| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. பலோகஸுத்தவண்ணனா
6. Palokasuttavaṇṇanā
57. ச²ட்டே² ஆசரியபாசரியானந்தி ஆசரியானம்பி ஆசரியானங். நிரந்தரபு²டோ நேரயிகஸத்தேஹி நிரயகா³மிகம்மஸ்ஸ காரகானங் ப³ஹுபா⁴வா. உப⁴யம்பேதந்தி யதா²வுத்தங் அத்த²த்³வயங். க⁴னநிவாஸதந்தி கா³மானங் க⁴னஸன்னிவாஸதங். ஏகந்தேனேவ அத⁴ம்மோதி அயோனிஸோமனஸிகாரஹேதுகத்தா அனத்த²ஹேதுதாய ச நியமேனேவ அத⁴ம்மோ. ந அத⁴ம்மராகோ³தி அதி⁴ப்பேதோதி பரபரிக்கா²ரேஸு ராகோ³ விய ந மஹாஸாவஜ்ஜோதி கத்வா வுத்தங். ததா² ஹி ஸகஸகபரிக்கா²ரவிஸயோ ராகோ³ விஸமலோபோ⁴ விய ந ஏகந்ததோ அபாயுப்பத்திஜனகோ. பரபரிக்கா²ரேஸு உப்பஜ்ஜமானஸ்ஸ மஹாஸாவஜ்ஜதாய அத⁴ம்மராக³தா. லோப⁴ஸ்ஸ ஸமகாலோ நாம நத்தி² காயது³ச்சரிதாதீ³னங் விய அயோனிஸோமனஸிகாரஸமுட்டா²னத்தா. ஏஸாதி ஏஸோ பாபத⁴ம்மோ. ஸமலோபோ⁴ விஸமலக்க²ணாபா⁴வதோ. ததா² ஹி தங்ஸமுட்டா²னோ பயோகோ³ மிச்சா²சாரோதி ந வுச்சதி. அவத்து²படிஸேவனஸங்கா²தேனாதி யங் லோகியஸாது⁴ஸமனுஞ்ஞாதங் ராக³ஸ்ஸ வத்து²ட்டா²னங், ததோ அஞ்ஞஸ்மிங் வத்து²ஸ்மிங் படிஸேவனஸங்கா²தேன.
57. Chaṭṭhe ācariyapācariyānanti ācariyānampi ācariyānaṃ. Nirantaraphuṭo nerayikasattehi nirayagāmikammassa kārakānaṃ bahubhāvā. Ubhayampetanti yathāvuttaṃ atthadvayaṃ. Ghananivāsatanti gāmānaṃ ghanasannivāsataṃ. Ekanteneva adhammoti ayonisomanasikārahetukattā anatthahetutāya ca niyameneva adhammo. Na adhammarāgoti adhippetoti paraparikkhāresu rāgo viya na mahāsāvajjoti katvā vuttaṃ. Tathā hi sakasakaparikkhāravisayo rāgo visamalobho viya na ekantato apāyuppattijanako. Paraparikkhāresu uppajjamānassa mahāsāvajjatāya adhammarāgatā. Lobhassa samakālo nāma natthi kāyaduccaritādīnaṃ viya ayonisomanasikārasamuṭṭhānattā. Esāti eso pāpadhammo. Samalobho visamalakkhaṇābhāvato. Tathā hi taṃsamuṭṭhāno payogo micchācāroti na vuccati. Avatthupaṭisevanasaṅkhātenāti yaṃ lokiyasādhusamanuññātaṃ rāgassa vatthuṭṭhānaṃ, tato aññasmiṃ vatthusmiṃ paṭisevanasaṅkhātena.
விவித⁴ஸஸ்ஸானந்தி ஸாலிவீஹிஆதி³னானப்பகாரஸஸ்ஸானங். து³ஸ்ஸஸ்ஸந்தி பச்சயதூ³ஸேன தூ³ஸிதங் ஸஸ்ஸங். ஸம்பஜ்ஜமானேதி நிப்ப²ஜ்ஜனதோ பகே³வ க³ப்³ப⁴பரிவுத்³தி⁴காலே. பாணகாதி ஸலபா⁴தி³பாணகா. பதந்தீதி ஸஸ்ஸானங் மத்த²கே பதந்தி. ஸலாகாமத்தமேவ ஸம்பஜ்ஜதீதி வட்³டி⁴த்வா க³ப்³ப⁴ங் க³ஹேதுங் அஸமத்த²ங் ஸம்பஜ்ஜதி. தேதி வாளஅமனுஸ்ஸா. லத்³தோ⁴காஸாதி யக்கா²தி⁴பதீஹி அனுஞ்ஞாதத்தா லத்³தோ⁴காஸா.
Vividhasassānanti sālivīhiādinānappakārasassānaṃ. Dussassanti paccayadūsena dūsitaṃ sassaṃ. Sampajjamāneti nipphajjanato pageva gabbhaparivuddhikāle. Pāṇakāti salabhādipāṇakā. Patantīti sassānaṃ matthake patanti. Salākāmattameva sampajjatīti vaḍḍhitvā gabbhaṃ gahetuṃ asamatthaṃ sampajjati. Teti vāḷaamanussā. Laddhokāsāti yakkhādhipatīhi anuññātattā laddhokāsā.
பலோகஸுத்தவண்ணனா நிட்டி²தா.
Palokasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. பலோகஸுத்தங் • 6. Palokasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. பலோகஸுத்தவண்ணனா • 6. Palokasuttavaṇṇanā
