| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
10. පල්‌ලඞ්‌කදායකත්‌ථෙරඅපදානවණ්‌ණනා
10. Pallaṅkadāyakattheraapadānavaṇṇanā
සුමෙධස්‌ස භගවතොතිආදිකං ආයස්‌මතො පල්‌ලඞ්‌කදායකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො අනෙකෙසු භවෙසු නිබ්‌බානාධිගමත්‌ථාය කතපුඤ්‌ඤූපචයො සුමෙධස්‌ස භගවතො කාලෙ ගහපතිකුලෙ නිබ්‌බත්‌තො වුද්‌ධිමන්‌වාය මහාභොගසම්‌පන්‌නො සත්‌ථරි පසීදිත්‌වා ධම්‌මං සුත්‌වා තස්‌ස සත්‌ථුනො සත්‌තරතනමයං පල්‌ලඞ්‌කං කාරෙත්‌වා මහන්‌තං පූජං අකාසි. සො තෙන පුඤ්‌ඤෙන දෙවමනුස්‌සෙසු සංසරන්‌තො සබ්‌බත්‌ථ පූජිතො අහොසි. සො අනුක්‌කමෙන ඉමස්‌මිං බුද්‌ධුප්‌පාදෙ විභවසම්‌පන්‌නෙ එකස්‌මිං කුලෙ නිබ්‌බත්‌තො විඤ්‌ඤුතං පත්‌තො ඝරාවාසං සණ්‌ඨපෙත්‌වා සත්‌ථු ධම්‌මදෙසනං සුත්‌වා පසන්‌නො පබ්‌බජිත්‌වා නචිරස්‌සෙව අරහත්‌තං පත්‌වා පුබ්‌බෙ කතපුඤ්‌ඤනාමෙන පල්‌ලඞ්‌කදායකත්‌ථෙරොති පාකටො අහොසි. හෙට්‌ඨා විය උපරිපි පුබ්‌බෙ කතපුඤ්‌ඤනාමෙන ථෙරානං නාමානි එවමෙව වෙදිතබ්‌බානි.
Sumedhassabhagavatotiādikaṃ āyasmato pallaṅkadāyakattherassa apadānaṃ. Ayampi purimabuddhesu katādhikāro anekesu bhavesu nibbānādhigamatthāya katapuññūpacayo sumedhassa bhagavato kāle gahapatikule nibbatto vuddhimanvāya mahābhogasampanno satthari pasīditvā dhammaṃ sutvā tassa satthuno sattaratanamayaṃ pallaṅkaṃ kāretvā mahantaṃ pūjaṃ akāsi. So tena puññena devamanussesu saṃsaranto sabbattha pūjito ahosi. So anukkamena imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā satthu dhammadesanaṃ sutvā pasanno pabbajitvā nacirasseva arahattaṃ patvā pubbe katapuññanāmena pallaṅkadāyakattheroti pākaṭo ahosi. Heṭṭhā viya uparipi pubbe katapuññanāmena therānaṃ nāmāni evameva veditabbāni.
47. සො එකදිවසං අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො සුමෙධස්‌ස භගවතොතිආදිමාහ. පල්‌ලඞ්‌කො හි මයා දින්‌නොති පල්‌ලඞ්‌කං ඌරුබද්‌ධාසනං කත්‌වා යත්‌ථ උපවීසන්‌ති නිසීදන්‌ති, සො පල්‌ලඞ්‌කොති වුච්‌චති, සො පල්‌ලඞ්‌කො සත්‌තරතනමයො මයා දින්‌නො පූජිතොති අත්‌ථො. සඋත්‌තරසපච්‌ඡදොති සහ උත්‌තරච්‌ඡදෙන සහ පච්‌ඡදෙන සඋත්‌තරසපච්‌ඡදො, උපරිවිතානං බන්‌ධිත්‌වා ආසනං උත්‌තමවත්‌ථෙහි අච්‌ඡාදෙත්‌වාති අත්‌ථො. සෙසං පාකටමෙවාති.
47. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento sumedhassa bhagavatotiādimāha. Pallaṅko hi mayā dinnoti pallaṅkaṃ ūrubaddhāsanaṃ katvā yattha upavīsanti nisīdanti, so pallaṅkoti vuccati, so pallaṅko sattaratanamayo mayā dinno pūjitoti attho. Sauttarasapacchadoti saha uttaracchadena saha pacchadena sauttarasapacchado, uparivitānaṃ bandhitvā āsanaṃ uttamavatthehi acchādetvāti attho. Sesaṃ pākaṭamevāti.
පල්‌ලඞ්‌කදායකත්‌ථෙරඅපදානවණ්‌ණනා සමත්‌තා.
Pallaṅkadāyakattheraapadānavaṇṇanā samattā.
පන්‌නරසමවග්‌ගවණ්‌ණනා සමත්‌තා.
Pannarasamavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. වටංසකියත්‌ථෙරඅපදානං • 9. Vaṭaṃsakiyattheraapadānaṃ
