| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১০. পংসুধোৰকসুত্তৰণ্ণনা
10. Paṃsudhovakasuttavaṇṇanā
১০২. দসমে অনীহতদোসন্তি অনপনীতথূলকাল়কং। অনপনীতকসাৰন্তি অনপগতসুখুমকাল়কং। পহটমত্তন্তি আহটমত্তং।
102. Dasame anīhatadosanti anapanītathūlakāḷakaṃ. Anapanītakasāvanti anapagatasukhumakāḷakaṃ. Pahaṭamattanti āhaṭamattaṃ.
দসকুসলকম্মপথৰসেন উপ্পন্নং চিত্তং চিত্তমেৰ, ৰিপস্সনাপাদকঅট্ঠসমাপত্তিচিত্তং ৰিপস্সনাচিত্তঞ্চ ততো চিত্ততো অধিকং চিত্তন্তি অধিচিত্তন্তি আহ ‘‘অধিচিত্তন্তি সমথৰিপস্সনাচিত্ত’’ন্তি। অনুযুত্তস্সাতি অনুপ্পন্নস্স উপ্পাদনৰসেন উপ্পন্নস্স পটিব্রূহনৰসেন অনু অনু যুত্তস্স, তত্থ যুত্তপ্পযুত্তস্সাতি অত্থো। এত্থ চ পুরেভত্তং পিণ্ডায চরিত্ৰা পচ্ছাভত্তং পিণ্ডপাতপ্পটিক্কন্তো নিসীদনং আদায ‘‘অসুকস্মিং রুক্খমূলে ৰা ৰনসণ্ডে ৰা পব্ভারে ৰা সমণধম্মং করিস্সামী’’তি নিক্খমন্তোপি তত্থ গন্ত্ৰা হত্থেহি ৰা পাদেহি ৰা নিসজ্জট্ঠানতো তিণপণ্ণানি অপনেন্তোপি অধিচিত্তং অনুযুত্তোযেৰ। নিসীদিত্ৰা পন হত্থপাদে ধোৰিত্ৰা মূলকম্মট্ঠানং গহেত্ৰা ভাৰনং অনুযুঞ্জন্তো ভাৰনায অপ্পনং অপ্পত্তাযপি অধিচিত্তমনুযুত্তোযেৰ তদত্থেনপি তংসদ্দৰোহারতো। চিত্তসম্পন্নোতি ধম্মচিত্তস্স সমন্নাগতত্তা সম্পন্নচিত্তো। পণ্ডিতজাতিকোতি পণ্ডিতসভাৰো।
Dasakusalakammapathavasena uppannaṃ cittaṃ cittameva, vipassanāpādakaaṭṭhasamāpatticittaṃ vipassanācittañca tato cittato adhikaṃ cittanti adhicittanti āha ‘‘adhicittanti samathavipassanācitta’’nti. Anuyuttassāti anuppannassa uppādanavasena uppannassa paṭibrūhanavasena anu anu yuttassa, tattha yuttappayuttassāti attho. Ettha ca purebhattaṃ piṇḍāya caritvā pacchābhattaṃ piṇḍapātappaṭikkanto nisīdanaṃ ādāya ‘‘asukasmiṃ rukkhamūle vā vanasaṇḍe vā pabbhāre vā samaṇadhammaṃ karissāmī’’ti nikkhamantopi tattha gantvā hatthehi vā pādehi vā nisajjaṭṭhānato tiṇapaṇṇāni apanentopi adhicittaṃ anuyuttoyeva. Nisīditvā pana hatthapāde dhovitvā mūlakammaṭṭhānaṃ gahetvā bhāvanaṃ anuyuñjanto bhāvanāya appanaṃ appattāyapi adhicittamanuyuttoyeva tadatthenapi taṃsaddavohārato. Cittasampannoti dhammacittassa samannāgatattā sampannacitto. Paṇḍitajātikoti paṇḍitasabhāvo.
কামে আরব্ভাতি ৰত্থুকামে আরব্ভ। কামরাগসঙ্খাতেন ৰা কামেন পটিসংযুত্তো ৰিতক্কো কামৰিতক্কো। ব্যাপজ্জতি চিত্তং এতেনাতি ব্যাপাদো, দোসো। ৰিহিংসন্তি এতায সত্তে, ৰিহিংসনং ৰা তেসং এতন্তি ৰিহিংসা, পরেসং ৰিহেঠনাকারেন পৰত্তস্স করুণাপটিপক্খস্স পাপধম্মস্সেতং অধিৰচনং। ঞাতকে আরব্ভ উপ্পন্নো ৰিতক্কোতি ঞাতকে আরব্ভ গেহস্সিতপেমৰসেন উপ্পন্নো ৰিতক্কো। জনপদমারব্ভ উপ্পন্নো ৰিতক্কোতি এত্থাপি এসেৰ নযো। অহো ৰত মং…পে॰… উপ্পন্নো ৰিতক্কোতি ‘‘অহো ৰত মং পরে ন অৰজানেয্যুং, ন হেট্ঠা কত্ৰা মঞ্ঞেয্যুং, পাসাণচ্ছত্তং ৰিয গরুং করেয্যু’’ন্তি এৰং উপ্পন্নৰিতক্কো। দসৰিপস্সনুপক্কিলেসৰিতক্কাতি ওভাসাদিদসৰিপস্সনুপক্কিলেসে আরব্ভ উপ্পন্নৰিতক্কা।
Kāme ārabbhāti vatthukāme ārabbha. Kāmarāgasaṅkhātena vā kāmena paṭisaṃyutto vitakko kāmavitakko. Byāpajjati cittaṃ etenāti byāpādo, doso. Vihiṃsanti etāya satte, vihiṃsanaṃ vā tesaṃ etanti vihiṃsā, paresaṃ viheṭhanākārena pavattassa karuṇāpaṭipakkhassa pāpadhammassetaṃ adhivacanaṃ. Ñātake ārabbha uppanno vitakkoti ñātake ārabbha gehassitapemavasena uppanno vitakko. Janapadamārabbha uppanno vitakkoti etthāpi eseva nayo. Aho vata maṃ…pe… uppanno vitakkoti ‘‘aho vata maṃ pare na avajāneyyuṃ, na heṭṭhā katvā maññeyyuṃ, pāsāṇacchattaṃ viya garuṃ kareyyu’’nti evaṃ uppannavitakko. Dasavipassanupakkilesavitakkāti obhāsādidasavipassanupakkilese ārabbha uppannavitakkā.
অৰসিট্ঠা ধম্মৰিতক্কা এতস্সাতি অৰসিট্ঠধম্মৰিতক্কো, ৰিপস্সনাসমাধি। ন একগ্গভাৰপ্পত্তো ন একগ্গতং পত্তো। একং উদেতীতি হি একোদি, পটিপক্খেহি অনভিভূতত্তা অগ্গং সেট্ঠং হুত্ৰা উদেতীতি অত্থো। সেট্ঠোপি হি লোকে একোতি ৰুচ্চতি, একস্মিং আরম্মণে সমাধানৰসেন পৰত্তচিত্তস্সেতং অধিৰচনং। একোদিস্স ভাৰো একোদিভাৰো, একগ্গতাযেতং অধিৰচনং।
Avasiṭṭhā dhammavitakkā etassāti avasiṭṭhadhammavitakko, vipassanāsamādhi. Na ekaggabhāvappatto na ekaggataṃ patto. Ekaṃ udetīti hi ekodi, paṭipakkhehi anabhibhūtattā aggaṃ seṭṭhaṃ hutvā udetīti attho. Seṭṭhopi hi loke ekoti vuccati, ekasmiṃ ārammaṇe samādhānavasena pavattacittassetaṃ adhivacanaṃ. Ekodissa bhāvo ekodibhāvo, ekaggatāyetaṃ adhivacanaṃ.
নিযকজ্ঝত্তন্তি অত্তসন্তানস্সেতং অধিৰচনং। গোচরজ্ঝত্তন্তি ইধ নিব্বানং অধিপ্পেতং। তেনাহ ‘‘একস্মিং নিব্বানগোচরেযেৰ তিট্ঠতী’’তি। সুট্ঠু নিসীদতীতি সমাধিপটিপক্খে কিলেসে সন্নিসীদেন্তো সুট্ঠু নিসীদতি। একগ্গং হোতীতি অব্যগ্গভাৰপ্পত্তিযা একগ্গং হোতি। সম্মা আধিযতীতি যথা আরম্মণে সুট্ঠু অপ্পিতং হোতি, এৰং সম্মা সম্মদেৰ আধিযতি।
Niyakajjhattanti attasantānassetaṃ adhivacanaṃ. Gocarajjhattanti idha nibbānaṃ adhippetaṃ. Tenāha ‘‘ekasmiṃ nibbānagocareyeva tiṭṭhatī’’ti. Suṭṭhu nisīdatīti samādhipaṭipakkhe kilese sannisīdento suṭṭhu nisīdati. Ekaggaṃ hotīti abyaggabhāvappattiyā ekaggaṃ hoti. Sammā ādhiyatīti yathā ārammaṇe suṭṭhu appitaṃ hoti, evaṃ sammā sammadeva ādhiyati.
অভিঞ্ঞা সচ্ছিকরণীযস্সাতি এত্থ ‘‘অভিঞ্ঞায সচ্ছিকরণীযস্সা’’তি ৰত্তব্বে ‘‘অভিঞ্ঞা’’তি য-কারলোপেন পন পুন কালকিরিযানিদ্দেসো কতোতি আহ ‘‘অভিজানিত্ৰা পচ্চক্খং কাতব্বস্সা’’তি। অভিঞ্ঞায ইদ্ধিৰিধাদিঞাণেন সচ্ছিকিরিযং ইদ্ধিৰিধপচ্চনুভৰনাদিকং অভিঞ্ঞাসচ্ছিকরণীযন্তি এৰং ৰা এত্থ অত্থো দট্ঠব্বো। সক্খিভব্বতং পাপুণাতীতি এত্থ পন যস্স পচ্চক্খং অত্থি, সো সক্খী, সক্খিনো ভব্বতা সক্খিভব্বতা, সক্খিভৰনন্তি ৰুত্তং হোতি। সক্খী চ সো ভব্বো চাতি সক্খিভব্বো। অযঞ্হি ইদ্ধিৰিধাদীনং ভব্বো তত্থ চ সক্খীতি সক্খিভব্বো, তস্স ভাৰো সক্খিভব্বতা, তং পাপুণাতীতি অত্থো।
Abhiññāsacchikaraṇīyassāti ettha ‘‘abhiññāya sacchikaraṇīyassā’’ti vattabbe ‘‘abhiññā’’ti ya-kāralopena pana puna kālakiriyāniddeso katoti āha ‘‘abhijānitvā paccakkhaṃ kātabbassā’’ti. Abhiññāya iddhividhādiñāṇena sacchikiriyaṃ iddhividhapaccanubhavanādikaṃ abhiññāsacchikaraṇīyanti evaṃ vā ettha attho daṭṭhabbo. Sakkhibhabbataṃ pāpuṇātīti ettha pana yassa paccakkhaṃ atthi, so sakkhī, sakkhino bhabbatā sakkhibhabbatā, sakkhibhavananti vuttaṃ hoti. Sakkhī ca so bhabbo cāti sakkhibhabbo. Ayañhi iddhividhādīnaṃ bhabbo tattha ca sakkhīti sakkhibhabbo, tassa bhāvo sakkhibhabbatā, taṃ pāpuṇātīti attho.
অভিঞ্ঞাপাদকজ্ঝানাদিভেদেতি এত্থ অভিঞ্ঞাপাদা চ অভিঞ্ঞাপাদকজ্ঝানঞ্চ অভিঞ্ঞাপাদকজ্ঝানানি। আদি-সদ্দেন অরহত্তঞ্চ অরহত্তস্স ৰিপস্সনা চ সঙ্গহিতাতি দট্ঠব্বং। তেনেৰ মজ্ঝিমনিকাযট্ঠকথাযং (ম॰ নি॰ অট্ঠ॰ ২.১৯৮) –
Abhiññāpādakajjhānādibhedeti ettha abhiññāpādā ca abhiññāpādakajjhānañca abhiññāpādakajjhānāni. Ādi-saddena arahattañca arahattassa vipassanā ca saṅgahitāti daṭṭhabbaṃ. Teneva majjhimanikāyaṭṭhakathāyaṃ (ma. ni. aṭṭha. 2.198) –
‘‘সতি সতিআযতনেতি সতি সতিকারণে। কিঞ্চেত্থ কারণং? অভিঞ্ঞা ৰা অভিঞ্ঞাপাদকজ্ঝানং ৰা, অৰসানে পন অরহত্তং ৰা কারণং অরহত্তস্স ৰিপস্সনা ৰাতি ৰেদিতব্ব’’ন্তি ৰুত্তং।
‘‘Sati satiāyataneti sati satikāraṇe. Kiñcettha kāraṇaṃ? Abhiññā vā abhiññāpādakajjhānaṃ vā, avasāne pana arahattaṃ vā kāraṇaṃ arahattassa vipassanā vāti veditabba’’nti vuttaṃ.
যঞ্হি তং তত্র তত্র সক্খিভব্বতাসঙ্খাতং ইদ্ধিৰিধপচ্চনুভৰনাদি, তস্স অভিঞ্ঞা কারণং । অথ ইদ্ধিৰিধপচ্চনুভৰনাদি অভিঞ্ঞা, এৰং সতি অভিঞ্ঞাপাদকজ্ঝানং কারণং। অৰসানে ছট্ঠাভিঞ্ঞায পন অরহত্তং, অরহত্তস্স ৰিপস্সনা ৰা কারণং। অরহত্তঞ্হি ‘‘কুদাস্সু নামাহং তদাযতনং উপসম্পজ্জ ৰিহরিস্সামি, যদরিযা এতরহি উপসম্পজ্জ ৰিহরন্তী’’তি (ম॰ নি॰ ১.৪৬৫; ৩.৩০৭) অনুত্তরেসু ৰিমোক্খেসু পিহং উপট্ঠপেত্ৰা অভিঞ্ঞা নিব্বত্তেন্তস্স কারণং। ইদঞ্চ সাধারণং ন হোতি, সাধারণৰসেন পন অরহত্তস্স ৰিপস্সনা কারণং। ইমস্মিঞ্হি সুত্তে অরহত্তফলৰসেন ছট্ঠাভিঞ্ঞা ৰুত্তা। তেনেৰাহ ‘‘আসৰানং খযাতিআদি চেত্থ ফলসমাপত্তিৰসেন ৰুত্তন্তি ৰেদিতব্ব’’ন্তি।
Yañhi taṃ tatra tatra sakkhibhabbatāsaṅkhātaṃ iddhividhapaccanubhavanādi, tassa abhiññā kāraṇaṃ . Atha iddhividhapaccanubhavanādi abhiññā, evaṃ sati abhiññāpādakajjhānaṃ kāraṇaṃ. Avasāne chaṭṭhābhiññāya pana arahattaṃ, arahattassa vipassanā vā kāraṇaṃ. Arahattañhi ‘‘kudāssu nāmāhaṃ tadāyatanaṃ upasampajja viharissāmi, yadariyā etarahi upasampajja viharantī’’ti (ma. ni. 1.465; 3.307) anuttaresu vimokkhesu pihaṃ upaṭṭhapetvā abhiññā nibbattentassa kāraṇaṃ. Idañca sādhāraṇaṃ na hoti, sādhāraṇavasena pana arahattassa vipassanā kāraṇaṃ. Imasmiñhi sutte arahattaphalavasena chaṭṭhābhiññā vuttā. Tenevāha ‘‘āsavānaṃ khayātiādi cettha phalasamāpattivasena vuttanti veditabba’’nti.
পংসুধোৰকসুত্তৰণ্ণনা নিট্ঠিতা।
Paṃsudhovakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. পংসুধোৰকসুত্তং • 10. Paṃsudhovakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. পংসুধোৰকসুত্তৰণ্ণনা • 10. Paṃsudhovakasuttavaṇṇanā
