| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၁၀. ပလ္လင္ကဒာယကတ္ထေရအပဒာနဝဏ္ဏနာ
10. Pallaṅkadāyakattheraapadānavaṇṇanā
သုမေဓသ္သ ဘဂဝတောတိအာဒိကံ အာယသ္မတော ပလ္လင္ကဒာယကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော အနေကေသု ဘဝေသု နိဗ္ဗာနာဓိဂမတ္ထာယ ကတပုညူပစယော သုမေဓသ္သ ဘဂဝတော ကာလေ ဂဟပတိကုလေ နိဗ္ဗတ္တော ဝုဒ္ဓိမန္ဝာယ မဟာဘောဂသမ္ပန္နော သတ္ထရိ ပသီဒိတ္ဝာ ဓမ္မံ သုတ္ဝာ တသ္သ သတ္ထုနော သတ္တရတနမယံ ပလ္လင္ကံ ကာရေတ္ဝာ မဟန္တံ ပူဇံ အကာသိ။ သော တေန ပုညေန ဒေဝမနုသ္သေသု သံသရန္တော သဗ္ဗတ္ထ ပူဇိတော အဟောသိ။ သော အနုက္ကမေန ဣမသ္မိံ ဗုဒ္ဓုပ္ပာဒေ ဝိဘဝသမ္ပန္နေ ဧကသ္မိံ ကုလေ နိဗ္ဗတ္တော ဝိညုတံ ပတ္တော ဃရာဝာသံ သဏ္ဌပေတ္ဝာ သတ္ထု ဓမ္မဒေသနံ သုတ္ဝာ ပသန္နော ပဗ္ဗဇိတ္ဝာ နစိရသ္သေဝ အရဟတ္တံ ပတ္ဝာ ပုဗ္ဗေ ကတပုညနာမေန ပလ္လင္ကဒာယကတ္ထေရောတိ ပာကဋော အဟောသိ။ ဟေဋ္ဌာ ဝိယ ဥပရိပိ ပုဗ္ဗေ ကတပုညနာမေန ထေရာနံ နာမာနိ ဧဝမေဝ ဝေဒိတဗ္ဗာနိ။
Sumedhassabhagavatotiādikaṃ āyasmato pallaṅkadāyakattherassa apadānaṃ. Ayampi purimabuddhesu katādhikāro anekesu bhavesu nibbānādhigamatthāya katapuññūpacayo sumedhassa bhagavato kāle gahapatikule nibbatto vuddhimanvāya mahābhogasampanno satthari pasīditvā dhammaṃ sutvā tassa satthuno sattaratanamayaṃ pallaṅkaṃ kāretvā mahantaṃ pūjaṃ akāsi. So tena puññena devamanussesu saṃsaranto sabbattha pūjito ahosi. So anukkamena imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā satthu dhammadesanaṃ sutvā pasanno pabbajitvā nacirasseva arahattaṃ patvā pubbe katapuññanāmena pallaṅkadāyakattheroti pākaṭo ahosi. Heṭṭhā viya uparipi pubbe katapuññanāmena therānaṃ nāmāni evameva veditabbāni.
၄၇. သော ဧကဒိဝသံ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော သုမေဓသ္သ ဘဂဝတောတိအာဒိမာဟ။ ပလ္လင္ကော ဟိ မယာ ဒိန္နောတိ ပလ္လင္ကံ ဦရုဗဒ္ဓာသနံ ကတ္ဝာ ယတ္ထ ဥပဝီသန္တိ နိသီဒန္တိ, သော ပလ္လင္ကောတိ ဝုစ္စတိ, သော ပလ္လင္ကော သတ္တရတနမယော မယာ ဒိန္နော ပူဇိတောတိ အတ္ထော။ သဥတ္တရသပစ္ဆဒောတိ သဟ ဥတ္တရစ္ဆဒေန သဟ ပစ္ဆဒေန သဥတ္တရသပစ္ဆဒော, ဥပရိဝိတာနံ ဗန္ဓိတ္ဝာ အာသနံ ဥတ္တမဝတ္ထေဟိ အစ္ဆာဒေတ္ဝာတိ အတ္ထော။ သေသံ ပာကဋမေဝာတိ။
47. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento sumedhassa bhagavatotiādimāha. Pallaṅko hi mayā dinnoti pallaṅkaṃ ūrubaddhāsanaṃ katvā yattha upavīsanti nisīdanti, so pallaṅkoti vuccati, so pallaṅko sattaratanamayo mayā dinno pūjitoti attho. Sauttarasapacchadoti saha uttaracchadena saha pacchadena sauttarasapacchado, uparivitānaṃ bandhitvā āsanaṃ uttamavatthehi acchādetvāti attho. Sesaṃ pākaṭamevāti.
ပလ္လင္ကဒာယကတ္ထေရအပဒာနဝဏ္ဏနာ သမတ္တာ။
Pallaṅkadāyakattheraapadānavaṇṇanā samattā.
ပန္နရသမဝဂ္ဂဝဏ္ဏနာ သမတ္တာ။
Pannarasamavaggavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၉. ဝဋံသကိယတ္ထေရအပဒာနံ • 9. Vaṭaṃsakiyattheraapadānaṃ
