি সীমসামিনো ৰুত্তা। রাজৰল্লভা পরনিকাযিকাপি একনিকাযিকাপি উপোসথপৰারণানং অন্তরাযকরা অলজ্জিনো রাজকুলূপগা ৰুচ্চন্তি। তেসং লজ্জিপরিসাতি তেসং সীমসামিকানং পক্খা হুত্ৰা অনুবলং দাতুং সমত্থা লজ্জিপরিসা। সুকতমেৰাতি অঞ্ঞেসং সন্তকেপি অত্তনো সীমায অন্তোৰুত্তৰিধিনা কতং সুকতমেৰ।
Āmaṇḍasāraketi āmalakehi katabhājane. Bhūmattharaṇeti cittakaṭasārakacittattharaṇādike parikammakatāya bhūmiyā attharitabbaattharaṇe. Pānīyaghaṭeti iminā kuṇḍikasarakepi saṅgaṇhāti. Bījaneti caturassabījane. Sabbaṃ…pe… vaṭṭatīti yathāvuttesu mañcapīṭhādīsu itthirūpaṃ vinā sabbaṃ mālākammalatākammādi vaṇṇamaṭṭhaṃ bhikkhuno vaṭṭati. Senāsane kiñci paṭisedhetabbaṃ natthi aññatra viruddhasenāsanāti etthāyamadhippāyo – senāsanaparikkhāresu paṭisedhetabbaṃ nāma kiñci natthi, viruddhasenāsanaṃ pana sayameva paṭikkhipitabbanti. Aññesanti sīmasāmino vuttā. Rājavallabhā paranikāyikāpi ekanikāyikāpi uposathapavāraṇānaṃ antarāyakarā alajjino rājakulūpagā vuccanti. Tesaṃ lajjiparisāti tesaṃ sīmasāmikānaṃ pakkhā hutvā anubalaṃ dātuṃ samatthā lajjiparisā. Sukatamevāti aññesaṃ santakepi attano sīmāya antovuttavidhinā kataṃ sukatameva.
পাল়িমুত্তকৰিনিচ্ছযৰণ্ণনা নিট্ঠিতা।
Pāḷimuttakavinicchayavaṇṇanā niṭṭhitā.
৮৬. দেৰেন গহিতদারূনীতি রঞ্ঞা পরিগ্গহিতদারূনি, রঞ্ঞো সন্তকানীতি ৰুত্তং হোতি। খণ্ডাখণ্ডং করোন্তোতি খুদ্দকং মহন্তঞ্চ খণ্ডং করোন্তো।
86.Devena gahitadārūnīti raññā pariggahitadārūni, rañño santakānīti vuttaṃ hoti. Khaṇḍākhaṇḍaṃ karontoti khuddakaṃ mahantañca khaṇḍaṃ karonto.
৮৭. কুলভোগইস্সরিযাদীহি মহতী মত্তা পমাণং এতস্সাতি মহামত্তো। তেনাহ – ‘‘মহতিযা ইস্সরিযমত্তায সমন্নাগতো’’তি।
87. Kulabhogaissariyādīhi mahatī mattā pamāṇaṃ etassāti mahāmatto. Tenāha – ‘‘mahatiyā issariyamattāya samannāgato’’ti.
৮৮. অৰজ্ঝাযন্তীতি হেট্ঠা কত্ৰা ওলোকেন্তি, চিন্তেন্তি ৰা। তেনাহ ‘‘অৰজানন্তা’’তিআদি। লামকতো ৰা চিন্তেন্তীতি নিহীনতো চিন্তেন্তি। কথেন্তীতি ‘‘কিং নামেতং কিং নামেত’’ন্তি অঞ্ঞমঞ্ঞং কথেন্তি।
88.Avajjhāyantīti heṭṭhā katvā olokenti, cintenti vā. Tenāha ‘‘avajānantā’’tiādi. Lāmakato vā cintentīti nihīnato cintenti. Kathentīti ‘‘kiṃ nāmetaṃ kiṃ nāmeta’’nti aññamaññaṃ kathenti.
কথং পনেত্থ ‘‘দারূনী’’তি বহুৰচনং ‘‘অদিন্ন’’ন্তি একৰচনেন সদ্ধিং সম্বন্ধমুপগচ্ছতীতি আহ – ‘‘অদিন্নং আদিযিস্সতীতি অযং উজ্ঝাযনত্থো’’তিআদি। উজ্ঝাযনস্স অদিন্নাদানৰিসযত্তা অদিন্নাদানং উজ্ঝাযনত্থোতি ৰুত্তং। সতিপি পনেত্থ গোপকেন দিন্নদারূনং গহণে উজুকং অৰত্ৰা লেসেন গহিতত্তা থেরো ‘‘অদিন্নং আদিযী’’তি ৰেদিতব্বো। ৰচনভেদেতি একৰচনবহুৰচনানং ভেদে।
Kathaṃ panettha ‘‘dārūnī’’ti bahuvacanaṃ ‘‘adinna’’nti ekavacanena saddhiṃ sambandhamupagacchatīti āha – ‘‘adinnaṃ ādiyissatīti ayaṃ ujjhāyanattho’’tiādi. Ujjhāyanassa adinnādānavisayattā adinnādānaṃ ujjhāyanatthoti vuttaṃ. Satipi panettha gopakena dinnadārūnaṃ gahaṇe ujukaṃ avatvā lesena gahitattā thero ‘‘adinnaṃ ādiyī’’ti veditabbo. Vacanabhedeti ekavacanabahuvacanānaṃ bhede.
সব্বাৰন্তং পরিসন্তি ভিক্খুভিক্খুনীআদিসব্বাৰযৰৰন্তং পরিসং। সব্বা চতুপরিসসঙ্খআতা পজা এত্থ অত্থীতি সব্বাৰন্তা, পরিসা। সেনা এতস্স অত্থীতি সেনিকো, সেনিকো এৰ সেনিযো। বিম্বিসারোতি তস্স নামন্তি এত্থ বিম্বীতি সুৰণ্ণং, তস্মা সারসুৰণ্ণসদিসৰণ্ণতায বিম্বিসারোতি ৰুচ্চতীতি ৰেদিতব্বো। চতুত্থো ভাগো পাদোতি ৰেদিতব্বোতি ইমিনাৰ সব্বজনপদেসু কহাপণস্স ৰীসতিমো ভাগো মাসকোতি ইদঞ্চ ৰুত্তমেৰ হোতীতি দট্ঠব্বং। পোরাণসত্থানুরূপং লক্খণসম্পন্না উপ্পাদিতা নীলকহাপণাতি ৰেদিতব্বা। রুদ্রদামেন উপ্পাদিতো রুদ্রদামকো। সো কির নীলকহাপণস্স তিভাগং অগ্ঘতি। যস্মিং পদেসে নীলকহাপণা ন সন্তি, তত্থাপি নীলকহাপণানং ৰল়ঞ্জনট্ঠানে চ অৰল়ঞ্জনট্ঠানে চ সমানঅগ্ঘৰসেন পৰত্তমানং ভণ্ডং গহেত্ৰা নীলকহাপণৰসেনেৰ পরিচ্ছেদো কাতব্বোতি ৰদন্তি।
Sabbāvantaṃparisanti bhikkhubhikkhunīādisabbāvayavavantaṃ parisaṃ. Sabbā catuparisasaṅkhaātā pajā ettha atthīti sabbāvantā, parisā. Senā etassa atthīti seniko, seniko eva seniyo. Bimbisāroti tassa nāmanti ettha bimbīti suvaṇṇaṃ, tasmā sārasuvaṇṇasadisavaṇṇatāya bimbisāroti vuccatīti veditabbo. Catuttho bhāgo pādoti veditabboti imināva sabbajanapadesu kahāpaṇassa vīsatimo bhāgo māsakoti idañca vuttameva hotīti daṭṭhabbaṃ. Porāṇasatthānurūpaṃ lakkhaṇasampannā uppāditā nīlakahāpaṇāti veditabbā. Rudradāmena uppādito rudradāmako. So kira nīlakahāpaṇassa tibhāgaṃ agghati. Yasmiṃ padese nīlakahāpaṇā na santi, tatthāpi nīlakahāpaṇānaṃ vaḷañjanaṭṭhāne ca avaḷañjanaṭṭhāne ca samānaagghavasena pavattamānaṃ bhaṇḍaṃ gahetvā nīlakahāpaṇavaseneva paricchedo kātabboti vadanti.
ধনিযৰত্থুৰণ্ণনা নিট্ঠিতা।
Dhaniyavatthuvaṇṇanā niṭṭhitā.
তস্সত্থো…পে॰… ৰুত্তনযেনেৰ ৰেদিতব্বোতি ইমিনা ‘‘ভগৰতা ভিক্খূনং ইদং সিক্খাপদং এৰং পঞ্ঞত্তং হোতি চ, ইদঞ্চ অঞ্ঞং ৰত্থু উদপাদী’’তি এৰং পঠমপারাজিকৰণ্ণনাযং (পারা॰ অট্ঠ॰ ১.৩৯) ৰুত্তনযেন তস্সত্থো ৰেদিতব্বো। ‘‘ইদানি যং তং অঞ্ঞং ৰত্থু উপ্পন্নং, তং দস্সেতুং ‘তেন খো পন সমযেনা’তিআদিমাহা’’তি এৰং অনুপঞ্ঞত্তিসম্বন্ধো চ তত্থ ৰুত্তনযেনেৰ ৰেদিতব্বোতি দস্সেতি।
Tassattho…pe… vuttanayeneva veditabboti iminā ‘‘bhagavatā bhikkhūnaṃ idaṃ sikkhāpadaṃ evaṃ paññattaṃ hoti ca, idañca aññaṃ vatthu udapādī’’ti evaṃ paṭhamapārājikavaṇṇanāyaṃ (pārā. aṭṭha. 1.39) vuttanayena tassattho veditabbo. ‘‘Idāni yaṃ taṃ aññaṃ vatthu uppannaṃ, taṃ dassetuṃ ‘tena kho pana samayenā’tiādimāhā’’ti evaṃ anupaññattisambandho ca tattha vuttanayeneva veditabboti dasseti.
৯০-৯১. রজকা অত্থরন্তি এত্থাতি রজকত্থরণং, রজকত্থরণন্তি রজকতিত্থং ৰুচ্চতীতি আহ ‘‘রজকতিত্থং গন্ত্ৰা’’তি। ৰুত্তমেৰত্থং ৰিভাৰেন্তো আহ ‘‘তঞ্হী’’তিআদি।
90-91. Rajakā attharanti etthāti rajakattharaṇaṃ, rajakattharaṇanti rajakatitthaṃ vuccatīti āha ‘‘rajakatitthaṃ gantvā’’ti. Vuttamevatthaṃ vibhāvento āha ‘‘tañhī’’tiādi.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ২. দুতিযপারাজিকং • 2. Dutiyapārājikaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. দুতিযপারাজিকং • 2. Dutiyapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পাল়িমুত্তকৰিনিচ্ছযৰণ্ণনা • Pāḷimuttakavinicchayavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পাল়িমুত্তকৰিনিচ্ছযৰণ্ণনা • Pāḷimuttakavinicchayavaṇṇanā
