| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. பங்ஸுதோ⁴வகஸுத்தவண்ணனா
10. Paṃsudhovakasuttavaṇṇanā
102. த³ஸமே தோ⁴வதீதி விக்கா²லேதி. ஸந்தோ⁴வதீதி ஸுட்டு² தோ⁴வதி, புனப்புனங் தோ⁴வதி. நித்³தோ⁴வதீதி நிக்³க³ண்ஹித்வா தோ⁴வதி. அனித்³த⁴ந்தகஸாவந்தி அனீஹததோ³ஸங் அனபனீதகஸாவங். பப⁴ங்கூ³தி பபி⁴ஜ்ஜனஸபா⁴வங், அதி⁴கரணீயங் ட²பெத்வா முட்டி²காய பஹடமத்தங் பி⁴ஜ்ஜதி. பட்டிகாயாதி ஸுவண்ணபட்டகாய. கீ³வெய்யகேதி கீ³வாலங்காரே.
102. Dasame dhovatīti vikkhāleti. Sandhovatīti suṭṭhu dhovati, punappunaṃ dhovati. Niddhovatīti niggaṇhitvā dhovati. Aniddhantakasāvanti anīhatadosaṃ anapanītakasāvaṃ. Pabhaṅgūti pabhijjanasabhāvaṃ, adhikaraṇīyaṃ ṭhapetvā muṭṭhikāya pahaṭamattaṃ bhijjati. Paṭṭikāyāti suvaṇṇapaṭṭakāya. Gīveyyaketi gīvālaṅkāre.
அதி⁴சித்தந்தி ஸமத²விபஸ்ஸனாசித்தங். அனுயுத்தஸ்ஸாதி பா⁴வெந்தஸ்ஸ. ஸசேதஸோதி சித்தஸம்பன்னோ. த³ப்³ப³ஜாதிகோதி பண்டி³தஜாதிகோ. காமவிதக்காதீ³ஸு காமே ஆரப்³ப⁴ உப்பன்னோ விதக்கோ காமவிதக்கோ. ப்³யாபாத³விஹிங்ஸஸம்பயுத்தா விதக்கா ப்³யாபாத³விஹிங்ஸவிதக்கா நாம. ஞாதிவிதக்காதீ³ஸு ‘‘அம்ஹாகங் ஞாதகா ப³ஹூ புஞ்ஞவந்தா’’திஆதி³னா நயேன ஞாதகே ஆரப்³ப⁴ உப்பன்னோ விதக்கோ ஞாதிவிதக்கோ. ‘‘அஸுகோ ஜனபதோ³ கே²மோ ஸுபி⁴க்கோ²’’திஆதி³னா நயேன ஜனபத³மாரப்³ப⁴ உப்பன்னோ விதக்கோ ஜனபத³விதக்கோ. ‘‘அஹோ வத மங் பரே ந அவஜானெய்யு’’ந்தி ஏவங் உப்பன்னோ விதக்கோ அனவஞ்ஞத்திபடிஸங்யுத்தோ விதக்கோ நாம. த⁴ம்மவிதக்காவஸிஸ்ஸந்தீதி த⁴ம்மவிதக்கா நாம த³ஸவிபஸ்ஸனுபக்கிலேஸவிதக்கா. ஸோ ஹோதி ஸமாதி⁴ ந சேவ ஸந்தோதி ஸோ அவஸிட்ட²த⁴ம்மவிதக்கோ விபஸ்ஸனாஸமாதி⁴ அவூபஸந்தகிலேஸத்தா ஸந்தோ ந ஹோதி. ந பணீதோதி ந அதப்பகோ. நப்படிப்பஸ்ஸத்³தி⁴லத்³தோ⁴தி ந கிலேஸபடிப்பஸ்ஸத்³தி⁴யா லத்³தோ⁴. ந ஏகோதி³பா⁴வாதி⁴க³தோதி ந ஏகக்³க³பா⁴வப்பத்தோ. ஸஸங்கா²ரனிக்³க³ய்ஹவாரிதக³தோதி ஸஸங்கா²ரேன ஸப்பயோகே³ன கிலேஸே நிக்³க³ண்ஹித்வா வாரெத்வா வாரிதோ, ந கிலேஸானங் சி²ன்னந்தே உப்பன்னோ, கிலேஸே பன வாரெத்வா உப்பன்னோ.
Adhicittanti samathavipassanācittaṃ. Anuyuttassāti bhāventassa. Sacetasoti cittasampanno. Dabbajātikoti paṇḍitajātiko. Kāmavitakkādīsu kāme ārabbha uppanno vitakko kāmavitakko. Byāpādavihiṃsasampayuttā vitakkā byāpādavihiṃsavitakkā nāma. Ñātivitakkādīsu ‘‘amhākaṃ ñātakā bahū puññavantā’’tiādinā nayena ñātake ārabbha uppanno vitakko ñātivitakko. ‘‘Asuko janapado khemo subhikkho’’tiādinā nayena janapadamārabbha uppanno vitakko janapadavitakko. ‘‘Aho vata maṃ pare na avajāneyyu’’nti evaṃ uppanno vitakko anavaññattipaṭisaṃyutto vitakko nāma. Dhammavitakkāvasissantīti dhammavitakkā nāma dasavipassanupakkilesavitakkā. So hoti samādhi na ceva santoti so avasiṭṭhadhammavitakko vipassanāsamādhi avūpasantakilesattā santo na hoti. Na paṇītoti na atappako. Nappaṭippassaddhiladdhoti na kilesapaṭippassaddhiyā laddho. Na ekodibhāvādhigatoti na ekaggabhāvappatto. Sasaṅkhāraniggayhavāritagatoti sasaṅkhārena sappayogena kilese niggaṇhitvā vāretvā vārito, na kilesānaṃ chinnante uppanno, kilese pana vāretvā uppanno.
ஹோதி ஸோ, பி⁴க்க²வே, ஸமயோதி எத்த² ஸமயோ நாம உதுஸப்பாயங் ஆஹாரஸப்பாயங் ஸேனாஸனஸப்பாயங் புக்³க³லஸப்பாயங் த⁴ம்மஸ்ஸவனஸப்பாயந்தி இமேஸங் பஞ்சன்னங் ஸப்பாயானங் படிலாப⁴காலோ. யங் தங் சித்தந்தி யஸ்மிங் ஸமயே தங் விபஸ்ஸனாசித்தங். அஜ்ஜ²த்தங்யேவ ஸந்திட்ட²தீதி அத்தனியேவ திட்ட²தி. நியகஜ்ஜ²த்தஞ்ஹி இத⁴ அஜ்ஜ²த்தங் நாம. கோ³சரஜ்ஜ²த்தம்பி வட்டதி. புது²த்தாரம்மணங் பஹாய ஏகஸ்மிங் நிப்³பா³னகோ³சரேயேவ திட்ட²தீதி வுத்தங் ஹோதி. ஸன்னிஸீத³தீதி ஸுட்டு² நிஸீத³தி. ஏகோதி³ ஹோதீதி ஏகக்³க³ங் ஹோதி. ஸமாதி⁴யதீதி ஸம்மா ஆதி⁴யதி. ஸந்தோதிஆதீ³ஸு பச்சனீககிலேஸவூபஸமேன ஸந்தோ. அதப்பகட்டே²ன பணீதோ. கிலேஸபடிப்பஸ்ஸத்³தி⁴யா லத்³த⁴த்தா படிப்பஸ்ஸத்³த⁴லத்³தோ⁴. ஏகக்³க³பா⁴வங் க³தத்தா ஏகோதி³பா⁴வாதி⁴க³தோ. கிலேஸானங் சி²ன்னந்தே உப்பன்னத்தா ந ஸப்பயோகே³ன கிலேஸே நிக்³க³ண்ஹித்வா வாரெத்வா வாரிதோதி ந ஸஸங்கா²ரனிக்³க³ய்ஹவாரிதக³தோ. எத்தாவதா அயங் பி⁴க்கு² விவட்டெத்வா அரஹத்தங் பத்தோ நாம ஹோதி.
Hotiso, bhikkhave, samayoti ettha samayo nāma utusappāyaṃ āhārasappāyaṃ senāsanasappāyaṃ puggalasappāyaṃ dhammassavanasappāyanti imesaṃ pañcannaṃ sappāyānaṃ paṭilābhakālo. Yaṃ taṃ cittanti yasmiṃ samaye taṃ vipassanācittaṃ. Ajjhattaṃyeva santiṭṭhatīti attaniyeva tiṭṭhati. Niyakajjhattañhi idha ajjhattaṃ nāma. Gocarajjhattampi vaṭṭati. Puthuttārammaṇaṃ pahāya ekasmiṃ nibbānagocareyeva tiṭṭhatīti vuttaṃ hoti. Sannisīdatīti suṭṭhu nisīdati. Ekodi hotīti ekaggaṃ hoti. Samādhiyatīti sammā ādhiyati. Santotiādīsu paccanīkakilesavūpasamena santo. Atappakaṭṭhena paṇīto. Kilesapaṭippassaddhiyā laddhattā paṭippassaddhaladdho. Ekaggabhāvaṃ gatattā ekodibhāvādhigato. Kilesānaṃ chinnante uppannattā na sappayogena kilese niggaṇhitvā vāretvā vāritoti na sasaṅkhāraniggayhavāritagato. Ettāvatā ayaṃ bhikkhu vivaṭṭetvā arahattaṃ patto nāma hoti.
இதா³னி கீ²ணாஸவஸ்ஸ ஸதோ அபி⁴ஞ்ஞாபடிபத³ங் த³ஸ்ஸெந்தோ யஸ்ஸ யஸ்ஸ சாதிஆதி³மாஹ. தத்த² அபி⁴ஞ்ஞா ஸச்சி²கரணீயஸ்ஸாதி அபி⁴ஜானித்வா பச்சக்க²ங் காதப்³ப³ஸ்ஸ. ஸதி ஸதிஆயதனேதி புப்³ப³ஹேதுஸங்கா²தே சேவ இதா³னி ச படிலத்³த⁴ப்³பே³ அபி⁴ஞ்ஞாபாத³கஜ்ஜா²னாதி³பே⁴தே³ ச ஸதி ஸதிகாரணே. வித்தா²ரதோ பன அயங் அபி⁴ஞ்ஞாகதா² விஸுத்³தி⁴மக்³கே³ (விஸுத்³தி⁴॰ 2.365 ஆத³யோ) வுத்தனயேனேவ வேதி³தப்³பா³. ஆஸவானங் க²யாதிஆதி³ செத்த² ப²லஸமாபத்திவஸேன வுத்தந்தி வேதி³தப்³ப³ங்.
Idāni khīṇāsavassa sato abhiññāpaṭipadaṃ dassento yassa yassa cātiādimāha. Tattha abhiññā sacchikaraṇīyassāti abhijānitvā paccakkhaṃ kātabbassa. Sati satiāyataneti pubbahetusaṅkhāte ceva idāni ca paṭiladdhabbe abhiññāpādakajjhānādibhede ca sati satikāraṇe. Vitthārato pana ayaṃ abhiññākathā visuddhimagge (visuddhi. 2.365 ādayo) vuttanayeneva veditabbā. Āsavānaṃ khayātiādi cettha phalasamāpattivasena vuttanti veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. பங்ஸுதோ⁴வகஸுத்தங் • 10. Paṃsudhovakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. பங்ஸுதோ⁴வகஸுத்தவண்ணனா • 10. Paṃsudhovakasuttavaṇṇanā
