| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. පමාදාදිවග්‌ගො
9. Pamādādivaggo
81. ‘‘අප්‌පමත්‌තිකා එසා, භික්‌ඛවෙ, වුද්‌ධි යදිදං යසොවුද්‌ධි. එතදග්‌ගං, භික්‌ඛවෙ, වුද්‌ධීනං යදිදං පඤ්‌ඤාවුද්‌ධි. තස්‌මාතිහ, භික්‌ඛවෙ, එවං සික්‌ඛිතබ්‌බං – ‘පඤ්‌ඤාවුද්‌ධියා වද්‌ධිස්‌සාමා’ති. එවඤ්‌හි වො, භික්‌ඛවෙ, සික්‌ඛිතබ්‌බ’’න්‌ති. පඨමං.
81. ‘‘Appamattikā esā, bhikkhave, vuddhi yadidaṃ yasovuddhi. Etadaggaṃ, bhikkhave, vuddhīnaṃ yadidaṃ paññāvuddhi. Tasmātiha, bhikkhave, evaṃ sikkhitabbaṃ – ‘paññāvuddhiyā vaddhissāmā’ti. Evañhi vo, bhikkhave, sikkhitabba’’nti. Paṭhamaṃ.
82. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, පමාදො. පමාදො, භික්‌ඛවෙ, මහතො අනත්‌ථාය සංවත්‌තතී’’ති. දුතියං.
82. ‘‘Nāhaṃ , bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, pamādo. Pamādo, bhikkhave, mahato anatthāya saṃvattatī’’ti. Dutiyaṃ.
83. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, අප්‌පමාදො. අප්‌පමාදො, භික්‌ඛවෙ, මහතො අත්‌ථාය සංවත්‌තතී’’ති. තතියං.
83. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, appamādo. Appamādo, bhikkhave, mahato atthāya saṃvattatī’’ti. Tatiyaṃ.
84. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, කොසජ්‌ජං. කොසජ්‌ජං, භික්‌ඛවෙ, මහතො අනත්‌ථාය සංවත්‌තතී’’ති. චතුත්‌ථං.
84. ‘‘Nāhaṃ , bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, kosajjaṃ. Kosajjaṃ, bhikkhave, mahato anatthāya saṃvattatī’’ti. Catutthaṃ.
85. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, වීරියාරම්‌භො. වීරියාරම්‌භො, භික්‌ඛවෙ, මහතො අත්‌ථාය සංවත්‌තතී’’ති. පඤ්‌චමං.
85. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, vīriyārambho. Vīriyārambho, bhikkhave, mahato atthāya saṃvattatī’’ti. Pañcamaṃ.
86. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, මහිච්‌ඡතා. මහිච්‌ඡතා, භික්‌ඛවෙ, මහතො අනත්‌ථාය සංවත්‌තතී’’ති. ඡට්‌ඨං.
86. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, mahicchatā. Mahicchatā, bhikkhave, mahato anatthāya saṃvattatī’’ti. Chaṭṭhaṃ.
87. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, අප්‌පිච්‌ඡතා. අප්‌පිච්‌ඡතා, භික්‌ඛවෙ, මහතො අත්‌ථාය සංවත්‌තතී’’ති. සත්‌තමං.
87. ‘‘Nāhaṃ , bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, appicchatā. Appicchatā, bhikkhave, mahato atthāya saṃvattatī’’ti. Sattamaṃ.
88. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, අසන්‌තුට්‌ඨිතා. අසන්‌තුට්‌ඨිතා, භික්‌ඛවෙ, මහතො අනත්‌ථාය සංවත්‌තතී’’ති. අට්‌ඨමං.
88. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, asantuṭṭhitā. Asantuṭṭhitā, bhikkhave, mahato anatthāya saṃvattatī’’ti. Aṭṭhamaṃ.
89. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, සන්‌තුට්‌ඨිතා. සන්‌තුට්‌ඨිතා, භික්‌ඛවෙ, මහතො අත්‌ථාය සංවත්‌තතී’’ති. නවමං.
89. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, santuṭṭhitā. Santuṭṭhitā, bhikkhave, mahato atthāya saṃvattatī’’ti. Navamaṃ.
90. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, අයොනිසො මනසිකාරො. අයොනිසොමනසිකාරො , භික්‌ඛවෙ, මහතො අනත්‌ථාය සංවත්‌තතී’’ති. දසමං.
90. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, ayoniso manasikāro. Ayonisomanasikāro , bhikkhave, mahato anatthāya saṃvattatī’’ti. Dasamaṃ.
91. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, යොනිසො මනසිකාරො. යොනිසොමනසිකාරො, භික්‌ඛවෙ, මහතො අත්‌ථාය සංවත්‌තතී’’ති. එකාදසමං.
91. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, yoniso manasikāro. Yonisomanasikāro, bhikkhave, mahato atthāya saṃvattatī’’ti. Ekādasamaṃ.
92. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, අසම්‌පජඤ්‌ඤං. අසම්‌පජඤ්‌ඤං, භික්‌ඛවෙ, මහතො අනත්‌ථාය සංවත්‌තතී’’ති. ද්‌වාදසමං.
92. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, asampajaññaṃ. Asampajaññaṃ, bhikkhave, mahato anatthāya saṃvattatī’’ti. Dvādasamaṃ.
93. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, සම්‌පජඤ්‌ඤං. සම්‌පජඤ්‌ඤං, භික්‌ඛවෙ, මහතො අත්‌ථාය සංවත්‌තතී’’ති. තෙරසමං.
93. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, sampajaññaṃ. Sampajaññaṃ, bhikkhave, mahato atthāya saṃvattatī’’ti. Terasamaṃ.
94. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, පාපමිත්‌තතා. පාපමිත්‌තතා, භික්‌ඛවෙ, මහතො අනත්‌ථාය සංවත්‌තතී’’ති. චුද්‌දසමං.
94. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, pāpamittatā. Pāpamittatā, bhikkhave, mahato anatthāya saṃvattatī’’ti. Cuddasamaṃ.
95. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, කල්‍යාණමිත්‌තතා. කල්‍යාණමිත්‌තතා, භික්‌ඛවෙ, මහතො අත්‌ථාය සංවත්‌තතී’’ති. පන්‌නරසමං.
95. ‘‘Nāhaṃ , bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, kalyāṇamittatā. Kalyāṇamittatā, bhikkhave, mahato atthāya saṃvattatī’’ti. Pannarasamaṃ.
96. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අනත්‌ථාය සංවත්‌තති යථයිදං, භික්‌ඛවෙ, අනුයොගො අකුසලානං ධම්‌මානං, අනනුයොගො කුසලානං ධම්‌මානං. අනුයොගො, භික්‌ඛවෙ, අකුසලානං ධම්‌මානං, අනනුයොගො කුසලානං ධම්‌මානං මහතො අනත්‌ථාය සංවත්‌තතී’’ති. සොළසමං.
96. ‘‘Nāhaṃ, bhikkhave, aññaṃ ekadhammampi samanupassāmi yo evaṃ mahato anatthāya saṃvattati yathayidaṃ, bhikkhave, anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogo, bhikkhave, akusalānaṃ dhammānaṃ, ananuyogo kusalānaṃ dhammānaṃ mahato anatthāya saṃvattatī’’ti. Soḷasamaṃ.
97. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං මහතො අත්‌ථාය සංවත්‌තති යථයිදං, භික්‌ඛවෙ, අනුයොගො කුසලානං ධම්‌මානං, අනනුයොගො අකුසලානං ධම්‌මානං. අනුයොගො, භික්‌ඛවෙ, කුසලානං ධම්‌මානං, අනනුයොගො අකුසලානං ධම්‌මානං මහතො අත්‌ථාය සංවත්‌තතී’’ති. සත්‌තරසමං.
97. ‘‘Nāhaṃ , bhikkhave, aññaṃ ekadhammampi samanupassāmi yo evaṃ mahato atthāya saṃvattati yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogo, bhikkhave, kusalānaṃ dhammānaṃ, ananuyogo akusalānaṃ dhammānaṃ mahato atthāya saṃvattatī’’ti. Sattarasamaṃ.
පමාදාදිවග්‌ගො නවමො.
Pamādādivaggo navamo.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. පමාදාදිවග්‌ගවණ්‌ණනා • 9. Pamādādivaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8. කල්‍යාණමිත්‌තාදිවග්‌ගවණ්‌ණනා • 8. Kalyāṇamittādivaggavaṇṇanā
