| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
49. பங்ஸுகூலவக்³கோ³
49. Paṃsukūlavaggo
1-10. பங்ஸுகூலஸஞ்ஞகத்தே²ரஅபதா³னாதி³வண்ணனா
1-10. Paṃsukūlasaññakattheraapadānādivaṇṇanā
ஏகூனபஞ்ஞாஸமவக்³கே³ பட²மாபதா³னங் ஸுவிஞ்ஞெய்யமேவ.
Ekūnapaññāsamavagge paṭhamāpadānaṃ suviññeyyameva.
14. து³தியாபதா³னே அதி⁴ச்சுப்பத்திகா பு³த்³தா⁴தி அதி⁴ச்சேன அகாரணேன உப்பத்திகா ஸயம்பூ⁴தா, அஞ்ஞேஹி தே³வப்³ரஹ்மமாராதீ³ஹி உபதே³ஸதா³யகேஹி ரஹிதா ஸயம்பூ⁴ஞாணேன உப்பன்னா ஜாதா பாதுபூ⁴தாதி அத்தோ².
14. Dutiyāpadāne adhiccuppattikā buddhāti adhiccena akāraṇena uppattikā sayambhūtā, aññehi devabrahmamārādīhi upadesadāyakehi rahitā sayambhūñāṇena uppannā jātā pātubhūtāti attho.
16. ஓது³ம்ப³ரிகபுப்ப²ங் வாதி உது³ம்ப³ரருக்கே² புப்ப²ங் து³ல்லப⁴ங் து³ல்லபு⁴ப்பத்திகங் இவ. சந்த³ம்ஹி ஸஸகங் யதா²தி சந்த³மண்ட³லே ஸஸலேகா²ய ரூபங் து³ல்லப⁴ங் யதா². வாயஸானங் யதா² கீ²ரந்தி காகானங் நிச்சங் ரத்திந்தி³வங் கு²த்³தா³பீளிதபா⁴வேன கீ²ரங் து³ல்லப⁴ங் யதா², ஏவங் து³ல்லப⁴ங் லோகனாயகங் சதுராஸங்க்²யெய்யங் வா அட்டா²ஸங்க்²யெய்யங் வா ஸோளஸாஸங்க்²யெய்யங் வா கப்பஸதஸஹஸ்ஸங் பாரமியோ பூரெத்வா பு³த்³த⁴பா⁴வதோ து³ல்லபோ⁴ லோகனாயகோதி அத்தோ².
16.Odumbarikapupphaṃ vāti udumbararukkhe pupphaṃ dullabhaṃ dullabhuppattikaṃ iva. Candamhi sasakaṃ yathāti candamaṇḍale sasalekhāya rūpaṃ dullabhaṃ yathā. Vāyasānaṃ yathā khīranti kākānaṃ niccaṃ rattindivaṃ khuddāpīḷitabhāvena khīraṃ dullabhaṃ yathā, evaṃ dullabhaṃ lokanāyakaṃ caturāsaṅkhyeyyaṃ vā aṭṭhāsaṅkhyeyyaṃ vā soḷasāsaṅkhyeyyaṃ vā kappasatasahassaṃ pāramiyo pūretvā buddhabhāvato dullabho lokanāyakoti attho.
30. ததியாபதா³னே மது⁴ங் பி⁴ஸேஹி ஸவதீதி பொக்க²ரமது⁴பது³மகேஸரேஹி ஸவதி பக்³க⁴ரதி. கீ²ரங் ஸப்பிங் முளாலிபீ⁴தி கீ²ரஞ்ச ஸப்பிரஸஞ்ச பது³மமுளாலேஹி ஸவதி பக்³க⁴ரதி. தஸ்மா தது³ப⁴யங் மம ஸந்தகங் பு³த்³தோ⁴ படிக்³க³ண்ஹதூதி அத்தோ².
30. Tatiyāpadāne madhuṃ bhisehi savatīti pokkharamadhupadumakesarehi savati paggharati. Khīraṃ sappiṃ muḷālibhīti khīrañca sappirasañca padumamuḷālehi savati paggharati. Tasmā tadubhayaṃ mama santakaṃ buddho paṭiggaṇhatūti attho.
சதுத்த²பஞ்சமச²ட்டா²பதா³னானி உத்தானானேவ.
Catutthapañcamachaṭṭhāpadānāni uttānāneva.
119. ஸத்தமாபதா³னே சத்தாலீஸதி³ஜாபி சாதி த்³விக்க²த்துங் ஜாதாதி தி³ஜா. குமாரவயே உட்டி²தத³ந்தானங் பதிதத்தா புன உட்டி²தத³ந்தா தி³ஜா, தே ச த³ந்தா. ப்³யாகரணஞ்ச ஹெட்டா² நிதா³னகதா²யங் வுத்தமேவ.
119. Sattamāpadāne cattālīsadijāpi cāti dvikkhattuṃ jātāti dijā. Kumāravaye uṭṭhitadantānaṃ patitattā puna uṭṭhitadantā dijā, te ca dantā. Byākaraṇañca heṭṭhā nidānakathāyaṃ vuttameva.
அட்ட²மாபதா³னங் உத்தானமேவாதி.
Aṭṭhamāpadānaṃ uttānamevāti.
171. நவமாபதா³னே ததா³ஹங் மாணவோ ஆஸிந்தி யதா³ ஸுமேத⁴பண்டி³தோ தீ³பங்கரப⁴க³வதோ ஸந்திகா ப்³யாகரணங் லபி⁴, ததா³ அஹங் மேகோ⁴ நாம ப்³ராஹ்மணமாணவோ ஹுத்வா ஸுமேத⁴தாபஸேன ஸஹ இஸிபப்³ப³ஜ்ஜங் பப்³ப³ஜித்வா ஸிக்கா²பதே³ஸு ஸிக்கி²தோ கேனசி பாபஸஹாயேன ஸங்ஸட்டோ² ஸங்ஸக்³க³தோ³ஸேன பாபவிதக்காதி³வஸங் க³தோ மாதுகா⁴தகம்மவஸேன நரகே அக்³கி³ஜாலாதி³து³க்க²மனுப⁴வித்வா ததோ சுதோ ஸமுத்³தே³ திமிங்க³லமஹாமச்சோ² ஹுத்வா நிப்³ப³த்தோ, ஸமுத்³த³மஜ்ஜே² க³ச்ச²ந்தங் மஹானாவங் கி³லிதுகாமோ க³தோ. தி³ஸ்வா மங் வாணிஜா பீ⁴தா ‘‘அஹோ கோ³தமோ ப⁴க³வா’’தி ஸத்³த³மகங்ஸு. அத² மஹாமச்சோ² புப்³ப³வாஸனாவஸேன பு³த்³த⁴கா³ரவங் உப்பாதெ³த்வா ததோ சுதோ ஸாவத்தி²யங் விப⁴வஸம்பன்னே ப்³ராஹ்மணகுலே நிப்³ப³த்தோ ஸத்³தோ⁴ பஸன்னோ ஸத்து² த⁴ம்மதே³ஸனங் ஸுத்வா பப்³ப³ஜித்வா ஸஹ படிஸம்பி⁴தா³ஹி அரஹத்தங் பாபுணித்வா தி³வஸஸ்ஸ திக்க²த்துங் உபட்டா²னங் க³ந்த்வா ஸரமானோ வந்த³தி. ததா³ ப⁴க³வா ‘‘சிரங் த⁴ம்மருசீ’’தி மங் ஆஹ.
171. Navamāpadāne tadāhaṃ māṇavo āsinti yadā sumedhapaṇḍito dīpaṅkarabhagavato santikā byākaraṇaṃ labhi, tadā ahaṃ megho nāma brāhmaṇamāṇavo hutvā sumedhatāpasena saha isipabbajjaṃ pabbajitvā sikkhāpadesu sikkhito kenaci pāpasahāyena saṃsaṭṭho saṃsaggadosena pāpavitakkādivasaṃ gato mātughātakammavasena narake aggijālādidukkhamanubhavitvā tato cuto samudde timiṅgalamahāmaccho hutvā nibbatto, samuddamajjhe gacchantaṃ mahānāvaṃ gilitukāmo gato. Disvā maṃ vāṇijā bhītā ‘‘aho gotamo bhagavā’’ti saddamakaṃsu. Atha mahāmaccho pubbavāsanāvasena buddhagāravaṃ uppādetvā tato cuto sāvatthiyaṃ vibhavasampanne brāhmaṇakule nibbatto saddho pasanno satthu dhammadesanaṃ sutvā pabbajitvā saha paṭisambhidāhi arahattaṃ pāpuṇitvā divasassa tikkhattuṃ upaṭṭhānaṃ gantvā saramāno vandati. Tadā bhagavā ‘‘ciraṃ dhammarucī’’ti maṃ āha.
184. அத² ஸோ தே²ரோ ‘‘ஸுசிரங் ஸதபுஞ்ஞலக்க²ண’’ந்திஆதீ³ஹி கா³தா²ஹி தோ²மேஸி. ப⁴ந்தே, ஸதபுஞ்ஞலக்க²ணத⁴ர கோ³தம. பதிபுப்³பே³ன விஸுத்³த⁴பச்சயந்தி புப்³பே³ தீ³பங்கரபாத³மூலே பரிபுண்ணபாரமீபச்சயஸம்பா⁴ரோ ஸுட்டு² சிரங் காலங் மயா ந தி³ட்டோ² அஸீதி அத்தோ². அஹமஜ்ஜஸுபெக்க²னந்தி அஜ்ஜ இமஸ்மிங் தி³வஸே அஹங் ஸுபெக்க²னங் ஸுந்த³ரத³ஸ்ஸனங், ஸுந்த³ரதி³ட்ட²ங் வா நிருபமங் விக்³க³ஹங் உபமாரஹிதஸரீரங் கோ³தமங் வத ஏகந்தேன பஸ்ஸாமி த³க்கா²மீதி அத்தோ².
184. Atha so thero ‘‘suciraṃ satapuññalakkhaṇa’’ntiādīhi gāthāhi thomesi. Bhante, satapuññalakkhaṇadhara gotama. Patipubbena visuddhapaccayanti pubbe dīpaṅkarapādamūle paripuṇṇapāramīpaccayasambhāro suṭṭhu ciraṃ kālaṃ mayā na diṭṭho asīti attho. Ahamajjasupekkhananti ajja imasmiṃ divase ahaṃ supekkhanaṃ sundaradassanaṃ, sundaradiṭṭhaṃ vā nirupamaṃ viggahaṃ upamārahitasarīraṃ gotamaṃ vata ekantena passāmi dakkhāmīti attho.
185-186. ஸுசிரங் விஹததமோ மயாதி விஸேஸேன ஹததமோ வித்³த⁴ங்ஸிதமோஹோ த்வங் மயாபி ஸுட்டு² சிரங் தோ²மிதோதி அத்தோ². ஸுசிரக்கே²ன நதீ³ விஸோஸிதாதி ஏஸா தண்ஹானதீ³ ஸுந்த³ரரக்கே²ன கோ³பனேன விஸேஸேன ஸோஸிதா, அப⁴ப்³பு³ப்பத்திகதா தயாதி அத்தோ². ஸுசிரங் அமலங் விஸோதி⁴தந்தி ஸுட்டு² சிரங் தீ³கே⁴ன அத்³து⁴னா அமலங் நிப்³பா³னங் விஸேஸேன ஸோதி⁴தங், ஸுட்டு² கதங் அதி⁴க³தங் தயாதி அத்தோ². நயனங் ஞாணமயங் மஹாமுனே. சிரகாலஸமங்கி³தோதி மஹாமுனே மஹாஸமண ஞாணமயங் நயனங் தி³ப்³ப³சக்கு²ங் சிரகாலங் ஸமதி⁴க³தோ ஸம்பத்தோ த்வந்தி அத்தோ². அவினட்டோ² புனரந்தரந்தி அஹங் புன அந்தரங் அந்தராப⁴வே மஜ்ஜே² பரினட்டோ² பரிஹீனோ அஹோஸிந்தி அத்தோ². புனரஜ்ஜஸமாக³தோ தயாதி அஜ்ஜ இமஸ்மிங் காலே தயா ஸத்³தி⁴ங் புனபி ஸமாக³தோ ஏகீபூ⁴தோ ஸஹ வஸாமீதி அத்தோ². ந ஹி நஸ்ஸந்தி கதானி கோ³தமாதி கோ³தம ஸப்³ப³ஞ்ஞுபு³த்³த⁴, தயா ஸத்³தி⁴ங் கதானி ஸமாக³மாதீ³னி ந ஹி நஸ்ஸந்தி யாவ க²ந்த⁴பரினிப்³பா³னா ந வினா ப⁴விஸ்ஸந்தீதி அத்தோ². ஸேஸங் உத்தானமேவாதி.
185-186.Suciraṃ vihatatamo mayāti visesena hatatamo viddhaṃsitamoho tvaṃ mayāpi suṭṭhu ciraṃ thomitoti attho. Sucirakkhena nadī visositāti esā taṇhānadī sundararakkhena gopanena visesena sositā, abhabbuppattikatā tayāti attho. Suciraṃ amalaṃ visodhitanti suṭṭhu ciraṃ dīghena addhunā amalaṃ nibbānaṃ visesena sodhitaṃ, suṭṭhu kataṃ adhigataṃ tayāti attho. Nayanaṃ ñāṇamayaṃ mahāmune. Cirakālasamaṅgitoti mahāmune mahāsamaṇa ñāṇamayaṃ nayanaṃ dibbacakkhuṃ cirakālaṃ samadhigato sampatto tvanti attho. Avinaṭṭho punarantaranti ahaṃ puna antaraṃ antarābhave majjhe parinaṭṭho parihīno ahosinti attho. Punarajjasamāgato tayāti ajja imasmiṃ kāle tayā saddhiṃ punapi samāgato ekībhūto saha vasāmīti attho. Na hi nassanti katāni gotamāti gotama sabbaññubuddha, tayā saddhiṃ katāni samāgamādīni na hi nassanti yāva khandhaparinibbānā na vinā bhavissantīti attho. Sesaṃ uttānamevāti.
த⁴ம்மருசியத்தே²ரஅபதா³னவண்ணனா ஸமத்தா.
Dhammaruciyattheraapadānavaṇṇanā samattā.
த³ஸமாபதா³னங் ஸுவிஞ்ஞெய்யமேவாதி.
Dasamāpadānaṃ suviññeyyamevāti.
ஏகூனபஞ்ஞாஸமவக்³க³வண்ணனா ஸமத்தா.
Ekūnapaññāsamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
2. பு³த்³த⁴ஸஞ்ஞகத்தே²ரஅபதா³னங் • 2. Buddhasaññakattheraapadānaṃ
3. பி⁴ஸதா³யகத்தே²ரஅபதா³னங் • 3. Bhisadāyakattheraapadānaṃ
7. புலினுப்பாத³கத்தே²ரஅபதா³னங் • 7. Pulinuppādakattheraapadānaṃ
9. த⁴ம்மருசியத்தே²ரஅபதா³னங் • 9. Dhammaruciyattheraapadānaṃ
