| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. பங்ஸுதோ⁴வகஸுத்தவண்ணனா
10. Paṃsudhovakasuttavaṇṇanā
102. த³ஸமே அனீஹததோ³ஸந்தி அனபனீததூ²லகாளகங். அனபனீதகஸாவந்தி அனபக³தஸுகு²மகாளகங். பஹடமத்தந்தி ஆஹடமத்தங்.
102. Dasame anīhatadosanti anapanītathūlakāḷakaṃ. Anapanītakasāvanti anapagatasukhumakāḷakaṃ. Pahaṭamattanti āhaṭamattaṃ.
த³ஸகுஸலகம்மபத²வஸேன உப்பன்னங் சித்தங் சித்தமேவ, விபஸ்ஸனாபாத³கஅட்ட²ஸமாபத்திசித்தங் விபஸ்ஸனாசித்தஞ்ச ததோ சித்ததோ அதி⁴கங் சித்தந்தி அதி⁴சித்தந்தி ஆஹ ‘‘அதி⁴சித்தந்தி ஸமத²விபஸ்ஸனாசித்த’’ந்தி. அனுயுத்தஸ்ஸாதி அனுப்பன்னஸ்ஸ உப்பாத³னவஸேன உப்பன்னஸ்ஸ படிப்³ரூஹனவஸேன அனு அனு யுத்தஸ்ஸ, தத்த² யுத்தப்பயுத்தஸ்ஸாதி அத்தோ². எத்த² ச புரேப⁴த்தங் பிண்டா³ய சரித்வா பச்சா²ப⁴த்தங் பிண்ட³பாதப்படிக்கந்தோ நிஸீத³னங் ஆதா³ய ‘‘அஸுகஸ்மிங் ருக்க²மூலே வா வனஸண்டே³ வா பப்³பா⁴ரே வா ஸமணத⁴ம்மங் கரிஸ்ஸாமீ’’தி நிக்க²மந்தோபி தத்த² க³ந்த்வா ஹத்தே²ஹி வா பாதே³ஹி வா நிஸஜ்ஜட்டா²னதோ திணபண்ணானி அபனெந்தோபி அதி⁴சித்தங் அனுயுத்தோயேவ. நிஸீதி³த்வா பன ஹத்த²பாதே³ தோ⁴வித்வா மூலகம்மட்டா²னங் க³ஹெத்வா பா⁴வனங் அனுயுஞ்ஜந்தோ பா⁴வனாய அப்பனங் அப்பத்தாயபி அதி⁴சித்தமனுயுத்தோயேவ தத³த்தே²னபி தங்ஸத்³த³வோஹாரதோ. சித்தஸம்பன்னோதி த⁴ம்மசித்தஸ்ஸ ஸமன்னாக³தத்தா ஸம்பன்னசித்தோ. பண்டி³தஜாதிகோதி பண்டி³தஸபா⁴வோ.
Dasakusalakammapathavasena uppannaṃ cittaṃ cittameva, vipassanāpādakaaṭṭhasamāpatticittaṃ vipassanācittañca tato cittato adhikaṃ cittanti adhicittanti āha ‘‘adhicittanti samathavipassanācitta’’nti. Anuyuttassāti anuppannassa uppādanavasena uppannassa paṭibrūhanavasena anu anu yuttassa, tattha yuttappayuttassāti attho. Ettha ca purebhattaṃ piṇḍāya caritvā pacchābhattaṃ piṇḍapātappaṭikkanto nisīdanaṃ ādāya ‘‘asukasmiṃ rukkhamūle vā vanasaṇḍe vā pabbhāre vā samaṇadhammaṃ karissāmī’’ti nikkhamantopi tattha gantvā hatthehi vā pādehi vā nisajjaṭṭhānato tiṇapaṇṇāni apanentopi adhicittaṃ anuyuttoyeva. Nisīditvā pana hatthapāde dhovitvā mūlakammaṭṭhānaṃ gahetvā bhāvanaṃ anuyuñjanto bhāvanāya appanaṃ appattāyapi adhicittamanuyuttoyeva tadatthenapi taṃsaddavohārato. Cittasampannoti dhammacittassa samannāgatattā sampannacitto. Paṇḍitajātikoti paṇḍitasabhāvo.
காமே ஆரப்³பா⁴தி வத்து²காமே ஆரப்³ப⁴. காமராக³ஸங்கா²தேன வா காமேன படிஸங்யுத்தோ விதக்கோ காமவிதக்கோ. ப்³யாபஜ்ஜதி சித்தங் ஏதேனாதி ப்³யாபாதோ³, தோ³ஸோ. விஹிங்ஸந்தி ஏதாய ஸத்தே, விஹிங்ஸனங் வா தேஸங் ஏதந்தி விஹிங்ஸா, பரேஸங் விஹேட²னாகாரேன பவத்தஸ்ஸ கருணாபடிபக்க²ஸ்ஸ பாபத⁴ம்மஸ்ஸேதங் அதி⁴வசனங். ஞாதகே ஆரப்³ப⁴ உப்பன்னோ விதக்கோதி ஞாதகே ஆரப்³ப⁴ கே³ஹஸ்ஸிதபேமவஸேன உப்பன்னோ விதக்கோ. ஜனபத³மாரப்³ப⁴ உப்பன்னோ விதக்கோதி எத்தா²பி ஏஸேவ நயோ. அஹோ வத மங்…பே॰… உப்பன்னோ விதக்கோதி ‘‘அஹோ வத மங் பரே ந அவஜானெய்யுங், ந ஹெட்டா² கத்வா மஞ்ஞெய்யுங், பாஸாணச்ச²த்தங் விய க³ருங் கரெய்யு’’ந்தி ஏவங் உப்பன்னவிதக்கோ. த³ஸவிபஸ்ஸனுபக்கிலேஸவிதக்காதி ஓபா⁴ஸாதி³த³ஸவிபஸ்ஸனுபக்கிலேஸே ஆரப்³ப⁴ உப்பன்னவிதக்கா.
Kāme ārabbhāti vatthukāme ārabbha. Kāmarāgasaṅkhātena vā kāmena paṭisaṃyutto vitakko kāmavitakko. Byāpajjati cittaṃ etenāti byāpādo, doso. Vihiṃsanti etāya satte, vihiṃsanaṃ vā tesaṃ etanti vihiṃsā, paresaṃ viheṭhanākārena pavattassa karuṇāpaṭipakkhassa pāpadhammassetaṃ adhivacanaṃ. Ñātake ārabbha uppanno vitakkoti ñātake ārabbha gehassitapemavasena uppanno vitakko. Janapadamārabbha uppanno vitakkoti etthāpi eseva nayo. Aho vata maṃ…pe… uppanno vitakkoti ‘‘aho vata maṃ pare na avajāneyyuṃ, na heṭṭhā katvā maññeyyuṃ, pāsāṇacchattaṃ viya garuṃ kareyyu’’nti evaṃ uppannavitakko. Dasavipassanupakkilesavitakkāti obhāsādidasavipassanupakkilese ārabbha uppannavitakkā.
அவஸிட்டா² த⁴ம்மவிதக்கா ஏதஸ்ஸாதி அவஸிட்ட²த⁴ம்மவிதக்கோ, விபஸ்ஸனாஸமாதி⁴. ந ஏகக்³க³பா⁴வப்பத்தோ ந ஏகக்³க³தங் பத்தோ. ஏகங் உதே³தீதி ஹி ஏகோதி³, படிபக்கே²ஹி அனபி⁴பூ⁴தத்தா அக்³க³ங் ஸெட்ட²ங் ஹுத்வா உதே³தீதி அத்தோ². ஸெட்டோ²பி ஹி லோகே ஏகோதி வுச்சதி, ஏகஸ்மிங் ஆரம்மணே ஸமாதா⁴னவஸேன பவத்தசித்தஸ்ஸேதங் அதி⁴வசனங். ஏகோதி³ஸ்ஸ பா⁴வோ ஏகோதி³பா⁴வோ, ஏகக்³க³தாயேதங் அதி⁴வசனங்.
Avasiṭṭhā dhammavitakkā etassāti avasiṭṭhadhammavitakko, vipassanāsamādhi. Na ekaggabhāvappatto na ekaggataṃ patto. Ekaṃ udetīti hi ekodi, paṭipakkhehi anabhibhūtattā aggaṃ seṭṭhaṃ hutvā udetīti attho. Seṭṭhopi hi loke ekoti vuccati, ekasmiṃ ārammaṇe samādhānavasena pavattacittassetaṃ adhivacanaṃ. Ekodissa bhāvo ekodibhāvo, ekaggatāyetaṃ adhivacanaṃ.
நியகஜ்ஜ²த்தந்தி அத்தஸந்தானஸ்ஸேதங் அதி⁴வசனங். கோ³சரஜ்ஜ²த்தந்தி இத⁴ நிப்³பா³னங் அதி⁴ப்பேதங். தேனாஹ ‘‘ஏகஸ்மிங் நிப்³பா³னகோ³சரேயேவ திட்ட²தீ’’தி. ஸுட்டு² நிஸீத³தீதி ஸமாதி⁴படிபக்கே² கிலேஸே ஸன்னிஸீதெ³ந்தோ ஸுட்டு² நிஸீத³தி. ஏகக்³க³ங் ஹோதீதி அப்³யக்³க³பா⁴வப்பத்தியா ஏகக்³க³ங் ஹோதி. ஸம்மா ஆதி⁴யதீதி யதா² ஆரம்மணே ஸுட்டு² அப்பிதங் ஹோதி, ஏவங் ஸம்மா ஸம்மதே³வ ஆதி⁴யதி.
Niyakajjhattanti attasantānassetaṃ adhivacanaṃ. Gocarajjhattanti idha nibbānaṃ adhippetaṃ. Tenāha ‘‘ekasmiṃ nibbānagocareyeva tiṭṭhatī’’ti. Suṭṭhu nisīdatīti samādhipaṭipakkhe kilese sannisīdento suṭṭhu nisīdati. Ekaggaṃ hotīti abyaggabhāvappattiyā ekaggaṃ hoti. Sammā ādhiyatīti yathā ārammaṇe suṭṭhu appitaṃ hoti, evaṃ sammā sammadeva ādhiyati.
அபி⁴ஞ்ஞா ஸச்சி²கரணீயஸ்ஸாதி எத்த² ‘‘அபி⁴ஞ்ஞாய ஸச்சி²கரணீயஸ்ஸா’’தி வத்தப்³பே³ ‘‘அபி⁴ஞ்ஞா’’தி ய-காரலோபேன பன புன காலகிரியானித்³தே³ஸோ கதோதி ஆஹ ‘‘அபி⁴ஜானித்வா பச்சக்க²ங் காதப்³ப³ஸ்ஸா’’தி. அபி⁴ஞ்ஞாய இத்³தி⁴விதா⁴தி³ஞாணேன ஸச்சி²கிரியங் இத்³தி⁴வித⁴பச்சனுப⁴வனாதி³கங் அபி⁴ஞ்ஞாஸச்சி²கரணீயந்தி ஏவங் வா எத்த² அத்தோ² த³ட்ட²ப்³போ³. ஸக்கி²ப⁴ப்³ப³தங் பாபுணாதீதி எத்த² பன யஸ்ஸ பச்சக்க²ங் அத்தி², ஸோ ஸக்கீ², ஸக்கி²னோ ப⁴ப்³ப³தா ஸக்கி²ப⁴ப்³ப³தா, ஸக்கி²ப⁴வனந்தி வுத்தங் ஹோதி. ஸக்கீ² ச ஸோ ப⁴ப்³போ³ சாதி ஸக்கி²ப⁴ப்³போ³. அயஞ்ஹி இத்³தி⁴விதா⁴தீ³னங் ப⁴ப்³போ³ தத்த² ச ஸக்கீ²தி ஸக்கி²ப⁴ப்³போ³, தஸ்ஸ பா⁴வோ ஸக்கி²ப⁴ப்³ப³தா, தங் பாபுணாதீதி அத்தோ².
Abhiññāsacchikaraṇīyassāti ettha ‘‘abhiññāya sacchikaraṇīyassā’’ti vattabbe ‘‘abhiññā’’ti ya-kāralopena pana puna kālakiriyāniddeso katoti āha ‘‘abhijānitvā paccakkhaṃ kātabbassā’’ti. Abhiññāya iddhividhādiñāṇena sacchikiriyaṃ iddhividhapaccanubhavanādikaṃ abhiññāsacchikaraṇīyanti evaṃ vā ettha attho daṭṭhabbo. Sakkhibhabbataṃ pāpuṇātīti ettha pana yassa paccakkhaṃ atthi, so sakkhī, sakkhino bhabbatā sakkhibhabbatā, sakkhibhavananti vuttaṃ hoti. Sakkhī ca so bhabbo cāti sakkhibhabbo. Ayañhi iddhividhādīnaṃ bhabbo tattha ca sakkhīti sakkhibhabbo, tassa bhāvo sakkhibhabbatā, taṃ pāpuṇātīti attho.
அபி⁴ஞ்ஞாபாத³கஜ்ஜா²னாதி³பே⁴தே³தி எத்த² அபி⁴ஞ்ஞாபாதா³ ச அபி⁴ஞ்ஞாபாத³கஜ்ஜா²னஞ்ச அபி⁴ஞ்ஞாபாத³கஜ்ஜா²னானி. ஆதி³-ஸத்³தே³ன அரஹத்தஞ்ச அரஹத்தஸ்ஸ விபஸ்ஸனா ச ஸங்க³ஹிதாதி த³ட்ட²ப்³ப³ங். தேனேவ மஜ்ஜி²மனிகாயட்ட²கதா²யங் (ம॰ நி॰ அட்ட²॰ 2.198) –
Abhiññāpādakajjhānādibhedeti ettha abhiññāpādā ca abhiññāpādakajjhānañca abhiññāpādakajjhānāni. Ādi-saddena arahattañca arahattassa vipassanā ca saṅgahitāti daṭṭhabbaṃ. Teneva majjhimanikāyaṭṭhakathāyaṃ (ma. ni. aṭṭha. 2.198) –
‘‘ஸதி ஸதிஆயதனேதி ஸதி ஸதிகாரணே. கிஞ்செத்த² காரணங்? அபி⁴ஞ்ஞா வா அபி⁴ஞ்ஞாபாத³கஜ்ஜா²னங் வா, அவஸானே பன அரஹத்தங் வா காரணங் அரஹத்தஸ்ஸ விபஸ்ஸனா வாதி வேதி³தப்³ப³’’ந்தி வுத்தங்.
‘‘Sati satiāyataneti sati satikāraṇe. Kiñcettha kāraṇaṃ? Abhiññā vā abhiññāpādakajjhānaṃ vā, avasāne pana arahattaṃ vā kāraṇaṃ arahattassa vipassanā vāti veditabba’’nti vuttaṃ.
யஞ்ஹி தங் தத்ர தத்ர ஸக்கி²ப⁴ப்³ப³தாஸங்கா²தங் இத்³தி⁴வித⁴பச்சனுப⁴வனாதி³, தஸ்ஸ அபி⁴ஞ்ஞா காரணங் . அத² இத்³தி⁴வித⁴பச்சனுப⁴வனாதி³ அபி⁴ஞ்ஞா, ஏவங் ஸதி அபி⁴ஞ்ஞாபாத³கஜ்ஜா²னங் காரணங். அவஸானே ச²ட்டா²பி⁴ஞ்ஞாய பன அரஹத்தங், அரஹத்தஸ்ஸ விபஸ்ஸனா வா காரணங். அரஹத்தஞ்ஹி ‘‘குதா³ஸ்ஸு நாமாஹங் ததா³யதனங் உபஸம்பஜ்ஜ விஹரிஸ்ஸாமி, யத³ரியா ஏதரஹி உபஸம்பஜ்ஜ விஹரந்தீ’’தி (ம॰ நி॰ 1.465; 3.307) அனுத்தரேஸு விமொக்கே²ஸு பிஹங் உபட்ட²பெத்வா அபி⁴ஞ்ஞா நிப்³ப³த்தெந்தஸ்ஸ காரணங். இத³ஞ்ச ஸாதா⁴ரணங் ந ஹோதி, ஸாதா⁴ரணவஸேன பன அரஹத்தஸ்ஸ விபஸ்ஸனா காரணங். இமஸ்மிஞ்ஹி ஸுத்தே அரஹத்தப²லவஸேன ச²ட்டா²பி⁴ஞ்ஞா வுத்தா. தேனேவாஹ ‘‘ஆஸவானங் க²யாதிஆதி³ செத்த² ப²லஸமாபத்திவஸேன வுத்தந்தி வேதி³தப்³ப³’’ந்தி.
Yañhi taṃ tatra tatra sakkhibhabbatāsaṅkhātaṃ iddhividhapaccanubhavanādi, tassa abhiññā kāraṇaṃ . Atha iddhividhapaccanubhavanādi abhiññā, evaṃ sati abhiññāpādakajjhānaṃ kāraṇaṃ. Avasāne chaṭṭhābhiññāya pana arahattaṃ, arahattassa vipassanā vā kāraṇaṃ. Arahattañhi ‘‘kudāssu nāmāhaṃ tadāyatanaṃ upasampajja viharissāmi, yadariyā etarahi upasampajja viharantī’’ti (ma. ni. 1.465; 3.307) anuttaresu vimokkhesu pihaṃ upaṭṭhapetvā abhiññā nibbattentassa kāraṇaṃ. Idañca sādhāraṇaṃ na hoti, sādhāraṇavasena pana arahattassa vipassanā kāraṇaṃ. Imasmiñhi sutte arahattaphalavasena chaṭṭhābhiññā vuttā. Tenevāha ‘‘āsavānaṃ khayātiādi cettha phalasamāpattivasena vuttanti veditabba’’nti.
பங்ஸுதோ⁴வகஸுத்தவண்ணனா நிட்டி²தா.
Paṃsudhovakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. பங்ஸுதோ⁴வகஸுத்தங் • 10. Paṃsudhovakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. பங்ஸுதோ⁴வகஸுத்தவண்ணனா • 10. Paṃsudhovakasuttavaṇṇanā
