| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੧੦. ਪਂਸੁਧੋવਕਸੁਤ੍ਤવਣ੍ਣਨਾ
10. Paṃsudhovakasuttavaṇṇanā
੧੦੨. ਦਸਮੇ ਅਨੀਹਤਦੋਸਨ੍ਤਿ ਅਨਪਨੀਤਥੂਲਕਾਲ਼ਕਂ। ਅਨਪਨੀਤਕਸਾવਨ੍ਤਿ ਅਨਪਗਤਸੁਖੁਮਕਾਲ਼ਕਂ। ਪਹਟਮਤ੍ਤਨ੍ਤਿ ਆਹਟਮਤ੍ਤਂ।
102. Dasame anīhatadosanti anapanītathūlakāḷakaṃ. Anapanītakasāvanti anapagatasukhumakāḷakaṃ. Pahaṭamattanti āhaṭamattaṃ.
ਦਸਕੁਸਲਕਮ੍ਮਪਥવਸੇਨ ਉਪ੍ਪਨ੍ਨਂ ਚਿਤ੍ਤਂ ਚਿਤ੍ਤਮੇવ, વਿਪਸ੍ਸਨਾਪਾਦਕਅਟ੍ਠਸਮਾਪਤ੍ਤਿਚਿਤ੍ਤਂ વਿਪਸ੍ਸਨਾਚਿਤ੍ਤਞ੍ਚ ਤਤੋ ਚਿਤ੍ਤਤੋ ਅਧਿਕਂ ਚਿਤ੍ਤਨ੍ਤਿ ਅਧਿਚਿਤ੍ਤਨ੍ਤਿ ਆਹ ‘‘ਅਧਿਚਿਤ੍ਤਨ੍ਤਿ ਸਮਥવਿਪਸ੍ਸਨਾਚਿਤ੍ਤ’’ਨ੍ਤਿ। ਅਨੁਯੁਤ੍ਤਸ੍ਸਾਤਿ ਅਨੁਪ੍ਪਨ੍ਨਸ੍ਸ ਉਪ੍ਪਾਦਨવਸੇਨ ਉਪ੍ਪਨ੍ਨਸ੍ਸ ਪਟਿਬ੍ਰੂਹਨવਸੇਨ ਅਨੁ ਅਨੁ ਯੁਤ੍ਤਸ੍ਸ, ਤਤ੍ਥ ਯੁਤ੍ਤਪ੍ਪਯੁਤ੍ਤਸ੍ਸਾਤਿ ਅਤ੍ਥੋ। ਏਤ੍ਥ ਚ ਪੁਰੇਭਤ੍ਤਂ ਪਿਣ੍ਡਾਯ ਚਰਿਤ੍વਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਨਿਸੀਦਨਂ ਆਦਾਯ ‘‘ਅਸੁਕਸ੍ਮਿਂ ਰੁਕ੍ਖਮੂਲੇ વਾ વਨਸਣ੍ਡੇ વਾ ਪਬ੍ਭਾਰੇ વਾ ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਨਿਕ੍ਖਮਨ੍ਤੋਪਿ ਤਤ੍ਥ ਗਨ੍ਤ੍વਾ ਹਤ੍ਥੇਹਿ વਾ ਪਾਦੇਹਿ વਾ ਨਿਸਜ੍ਜਟ੍ਠਾਨਤੋ ਤਿਣਪਣ੍ਣਾਨਿ ਅਪਨੇਨ੍ਤੋਪਿ ਅਧਿਚਿਤ੍ਤਂ ਅਨੁਯੁਤ੍ਤੋਯੇવ। ਨਿਸੀਦਿਤ੍વਾ ਪਨ ਹਤ੍ਥਪਾਦੇ ਧੋવਿਤ੍વਾ ਮੂਲਕਮ੍ਮਟ੍ਠਾਨਂ ਗਹੇਤ੍વਾ ਭਾવਨਂ ਅਨੁਯੁਞ੍ਜਨ੍ਤੋ ਭਾવਨਾਯ ਅਪ੍ਪਨਂ ਅਪ੍ਪਤ੍ਤਾਯਪਿ ਅਧਿਚਿਤ੍ਤਮਨੁਯੁਤ੍ਤੋਯੇવ ਤਦਤ੍ਥੇਨਪਿ ਤਂਸਦ੍ਦવੋਹਾਰਤੋ। ਚਿਤ੍ਤਸਮ੍ਪਨ੍ਨੋਤਿ ਧਮ੍ਮਚਿਤ੍ਤਸ੍ਸ ਸਮਨ੍ਨਾਗਤਤ੍ਤਾ ਸਮ੍ਪਨ੍ਨਚਿਤ੍ਤੋ। ਪਣ੍ਡਿਤਜਾਤਿਕੋਤਿ ਪਣ੍ਡਿਤਸਭਾવੋ।
Dasakusalakammapathavasena uppannaṃ cittaṃ cittameva, vipassanāpādakaaṭṭhasamāpatticittaṃ vipassanācittañca tato cittato adhikaṃ cittanti adhicittanti āha ‘‘adhicittanti samathavipassanācitta’’nti. Anuyuttassāti anuppannassa uppādanavasena uppannassa paṭibrūhanavasena anu anu yuttassa, tattha yuttappayuttassāti attho. Ettha ca purebhattaṃ piṇḍāya caritvā pacchābhattaṃ piṇḍapātappaṭikkanto nisīdanaṃ ādāya ‘‘asukasmiṃ rukkhamūle vā vanasaṇḍe vā pabbhāre vā samaṇadhammaṃ karissāmī’’ti nikkhamantopi tattha gantvā hatthehi vā pādehi vā nisajjaṭṭhānato tiṇapaṇṇāni apanentopi adhicittaṃ anuyuttoyeva. Nisīditvā pana hatthapāde dhovitvā mūlakammaṭṭhānaṃ gahetvā bhāvanaṃ anuyuñjanto bhāvanāya appanaṃ appattāyapi adhicittamanuyuttoyeva tadatthenapi taṃsaddavohārato. Cittasampannoti dhammacittassa samannāgatattā sampannacitto. Paṇḍitajātikoti paṇḍitasabhāvo.
ਕਾਮੇ ਆਰਬ੍ਭਾਤਿ વਤ੍ਥੁਕਾਮੇ ਆਰਬ੍ਭ। ਕਾਮਰਾਗਸਙ੍ਖਾਤੇਨ વਾ ਕਾਮੇਨ ਪਟਿਸਂਯੁਤ੍ਤੋ વਿਤਕ੍ਕੋ ਕਾਮવਿਤਕ੍ਕੋ। ਬ੍ਯਾਪਜ੍ਜਤਿ ਚਿਤ੍ਤਂ ਏਤੇਨਾਤਿ ਬ੍ਯਾਪਾਦੋ, ਦੋਸੋ। વਿਹਿਂਸਨ੍ਤਿ ਏਤਾਯ ਸਤ੍ਤੇ, વਿਹਿਂਸਨਂ વਾ ਤੇਸਂ ਏਤਨ੍ਤਿ વਿਹਿਂਸਾ, ਪਰੇਸਂ વਿਹੇਠਨਾਕਾਰੇਨ ਪવਤ੍ਤਸ੍ਸ ਕਰੁਣਾਪਟਿਪਕ੍ਖਸ੍ਸ ਪਾਪਧਮ੍ਮਸ੍ਸੇਤਂ ਅਧਿવਚਨਂ। ਞਾਤਕੇ ਆਰਬ੍ਭ ਉਪ੍ਪਨ੍ਨੋ વਿਤਕ੍ਕੋਤਿ ਞਾਤਕੇ ਆਰਬ੍ਭ ਗੇਹਸ੍ਸਿਤਪੇਮવਸੇਨ ਉਪ੍ਪਨ੍ਨੋ વਿਤਕ੍ਕੋ। ਜਨਪਦਮਾਰਬ੍ਭ ਉਪ੍ਪਨ੍ਨੋ વਿਤਕ੍ਕੋਤਿ ਏਤ੍ਥਾਪਿ ਏਸੇવ ਨਯੋ। ਅਹੋ વਤ ਮਂ…ਪੇ॰… ਉਪ੍ਪਨ੍ਨੋ વਿਤਕ੍ਕੋਤਿ ‘‘ਅਹੋ વਤ ਮਂ ਪਰੇ ਨ ਅવਜਾਨੇਯ੍ਯੁਂ, ਨ ਹੇਟ੍ਠਾ ਕਤ੍વਾ ਮਞ੍ਞੇਯ੍ਯੁਂ, ਪਾਸਾਣਚ੍ਛਤ੍ਤਂ વਿਯ ਗਰੁਂ ਕਰੇਯ੍ਯੁ’’ਨ੍ਤਿ ਏવਂ ਉਪ੍ਪਨ੍ਨવਿਤਕ੍ਕੋ। ਦਸવਿਪਸ੍ਸਨੁਪਕ੍ਕਿਲੇਸવਿਤਕ੍ਕਾਤਿ ਓਭਾਸਾਦਿਦਸવਿਪਸ੍ਸਨੁਪਕ੍ਕਿਲੇਸੇ ਆਰਬ੍ਭ ਉਪ੍ਪਨ੍ਨવਿਤਕ੍ਕਾ।
Kāme ārabbhāti vatthukāme ārabbha. Kāmarāgasaṅkhātena vā kāmena paṭisaṃyutto vitakko kāmavitakko. Byāpajjati cittaṃ etenāti byāpādo, doso. Vihiṃsanti etāya satte, vihiṃsanaṃ vā tesaṃ etanti vihiṃsā, paresaṃ viheṭhanākārena pavattassa karuṇāpaṭipakkhassa pāpadhammassetaṃ adhivacanaṃ. Ñātake ārabbha uppanno vitakkoti ñātake ārabbha gehassitapemavasena uppanno vitakko. Janapadamārabbha uppanno vitakkoti etthāpi eseva nayo. Aho vata maṃ…pe… uppanno vitakkoti ‘‘aho vata maṃ pare na avajāneyyuṃ, na heṭṭhā katvā maññeyyuṃ, pāsāṇacchattaṃ viya garuṃ kareyyu’’nti evaṃ uppannavitakko. Dasavipassanupakkilesavitakkāti obhāsādidasavipassanupakkilese ārabbha uppannavitakkā.
ਅવਸਿਟ੍ਠਾ ਧਮ੍ਮવਿਤਕ੍ਕਾ ਏਤਸ੍ਸਾਤਿ ਅવਸਿਟ੍ਠਧਮ੍ਮવਿਤਕ੍ਕੋ, વਿਪਸ੍ਸਨਾਸਮਾਧਿ। ਨ ਏਕਗ੍ਗਭਾવਪ੍ਪਤ੍ਤੋ ਨ ਏਕਗ੍ਗਤਂ ਪਤ੍ਤੋ। ਏਕਂ ਉਦੇਤੀਤਿ ਹਿ ਏਕੋਦਿ, ਪਟਿਪਕ੍ਖੇਹਿ ਅਨਭਿਭੂਤਤ੍ਤਾ ਅਗ੍ਗਂ ਸੇਟ੍ਠਂ ਹੁਤ੍વਾ ਉਦੇਤੀਤਿ ਅਤ੍ਥੋ। ਸੇਟ੍ਠੋਪਿ ਹਿ ਲੋਕੇ ਏਕੋਤਿ વੁਚ੍ਚਤਿ, ਏਕਸ੍ਮਿਂ ਆਰਮ੍ਮਣੇ ਸਮਾਧਾਨવਸੇਨ ਪવਤ੍ਤਚਿਤ੍ਤਸ੍ਸੇਤਂ ਅਧਿવਚਨਂ। ਏਕੋਦਿਸ੍ਸ ਭਾવੋ ਏਕੋਦਿਭਾવੋ, ਏਕਗ੍ਗਤਾਯੇਤਂ ਅਧਿવਚਨਂ।
Avasiṭṭhā dhammavitakkā etassāti avasiṭṭhadhammavitakko, vipassanāsamādhi. Na ekaggabhāvappatto na ekaggataṃ patto. Ekaṃ udetīti hi ekodi, paṭipakkhehi anabhibhūtattā aggaṃ seṭṭhaṃ hutvā udetīti attho. Seṭṭhopi hi loke ekoti vuccati, ekasmiṃ ārammaṇe samādhānavasena pavattacittassetaṃ adhivacanaṃ. Ekodissa bhāvo ekodibhāvo, ekaggatāyetaṃ adhivacanaṃ.
ਨਿਯਕਜ੍ਝਤ੍ਤਨ੍ਤਿ ਅਤ੍ਤਸਨ੍ਤਾਨਸ੍ਸੇਤਂ ਅਧਿવਚਨਂ। ਗੋਚਰਜ੍ਝਤ੍ਤਨ੍ਤਿ ਇਧ ਨਿਬ੍ਬਾਨਂ ਅਧਿਪ੍ਪੇਤਂ। ਤੇਨਾਹ ‘‘ਏਕਸ੍ਮਿਂ ਨਿਬ੍ਬਾਨਗੋਚਰੇਯੇવ ਤਿਟ੍ਠਤੀ’’ਤਿ। ਸੁਟ੍ਠੁ ਨਿਸੀਦਤੀਤਿ ਸਮਾਧਿਪਟਿਪਕ੍ਖੇ ਕਿਲੇਸੇ ਸਨ੍ਨਿਸੀਦੇਨ੍ਤੋ ਸੁਟ੍ਠੁ ਨਿਸੀਦਤਿ। ਏਕਗ੍ਗਂ ਹੋਤੀਤਿ ਅਬ੍ਯਗ੍ਗਭਾવਪ੍ਪਤ੍ਤਿਯਾ ਏਕਗ੍ਗਂ ਹੋਤਿ। ਸਮ੍ਮਾ ਆਧਿਯਤੀਤਿ ਯਥਾ ਆਰਮ੍ਮਣੇ ਸੁਟ੍ਠੁ ਅਪ੍ਪਿਤਂ ਹੋਤਿ, ਏવਂ ਸਮ੍ਮਾ ਸਮ੍ਮਦੇવ ਆਧਿਯਤਿ।
Niyakajjhattanti attasantānassetaṃ adhivacanaṃ. Gocarajjhattanti idha nibbānaṃ adhippetaṃ. Tenāha ‘‘ekasmiṃ nibbānagocareyeva tiṭṭhatī’’ti. Suṭṭhu nisīdatīti samādhipaṭipakkhe kilese sannisīdento suṭṭhu nisīdati. Ekaggaṃ hotīti abyaggabhāvappattiyā ekaggaṃ hoti. Sammā ādhiyatīti yathā ārammaṇe suṭṭhu appitaṃ hoti, evaṃ sammā sammadeva ādhiyati.
ਅਭਿਞ੍ਞਾ ਸਚ੍ਛਿਕਰਣੀਯਸ੍ਸਾਤਿ ਏਤ੍ਥ ‘‘ਅਭਿਞ੍ਞਾਯ ਸਚ੍ਛਿਕਰਣੀਯਸ੍ਸਾ’’ਤਿ વਤ੍ਤਬ੍ਬੇ ‘‘ਅਭਿਞ੍ਞਾ’’ਤਿ ਯ-ਕਾਰਲੋਪੇਨ ਪਨ ਪੁਨ ਕਾਲਕਿਰਿਯਾਨਿਦ੍ਦੇਸੋ ਕਤੋਤਿ ਆਹ ‘‘ਅਭਿਜਾਨਿਤ੍વਾ ਪਚ੍ਚਕ੍ਖਂ ਕਾਤਬ੍ਬਸ੍ਸਾ’’ਤਿ। ਅਭਿਞ੍ਞਾਯ ਇਦ੍ਧਿવਿਧਾਦਿਞਾਣੇਨ ਸਚ੍ਛਿਕਿਰਿਯਂ ਇਦ੍ਧਿવਿਧਪਚ੍ਚਨੁਭવਨਾਦਿਕਂ ਅਭਿਞ੍ਞਾਸਚ੍ਛਿਕਰਣੀਯਨ੍ਤਿ ਏવਂ વਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ। ਸਕ੍ਖਿਭਬ੍ਬਤਂ ਪਾਪੁਣਾਤੀਤਿ ਏਤ੍ਥ ਪਨ ਯਸ੍ਸ ਪਚ੍ਚਕ੍ਖਂ ਅਤ੍ਥਿ, ਸੋ ਸਕ੍ਖੀ, ਸਕ੍ਖਿਨੋ ਭਬ੍ਬਤਾ ਸਕ੍ਖਿਭਬ੍ਬਤਾ, ਸਕ੍ਖਿਭવਨਨ੍ਤਿ વੁਤ੍ਤਂ ਹੋਤਿ। ਸਕ੍ਖੀ ਚ ਸੋ ਭਬ੍ਬੋ ਚਾਤਿ ਸਕ੍ਖਿਭਬ੍ਬੋ। ਅਯਞ੍ਹਿ ਇਦ੍ਧਿવਿਧਾਦੀਨਂ ਭਬ੍ਬੋ ਤਤ੍ਥ ਚ ਸਕ੍ਖੀਤਿ ਸਕ੍ਖਿਭਬ੍ਬੋ, ਤਸ੍ਸ ਭਾવੋ ਸਕ੍ਖਿਭਬ੍ਬਤਾ, ਤਂ ਪਾਪੁਣਾਤੀਤਿ ਅਤ੍ਥੋ।
Abhiññāsacchikaraṇīyassāti ettha ‘‘abhiññāya sacchikaraṇīyassā’’ti vattabbe ‘‘abhiññā’’ti ya-kāralopena pana puna kālakiriyāniddeso katoti āha ‘‘abhijānitvā paccakkhaṃ kātabbassā’’ti. Abhiññāya iddhividhādiñāṇena sacchikiriyaṃ iddhividhapaccanubhavanādikaṃ abhiññāsacchikaraṇīyanti evaṃ vā ettha attho daṭṭhabbo. Sakkhibhabbataṃ pāpuṇātīti ettha pana yassa paccakkhaṃ atthi, so sakkhī, sakkhino bhabbatā sakkhibhabbatā, sakkhibhavananti vuttaṃ hoti. Sakkhī ca so bhabbo cāti sakkhibhabbo. Ayañhi iddhividhādīnaṃ bhabbo tattha ca sakkhīti sakkhibhabbo, tassa bhāvo sakkhibhabbatā, taṃ pāpuṇātīti attho.
ਅਭਿਞ੍ਞਾਪਾਦਕਜ੍ਝਾਨਾਦਿਭੇਦੇਤਿ ਏਤ੍ਥ ਅਭਿਞ੍ਞਾਪਾਦਾ ਚ ਅਭਿਞ੍ਞਾਪਾਦਕਜ੍ਝਾਨਞ੍ਚ ਅਭਿਞ੍ਞਾਪਾਦਕਜ੍ਝਾਨਾਨਿ। ਆਦਿ-ਸਦ੍ਦੇਨ ਅਰਹਤ੍ਤਞ੍ਚ ਅਰਹਤ੍ਤਸ੍ਸ વਿਪਸ੍ਸਨਾ ਚ ਸਙ੍ਗਹਿਤਾਤਿ ਦਟ੍ਠਬ੍ਬਂ। ਤੇਨੇવ ਮਜ੍ਝਿਮਨਿਕਾਯਟ੍ਠਕਥਾਯਂ (ਮ॰ ਨਿ॰ ਅਟ੍ਠ॰ ੨.੧੯੮) –
Abhiññāpādakajjhānādibhedeti ettha abhiññāpādā ca abhiññāpādakajjhānañca abhiññāpādakajjhānāni. Ādi-saddena arahattañca arahattassa vipassanā ca saṅgahitāti daṭṭhabbaṃ. Teneva majjhimanikāyaṭṭhakathāyaṃ (ma. ni. aṭṭha. 2.198) –
‘‘ਸਤਿ ਸਤਿਆਯਤਨੇਤਿ ਸਤਿ ਸਤਿਕਾਰਣੇ। ਕਿਞ੍ਚੇਤ੍ਥ ਕਾਰਣਂ? ਅਭਿਞ੍ਞਾ વਾ ਅਭਿਞ੍ਞਾਪਾਦਕਜ੍ਝਾਨਂ વਾ, ਅવਸਾਨੇ ਪਨ ਅਰਹਤ੍ਤਂ વਾ ਕਾਰਣਂ ਅਰਹਤ੍ਤਸ੍ਸ વਿਪਸ੍ਸਨਾ વਾਤਿ વੇਦਿਤਬ੍ਬ’’ਨ੍ਤਿ વੁਤ੍ਤਂ।
‘‘Sati satiāyataneti sati satikāraṇe. Kiñcettha kāraṇaṃ? Abhiññā vā abhiññāpādakajjhānaṃ vā, avasāne pana arahattaṃ vā kāraṇaṃ arahattassa vipassanā vāti veditabba’’nti vuttaṃ.
ਯਞ੍ਹਿ ਤਂ ਤਤ੍ਰ ਤਤ੍ਰ ਸਕ੍ਖਿਭਬ੍ਬਤਾਸਙ੍ਖਾਤਂ ਇਦ੍ਧਿવਿਧਪਚ੍ਚਨੁਭવਨਾਦਿ, ਤਸ੍ਸ ਅਭਿਞ੍ਞਾ ਕਾਰਣਂ । ਅਥ ਇਦ੍ਧਿવਿਧਪਚ੍ਚਨੁਭવਨਾਦਿ ਅਭਿਞ੍ਞਾ, ਏવਂ ਸਤਿ ਅਭਿਞ੍ਞਾਪਾਦਕਜ੍ਝਾਨਂ ਕਾਰਣਂ। ਅવਸਾਨੇ ਛਟ੍ਠਾਭਿਞ੍ਞਾਯ ਪਨ ਅਰਹਤ੍ਤਂ, ਅਰਹਤ੍ਤਸ੍ਸ વਿਪਸ੍ਸਨਾ વਾ ਕਾਰਣਂ। ਅਰਹਤ੍ਤਞ੍ਹਿ ‘‘ਕੁਦਾਸ੍ਸੁ ਨਾਮਾਹਂ ਤਦਾਯਤਨਂ ਉਪਸਮ੍ਪਜ੍ਜ વਿਹਰਿਸ੍ਸਾਮਿ, ਯਦਰਿਯਾ ਏਤਰਹਿ ਉਪਸਮ੍ਪਜ੍ਜ વਿਹਰਨ੍ਤੀ’’ਤਿ (ਮ॰ ਨਿ॰ ੧.੪੬੫; ੩.੩੦੭) ਅਨੁਤ੍ਤਰੇਸੁ વਿਮੋਕ੍ਖੇਸੁ ਪਿਹਂ ਉਪਟ੍ਠਪੇਤ੍વਾ ਅਭਿਞ੍ਞਾ ਨਿਬ੍ਬਤ੍ਤੇਨ੍ਤਸ੍ਸ ਕਾਰਣਂ। ਇਦਞ੍ਚ ਸਾਧਾਰਣਂ ਨ ਹੋਤਿ, ਸਾਧਾਰਣવਸੇਨ ਪਨ ਅਰਹਤ੍ਤਸ੍ਸ વਿਪਸ੍ਸਨਾ ਕਾਰਣਂ। ਇਮਸ੍ਮਿਞ੍ਹਿ ਸੁਤ੍ਤੇ ਅਰਹਤ੍ਤਫਲવਸੇਨ ਛਟ੍ਠਾਭਿਞ੍ਞਾ વੁਤ੍ਤਾ। ਤੇਨੇવਾਹ ‘‘ਆਸવਾਨਂ ਖਯਾਤਿਆਦਿ ਚੇਤ੍ਥ ਫਲਸਮਾਪਤ੍ਤਿવਸੇਨ વੁਤ੍ਤਨ੍ਤਿ વੇਦਿਤਬ੍ਬ’’ਨ੍ਤਿ।
Yañhi taṃ tatra tatra sakkhibhabbatāsaṅkhātaṃ iddhividhapaccanubhavanādi, tassa abhiññā kāraṇaṃ . Atha iddhividhapaccanubhavanādi abhiññā, evaṃ sati abhiññāpādakajjhānaṃ kāraṇaṃ. Avasāne chaṭṭhābhiññāya pana arahattaṃ, arahattassa vipassanā vā kāraṇaṃ. Arahattañhi ‘‘kudāssu nāmāhaṃ tadāyatanaṃ upasampajja viharissāmi, yadariyā etarahi upasampajja viharantī’’ti (ma. ni. 1.465; 3.307) anuttaresu vimokkhesu pihaṃ upaṭṭhapetvā abhiññā nibbattentassa kāraṇaṃ. Idañca sādhāraṇaṃ na hoti, sādhāraṇavasena pana arahattassa vipassanā kāraṇaṃ. Imasmiñhi sutte arahattaphalavasena chaṭṭhābhiññā vuttā. Tenevāha ‘‘āsavānaṃ khayātiādi cettha phalasamāpattivasena vuttanti veditabba’’nti.
ਪਂਸੁਧੋવਕਸੁਤ੍ਤવਣ੍ਣਨਾ ਨਿਟ੍ਠਿਤਾ।
Paṃsudhovakasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਪਂਸੁਧੋવਕਸੁਤ੍ਤਂ • 10. Paṃsudhovakasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੧੦. ਪਂਸੁਧੋવਕਸੁਤ੍ਤવਣ੍ਣਨਾ • 10. Paṃsudhovakasuttavaṇṇanā
