| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. පලොකසුත්‌තං
6. Palokasuttaṃ
57. අථ ඛො අඤ්‌ඤතරො බ්‍රාහ්‌මණමහාසාලො යෙන භගවා තෙනුපසඞ්‌කමි…පෙ.… එකමන්‌තං නිසින්‌නො ඛො සො බ්‍රාහ්‌මණමහාසාලො භගවන්‌තං එතදවොච – ‘‘සුතං මෙතං, භො ගොතම, පුබ්‌බකානං බ්‍රාහ්‌මණානං වුද්‌ධානං මහල්‌ලකානං ආචරියපාචරියානං භාසමානානං – ‘පුබ්‌බෙ සුදං 1 අයං ලොකො අවීචි මඤ්‌ඤෙ ඵුටො අහොසි මනුස්‌සෙහි, කුක්‌කුටසංපාතිකා ගාමනිගමරාජධානියො’ති. කො නු ඛො, භො ගොතම, හෙතු කො පච්‌චයො යෙනෙතරහි මනුස්‌සානං ඛයො හොති, තනුත්‌තං පඤ්‌ඤායති, ගාමාපි අගාමා හොන්‌ති , නිගමාපි අනිගමා හොන්‌ති, නගරාපි අනගරා හොන්‌ති, ජනපදාපි අජනපදා හොන්‌තී’’ති?
57. Atha kho aññataro brāhmaṇamahāsālo yena bhagavā tenupasaṅkami…pe… ekamantaṃ nisinno kho so brāhmaṇamahāsālo bhagavantaṃ etadavoca – ‘‘sutaṃ metaṃ, bho gotama, pubbakānaṃ brāhmaṇānaṃ vuddhānaṃ mahallakānaṃ ācariyapācariyānaṃ bhāsamānānaṃ – ‘pubbe sudaṃ 2 ayaṃ loko avīci maññe phuṭo ahosi manussehi, kukkuṭasaṃpātikā gāmanigamarājadhāniyo’ti. Ko nu kho, bho gotama, hetu ko paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti , nigamāpi anigamā honti, nagarāpi anagarā honti, janapadāpi ajanapadā hontī’’ti?
‘‘එතරහි, බ්‍රාහ්‌මණ, මනුස්‌සා අධම්‌මරාගරත්‌තා විසමලොභාභිභූතා මිච්‌ඡාධම්‌මපරෙතා. තෙ අධම්‌මරාගරත්‌තා විසමලොභාභිභූතා මිච්‌ඡාධම්‌මපරෙතා තිණ්‌හානි සත්‌ථානි ගහෙත්‌වා අඤ්‌ඤමඤ්‌ඤං 3 ජීවිතා වොරොපෙන්‌ති, තෙන බහූ මනුස්‌සා කාලං කරොන්‌ති. අයම්‌පි ඛො , බ්‍රාහ්‌මණ, හෙතු අයං පච්‌චයො යෙනෙතරහි මනුස්‌සානං ඛයො හොති, තනුත්‌තං පඤ්‌ඤායති, ගාමාපි අගාමා හොන්‌ති, නිගමාපි අනිගමා හොන්‌ති, නගරාපි අනගරා හොන්‌ති, ජනපදාපි අජනපදා හොන්‌ති.
‘‘Etarahi, brāhmaṇa, manussā adhammarāgarattā visamalobhābhibhūtā micchādhammaparetā. Te adhammarāgarattā visamalobhābhibhūtā micchādhammaparetā tiṇhāni satthāni gahetvā aññamaññaṃ 4 jīvitā voropenti, tena bahū manussā kālaṃ karonti. Ayampi kho , brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
‘‘පුන චපරං, බ්‍රාහ්‌මණ, එතරහි මනුස්‌සා අධම්‌මරාගරත්‌තා විසමලොභාභිභූතා මිච්‌ඡාධම්‌මපරෙතා. තෙසං අධම්‌මරාගරත්‌තානං විසමලොභාභිභූතානං මිච්‌ඡාධම්‌මපරෙතානං දෙවො න සම්‌මාධාරං අනුප්‌පවෙච්‌ඡති. තෙන දුබ්‌භික්‌ඛං හොති දුස්‌සස්‌සං සෙතට්‌ඨිකං සලාකාවුත්‌තං. තෙන බහූ මනුස්‌සා කාලං කරොන්‌ති. අයම්‌පි ඛො, බ්‍රාහ්‌මණ, හෙතු අයං පච්‌චයො යෙනෙතරහි මනුස්‌සානං ඛයො හොති, තනුත්‌තං පඤ්‌ඤායති, ගාමාපි අගාමා හොන්‌ති, නිගමාපි අනිගමා හොන්‌ති, නගරාපි අනගරා හොන්‌ති, ජනපදාපි අජනපදා හොන්‌ති.
‘‘Puna caparaṃ, brāhmaṇa, etarahi manussā adhammarāgarattā visamalobhābhibhūtā micchādhammaparetā. Tesaṃ adhammarāgarattānaṃ visamalobhābhibhūtānaṃ micchādhammaparetānaṃ devo na sammādhāraṃ anuppavecchati. Tena dubbhikkhaṃ hoti dussassaṃ setaṭṭhikaṃ salākāvuttaṃ. Tena bahū manussā kālaṃ karonti. Ayampi kho, brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
‘‘පුන චපරං, බ්‍රාහ්‌මණ, එතරහි මනුස්‌සා අධම්‌මරාගරත්‌තා විසමලොභාභිභූතා මිච්‌ඡාධම්‌මපරෙතා. තෙසං අධම්‌මරාගරත්‌තානං විසමලොභාභිභූතානං මිච්‌ඡාධම්‌මපරෙතානං යක්‌ඛා වාළෙ අමනුස්‌සෙ ඔස්‌සජ්‌ජන්‌ති 5, තෙන බහූ මනුස්‌සා කාලං කරොන්‌ති. අයම්‌පි ඛො, බ්‍රාහ්‌මණ, හෙතු අයං පච්‌චයො යෙනෙතරහි මනුස්‌සානං ඛයො හොති, තනුත්‌තං පඤ්‌ඤායති, ගාමාපි අගාමා හොන්‌ති, නිගමාපි අනිගමා හොන්‌ති, නගරාපි අනගරා හොන්‌ති, ජනපදාපි අජනපදා හොන්‌තී’’ති.
‘‘Puna caparaṃ, brāhmaṇa, etarahi manussā adhammarāgarattā visamalobhābhibhūtā micchādhammaparetā. Tesaṃ adhammarāgarattānaṃ visamalobhābhibhūtānaṃ micchādhammaparetānaṃ yakkhā vāḷe amanusse ossajjanti 6, tena bahū manussā kālaṃ karonti. Ayampi kho, brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā hontī’’ti.
‘‘අභික්‌කන්‌තං, භො ගොතම…පෙ.… උපාසකං මං භවං ගොතමො ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති. ඡට්‌ඨං.
‘‘Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Chaṭṭhaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 6. පලොකසුත්‌තවණ්‌ණනා • 6. Palokasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. පලොකසුත්‌තවණ්‌ණනා • 6. Palokasuttavaṇṇanā
