| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൪. പമാദവിഹാരീസുത്തം
4. Pamādavihārīsuttaṃ
൯൭. ‘‘പമാദവിഹാരിഞ്ച വോ, ഭിക്ഖവേ, ദേസേസ്സാമി അപ്പമാദവിഹാരിഞ്ച. തം സുണാഥ. കഥഞ്ച, ഭിക്ഖവേ, പമാദവിഹാരീ ഹോതി? ചക്ഖുന്ദ്രിയം അസംവുതസ്സ, ഭിക്ഖവേ, വിഹരതോ ചിത്തം ബ്യാസിഞ്ചതി 1. ചക്ഖുവിഞ്ഞേയ്യേസു രൂപേസു തസ്സ ബ്യാസിത്തചിത്തസ്സ പാമോജ്ജം ന ഹോതി. പാമോജ്ജേ അസതി പീതി ന ഹോതി. പീതിയാ അസതി പസ്സദ്ധി ന ഹോതി. പസ്സദ്ധിയാ അസതി ദുക്ഖം ഹോതി. ദുക്ഖിനോ ചിത്തം ന സമാധിയതി. അസമാഹിതേ ചിത്തേ ധമ്മാ ന പാതുഭവന്തി. ധമ്മാനം അപാതുഭാവാ പമാദവിഹാരീ ത്വേവ സങ്ഖം ഗച്ഛതി…പേ॰… ജിവ്ഹിന്ദ്രിയം അസംവുതസ്സ, ഭിക്ഖവേ, വിഹരതോ ചിത്തം ബ്യാസിഞ്ചതി ജിവ്ഹാവിഞ്ഞേയ്യേസു രസേസു, തസ്സ ബ്യാസിത്തചിത്തസ്സ…പേ॰… പമാദവിഹാരീ ത്വേവ സങ്ഖം ഗച്ഛതി…പേ॰… മനിന്ദ്രിയം അസംവുതസ്സ, ഭിക്ഖവേ, വിഹരതോ ചിത്തം ബ്യാസിഞ്ചതി മനോവിഞ്ഞേയ്യേസു ധമ്മേസു, തസ്സ ബ്യാസിത്തചിത്തസ്സ പാമോജ്ജം ന ഹോതി. പാമോജ്ജേ അസതി പീതി ന ഹോതി . പീതിയാ അസതി പസ്സദ്ധി ന ഹോതി. പസ്സദ്ധിയാ അസതി ദുക്ഖം ഹോതി. ദുക്ഖിനോ ചിത്തം ന സമാധിയതി. അസമാഹിതേ ചിത്തേ ധമ്മാ ന പാതുഭവന്തി . ധമ്മാനം അപാതുഭാവാ പമാദവിഹാരീ ത്വേവ സങ്ഖം ഗച്ഛതി. ഏവം ഖോ, ഭിക്ഖവേ, പമാദവിഹാരീ ഹോതി.
97. ‘‘Pamādavihāriñca vo, bhikkhave, desessāmi appamādavihāriñca. Taṃ suṇātha. Kathañca, bhikkhave, pamādavihārī hoti? Cakkhundriyaṃ asaṃvutassa, bhikkhave, viharato cittaṃ byāsiñcati 2. Cakkhuviññeyyesu rūpesu tassa byāsittacittassa pāmojjaṃ na hoti. Pāmojje asati pīti na hoti. Pītiyā asati passaddhi na hoti. Passaddhiyā asati dukkhaṃ hoti. Dukkhino cittaṃ na samādhiyati. Asamāhite citte dhammā na pātubhavanti. Dhammānaṃ apātubhāvā pamādavihārī tveva saṅkhaṃ gacchati…pe… jivhindriyaṃ asaṃvutassa, bhikkhave, viharato cittaṃ byāsiñcati jivhāviññeyyesu rasesu, tassa byāsittacittassa…pe… pamādavihārī tveva saṅkhaṃ gacchati…pe… manindriyaṃ asaṃvutassa, bhikkhave, viharato cittaṃ byāsiñcati manoviññeyyesu dhammesu, tassa byāsittacittassa pāmojjaṃ na hoti. Pāmojje asati pīti na hoti . Pītiyā asati passaddhi na hoti. Passaddhiyā asati dukkhaṃ hoti. Dukkhino cittaṃ na samādhiyati. Asamāhite citte dhammā na pātubhavanti . Dhammānaṃ apātubhāvā pamādavihārī tveva saṅkhaṃ gacchati. Evaṃ kho, bhikkhave, pamādavihārī hoti.
‘‘കഥഞ്ച, ഭിക്ഖവേ, അപ്പമാദവിഹാരീ ഹോതി? ചക്ഖുന്ദ്രിയം സംവുതസ്സ, ഭിക്ഖവേ, വിഹരതോ ചിത്തം ന ബ്യാസിഞ്ചതി ചക്ഖുവിഞ്ഞേയ്യേസു രൂപേസു, തസ്സ അബ്യാസിത്തചിത്തസ്സ പാമോജ്ജം ജായതി. പമുദിതസ്സ പീതി ജായതി. പീതിമനസ്സ കായോ പസ്സമ്ഭതി. പസ്സദ്ധകായോ സുഖം വിഹരതി. സുഖിനോ ചിത്തം സമാധിയതി. സമാഹിതേ ചിത്തേ ധമ്മാ പാതുഭവന്തി. ധമ്മാനം പാതുഭാവാ അപ്പമാദവിഹാരീ ത്വേവ സങ്ഖം ഗച്ഛതി…പേ॰… ജിവ്ഹിന്ദ്രിയം സംവുതസ്സ, ഭിക്ഖവേ, വിഹരതോ ചിത്തം ന ബ്യാസിഞ്ചതി…പേ॰… അപ്പമാദവിഹാരീ ത്വേവ സങ്ഖം ഗച്ഛതി. മനിന്ദ്രിയം സംവുതസ്സ, ഭിക്ഖവേ, വിഹരതോ ചിത്തം ന ബ്യാസിഞ്ചതി, മനോവിഞ്ഞേയ്യേസു ധമ്മേസു, തസ്സ അബ്യാസിത്തചിത്തസ്സ പാമോജ്ജം ജായതി. പമുദിതസ്സ പീതി ജായതി. പീതിമനസ്സ കായോ പസ്സമ്ഭതി. പസ്സദ്ധകായോ സുഖം വിഹരതി. സുഖിനോ ചിത്തം സമാധിയതി. സമാഹിതേ ചിത്തേ ധമ്മാ പാതുഭവന്തി. ധമ്മാനം പാതുഭാവാ അപ്പമാദവിഹാരീ ത്വേവ സങ്ഖം ഗച്ഛതി. ഏവം ഖോ, ഭിക്ഖവേ, അപ്പമാദവിഹാരീ ഹോതീ’’തി. ചതുത്ഥം.
‘‘Kathañca, bhikkhave, appamādavihārī hoti? Cakkhundriyaṃ saṃvutassa, bhikkhave, viharato cittaṃ na byāsiñcati cakkhuviññeyyesu rūpesu, tassa abyāsittacittassa pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ viharati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhaṃ gacchati…pe… jivhindriyaṃ saṃvutassa, bhikkhave, viharato cittaṃ na byāsiñcati…pe… appamādavihārī tveva saṅkhaṃ gacchati. Manindriyaṃ saṃvutassa, bhikkhave, viharato cittaṃ na byāsiñcati, manoviññeyyesu dhammesu, tassa abyāsittacittassa pāmojjaṃ jāyati. Pamuditassa pīti jāyati. Pītimanassa kāyo passambhati. Passaddhakāyo sukhaṃ viharati. Sukhino cittaṃ samādhiyati. Samāhite citte dhammā pātubhavanti. Dhammānaṃ pātubhāvā appamādavihārī tveva saṅkhaṃ gacchati. Evaṃ kho, bhikkhave, appamādavihārī hotī’’ti. Catutthaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൪. പമാദവിഹാരീസുത്തവണ്ണനാ • 4. Pamādavihārīsuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൪. പമാദവിഹാരീസുത്തവണ്ണനാ • 4. Pamādavihārīsuttavaṇṇanā
