| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. பமாத³விஹாரீஸுத்தங்
4. Pamādavihārīsuttaṃ
97. ‘‘பமாத³விஹாரிஞ்ச வோ, பி⁴க்க²வே, தே³ஸெஸ்ஸாமி அப்பமாத³விஹாரிஞ்ச. தங் ஸுணாத². கத²ஞ்ச, பி⁴க்க²வே, பமாத³விஹாரீ ஹோதி? சக்கு²ந்த்³ரியங் அஸங்வுதஸ்ஸ, பி⁴க்க²வே, விஹரதோ சித்தங் ப்³யாஸிஞ்சதி 1. சக்கு²விஞ்ஞெய்யேஸு ரூபேஸு தஸ்ஸ ப்³யாஸித்தசித்தஸ்ஸ பாமோஜ்ஜங் ந ஹோதி. பாமோஜ்ஜே அஸதி பீதி ந ஹோதி. பீதியா அஸதி பஸ்ஸத்³தி⁴ ந ஹோதி. பஸ்ஸத்³தி⁴யா அஸதி து³க்க²ங் ஹோதி. து³க்கி²னோ சித்தங் ந ஸமாதி⁴யதி. அஸமாஹிதே சித்தே த⁴ம்மா ந பாதுப⁴வந்தி. த⁴ம்மானங் அபாதுபா⁴வா பமாத³விஹாரீ த்வேவ ஸங்க²ங் க³ச்ச²தி…பே॰… ஜிவ்ஹிந்த்³ரியங் அஸங்வுதஸ்ஸ, பி⁴க்க²வே, விஹரதோ சித்தங் ப்³யாஸிஞ்சதி ஜிவ்ஹாவிஞ்ஞெய்யேஸு ரஸேஸு, தஸ்ஸ ப்³யாஸித்தசித்தஸ்ஸ…பே॰… பமாத³விஹாரீ த்வேவ ஸங்க²ங் க³ச்ச²தி…பே॰… மனிந்த்³ரியங் அஸங்வுதஸ்ஸ, பி⁴க்க²வே, விஹரதோ சித்தங் ப்³யாஸிஞ்சதி மனோவிஞ்ஞெய்யேஸு த⁴ம்மேஸு, தஸ்ஸ ப்³யாஸித்தசித்தஸ்ஸ பாமோஜ்ஜங் ந ஹோதி. பாமோஜ்ஜே அஸதி பீதி ந ஹோதி . பீதியா அஸதி பஸ்ஸத்³தி⁴ ந ஹோதி. பஸ்ஸத்³தி⁴யா அஸதி து³க்க²ங் ஹோதி. து³க்கி²னோ சித்தங் ந ஸமாதி⁴யதி. அஸமாஹிதே சித்தே த⁴ம்மா ந பாதுப⁴வந்தி . த⁴ம்மானங் அபாதுபா⁴வா பமாத³விஹாரீ த்வேவ ஸங்க²ங் க³ச்ச²தி. ஏவங் கோ², பி⁴க்க²வே, பமாத³விஹாரீ ஹோதி.
97. ‘‘Pamādavihāriñca vo, bhikkhave, desessāmi appamādavihāriñca. Taṃ suṇātha. Kathañca, bhikkhave, pamādavihārī hoti? Cakkhundriyaṃ asaṃvutassa, bhikkhave, viharato cittaṃ byāsiñcati 2. Cakkhuviññeyyesu rūpesu tassa byāsittacittassa pāmojjaṃ na hoti. Pāmojje asati pīti na hoti. Pītiyā asati passaddhi na hoti. Passaddhiyā asati dukkhaṃ hoti. Dukkhino cittaṃ na samādhiyati. Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhaṃ gacchati…pe… jivhindriyaṃ asaṃvutassa, bhikkhave, viharato cittaṃ byāsiñcati jivhāviññeyyesu rasesu, tassa byāsittacittassa…pe… pamādavihārī tveva saṅkhaṃ gacchati…pe… manindriyaṃ asaṃvutassa, bhikkhave, viharato cittaṃ byāsiñcati manoviññeyyesu dhammesu, tassa byāsittacittassa pāmojjaṃ na hoti. Pāmojje asati pīti na hoti . Pītiyā asati passaddhi na hoti. Passaddhiyā asati dukkhaṃ hoti. Dukkhino cittaṃ na samādhiyati. Asamāhite citte dhammā na pātubhavanti . Dhammānaṃ apātubhāvā pamādavihārī tveva saṅkhaṃ gacchati. Evaṃ kho, bhikkhave, pamādavihārī hoti.
‘‘கத²ஞ்ச, பி⁴க்க²வே, அப்பமாத³விஹாரீ ஹோதி? சக்கு²ந்த்³ரியங் ஸங்வுதஸ்ஸ, பி⁴க்க²வே, விஹரதோ சித்தங் ந ப்³யாஸிஞ்சதி சக்கு²விஞ்ஞெய்யேஸு ரூபேஸு, தஸ்ஸ அப்³யாஸித்தசித்தஸ்ஸ பாமோஜ்ஜங் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ங் விஹரதி. ஸுகி²னோ சித்தங் ஸமாதி⁴யதி. ஸமாஹிதே சித்தே த⁴ம்மா பாதுப⁴வந்தி. த⁴ம்மானங் பாதுபா⁴வா அப்பமாத³விஹாரீ த்வேவ ஸங்க²ங் க³ச்ச²தி…பே॰… ஜிவ்ஹிந்த்³ரியங் ஸங்வுதஸ்ஸ, பி⁴க்க²வே, விஹரதோ சித்தங் ந ப்³யாஸிஞ்சதி…பே॰… அப்பமாத³விஹாரீ த்வேவ ஸங்க²ங் க³ச்ச²தி. மனிந்த்³ரியங் ஸங்வுதஸ்ஸ, பி⁴க்க²வே, விஹரதோ சித்தங் ந ப்³யாஸிஞ்சதி, மனோவிஞ்ஞெய்யேஸு த⁴ம்மேஸு, தஸ்ஸ அப்³யாஸித்தசித்தஸ்ஸ பாமோஜ்ஜங் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ங் விஹரதி. ஸுகி²னோ சித்தங் ஸமாதி⁴யதி. ஸமாஹிதே சித்தே த⁴ம்மா பாதுப⁴வந்தி. த⁴ம்மானங் பாதுபா⁴வா அப்பமாத³விஹாரீ த்வேவ ஸங்க²ங் க³ச்ச²தி. ஏவங் கோ², பி⁴க்க²வே, அப்பமாத³விஹாரீ ஹோதீ’’தி. சதுத்த²ங்.
‘‘Kathañca, bhikkhave, appamādavihārī hoti? Cakkhundriyaṃ saṃvutassa, bhikkhave, viharato cittaṃ na byāsiñcati cakkhuviññeyyesu rūpesu, tassa abyāsittacittassa pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ viharati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhaṃ gacchati…pe… jivhindriyaṃ saṃvutassa, bhikkhave, viharato cittaṃ na byāsiñcati…pe… appamādavihārī tveva saṅkhaṃ gacchati. Manindriyaṃ saṃvutassa, bhikkhave, viharato cittaṃ na byāsiñcati, manoviññeyyesu dhammesu, tassa abyāsittacittassa pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ viharati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhaṃ gacchati. Evaṃ kho, bhikkhave, appamādavihārī hotī’’ti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. பமாத³விஹாரீஸுத்தவண்ணனா • 4. Pamādavihārīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. பமாத³விஹாரீஸுத்தவண்ணனா • 4. Pamādavihārīsuttavaṇṇanā
