| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಪಲ್ಲಙ್ಕದಾಯಕತ್ಥೇರಅಪದಾನವಣ್ಣನಾ
10. Pallaṅkadāyakattheraapadānavaṇṇanā
ಸುಮೇಧಸ್ಸ ಭಗವತೋತಿಆದಿಕಂ ಆಯಸ್ಮತೋ ಪಲ್ಲಙ್ಕದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಅನೇಕೇಸು ಭವೇಸು ನಿಬ್ಬಾನಾಧಿಗಮತ್ಥಾಯ ಕತಪುಞ್ಞೂಪಚಯೋ ಸುಮೇಧಸ್ಸ ಭಗವತೋ ಕಾಲೇ ಗಹಪತಿಕುಲೇ ನಿಬ್ಬತ್ತೋ ವುದ್ಧಿಮನ್ವಾಯ ಮಹಾಭೋಗಸಮ್ಪನ್ನೋ ಸತ್ಥರಿ ಪಸೀದಿತ್ವಾ ಧಮ್ಮಂ ಸುತ್ವಾ ತಸ್ಸ ಸತ್ಥುನೋ ಸತ್ತರತನಮಯಂ ಪಲ್ಲಙ್ಕಂ ಕಾರೇತ್ವಾ ಮಹನ್ತಂ ಪೂಜಂ ಅಕಾಸಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಸಬ್ಬತ್ಥ ಪೂಜಿತೋ ಅಹೋಸಿ। ಸೋ ಅನುಕ್ಕಮೇನ ಇಮಸ್ಮಿಂ ಬುದ್ಧುಪ್ಪಾದೇ ವಿಭವಸಮ್ಪನ್ನೇ ಏಕಸ್ಮಿಂ ಕುಲೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಘರಾವಾಸಂ ಸಣ್ಠಪೇತ್ವಾ ಸತ್ಥು ಧಮ್ಮದೇಸನಂ ಸುತ್ವಾ ಪಸನ್ನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹತ್ತಂ ಪತ್ವಾ ಪುಬ್ಬೇ ಕತಪುಞ್ಞನಾಮೇನ ಪಲ್ಲಙ್ಕದಾಯಕತ್ಥೇರೋತಿ ಪಾಕಟೋ ಅಹೋಸಿ। ಹೇಟ್ಠಾ ವಿಯ ಉಪರಿಪಿ ಪುಬ್ಬೇ ಕತಪುಞ್ಞನಾಮೇನ ಥೇರಾನಂ ನಾಮಾನಿ ಏವಮೇವ ವೇದಿತಬ್ಬಾನಿ।
Sumedhassabhagavatotiādikaṃ āyasmato pallaṅkadāyakattherassa apadānaṃ. Ayampi purimabuddhesu katādhikāro anekesu bhavesu nibbānādhigamatthāya katapuññūpacayo sumedhassa bhagavato kāle gahapatikule nibbatto vuddhimanvāya mahābhogasampanno satthari pasīditvā dhammaṃ sutvā tassa satthuno sattaratanamayaṃ pallaṅkaṃ kāretvā mahantaṃ pūjaṃ akāsi. So tena puññena devamanussesu saṃsaranto sabbattha pūjito ahosi. So anukkamena imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā satthu dhammadesanaṃ sutvā pasanno pabbajitvā nacirasseva arahattaṃ patvā pubbe katapuññanāmena pallaṅkadāyakattheroti pākaṭo ahosi. Heṭṭhā viya uparipi pubbe katapuññanāmena therānaṃ nāmāni evameva veditabbāni.
೪೭. ಸೋ ಏಕದಿವಸಂ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಸುಮೇಧಸ್ಸ ಭಗವತೋತಿಆದಿಮಾಹ। ಪಲ್ಲಙ್ಕೋ ಹಿ ಮಯಾ ದಿನ್ನೋತಿ ಪಲ್ಲಙ್ಕಂ ಊರುಬದ್ಧಾಸನಂ ಕತ್ವಾ ಯತ್ಥ ಉಪವೀಸನ್ತಿ ನಿಸೀದನ್ತಿ, ಸೋ ಪಲ್ಲಙ್ಕೋತಿ ವುಚ್ಚತಿ, ಸೋ ಪಲ್ಲಙ್ಕೋ ಸತ್ತರತನಮಯೋ ಮಯಾ ದಿನ್ನೋ ಪೂಜಿತೋತಿ ಅತ್ಥೋ। ಸಉತ್ತರಸಪಚ್ಛದೋತಿ ಸಹ ಉತ್ತರಚ್ಛದೇನ ಸಹ ಪಚ್ಛದೇನ ಸಉತ್ತರಸಪಚ್ಛದೋ, ಉಪರಿವಿತಾನಂ ಬನ್ಧಿತ್ವಾ ಆಸನಂ ಉತ್ತಮವತ್ಥೇಹಿ ಅಚ್ಛಾದೇತ್ವಾತಿ ಅತ್ಥೋ। ಸೇಸಂ ಪಾಕಟಮೇವಾತಿ।
47. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento sumedhassa bhagavatotiādimāha. Pallaṅko hi mayā dinnoti pallaṅkaṃ ūrubaddhāsanaṃ katvā yattha upavīsanti nisīdanti, so pallaṅkoti vuccati, so pallaṅko sattaratanamayo mayā dinno pūjitoti attho. Sauttarasapacchadoti saha uttaracchadena saha pacchadena sauttarasapacchado, uparivitānaṃ bandhitvā āsanaṃ uttamavatthehi acchādetvāti attho. Sesaṃ pākaṭamevāti.
ಪಲ್ಲಙ್ಕದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Pallaṅkadāyakattheraapadānavaṇṇanā samattā.
ಪನ್ನರಸಮವಗ್ಗವಣ್ಣನಾ ಸಮತ್ತಾ।
Pannarasamavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೯. ವಟಂಸಕಿಯತ್ಥೇರಅಪದಾನಂ • 9. Vaṭaṃsakiyattheraapadānaṃ
