| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৬. পলোকসুত্তং
6. Palokasuttaṃ
৫৭. অথ খো অঞ্ঞতরো ব্রাহ্মণমহাসালো যেন ভগৰা তেনুপসঙ্কমি…পে॰… একমন্তং নিসিন্নো খো সো ব্রাহ্মণমহাসালো ভগৰন্তং এতদৰোচ – ‘‘সুতং মেতং, ভো গোতম, পুব্বকানং ব্রাহ্মণানং ৰুদ্ধানং মহল্লকানং আচরিযপাচরিযানং ভাসমানানং – ‘পুব্বে সুদং 1 অযং লোকো অৰীচি মঞ্ঞে ফুটো অহোসি মনুস্সেহি, কুক্কুটসংপাতিকা গামনিগমরাজধানিযো’তি। কো নু খো, ভো গোতম, হেতু কো পচ্চযো যেনেতরহি মনুস্সানং খযো হোতি, তনুত্তং পঞ্ঞাযতি, গামাপি অগামা হোন্তি , নিগমাপি অনিগমা হোন্তি, নগরাপি অনগরা হোন্তি, জনপদাপি অজনপদা হোন্তী’’তি?
57. Atha kho aññataro brāhmaṇamahāsālo yena bhagavā tenupasaṅkami…pe… ekamantaṃ nisinno kho so brāhmaṇamahāsālo bhagavantaṃ etadavoca – ‘‘sutaṃ metaṃ, bho gotama, pubbakānaṃ brāhmaṇānaṃ vuddhānaṃ mahallakānaṃ ācariyapācariyānaṃ bhāsamānānaṃ – ‘pubbe sudaṃ 2 ayaṃ loko avīci maññe phuṭo ahosi manussehi, kukkuṭasaṃpātikā gāmanigamarājadhāniyo’ti. Ko nu kho, bho gotama, hetu ko paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti , nigamāpi anigamā honti, nagarāpi anagarā honti, janapadāpi ajanapadā hontī’’ti?
‘‘এতরহি, ব্রাহ্মণ, মনুস্সা অধম্মরাগরত্তা ৰিসমলোভাভিভূতা মিচ্ছাধম্মপরেতা। তে অধম্মরাগরত্তা ৰিসমলোভাভিভূতা মিচ্ছাধম্মপরেতা তিণ্হানি সত্থানি গহেত্ৰা অঞ্ঞমঞ্ঞং 3 জীৰিতা ৰোরোপেন্তি, তেন বহূ মনুস্সা কালং করোন্তি। অযম্পি খো , ব্রাহ্মণ, হেতু অযং পচ্চযো যেনেতরহি মনুস্সানং খযো হোতি, তনুত্তং পঞ্ঞাযতি, গামাপি অগামা হোন্তি, নিগমাপি অনিগমা হোন্তি, নগরাপি অনগরা হোন্তি, জনপদাপি অজনপদা হোন্তি।
‘‘Etarahi, brāhmaṇa, manussā adhammarāgarattā visamalobhābhibhūtā micchādhammaparetā. Te adhammarāgarattā visamalobhābhibhūtā micchādhammaparetā tiṇhāni satthāni gahetvā aññamaññaṃ 4 jīvitā voropenti, tena bahū manussā kālaṃ karonti. Ayampi kho , brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
‘‘পুন চপরং, ব্রাহ্মণ, এতরহি মনুস্সা অধম্মরাগরত্তা ৰিসমলোভাভিভূতা মিচ্ছাধম্মপরেতা। তেসং অধম্মরাগরত্তানং ৰিসমলোভাভিভূতানং মিচ্ছাধম্মপরেতানং দেৰো ন সম্মাধারং অনুপ্পৰেচ্ছতি। তেন দুব্ভিক্খং হোতি দুস্সস্সং সেতট্ঠিকং সলাকাৰুত্তং। তেন বহূ মনুস্সা কালং করোন্তি। অযম্পি খো, ব্রাহ্মণ, হেতু অযং পচ্চযো যেনেতরহি মনুস্সানং খযো হোতি, তনুত্তং পঞ্ঞাযতি, গামাপি অগামা হোন্তি, নিগমাপি অনিগমা হোন্তি, নগরাপি অনগরা হোন্তি, জনপদাপি অজনপদা হোন্তি।
‘‘Puna caparaṃ, brāhmaṇa, etarahi manussā adhammarāgarattā visamalobhābhibhūtā micchādhammaparetā. Tesaṃ adhammarāgarattānaṃ visamalobhābhibhūtānaṃ micchādhammaparetānaṃ devo na sammādhāraṃ anuppavecchati. Tena dubbhikkhaṃ hoti dussassaṃ setaṭṭhikaṃ salākāvuttaṃ. Tena bahū manussā kālaṃ karonti. Ayampi kho, brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
‘‘পুন চপরং, ব্রাহ্মণ, এতরহি মনুস্সা অধম্মরাগরত্তা ৰিসমলোভাভিভূতা মিচ্ছাধম্মপরেতা। তেসং অধম্মরাগরত্তানং ৰিসমলোভাভিভূতানং মিচ্ছাধম্মপরেতানং যক্খা ৰাল়ে অমনুস্সে ওস্সজ্জন্তি 5, তেন বহূ মনুস্সা কালং করোন্তি। অযম্পি খো, ব্রাহ্মণ, হেতু অযং পচ্চযো যেনেতরহি মনুস্সানং খযো হোতি, তনুত্তং পঞ্ঞাযতি, গামাপি অগামা হোন্তি, নিগমাপি অনিগমা হোন্তি, নগরাপি অনগরা হোন্তি, জনপদাপি অজনপদা হোন্তী’’তি।
‘‘Puna caparaṃ, brāhmaṇa, etarahi manussā adhammarāgarattā visamalobhābhibhūtā micchādhammaparetā. Tesaṃ adhammarāgarattānaṃ visamalobhābhibhūtānaṃ micchādhammaparetānaṃ yakkhā vāḷe amanusse ossajjanti 6, tena bahū manussā kālaṃ karonti. Ayampi kho, brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā hontī’’ti.
‘‘অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি। ছট্ঠং।
‘‘Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Chaṭṭhaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৬. পলোকসুত্তৰণ্ণনা • 6. Palokasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬. পলোকসুত্তৰণ্ণনা • 6. Palokasuttavaṇṇanā
