| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೪೯. ಪಂಸುಕೂಲವಗ್ಗೋ
49. Paṃsukūlavaggo
೧. ಪಂಸುಕೂಲಸಞ್ಞಕತ್ಥೇರಅಪದಾನಂ
1. Paṃsukūlasaññakattheraapadānaṃ
೧.
1.
‘‘ತಿಸ್ಸೋ ನಾಮಾಸಿ ಭಗವಾ, ಸಯಮ್ಭೂ ಅಗ್ಗಪುಗ್ಗಲೋ।
‘‘Tisso nāmāsi bhagavā, sayambhū aggapuggalo;
ಪಂಸುಕೂಲಂ ಠಪೇತ್ವಾನ, ವಿಹಾರಂ ಪಾವಿಸೀ ಜಿನೋ॥
Paṃsukūlaṃ ṭhapetvāna, vihāraṃ pāvisī jino.
೨.
2.
ಮಣ್ಡಲಗ್ಗಂ ಗಹೇತ್ವಾನ, ಕಾನನಂ ಪಾವಿಸಿಂ ಅಹಂ॥
Maṇḍalaggaṃ gahetvāna, kānanaṃ pāvisiṃ ahaṃ.
೩.
3.
‘‘ತತ್ಥದ್ದಸಂ ಪಂಸುಕೂಲಂ, ದುಮಗ್ಗೇ ಲಗ್ಗಿತಂ ತದಾ।
‘‘Tatthaddasaṃ paṃsukūlaṃ, dumagge laggitaṃ tadā;
ಚಾಪಂ ತತ್ಥೇವ ನಿಕ್ಖಿಪ್ಪ, ಸಿರೇ ಕತ್ವಾನ ಅಞ್ಜಲಿಂ॥
Cāpaṃ tattheva nikkhippa, sire katvāna añjaliṃ.
೪.
4.
‘‘ಪಸನ್ನಚಿತ್ತೋ ಸುಮನೋ, ವಿಪುಲಾಯ ಚ ಪೀತಿಯಾ।
‘‘Pasannacitto sumano, vipulāya ca pītiyā;
ಬುದ್ಧಸೇಟ್ಠಂ ಸರಿತ್ವಾನ, ಪಂಸುಕೂಲಂ ಅವನ್ದಹಂ॥
Buddhaseṭṭhaṃ saritvāna, paṃsukūlaṃ avandahaṃ.
೫.
5.
‘‘ದ್ವೇನವುತೇ ಇತೋ ಕಪ್ಪೇ, ಪಂಸುಕೂಲಮವನ್ದಹಂ।
‘‘Dvenavute ito kappe, paṃsukūlamavandahaṃ;
ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ॥
Duggatiṃ nābhijānāmi, vandanāya idaṃ phalaṃ.
೬.
6.
‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ।
‘‘Kilesā jhāpitā mayhaṃ, bhavā sabbe samūhatā;
ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ॥
Nāgova bandhanaṃ chetvā, viharāmi anāsavo.
೭.
7.
‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ।
‘‘Svāgataṃ vata me āsi, mama buddhassa santike;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ॥
Tisso vijjā anuppattā, kataṃ buddhassa sāsanaṃ.
೮.
8.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಪಂಸುಕೂಲಸಞ್ಞಕೋ ಥೇರೋ ಇಮಾ ಗಾಥಾಯೋ
Itthaṃ sudaṃ āyasmā paṃsukūlasaññako thero imā gāthāyo
ಅಭಾಸಿತ್ಥಾತಿ।
Abhāsitthāti.
ಪಂಸುಕೂಲಸಞ್ಞಕತ್ಥೇರಸ್ಸಾಪದಾನಂ ಪಠಮಂ।
Paṃsukūlasaññakattherassāpadānaṃ paṭhamaṃ.
Footnotes:
