| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. ச²ன்னவக்³கோ³
9. Channavaggo
1. பலோகத⁴ம்மஸுத்தங்
1. Palokadhammasuttaṃ
84. ஸாவத்தி²னிதா³னங். அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி…பே॰… ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச –
84. Sāvatthinidānaṃ. Atha kho āyasmā ānando yena bhagavā tenupasaṅkami…pe… ekamantaṃ nisinno kho āyasmā ānando bhagavantaṃ etadavoca –
‘‘‘லோகோ, லோகோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, லோகோதி வுச்சதீ’’தி? ‘‘யங் கோ², ஆனந்த³, பலோகத⁴ம்மங், அயங் வுச்சதி அரியஸ்ஸ வினயே லோகோ. கிஞ்ச, ஆனந்த³, பலோகத⁴ம்மங்? சக்கு² கோ², ஆனந்த³, பலோகத⁴ம்மங், ரூபா பலோகத⁴ம்மா, சக்கு²விஞ்ஞாணங் பலோகத⁴ம்மங், சக்கு²ஸம்ப²ஸ்ஸோ பலோகத⁴ம்மோ, யம்பித³ங் சக்கு²ஸம்ப²ஸ்ஸபச்சயா…பே॰… தம்பி பலோகத⁴ம்மங்…பே॰… ஜிவ்ஹா பலோகத⁴ம்மா, ரஸா பலோகத⁴ம்மா, ஜிவ்ஹாவிஞ்ஞாணங் பலோகத⁴ம்மங், ஜிவ்ஹாஸம்ப²ஸ்ஸோ பலோகத⁴ம்மோ, யம்பித³ங் ஜிவ்ஹாஸம்ப²ஸ்ஸபச்சயா…பே॰… தம்பி பலோகத⁴ம்மங்…பே॰… மனோ பலோகத⁴ம்மோ, த⁴ம்மா பலோகத⁴ம்மா, மனோவிஞ்ஞாணங் பலோகத⁴ம்மங், மனோஸம்ப²ஸ்ஸோ பலோகத⁴ம்மோ, யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி பலோகத⁴ம்மங். யங் கோ², ஆனந்த³, பலோகத⁴ம்மங், அயங் வுச்சதி அரியஸ்ஸ வினயே லோகோ’’தி. பட²மங்.
‘‘‘Loko, loko’ti, bhante, vuccati. Kittāvatā nu kho, bhante, lokoti vuccatī’’ti? ‘‘Yaṃ kho, ānanda, palokadhammaṃ, ayaṃ vuccati ariyassa vinaye loko. Kiñca, ānanda, palokadhammaṃ? Cakkhu kho, ānanda, palokadhammaṃ, rūpā palokadhammā, cakkhuviññāṇaṃ palokadhammaṃ, cakkhusamphasso palokadhammo, yampidaṃ cakkhusamphassapaccayā…pe… tampi palokadhammaṃ…pe… jivhā palokadhammā, rasā palokadhammā, jivhāviññāṇaṃ palokadhammaṃ, jivhāsamphasso palokadhammo, yampidaṃ jivhāsamphassapaccayā…pe… tampi palokadhammaṃ…pe… mano palokadhammo, dhammā palokadhammā, manoviññāṇaṃ palokadhammaṃ, manosamphasso palokadhammo, yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi palokadhammaṃ. Yaṃ kho, ānanda, palokadhammaṃ, ayaṃ vuccati ariyassa vinaye loko’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. பலோகத⁴ம்மஸுத்தவண்ணனா • 1. Palokadhammasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. பலோகத⁴ம்மஸுத்தவண்ணனா • 1. Palokadhammasuttavaṇṇanā
